1. ¿Imamantataj Jesús parlasqa wañupunanpaj chʼisillaña faltashajtin?

JESUSQA wañupunanpaj uj chʼisillaña faltashajtin munakuy palabrata casi 30 kutista oqharerqa. Payqa discipulosninman nerqa: “Purajmanta munanakuychej”, nispa (Juan 15:12, 17). Chantá nillarqataj: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:34, 35). Jesusqa mana nisharqachu simillamanta munanakunanchejta, manaqa wajkunata munakuspa allinninkuta maskʼanata. Jesús nerqa: “Mana pipis aswan munakuyniyojqa kanchu, amigosninrayku wañojmanta nisqaqa. Sichus kamachisqayta kasunkichej chayqa, amigosniy kankichej”, nispa (Juan 15:13, 14).

2. 1) ¿Diospa kamachisnin munanakunchejchu? 2) ¿Imatataj qhepan parrafospi yachakusunchej?

² Diospa kamachisnenqa rejsisqa kanchej sonqomantapacha munanakusqanchejrayku, ujchasqas kasqanchejraykutaj (1 Juan 3:10, 11). Noqanchejqa tukuy sonqo munanakunchej, maymanta kajtinchejpis, ima familiamanta kajtinchejpis, waj idiomata parlajtinchejpis, waj jinasmanta uywasqas kajtinchejpis. Qhepan parrafospitaj yachakusunchej imaraykuchus kay tiempopi munanakunanchejpuni kasqanta. Yachakullasuntaj  imaynatachus Jehová Dioswan Jesuswan kallpachawasqanchejta. Yachakullasuntaj imaynatachus wajkunata munakuywan sonqochanata, kallpachanatataj (1 Cor. 8:1).

3. ¿Imaynataj kay qhepa pʼunchaykunapi kausay?

³ Qhepa pʼunchaykunapi kausakusqanchejrayku, kausayninchejpi llakiylla, ñakʼariyllataj tiyan (Sal. 90:10; 2 Tim. 3:1-5). May chhika runastaj llakiypi rikukusqankurayku wañupullaytaña munanku. Chayrayku sapa wata 800.000 runaspuni wañuchikunku, nisunman sapa 40 segundos uj runa wañuchikun. Wakin hermanospis llakiywan atipachikuspa wañuchikullarqankutaj.

4. ¿Pikunataj wañupullaytaña munasqanku?

⁴ Unay tiempomanta Diospa kamachisninpis problemaspi rikukuspa wañupullaytaña munarqanku. Por ejemplo Jobqa, manchay llakisqa kashaspa jinata nerqa: “Manaña kayta atinichu, nitaj kawsaytapis munaniñachu”, nispa (Job 7:16; 14:13). Jonaspis manchay llakisqa kashaspa nerqa: “Tata Dios, mañakuyki wañuchinawaykita; allin kanman wañupunay kawsanaymantaqa”, nispa (Jon. 4:3). Profeta Eliaspis llakisqa kashaspa nerqa: “¡Señor Diosníy, kaykamallaña! Kawsayniyta qechupuway”, nispa (1 Rey. 19:4, Diospa Simin Qelqa, 2004). Chaywanpis Jehová Diosqa kamachisninta munakusqanrayku mana munarqachu wañupunankuta. Nitaj paykunata qhesacharqachu wañupullaytaña munasqankuta nejtinku. Astawanpis Jehová Diosqa paykunata munakuywan yanaparqa, payta tukuy sonqo sirvinallankupajpuni. 

5. ¿Imajtintaj wakin hermanos munakunanchejta, kallpachananchejtataj necesitanku?

⁵ May chhika hermanosninchejqa sapa día ashkha problemaspi rikukunku. Chayrayku necesitanku munakunanchejta, kallpachananchejtataj. Wakin hermanosninchejtaqa runas asipayanku, pʼenqaypitaj rikhurichinku. Wakintataj trabajonkupi llullasta parlaspa kʼumuykachachinku. Wakin hermanosninchejtaj saykʼusqas kashanku patronninku anchata trabajachisqankumanta. Wakinkunataj familiankupi jatuchaj problemasniyoj kanku. Ichapis uj hermanaj qosanqa mana Testigochu kanman, paytaj hermananchejta kʼumuykachachinman. Hermanosninchejqa chay jina problemaspi rikukusqankurayku manchay phutisqas, saykʼusqastaj kashanku, ni imapaj valesqankutataj yuyanku. Kunantaj pichus paykunata yanapayta atisqanta qhawarina.

6. ¿Imatataj Jehová Dios niwanchej?

⁶ Jehová Diosqa niwanchej mayta munakuwasqanchejta, munakunallawanchejtapunitaj. Payqa israelitasta munakusqanrayku nerqa: ‘Noqaj ñaupaqeypi may kʼacha, allintaj kanki, munakuykitaj. Ama manchachikuychu. Noqa qanwan kashani’, nispa (Isa. 43:4, 5). Amapuni qonqanachu Jehová Dios sapa ujninchejta munakuwasqanchejta. * Bibliaqa niwanchej: “Payqa atiyniyoj, salvasonqataj. Tata Diosqa kusikonqa qanmanta”, nispa (Sof. 3:16, 17).

7. ¿Imajtintaj nisunman Jehová Dios uj mama jina munakuwasqanchejta? (12 paginapi dibujota qhawariy).

⁷ Jehová Diosqa niwanchej ima problemapi rikukojtinchejpis kallpachanawanchejta, sonqochanawanchejtataj.  Bibliaqa niwanchej: “Qankunaqa ñuñoj wawas jina kusikunkichej, makisninwan marqʼarikusonqachej, arphin patapitaj chhukurisonqachej. Imaynatachus mamaqa wawanta sonqochan, ajinallatataj noqapis qankunataqa sonqochasqaykichej”, nispa (Isa. 66:12, 13). Uj mamaqa munakuywan ñuñoj wawitanta marqʼarikuspa cuidan. Ajinallatataj Jehová Diospis munakuywan cuidawanchej. Arí, Jehová Diosqa maytapuni munakuwanchej (Jer. 31:3).

8, 9. ¿Imaynatataj Cristoj munakuynin yanapawasunman?

⁸ Jehová Dios mayta munakuwasqanchejmanta Biblia jinata niwanchej: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Jesuspis mayta munakullawanchejtaj, chayrayku kausayninta noqanchejrayku qorqa. Bibliapis niwanchej ni ñakʼariypis, ni llakiypis Cristoj munakuyninmanta tʼaqanawanchejta (Rom. 8:35, 38, 39).

⁹ Problemasniyoj kaspaqa llakisqalla, sonqo pʼakisqallataj purinchej, Jehová Diostapis manaña kusisqachu sirvinchej. Chaywanpis ñaupajllamanpuni rinanchejpajqa Cristoj munakuynin yanapawasunchej (2 Corintios 5:14, 15 leey). Cristoj munakuynenqa Jehová Diosta yupaychanallapajpuni yanapawanchej. Yanapallawanchejtaj jatuchaj llakiykunapi rikukojtinchej, qhatiykachasqa kajtinchej, sonqo pʼakisqa kajtinchej mana saykʼupunanchejpaj.

10, 11. ¿Ancianosllachu llakisqa hermanosta sonqochananku kasqa?

¹⁰ Jehová Diosqa hermanosnejta kallpachallawanchejtaj. Hermanosninchejta munakuspaqa, Jehová Diosta munakusqanchejta rikuchinchej. Chantapis hermanosninchejta yanaparinchej Jehová Dios paykunata mayta munakusqanta reparanankupaj (1 Juan 4:19-21). Apóstol Pablo nerqa: “Qankunapura sonqochanakullaychejpuni, kallpachanakuychejtaj, imaynatachus ruwashankichej, ajinata”, nispa (1 Tes. 5:11). Hermanosninchejtaqa  mana ancianosllachu sonqochankuman, kallpachankumantaj. Manachayqa sapa ujninchej Jehová Dios jina, Jesús jinataj hermanosninchejta kallpachayta atinchej (Romanos 15:1, 2 leey).

¹¹ Wakin hermanosqa llakisqalla kasqankurayku chayri depresión onqoywan kasqankurayku uj sumaj doctorwan jampichikuyta necesitankuman (Luc. 5:31). Chaywanpis congregacionmanta ancianos, hermanos imaqa mana doctores kaspapis, llakisqa hermanosta sonqochankuman, yanapankumantaj. Chayrayku Biblia niwanchej llakisqa kajkunata sonqochananchejta, llauchhiyajkunata yanapananchejta, tukuypajtaj pacienciayoj kananchejta (1 Tes. 5:14). Llakisqa hermanospa lugarninkupi churakuna, ajinamanta paykunata pacienciawan, munakuywantaj sonqochayta atisunchej. Chayrayku piensarisunman imaynasmantachus hermanosninchejta sonqochayta, kallpachayta ima atisqanchejpi. 

12. ¿Imaynatataj uj hermanata congregacionninmanta hermanos yanapasqanku?

¹² Europamanta uj hermana nin: “Wakin kuteqa manaña kausayta munarqanichu. Pero congregacionniymanta hermanosqa mayta yanapawarqanku. Paykunaqa noqawan may kʼachas kanku, kallpachawankupunitaj. Depresión onqoywan kasqaytaqa wakin hermanoslla yachanku, chaywanpis hermanosqa yanapawankupuni. Congregacionniymanta uj qhariwarmeqa tatasniy jina kanku. Paykunaqa tuta pʼunchay cuidawanku, yanapawankutaj”, nispa. Llakisqa hermanosninchejtaqa mana tukuychu kikinta yanapayta atinchej. Chaywanpis sapa ujninchej atisqanchejman jina sinchʼi llakisqa hermanosninchejta sonqocharisunman, kallpacharisunmantaj. *

13. ¿Imatataj ruwasunman wajkunata sonqochanapaj?

¹³ Allinta uyariyta yachana (Sant. 1:19). Llakisqa hermanosta allinta uyarispaqa, paykunata munakusqanchejta rikuchinchej. Chantapis lugarninkupi churakusunman, imaynachus kashasqankutataj kʼachallamanta tapurisunman. Ajinamanta uyanchejpi yachakonqa paykunamanta llakikusqanchejta, paykunata munakusqanchejtapis. Jinamanta paykunaqa llakiyninkuta willarillawasunchej. Willariwajtinchejtaj paykunata sumajta uyarina, manataj pantachinachu. Chayta ruwajtinchejqa sonqocharishajtinchej uyarillawasunchej. Paykunataj sonqochakonqanku tukuy sonqo yanapayta munasqanchejta reparaspa.

14. ¿Imaraykutaj allinta yuyaycharikuspa parlananchej kasqa?

¹⁴ Ama wajkunaj contranpi parlanachu. Ama llakisqa hermanoj contranpi parlanachu, imajtinchus contranpi parlaspaqa sonqonta astawan nanachisunman, niñataj sonqochaytapis atisunmanchu. Bibliapis nin: “Imallatapis mana yuyaychakuspalla runaj parlarparisqanqa espada jina tʼojsin; yachayniyojkunaj parlasqasninkurí jampi jina sonqota thañichin”, nispa (Pro. 12:18). Hermanosninchejtaqa mana parlasqanchejwan  sonqonkuta nanachiyta munanchejchu. Chaywanpis mana allinta yuyaychakuspalla parlarparejtinchejqa sonqonkuta nanarpachisunman. Chayrayku kʼachamanta, munakuywantaj llakisqa hermanosninchejta kallpachanapajqa, imayna llakisqapunichus kashasqankuta entiendenapaj kallpachakuna (Mat. 7:12).

15. ¿Imawantaj hermanosta sonqocharisunman?

¹⁵ Diospa Palabranwan hermanosta sonqochana (Romanos 15:4, 5 leey). Bibliaqa Diospa Palabran kasqanrayku “sonqochawanchej, kallpachawanchejtaj sinchʼita sayanapaj”. Chayrayku hermanosninchejta wakin versiculoswan, wakin publicacioneswan ima mayta sonqochasunman. Chaykunata maskʼanapajtaj kay iskay yanapas tiyapuwanchej: Índice de las publicaciones Watch Tower nisqa libro chantá Jehovaj testigosnin yachaqanasta maskʼanankupaj nisqa libro.

16. ¿Kʼachas kaspa, khuyakoj kaspataj wajkunata kallpachasunmanchu?

¹⁶ Kʼachastaj khuyakuyniyojtaj kana. Jehová Diosqa kamachisninpaj “may khuyakuyniyoj Tata, tukuy imapi sonqochaj Diostaj” (2 Corintios 1:3-6 leey; Luc. 1:78; Rom. 15:13). Apóstol Pabloqa, Jehová Dios jinallataj wajkunata khuyakorqa. Chayrayku Pablo nerqa: “Astawanqa qankuna ukhupi may kʼachas karqayku, imaynatachus uj mama wawitanta ñuñuchin, munakuywantaj qhawan, ajinata. Qankunata may jinatapuni munakusqaykurayku, mana Diospa sumaj willaykunasnillantachu qankunaman rejsichiyta munayku, manaqa kausayniykutapis qankunata yanapanaykupaj qoyta munayku”, nispa (1 Tes. 2:7, 8). Llakisqa hermanonchejwan Jehová Dios jina kʼachas, khuyakuyniyojtaj kasunchej chayqa, chay hermanota sonqochayta atisunchej. Jinamantataj Jehová Dios chay hermanoj mañakusqanman kutichishanman.

17. ¿Imatataj hermanosninchejmanta mana suyanachu kasqa?

¹⁷ Ama suyanachu hermanosninchej ni imapi pantanankuta. Tukuypis pantanchejpuni pantaj runas kasqanchejrayku (Ecl. 7:21, 22). Chayrayku Jehová Diosqa maychus kajllata noqanchejmanta suyan. Noqanchejpis hermanosmanta maychus kajllata suyana, pacienciakunataj (Efe. 4:2, 32). Chayrayku hermanosninchejtaqa ama wajkunawan kikinchanachu, nitaj ninachu mana kallpachakushasqankuta. Astawanpis kallpacharina, sumajta ruwashasqankutataj nina. Kallpacharejtinchejqa kusisqa Jehová Diosta yupaychallanqankupuni (Gál. 6:4).

18. ¿Imaraykutaj hermanosninchejta munakunanchej kasqa?

¹⁸ Jehová Dioswan Jesuswanqa tukuyta munakuwanchej (Gál. 2:20). Noqanchejpis hermanosninchejta sonqomantapacha munakunchej. Chayrayku “tukuy imata ruwana wajkunawan allinpi kausakunapaj, jinallataj purajmanta kallpachanakunapajpis” (Rom. 14:19). Tukuypis mayta suyakushanchej paraisopi kausakullaytaña. Chaypeqa niña imapis llakichiwasunchu, nitaj onqosunchu, nitaj guerraspis kanqachu. Chantapis manaña wañusunchu, nitaj pipis qhatiykachawasunchu, familianchejpipis manaña chʼajwas kanqachu, nitaj wañuchikuytapis munasunchu. Waranqa watas pasajtintaj mana juchayoj runasman tukusunchej. Pruebaman churasqa kasqanchejtawantaj, Jehová Dios wawasninpaj rejsikapuwasunchej, juchamanta, wañuymantataj kacharichiwasunchej (Rom. 8:21). Chayrayku purajmanta munakuywan kallpachanakunallapuni. Ajinamanta paraisopi kausakusunchej.