Diospaj astawan llankʼayqa payta jatunchan

UNAY tiempopi Romamanta uj filósofo nerqa: “Sichus uj barcota apaykachaj runa mana yachanchu maymanchus rinanta chayqa, wayrawan kayman jaqayman apaykachachikonqa”, nispa. Chay nisqanqa cheqapuni. Kausayninchejpi imatachus ruwanata mana yachasunman chayqa, chay barcota apaykachaj runa jina kasunman. Chayrayku may allinpuni kausayninchejpi imatachus ruwanata ajllananchej.

Diospa kamachisnenqa kausayninkupi imatachus ruwanankuta sumajta ajllanku. Wakinmanta parlarina. Noeqa 50 watasta jina arcata ruwaspa trabajarqa “wasinmanta kajkuna salvakunankupaj”. Profeta Moisespis “tʼinkata japʼiyta tukuy sonqo suyakorqa” (Hebreos 11:7, 26). Josuepis Jehová Dios nisqanman jina Canaán jallpʼasta japʼikapunan karqa. Imaraykuchus Jehovaqa Moisespa cuentanmanta payta churarqa israelitasta ñaupajman pusananpaj (Deuteronomio 3:21, 22, 28; Josué 12:7-24).

Ñaupa tiempopi apóstol Pablota, ¿imataj yanaparqa kausayninpi allin imasta ruwayta ajllananpaj? Jesuspa kay nisqan: “Diospa Gobiernonmanta sumaj willaykunapis jallpʼantinpi willakonqa” (Mateo 24:14). Chantapis, ¿imastaj Pablota yanapallarqataj Asia Menorpi, Europapi ima mosoj congregacionesta rikhurichinanpaj? Jesús imatachus uj mosqoypi nisqan, imatachus rikuchisqan, ‘sutinmanta nacionesman willamunanta’ kamachisqan ima (Hechos 9:15; Colosenses 1:23).

Ñaupa tiempomantapacha Jehovata sirvejkunaqa, payta jatunchanankupaj kausayninkupi imatachus ruwanankuta ajllarqanku, chayman jinataj ruwarqanku. Noqanchejrí, ¿kausayninchejpi imasta ruwaytataj ajllasunman? ¿Imaynatá chayta ajllasunman? Chanta, ¿imatá ruwasunman chay ajllasqanchejta juntʼanapaj?

¿Ima yuyaywantaj imatapis ajllananchej tiyan?

Tukuy runas kausayninchejpi imatachus ruwanataqa ajllanchejpuni. Jinapis Jehová Diosta yupaychajkunaqa, mana kay mundomanta runas jinachu imatapis ajllanchej. Kay mundomanta runasqa qhapaj kayta, sumaj rejsisqa kayta, atiyniyoj kayta astawan ajllanku. Noqanchejpis paykuna jinallataj ruwayta ajllasunman chayqa, mayta pantashasunman. Chayta ruwanamantaqa Jehová Diosta yupaychanapaj, Gobiernonta ñaupajman churanapaj imatapis ajllananchej tiyan (Mateo 6:33). Chaytataj ruwananchej tiyan Jehová Diosta, runasta ima munakusqanchejrayku. Ajinamanta Jehová Diosta jatunchasun, tukuy sonqotaj payllata yupaychasun (Mateo 22:37-39; 1 Timoteo 4:7).

Congregacionpi astawan ruwanasta japʼiyta munaspa chayri aswan sumaj cristianos kayta munaspa imatapis ajllashanchej chayqa, may allin. Jinapis imayna sonqowanchus chay imasta ajllashasqanchejta qhawarikunanchej tiyan. Jehová Diosta, runastapis munakunchej chayqa, kausayninchejpi allin imasta ruwayta ajllasun. Jinapis wakin kutisqa imatachus ruwayta ajllasqanchejta mana junt’ayta atillasunchu. Jina kajtin, ¿imasta ruwanatataj ajllasunman? Chanta, ¿imastaj yanapawasunman chay ajllasqanchejta juntʼanapaj?

Ajllasqanchejta juntʼanapaj, ¿imastaj yanapawasunman?

Jehová Dios imaynatachus kay jallpʼata, cielotapis ruwasqanmanta parlarina. Payqa mana ujllapichu tukuy imata ruwarqa, manaqa pisimanta pisi. Ajinamanta ‘chʼisiyaywan sutʼiyaywan karqa’ (Génesis 1:5, 8, 13, 19, 23, 31). Jehová Diosqa sapa día imatachus ruwananta ajllarqa, chayman jinataj ruwarqa, juntʼarqataj (Apocalipsis 4:11). Ñaupa tiempomanta Diospa kamachin Jobpis, Jehovamanta nerqa: “Dios ruwasaj nin chayqa, ruwanpuni”, nispa (Job 23:13). Ajinapunitaj karqa, Jehová Diosqa “rikorqa tukuy ima ruwasqanqa sumajpuni kasqanta”. Chayrayku mayta kusikorqa (Génesis 1:31).

Kausayninchejpi imatapis ruwanata ajllanchej chayqa, junt’ayta munananchej tiyan. ¿Imataj ajllasqanchejta junt’ayta munanapaj yanapawasunman? Jehová imatachus ruwasqanmanta yachakuy. Jehová Diosqa niraj jallpʼata ruwayta tukushaspa, piensarerqaña tukusqa kajtin imayna kʼachituchus kananpi, paytapis jatunchananpi. Noqanchejpis pay jinallataj ajllasqanchejta juntʼaspa imaynachus kananchejpi piensarisunman. Chayta ruwaspaqa ajllasqanchejta juntʼayta munasqanchejta rikuchishanchej. 19 watasniyoj Tony sutiyoj jovenmanta parlarina. Payqa Europapi kaj sucursalninchejman visitarej risqa. Chaypi kashaspataj piensarisqa: “Kaypi tiyakuy, kaypi llankʼaypis may sumajchá”, nispa. Chay diamantapacha payqa chay sucursalpi tiyakuypi, chaypi trabajaypi ima piensarerqa. Munarqapunitaj chayman riyta, chayrayku chay munasqanta juntʼananpaj kallpachakorqa. Ashkha watasninman chay sucursalpi trabajananpaj wajyarejtinkutaj, maytachá kusikorqa.

Jehová Diosta yupaychayninchejpi imatachus ajllasqanchejta juntʼanapaj, ¿imataj yanapallawasunmantaj? Jehovata yupaychayninkupi imatachus ajllasqankuta juntʼaj hermanoswan masichakuy. 30 watasniyoj Jayson sutiyoj hermanomanta parlarina. Paymanqa joven kashajtin predicay mana gustajchu. Jinapis pisimanta pisi gustarqa. Chayrayku colegiota tukuytawan precursor regular jina llankʼayta qallarerqa. ¿Imataj Jaysonta yanaparqa precursor kayta munananpaj? Pay nin: “Precursoreswan masichakuy, paykunawan khuska predicacionman llojsiy mayta yanapawarqa”, nispa.

Diosta yupaychaypi imatachus ruwayta munasqanchejta anotakuna

Imatachus ruwayta munasqanchejta umallanchejpi japʼinamantaqa, anotakunanchej tiyan. Rey Salomón nerqa, “yachayniyoj runaj palabrasnenqa” kausayninchejpi allin imasta ajllanapaj yanapawasqanchejta (Eclesiastés 12:11). Jehovata sirvinapaj imatachus ruwanata anotakusqanchejqa, sonqonchejpi, yuyayninchejpi ima qhepakun. Chayraykuchá Jehová Diosqa Israelmanta reyesman kamacherqa Leyta copianankuta (Deuteronomio 17:18). Noqanchejpis kausayninchejpi imatachus ruwayta munasqanchejta, imaynatachus chayta juntʼananchejtapis anotakuna tiyan. Chantá anotakullasunmantaj ima jarkʼaykunachus ichá kananta, imaynatachus chayta atipanatapis. Ajllasqanchejta juntʼanapajqa yanapallawasunmantaj wakin yachaqanasta estudiay, imastachus sumajta yachakunanchejpi piensariy, Jehovapaj astawan llankʼaj hermanosta tapurikuy, yanaparichikuy ima.

Geoffrey sutiyoj hermanomanta parlarina. Payqa Asiapi ashkha unayta precursor especial jina llankʼarqa. Jehová Diospaj astawan llankʼayta munasqanqa, sonqo tiyasqa kananpaj yanaparqa. Imaraykuchus paypa warmenqa kaymanta jinalla wañuporqa. Chayrayku may llakisqa kasharqa. Jinapis tiemponmanqa Jehová Diosta yupaychaypi imatachus ruwananta ajllarqa, anotakorqataj. Chay ajllasqanta juntʼananpajtaj Diosmanta yanapata mañakorqa. Payqa uj killapi kinsa mosoj estudiosta tariyta munarqa. Chayrayku imatachus anotakusqanta sapa día qhawaykurej chayman jina ruwananpaj. Chunka diasninmantaj qhawaykurillajtaj imaynachus rishasqanta yachananpaj. Chayta ruwasqan, ¿yanaparqachu imatachus ajllasqanta juntʼananpaj? Pay kusiywan nin: “Mana kinsa estudiosllatachu tarerqani, manaqa tawata”, nispa.

Pisi tiempollapi juntʼanapaj imatachus ruwanata ajllana

Qallariypeqa imatachus ruwanata ajllasqanchejta mana juntʼayta atinanchejta yuyasunman. Tony sutiyoj jovenmanta parlarinallapuni. Payqa Europapi kaj sucursalninchejman llankʼaj riyta munarqa. Jinapis ni jayk’aj chayman chayananta yuyarqa. Imaraykuchus payqa kausayninta cambiananraj karqa, Jehová Diosmanpis kausayninta qopunanraj karqa. Chayta ruwananpajtaj kallpachakorqa, chayrayku kausayninta cambiarqa, bautismoman chayananpajpis tukuy imata ruwarqa. Bautizakuspañataj precursor auxiliar karqa, chaymantataj precursor regular karqa. Imatachus ruwananta yachananpajqa uj calendariopi ima fechaspichus precursor auxiliar, precursor regular kananta anotakorqa. Uj tiempota precursor regular jina llankʼashaspataj, yuyasharqaña sucursalman trabajaj riyta atisqanpi.

Pisi tiempollapi juntʼanapaj wakin imasta ruwayta ajllasqanchejqa, unay tiempopi juntʼanapaj ajllasqanchejta ruwanapaj yanapawanchej. Pisi tiempopi imatachus ruwanata nerqanchej chayta juntʼasun chayqa, unay tiempopi juntʼanapaj ajllasqanchejtapis juntʼayta atillasun. ¿Imastaj yanapallawasunmantaj ajllasqanchejta juntʼanapaj? Sapa kuti anotakusqanchejta qhawaykuriy. Ajinamanta reparasun chayman jinachus manachus ruwashasqanchejta. Jehová Diosmanta yanapata mañakuypis ajllasqanchejta juntʼanapaj yanapallawanchejtaj. Apóstol Pablo nerqa: “Mana saykʼuspa Diosmanta mañakullaychejpuni”, nispa (1 Tesalonicenses 5:17).

Imatachus ruwayta ajllasqanchejta juntʼanapaj kallpachakuna

Imatachus ruwanata allinta ajllaspapis, chay ajllasqanchejta junt’ayta munaspapis, wakin kutisqa ajllasqanchej mana juntʼakunchu. Discípulo Marcosmanta parlarina. Payqa apóstol Pablo willamunanpaj iskay kaj viajenpi mana pusasqanrayku maytachá llakikorqa (Hechos 15:37-40). Jinapis Marcosqa mana llakiyninwan atipachikorqachu. Astawanpis Jehovata sirvinallanpajpuni imatachus ruwananta ajllarqa. ¿Imaynapí chayta yachanchej? Aswan qhepaman apóstol Pablo, Marcosmanta allinta parlasqanpi. Marcosqa Babilonia llajtapi, apóstol Pedrowan khuska Jehovapaj sumajta llankʼarqa (2 Timoteo 4:11; 1 Pedro 5:13). Chantapis Jehová Diosqa Marcoswan qhelqacherqa Jesuspa kausayninmanta, imaynatachus predicasqanmantapis. Chaytaj Marcostaqa maytachá kusicherqa.

Imatachus ruwanata ajllasqanchejta juntʼanapaj mayta kallpachakojtinchejpis, wakin kutisqa mana junt’ayta atillasunchu. Jinapis ama saykʼupunachu. Maykamañachus ruwasqanchejpi piensarina, chay ajllasqanchejta juntʼanapajtaj waj jinamanta ruwayta ajllana. Ima kajtinpis ajllasqanchejta juntʼanapaj kallpachakusun chayqa, allin riwasun. Rey Salomón nerqa: “Jehová Diospa makinman saqey tukuy ruwanasniykita, tukuy ima wakichikusqaykitaj allin llojsenqa”, nispa (Proverbios 16:3).

Mayta kallpachakojtinchejpis wakin kutisqa, onqosqa kasqanchejrayku chayri familianchejta cuidananchejrayku imatachus ruwayta ajllasqanchejta mana junt’ayta atillasunchu. Jinapis wiñay kausayta japʼinapaj kallpachakunallapuni (Lucas 23:43; Filipenses 3:13, 14). Apóstol Juan nerqa: “Diospa munayninta ruwajrí wiñaypaj kausanqa”, nispa (1 Juan 2:17). Jehová Diosta yupaychayninchejpi imatachus ruwanata ajllasqanchejta mana junt’ayta atispapis, ‘cheqa Diosta manchachikunallapuni, kamachisqasnintapis kasukunallapuni’ (Eclesiastés 12:13). Imatachus ruwanata ajllasqanchejqa, Jehovaj munayninta ruwanapaj yanapawanchej. Chayrayku payta jatunchanapaj jina imatachus ruwanata ajllana, juntʼanataj.

[Recuadro]

Kay imasta ruwayta ajllana

○ Bibliata sapa día leena.

○ Torremanta Qhawaj revistata, ¡Rijch’ariy! revistata ima leena.

○ Diosmanta aswan sumajta mañakuyta yachakuna.

○ Aswan k’acha cristiano kanapaj kallpachakuna.

○ Astawan predicana.

○ Aswan sumajta predicanapaj, yachachinapaj ima kallpachakuna.

○ Telefonopi, negociospi chayri maypi kashaspapis allinta predicayta yachakuna.