¿Imaraykutaq kay tiempopi wasimanta wasi willananchik tiyan?

“Sapa pʼunchaytaj mana saykʼuspa Templopi, jinallataj wasimanta wasi purej kanku, Cristo Jesusmanta yachachispa.” (HECH. 5:42.)

1, 2. a) Jehovamanta sutʼinchaqkuna, ¿ima ruwasqankupitaq riqsichikunku? b) ¿Imatá kay yachaqanapi yachakusun?

KAY RUWAYQA, Jallpʼantinpi rikukun: iskay runas allin pʼachallisqas, juk chhikanta Diospa Reinonmanta parlanankupaq punkuta takanku. Chay wasiyuq runa willayninkuta uyariptintaq, Bibliamanta juk publicacionta rikuchinku, chaymantataq mana imata mañaspalla Bibliamanta yachachiyta munasqankuta ninku. Parlayta tukuchaytawanqa, wak punkutañataq takanku. ¿Willachkankichu qampis paykunajina? Jina kaptinqa, reparankichá runaman niraq imatapis nichkaptinchik, paykunaqa, Jehovamanta sutʼinchaq kasqanchikta reparankuña. Arí, Jehovamanta sutʼinchaq kasqanchikta, wasimanta wasi willasqanchikrayku, riqsiwanchik.

² Jehovamanta sutʼinchaqkunaqa, imaymanamanta Jesús kamachisqanta, runaman willayta, discipulosta ruwayta ima, juntʼachkanchik (Mat. 28:19, 20). Chaypaqtaq, callespi, qhatuspi, maypichá runa kan, chaypi willanchik (Hech. 17:17, DIOS PARLAPAWANCHEJ). Chantapis, telefononiqta, cartaniqta chayri sapa pʼunchay imatapis ruwachkaptinchik, runaman willanchik. Chantapis, publicacionesninchik kimsa pachak kuraq qalluspi, Internet nisqaman churakun. * Kay ruwasqanchikqa, mayta willayninchikpi yanapachkawanchik. Chaywanpis, kaykunamanta nisqaqa, wasimanta wasi astawam runaman willanchik. ¿Imaraykutaq wasimanta wasi willanchik? ¿Imaraykutaq Diospa llaqtan astawan wasimanta wasi runaman willan? ¿Imaraykutaq kay tiempopi jinata willakunan tiyan?

¿Imaynatá apóstoles willarqanku?

3. ¿Ima kamachiytataq Jesús apostolesninman qurqa, imaynatataq chayta juntʼananku karqa?

³ Bibliaqa, wasimanta wasi willamunata yachachin. Jesús, apostolesninta runaman willamunankupaq kachachkaptin, kamachirqa: “May llajtallamampis, chayrí ranchomampis chayaspaqa, maskʼaychej pichus kʼacha runata”, nispa. ¿Imaynatá kʼacha runasta maskʼananku karqa? Wasisninkuman rispa, Jesús nirqa: “Wasiman yaykuspataj, chaypi tiyakojkunata napaykuychej. Chaypi tiyakojkuna chay napaykusqaykichejta japʼikunankupaj jinachus kanku chayqa, napaykusqaykichejqa paykunapi qhepakonqa”, nispa. Apóstoles runap wasinkuman rinankupaq, ¿runas paykunata waqyarinankutachu suyarqanku? Mana, Jesús nirqa: “Sichus pillapis wasinkuman mana wajyarikusunkichej, nitaj parlasqaykichejtapis uyarisunkichej chayqa, chay wasimanta, chayri chay llajtamanta llojsiychej, chakisniykichejmanta jallpʼata thalarakuspa”, nispa (Mat. 10:11-14). Chay kamachisqanqa, sutʼita rikuchiwanchik discípulos ‘tukuy ranchosman willaq richkaspa’, paykuna runaspa wasinkuman rinankuta (Luc. 9:6).

4. Bibliamanta, ¿ima pʼitipitaq wasimanta wasi willanata yachachin?

⁴ Bibliaqa, apóstoles wasimanta wasi willasqankuta yachachin. Kay Hechos 5:42 pʼitiqa 33 watapi qutuchakuy qallarisqanmanta ruwachkasqankumanta nin: “Sapa pʼunchaytaj mana  saykʼuspa Templopi, jinallataj wasimanta wasi purej kanku, Cristo Jesusmanta yachachispa”. Chaymanta, iskay chunka watanman, apóstol Pablo Efesomanta ancianosta yuyarichirqa: “Manataj imatapis pakarqaykichejchu, astawanqa qankunapaj imachus allin kaj chhikata willarqaykichej; wasimanta wasi purispataj, tukuypa rikunanta yachacherqaykichej”, nispa. Pablop nisqan, ¿ninayanchu niraq cristianoman tukuchkaptinku paykunaman willasqanta? Arí, imaptinchus payqa, “Diosman kutirikunamanta, Señorninchej Jesucristopitaj creenamanta” parlarqa (Hech. 20:20, 21). Kay texto griego del Nuevo Testamento, de Archibald Thomas Robertson nisqa, Hechos 20:20 pʼitimanta nin: “Sutʼinchana kanman, payqa Diosmanta willaq runajina, wasimanta wasi willamuq riq”, nispa.

Kay tiempopi, soldadosjina achkha langostas

5. ¿Imaynatá Joel libro, imaynatachus willayninchik ruwakuchkasqanta rikuchin?

⁵ Ñawpa tiempopi cristianospa willasqankuqa, kay tiemponchikpi runaman astawan willakunanta rikuchirqa. Profeta Joelqa, akllasqa cristianospa willayninkuta imaymana mikhuq khuruswan, langostaswan ima, kikincharqa (Joel 1:4). Langostasqa, juk tropajina rispa jarkʼaykunata atipanku, wasisman yaykuspataq tukuy ima kaqta mikhukapunku (Joel 2:2, 7-9, ñawiriy). Chayqa, kay tiempopi Diospa llaqtan mana saykʼuspa, mana saqispa ima, willachkasqankuta, rikuchin. Akllasqa cristianos, ‘wak ovejas’ ima, Bibliap nisqanta juntʼanankupaq, wasimanta wasi runaman willamunku (Juan 10:16). ¿Imaynamantá Jehovamanta sutʼinchaqkuna, apostolesjina wasimanta wasi willachkanchik?

6. Kay 1922 watapi, ¿ima yuyarichiytaq cristianospaq karqa, imaynatá wakinkuna chayta qhawarqanku?

⁶ Kay 1919 watamantapacha, tukuy cristianosta astawan Diosmanta willanankuta nikurqa. Kay 1922 watamanta 15 de agosto The Watch Tower nisqa revistapitaq, “Willanallapuni tiyan” yachaqananpi, akllasqa cristianosta, “runap wasinman rispa Diospa Reinon qayllamusqanmanta, publicacioneswan kusiywan willamunankuta” yuyarichirqa. Kay Bulletin nisqapi (Boletín, kunantaq Reinomanta Willayninchik), runaman willanankupaq yanapaykuna tarikuptinpis, qallariypi wasimanta  wasi willaqkunaqa, jukchhikalla karqanku. Wasimanta wasi mana willayta munaqkunataq, imaymana jarkʼaykunata rikhurichiq kanku, imaraykuchus paykunaqa, pʼinqakuq kanku wasimanta wasi willaq riyta. Chayrayku, Diosmanta willamunata sapa kuti kamachikusqanrayku, Jehovap llaqtanmanta achkha karunchakurqanku.

7. Kay 1950 wata chayniqpi, ¿ima yanapaytaq necesitakurqa?

⁷ Chaymanta qhipa watasmantaq, willaqkunaqa yapakurqanku. Chaywanpis, allinta wasimanta wasi willamunankupaqqa, astawanraq yachakunanku karqa. Chaymanta yachanapaq, Estados Unidos suyupi ruwakusqanta yuyarina. Kay 1950 wata qallarichkaptinqa, chay llaqtamanta 28% (pachakmanta iskay chunka pusaqniyuq) Jehovamanta sutʼinchaqkunaqa, qillqasqa hojitasllata runaman jaywaq kanku chayri revistasta japʼirispalla callespi sayaq kanku. Chantá, 40% (pachakmanta tawa chunka) hermanos wakin kutilla willaq kanku chayri killasta mana willaqchu kanku. ¿Imatá ruwakunman karqa cristianos wasimanta wasi willaq rinankupaq?

8, 9. Kay 1953 watapi, ¿ima wakichiywantaq hermanosta allinta willamunankupaq yanapakurqa, imaynatá chaymanta willaqkuna yapakurqanku?

⁸ Kay 1953 watamanta Nueva York suyupi, achkha suyusmanta jatun tantakuypi, wasimanta wasi willamunata watiqmanta yuyarichikullarqataq. Hermano Nathan H. Knorr, qutuchakuymanta ancianospa llamkʼayninkuta sutʼincharqa, chay hermanosqa, hermanosta wasimanta wasi willanankupaq yanapananku karqa, chantá nirqa: “Tukuypis allin willaykunata wasimanta wasi willananpaq, wakichisqa kanan tiyan”, nispa. Chaymantataq, Jallpʼantinpi hermanos willayta yachanankupaq, juk wakichiy (programa) qallarikurqa. Manaraq wasimanta wasi willaq hermanosqa, Bibliamanta parlayta qallarinankupaq, Bibliawan tapuykunaman kutichinankupaq, tʼukurichinankupaq ima, juk yanapata japʼirqanku.

⁹ Jinata hermanosta wakichikusqanrayku, niraq chunka watapi wasimanta wasi willaqkuna 100% yapakurqa, Bibliamanta yachakuyta munaqkunaman kutisqankutaq 126%, Bibliamanta yachakuqkunataq, 150% yapakurqa. Kay tiempopitaq, yaqha qanchis junu Jehovamanta sutʼinchaqkuna, Jallpʼantinpi allin willaykunata willachkanku. Tʼukunapaqjina achkhaman yapakusqankuqa, sutʼita rikuchin Jehová llaqtanta bendecichkasqanta, wasimanta wasi willamunankupaq kallpakusqankumanta (Isa. 60:22).

Salvakunapaq señal

10, 11. a) Ezequiel libropi 9 tʼaqapi musquypijina, ¿imataq rikukun? b) ¿Imaynatá chay rikukusqan kay tiempopi juntʼakuchkan?

¹⁰ Wasimanta wasi willamunanchikpuni kasqanta, Ezequiel libromanta jisqʼun tʼaqapi musquypijina rikukusqanta ukhunchaspa, sutʼita yachasunchik. Chay musquypijina Ezequielqa, suqta armasqa runasta rikun, chantá paykunawan khuska linomanta yuraq pʼachawan runata, chumpinpi qillqanapaq churasqa imaswan kachkapta, rikullarqataq, chay runamanqa, kayta kamachikurqa: “Llajta ukhunta purispa, uj señalta frentesninkuman churaykuy, pikunachus chay llajtapi tukuy millay imas ruwakusqanmanta qhaparispa waqashanqanku, chay runasman”. Runaspa frentesninkuman señalta churasqantawantaq, chay suqta runasta, frentesninkupi mana señalniyuq kaqkunata wañuchinankuta kamachikun (Ezequiel 9:1-6, ñawiriy).

¹¹ Chay ‘linomanta yuraq pʼachayuq runaqa’, kay Jallpʼapi Diospa espiritunwan akllasqa cristianosmanta puchuqkunawan, ninakun. Akllasqa cristianostaq, allin willaykunaniqta, discipulosta ruwayniqta ima, Jesuspa ‘wak ovejasninpa’ frentesninkuman juk señalta churachkanku (Juan 10:16). ¿Imataq chay señal? Chay señalqa,  Jesuspa discipulosninjina Jehovaman qukuspa bautizakusqanku, jinallataq kʼacha kaykunawan pʼachawanjina pʼachallikusqankupis (Efe. 4:20-24). Kay ovejasqa, akllasqa cristianoswan juk tropalla kanku, chayrayku akllasqa hermanosta runaspa frentesninkuman señalta churaspa yanapachkanku (Apo. 22:17).

12. ¿Imaynatá Ezequiel libro ovejasjina llampʼu sunqu runasta maskʼanallanchiktapuni rikuchin?

¹² Ezequiel libropi musquypijina rikukusqanqa, ‘qhaparispa waqachkaqkunata’, usqhayllata maskʼananchikta rikuchiwanchik, imaptinchus runap kawsayninqa, wañuy patapi kachkan. Juk chhikamantawan, Jehová angelesninwan, nisunman chay suqta armasqa runaswan, frentesninkupi mana señalniyuq kaqkunata wañuchichinqa. Apóstol Pablo juicio pʼunchay qayllamuchkasqanmanta parlaspa nirqa: Jesús, atiyniyuq angelesninwan “juchachaspataj castiganqa sonqonkupi Diosta qhesachajkunata, pikunachus Señorninchej Jesucristoj evangeliontapis mana kasojkunata”, nispa (2 Tes. 1:7, 8). Kay rimayqa, runa imaynatachus willayninchikman kutichisqankumanjina juchachasqa kanankuta rikuchiwanchik, chayrayku tukukuykama mana saykʼuspa, Diosmanta willanallapuni tiyan (Apo. 14:6, 7). Kay rikuchiwanchik, runap kawsaynin makinchikpi kasqanta (Ezequiel 3:17-19, ñawiriy).

13. a) Pablo, ¿imatataq sumaqta yacharqa, imaraykutaq? b)  Qampis llaqtaykimanta runasman, ¿manupijina kasqaykitachu qhawanki?

¹³ Apóstol Pabloqa, runaman allin willaykunata willananpuni kasqanta yacharqa, chayrayku nirqa: “Noqa evangeliota willanaymanta manu jina kani griegosman, mana griegosmampis, yachayniyojkunaman, jinallataj mana yachayniyojkunamampis. Noqamantaqa wakichisqaña kani, usqhayta jamuspa evangeliota willanaypaj qankuna Romapi tiyakojkunamampis”, nispa (Rom. 1:14, 15). Pabloqa, Jehovap khuyakuyninrayku allinpaq qhawasqa kasqanta, mayta agradecekurqa. Chayrayku, runa Diospa qhasi kʼacha kayninta japʼinankupaq, yanapayta munarqa (1 Tim. 1:12-16). Payqa, sapa juk runawan riqsinakuspa manupijina chay runaman kasqanta qhawaq, chay manutataq allin willaykunata willaspalla pagayta atisqanta yacharqa. Qampis llaqtaykimanta runasman, ¿manupijina kasqaykitachu qhawanki? (Hechos 20:26, 27, ñawiriy.)

14. ¿Imaraykutaq astawan wasimanta wasi runaman willamunchik?

¹⁴ Runata mana wañunankupaq yanapayqa may allin, chaywanpis mana chayraykullachu wasimanta wasi willamunchik. Kay Malaquías 1:11 pʼitipi, Jehová nin: “Tukuy kay pachapi sutiyta jatumpaj qhawanku; [...] ofrendastapis maychus qonanwankuta qowanku, imaraykuchus suteyqa may jatunmin tukuy nacionespi”, nispa. Kay profeciaqa, kunan juntʼakuchkan, imaptinchus Jehovata yupaychaqkunaqa, Diosninkup sutinta Jallpʼantinpi llampʼu sunquwan willachkanku (Sal. 109:30; Mat. 24:14). Ñuqanchikqa, ‘alabanza sacrificiota’ Jehovaman quyta munasqanchikrayku, wasimanta wasi runaman willamunchik (Heb. 13:15, MOSOJ TESTAMENTO).

¿Imataq aswan qhipaman kanqa?

15. a) ¿Imaynatá israelitas Jericó llaqtata qanchis pʼunchaypi muyuykurqanku? b) Chaymanjina, ¿imatá willayninchikwan kananta suyasun?

¹⁵ ¿Imataq willayninchikwan aswan qhipanman kanqa? Josué libropi nisqanmanjina, Jericó llaqtata muyuykusqankuqa, kay tiempopi kikinta ruwakuchkasqanta rikuchin. Yuyarinachik, Jehová niraq Jericó llaqtata thuñichkaptin, israelitasman suqta pʼunchayta, sapa pʼunchay jukta chay llaqtata muyuykunankuta  kamachirqa. Chaywanpis, qanchis pʼunchaypiqa, mana juk kutillatachu muyuykunanku karqa. Jehová, Josueman nirqa: “Qanchis kaj pʼunchaypitaj qanchis kutita llajtata muyurinkichej, sacerdotestaj chaypacha pututusninkuta waqachenqanku. Carnero wajrasmanta pututusta waqajta uyariytawan, tukuy kallpawan qhapariychej, llajtaj perqasnintaj ujllata thuñikonqanku”, nispa (Jos. 6:2-5). Ichapis, kay tiempopipis willayninchik, kikillantataq yapakunqa. Kay pachap tukukuynin chayamuptintaq, mana jaykʼaqjina, Diospa sutinmanta Reinonmanta ima, willakusqanta rikusunchik.

16, 17. a) ¿Imataq ruwakunqa niraq “jatun ñakʼariy” chayamuchkaptin? b) ¿Ima tapuykunamantaq qhipan yachaqanapi kutichikunqa?

¹⁶ Willayninchikqa, ‘tukuy kallpawan juk qhapariyjina’ kanman. Apocalipsis libroqa, juicio pʼunchaypaq willayninchikmanta parlan, chaytataq ‘kimsa arrobasniyuqjina manchay jatuchaq granizoswan’, kikinchan. * Chayrayku, Apocalipsis 16:21 pʼitiqa, ‘chay castigo anchapuni kananta’ nin. Mana yachanchikchu, imaynatachus wasimanta wasi willayninchik, Diospa juicio pʼunchayninmanta willayta, yanapananta. Chaywanpis, “jatun ñakʼariy” tukukuptin, Jallpʼantinpi Jehovap sutin mana jaykʼaqjina willasqa kananta, yachanchik (Apo. 7:14; Eze. 38:23).

¹⁷ Kay ñawpaq parrafopi nikusqan juntʼakunankamaqa, Reinomanta allin willaykunata kʼajaywan willanallapuni. Kay yachaqanapi yachakunchikjina, Dios kamachiwasqanchikta juntʼanapaqqa, wasimanta wasi willananchik tiyan. ¿Ima jarkʼaykunataq willayninchikpi kanman? ¿Imaynatá chaykunata atipasunman? Kay tapuykunamanqa, qhipan yachaqanapi kutichikunqa.

[Sutʼinchaykunasnin]

¿Imatá kutichiwaq?

• ¿Imatá Biblia wasimanta wasi willananchikmanta yachachin?

• ¿Imatá kay tiempopi astawan wasimanta wasi willayninchikmanta nikun?

• ¿Imaraykutaq Jehovata yupaychaqkuna runaman willanankupuni tiyan?

• ¿Imataq aswan qhipaman kanqa?

[Tapuykuna]

[5 paginapi dibujos/fotos]

¿Pablojinachu runaman willanapuni kasqanta yachanki?

[6 paginapi dibujo/foto]

Hermano Knorr 1953 watapi