MUNDONTINPI ancianosqa ruwanasninkuta kusiywan juntʼanku. Tukuyninchejtaj agradecesqas kashanchej ancianos yanapawasqanchejmanta. Chaywanpis pasaj watasllapi viejito ancianosta nikorqa wakin ruwanasninkuta joven ancianosman pasapunankuta.

Chayrayku congregacionesta waturej hermanos, Diospa llajtanpi kaj escuelaspi yachachej hermanospis 70 watasniyojña kaspa, ruwanasninkuta saqeporqanku. Chantapis sucursalespi coordinador jina llankʼaj ancianos, congregacionespi coordinador jina llankʼaj ancianospis 80 watasniyojña kaspa, ruwanasninkuta joven ancianosman pasaporqanku. Chay ancianosqa ruwanasninkuta saqepuspapis Jehová Diosmanta, llajtanmantapis mana karunchakorqankuchu.

Ken sutiyoj ancianomanta parlarina. Payqa uj sucursalpi coordinador jina casi 49 watasta sirvisqa. Pay nin: “Sucursalpi uj joven ancianota coordinadorta jina churanankuta yachaspaqa, may kusisqa kasharqani. Imajtinchus chay paqarin Jehová Diosman orakuspa nerqani: ‘Uj joven anciano coordinador kachun’, nispa”. Ajinallatataj tukuy viejito hermanospis ninku. Chaywanpis wakin viejito  ancianosqa ruwanasninkuta saqepunankuta yachaspa llakikunku. Imaraykuchus ruwanasninkuta ruwaspa may kusisqa kasharqanku.

Esperandio sutiyoj ancianomanta parlarina. Payqa congregacionpi coordinador jina sirvisqa. Ruwanasninta uj joven ancianoman saqepunanta yachaspa llakikusqa. Chaywanpis nisqa: “Cuidakunaypaj tiempota necesitasharqanipuni. Viejitoña kasqayrayku tukuy imaypis nanawan”, nispa. Kunantaj payqa Jehová Diosta tukuy sonqollapuni sirvishan, hermanostapis mayta yanapashan.

Unaytaña congregacionesta waturej hermanospis ruwanasninkuta saqepullarqankutaj. Hermanonchej Allanmanta parlarina. Payqa 38 watasta congregacionesta waturispa sirvisqa. Pay nin: “Manaña congregacionesta waturinayta yachaspa, titipacha qhepakorqani. Chaywanpis kusikorqani uj joven hermano congregacionesta waturinanta yachaspa. Imajtinchus jóvenes wakichisqa kanankoqa may sumajpuni”, nispa. Kunan payqa Diosta tukuy sonqollapuni sirvishan.

Hermanonchej Russellmantañataj parlarina. Payqa 40 watasta congregacionesta waturispa, Diospa llajtanpi kaj escuelaspi yachachispa ima sirvisqa. Pay nin: “Congregacionesta manaña waturinaykuta yachaspa señoraywan llakisqa kasharqayku. Imaraykuchus kusisqa congregacionesta waturikoj kayku, yuyarqaykutaj kallpayojraj kasqaykuta waturikunaykupaj”, nispa. Kunantaj paykunaqa tukuy experienciankuwan congregacionpi sumajta yanapakushanku. Hermanospis paykunawan kaspa mayta kusikunku.

Ichapis mana kay hermanos jina sientekorqanchejchu. Jinapis 2 Samuel libropi imaynachus Barzilai sientekusqanta yachayqa, yanapawasunchej imaynachus viejito hermanos sientekusqankuta yachanapaj.

Absalón tatanpa contranpi oqharikusqanmanta parlarina. Chay kutipi tatan Davidqa Jerusalenmanta Mahanaimman ayqekorqa. Chay lugarpitaj Davidwan kamachisninwan ima mikhunata necesitarqanku.

Chay lugarmanta kinsa runastaj Davidman aparqanku phullusta, yurusta, mankasta, jinataj trigota, cebadata, jakʼuta ima. Chay runasmanta ujnintaj Barzilai karqa (2 Sam. 17:27-29). Absalón wañuchisqa kasqantawantaj, Davidqa Jerusalenman kutiporqa. Barzilaitaj Davidta Jordán mayukama compañarqa. Chantá Davidqa Barzilaita nerqa paywan Jerusalenman ripunanta, mana mikhunata faltachikunanpaj. Chaywanpis Barzilaiqa mana munarqachu, mikhunanpis kapullarqa (2 Sam. 19:31-33). Davidqa ichapis Barzilaiwan tiyakuyta munarqa may kʼacha kasqanrayku, experienciayoj kasqanrayku, sumajtataj yuyaychasqanrayku. Barzilaitaj reypa wasinpi tiyakuspa, llankʼaspa ima kusisqa kanman karqa.

Barzilaiqa kuraj runaña kasqanrayku may yachayniyojchá karqa. Chantapis sumajtachá runasta yuyaychaj, imaynatachus rey  Rehoboamta ‘kurajkunas’ yuyaycharqanku, ajinata (1 Rey. 12:6, 7; Sal. 92:12-14; Pro. 16:31). Chaywanpis Barzilaiqa Davidwan mana riyta munarqachu. Chayrayku nerqa: “Pusaj chunka watasniyojña kani; manaña yachanichu mayqenchus allin, mayqenchus mana allimpis mikhunasmanta, ujyanasmantapis. Manaña yachayta atinichu miskʼichus qʼaymachus kasqantapis, manañataj uyariyta atinichu takejkunaj takisqankutapis”, nispa (2 Sam. 19:35; Ecl. 12:4, 5). Chantá Barzilaiqa Davidta nillarqataj: “Reyníy, kaypi kashan churiy Quimam. Pay richun qanwan”, nispa (2 Sam. 19:36-40).

Barzilaiqa reconocerqa viejitoña kasqanrayku manaña wakin imasta ruwayta atisqanta. Kay tiempopipis kuraj ancianosqa manaña wakin imasta ruwayta atinkuchu. Chayrayku allinninkupi piensarikorqa. Chaynejtataj viejito ancianosta nikorqa ruwanasninkuta joven ancianosman pasapunankuta.

Jinamantataj viejito ancianosqa joven ancianosman ruwanasninkuta saqeporqankupacha. Chayta ruwaspaqa joven ancianosta yanapashanku sumaj wakichisqas kanankupaj. Ajinamantataj Diospa llajtan ashkhayajtin ancianos mana faltanqachu. May chhika viejito ancianosqa sumajta joven ancianosta wakicherqanku. Imaynatachus Barzilaipis wawanta wakichinman karqa, ajinata chayri imaynatachus apóstol Pablo Timoteota wakicherqa, ajinata (1 Cor. 4:17; Fili. 2:20-22). Joven ancianosqa congregacionpi sumaj regalos jina kanku. Paykunaqa sumajta yanapakunku “Cristoj cuerponta wiñachinankupaj” nisunman congregacionta kallpachanankupaj (Efe. 4:8-12; kikinchay Núm. 11:16, 17, 29).

Joven ancianosman ruwanasninkuta saqepoj hermanosqa astawan Jehová Diospaj llankʼashanku.

Hermanonchej Marcomanta parlarina. Payqa 19 watasta congregacionesta waturikuspa sirvisqa. Pay nin: “Congregacionniypeqa wakin hermanaspa qosasninku mana Testigoschu kanku. Kunantaj astawan tiempoyoj kasqayrayku, mana Testigo qosaspa sonqonkuman Bibliawan chayayta atillani”, nispa.

Hermano Geraldomanta parlarina. Payqa 28 watasta congregacionesta waturikuspa sirvisqa. Pay nin: “Señoraywanqa, manaña predicacionman llojsej hermanosta yanapanaykupaj kallpachakunaykuta nikorqayku, jinallataj astawan estudiosniyoj kanaykuta”, nispa. Kunantaj paykunaqa 15 estudiosniyojña kanku, manaña predicacionman llojsej hermanostapis tantakuykunaman pusashanku.

Hermanonchej Allan nin: “Kunanqa señoraywan astawan predicayta atiyku. Maytataj gustawayku predicay callespi, mercadospi, comunidadniykupi ima. Iskay vecinosniykupis tantakuykunaman rerqanku”, nispa.

Ichapis viejitoña kasqanchejrayku wakin ruwanasninchejta saqeporqanchej. Jinapis experiencianchejwan joven hermanosta mayta yanapasunman. Chaymanta parlaspa hermanonchej Russell nin: “Jehová Diosqa astawan jovenesta yachachishan, wakichishantaj. Joven hermanosqa sumajta hermanosta yachachinku, yanapankutaj”, nispa (“ Joven hermanosta yanapa ñauparinankupaj” nisqa recuadrota qhawariy).

Congregacionpi ruwanasninchejta aswan joven ancianosman saqeporqanchej chayqa, ama llakiywan atipachikunachu. Imajtinchus Diosta tukuy sonqo yupaychaspa ashkha runasta yanaparqanchej, yanapallasunmanpunitaj. Hermanosqa munakuwanchej, munakullawasunpunitaj.

Chantapis Jehová Diosqa mana qonqapuwasunchu. Chayrayku Biblia nin: “Diosqa cheqan, manataj qonqaponqachu ruwasqaykichejta,  sutinta munakusqaykichejtapis. Chaytataj Diospaj tʼaqasqa kajkunata yanapaspa rikucherqankichej, kunanpis yanapashallankichejpuni”, nispa (Heb. 6:10). Kay versiculoqa sutʼita niwanchej, Jehová Dios mana qonqapunanta ruwasqasninchejta, yanapakushasqanchejta ima.

Tukuypis ruwanasninkuta saqepoj ancianosmanta mayta yachakusunman.

Ruwanasninkuta saqepoj ancianoswan yuyaychachikusunman, experienciankumantapis yachakusunman. Chantapis imaynatachus ruwanasninkuta juntʼasqankuta reparana, noqanchejpis paykuna jinallataj ruwanapaj.

Tukuypis mana qonqananchejchu tiyan viejito ancianosmanta Jehová Dios manapuni qonqapunanta. Imajtinchus congregacionpi ruwanasninkuta saqepoj ancianosqa, tukuy sonqo Jehová Diosta yupaycharqanku, hermanostapis yanapashallankupuni.