¿Imaynatá wasimanta wasi willayninchikpi jarkʼaykunata atipasunman?

“Diosniyku kallpachawarqayku, paypa evangelionta qankunaman willanaykupaj manchay churanaku chawpipi.” (1 TES. 2:2.)

1. ¿Ima jarkʼaykunataq Jeremiaspaq rikhurirqa, imaynatá chay jarkʼaykunata atiparqa?

JEREMIASQA, ñuqanchikjina runallataq karqa. Jehová, payta ‘nacionespa profetan kananpaq’ churachkaptin, jinata nirqa: “Ay Señor Tata Dios, noqaqa waynallaraj kani, nitaj sumajta parlaytapis atinichu”, nispa. Chayta nispapis, payqa, Jehovapi atienekurqa, kamachisqantataq juntʼarqa (Jer. 1:4-10). Jeremiasqa, Diosmanta parlasqanta runa mana uyariyta munaptinku, asipayaptinku, wañuchiyta munaptinku ima, tawa chunka wata kuraqta muchurqa (Jer. 20:1, 2). Chayrayku wakin kutiqa, manaña willamuyta munarqachu, chaywanpis Dios kallpanwan yanapasqanrayku, kamachisqanmanjina willallarqapuni (Jeremías 20:7-9, ñawiriy).

2, 3. ¿Ima jarkʼaykunatataq kay tiempopi Jeremiasjina, Jehovata yupaychaqkuna atipanku?

² Kay tiempopiqa, achkha cristianos Jeremiasjina yuyanku. Wasimanta wasi willamunanchikta yachaspa, wakinkunaqa jinata yuyanchik: “Ñuqaqa, mana jaykʼaqpis chayta ruwayta atiymanchu”, nispa. Chaywanpis, willayninchik  Jehovap munaynin kasqanta allinta yachaspaqa, manchachikusqanchikta atipaspa runaman willayta qallarinchik. Chantapis, wakinpaqqa, Diosmanta mana saykʼuspa willayqa, wakin kuti mana atikullarqachu. Arí, wasimanta wasi willayta qallariyqa, mana atikullanchu, jinallataq mana saykʼuspa tukukuykama willaypis (Mat. 24:13).

³ ¿Unaytañachu Bibliamanta yachakuspa, tantakuykunaman richkanki? Chaywanpis, ¿manaraqchu wasimanta wasi willaq lluqsiyta atinki? Bautizasqaña kaspapis, ichapis mana willaq lluqsiyta atichkankichu. Kunanqa tukuypis wasimanta wasi willamunankupaq, tukuy laya jarkʼaykunata atipachkanku. Qampis, Jehová Diospa yanapayninwan, jarkʼaykunata atipayta atiwaq.

Mana manchachikunapaq kallpachakuna

4. ¿Imataq apóstol Pablota mana manchachikuspa willamunanpaq yanaparqa?

⁴ Tukuy yachanchik, Jallpʼantinpi Diospa Reinonmanta willakuchkasqanqa, mana runap yachayninraykuchu nitaq atiyninraykuchu, manaqa Diospa espiritunrayku willakuchkan (Zac. 4:6). Sapa juk ñuqanchikmanta, Diospa espiritunraykullataq runaman willamuchkanchik (2 Cor. 4:7). Apóstol Pablopi tʼukurina. Juk kutiqa, pay, wak hermano ima, willayninkuman churanakuq runaswan maqachikusqankumanta, jinata qillqarqa: “Yachankichej imaynatachus Filipos llajtapi ñawpajta ñakʼarichiwasqaykuta, kʼumuykachachiwasqaykutataj, manaraj qankunaman jamushajtiyku. Chaywanpis Diosniyku kallpachawarqayku, paypa evangelionta qankunaman willanaykupaj manchay churanaku chawpipi”, nispa (1 Tes. 2:2; Hech. 16:22-24). Wakin kutipiqa, kʼajaywan willaq Pablopis, mana runaman allin willaykunata willayta atillarqachu. Paypis, ñuqanchikjina Diospa yanapayninta willamunanpaq necesitarqa (Efesios 6:18-20, ñawiriy). ¿Imaynatá payjina ruwasunman?

5. ¿Imataq mana manchachikuspa willamunapaq, yanapawasun?

⁵ Mana manchachikuspa willamunapaqqa, Diosmanta mañakuna tiyan. Juk precursora chaymanta parlaspa jinata nirqa: “Mana manchachikuspa parlanaypaq, runap sunqunman chayanaypaq, kusiywan willanallaypaqpuni, Diosmantapuni mañakuni. Chantapis, willayninchikqa, mana ñuqanchikpatachu manaqa, Jehová Diospata. Chayrayku sapallanchikmantaqa, mana imatapis ruwayta atisunmanchu”, nispa (1 Tes. 5:17). Tukuypis, mana manchachikuspa willamunapaqqa, Diospa espíritu santonta mañakunallapuni tiyan (Luc. 11:9-13).

6, 7. a) ¿Imatá musquypijina Ezequiel rikurqa, ima ninayantaq chay rikusqan? b) ¿Imatá Ezequielpa rikusqan yachachiwanchik?

⁶ Ezequiel libropiqa, mana manchachikuspa willamunapaq, juk yanapa tarikun. Jehovaqa, musquypijina profeta Jeremiasman juk qillqasqa librota qurqa, chay librop “puraj Iadompitaj qhelqasqa karqa llakiy, waqay, ayqoykuna, ay ay niykuna ima”. Chantá Jehová, Jeremiasta ajinata kamachirqa: “Runaj Churin, kay jaywasusqay qelqasqa librota mikhuspa, chaywan wijsaykiman juntʼaykuchiy”, nispa. ¿Ima ninayantaq chay musquypijina rikukusqan? Chay ninayarqa, Ezequiel imamantachus willamuchkasqanta, sumaqta yachanan kasqanta, nisunman sunqun ukhukama chayanan karqa. Ezequielllataq nirqa: “Noqataj mikhuykorqani. Simiypeqa may miskʼi karqa, abeja miskʼi jina”, nispa. Ezequielqa, Diospa willayninta runaman riqsichiypi miskʼichikuq; abejap miskʼintapis llamirichkanmanjina paypaq karqa. Ezequielqa, mana kasukuq israelitasman, Dios paykunata juchachananta willanan kaptinpis, Jehovap profetan kayta, kamachisqanta juntʼayta ima, jatunpaq qhawarqa (Ezequiel 2:8–3:4, 7-9, ñawiriy).

⁷ Ezequielpa rikusqanqa, ñuqanchiktapis yanapawanchik, imaptinchus ñuqanchikpis saqra runasman, Jehová paykunata chinkachinanta willallanchiktaq. Jehová runaman willananchikta kamachiwasqanchikta, jatunpaq qhawanapaqqa, Bibliamanta sumaqta yachakunanchik tiyan. Wakin kutilla Bibliata ukhunchasun chayqa chayri patallanta ñawirisun chayqa, mana Diospa Palabranmanta  sumaqta yachasunchu. ¿Atinkimanchu Bibliata, sapa pʼunchay ñawiriyta, ukhunchayta ima? ¿Sapa ñawiriptiyki tʼukuriwaqchu? (Sal. 1:2, 3.)

Imaynatá willayta qallarisunman

8. ¿Imataq wakin willaqkunata, wasimanta wasi Bibliamanta parlayta qallarinankupaq yanapan?

⁸ Achkha willaqkunaqa, wasimanta wasi willayta manchachikunku, imaptinchus mana runawan Bibliamanta parlayta qallariyta atillankuchu. Wakin lugarespitaq, runawan parlayqa mana atikullanchu. Wakin hermanosqa, mana manchachikuspa runaman willanankupaq, imamantachus parlanankuta ñawpaqmanta wakichikunku, chantá kay recuadropi ninjina juk tratadota jaywanku. Chantapis, runaman tratadota rikuchichkaspa, imamantachus parlasqanta ñawiripuptinchik, dibujosninta rikuchiptinchik ima, ichapis chay runa willayninchikta uyariwasun, jina kaptintaq, imaraykuchus waturikuq risqanchikta sutʼinchasunman, chayri tʼukurinanpaq tapurisunman. Chantapis, kimsa chayri tawa tratadosta rikuchisunman mayqintachus munasqanta akllakunanpaq. Chaywanpis, willaq rispaqa, mana tratadosta tukuy punkupi jaywaqllachu rinchik, manaqa Bibliamanta parlayta, yachachiyta qallarinapaq rinchik.

9. ¿Imaraykutaq willamunapaq allinta wakichikunanchik tiyan?

⁹ Wasimanta wasi mana manchachikuspa kusiywan willanapaqqa, allinta wakichikuna  tiyan. Juk precursor nirqa: “Imamantachus parlanayta wakichikuptiyqa, kusiywan runaman willani imaptinchus wakichikusqaywan runaman mayta parlayta munani”, nispa. Wak precursortaq, nirqa: “Revistas, libros ima, imamantachus parlasqankuta sumaqta yachaspaqa, kusiywan chay librosta jaywani”, nispa. Wakichikuchkaspa, imamantachus runaman parlananchikta yuyayninchikpi tʼukuriy allin kaptinpis, wakin hermanosqa, wasinkupi runawan parlachkankumanpisjina sapallanku parlaspa, wakichikunku. Jinamanta, astawan sumaqta Jehovapaq llamkʼanku (Col. 3:23, 24; 2 Tim. 2:15).

10. ¿Imaynatá willayman lluqsinapaq tantakuy, runaman willanapaq yanapawasunman?

¹⁰ Willaq lluqsinapaq tantakuykunapiqa (reunión para el servicio del campo), wasimanta wasi sumaqta willananchikpaq yanapaykunata, wakichipuwanchik. Chay pʼunchaypaq Bibliamanta wakichisqa pʼiti (texto del día) willaymanta parlaptin, chay pʼitita ñawirikunman, juk chhikantataq sutʼinchakunman. Willayman urqhuq hermanoqa, niraq hermanosta willayman urqhuchkaspa, tiempochakunan tiyan, chay llaqtanmanta runaspaq ima willaykunachus aswan sumaq kasqanta rikuchinanpaq, chayri imamantachus chay pʼunchay parlanankuta sutʼinchananpaq. Jinamanta willaqkunaqa, Diosmanta willanankupaq, sumaq wakichisqas kanqanku. Willayman lluqsinapaq urqhuq hermanos sumaqta wakichikuptinkuqa, allinta hermanosta yanapanqanku, maychus tiemponpitaq, chay tantakuyta tukunqanku (Rom. 12:8).

Sumaqta uyariy yanapawanchik

11, 12. Imaynatachus runap sunqunman khuyakuywan uyarispa chayasqankumanta, parlariy.

¹¹ Runa masinchikman Bibliamanta parlayta qallarinapaq, sunqunman chayanapaq ima, mana wakichikuyllachu yanapawasun; manaqa chiqamantapuni paykunamanta llakikuna tiyan. Chaytataq, imaynatachus uyarisqanchikpi, rikuchisun. Qutuchakuykunata waturiq juk hermano, jinata nirqa: “Paciencia, sumaqta uyariyta munay ima, runa uyarinawanchikpaq yanapawanchik, chantapis chayta ruwaspaqa, paykunamanta llakikusqanchikta, munakusqanchikta ima, rikuchinchik”, nispa. Kʼachamanta uyariptinchikqa, runap sunqunman chayayta atisun, qhawarina qhipan parrafopi juk willayta.

¹² Francia suyumanta Saint-Étienne llaqtapiqa, Le Progrès nisqa periodicopi, juk warmip cartanta churarqanku. Chay warmiptaqa, uña wawitan wañupurqa. Chaymanta qhipamantaq, iskay warmis punkunta takasqankumanta jinata qillqarqa: “Jehovamanta sutʼinchaqkuna kasqankuta, chayratu repararqani. Chayrayku, mana uyariyta munasqayta allinllamanta niyta munachkarqani, chaywanpis imarayku Dios ñakʼariykuna kananta saqisqanmanta parlaq, folletota, runaman jaywanankupaq apaykachachkasqankuta rikuspa, yachachiyninku mana chiqa kasqanta rikuchinaypaq, paykunata wasiyman yaykuchirqani. [...] Chay iskay hermanasqa pacienciawan, juk hora kuraqta parlasqayta uyariwarqanku. Ripuchkaptinkutaq, sunqu tiyaykusqa karqani, chayrayku wak pʼunchay Bibliamanta yachachinawankupaq, kutimunankutapis munarqani”, nispa (Rom. 12:15). Chaymanta qhipamantaq, chay warmiqa, Bibliamanta yachakuyta qallarirqa. Arí, chay warmiqa, mana chay iskay hermanas nisqankutachu astawan yuyarikurqa, manaqa pacienciawan uyarisqankuta.

13. ¿Imaynatá maypichus willanchik chaypi imayna runachus kasqankumanjina, willasunman?

¹³ Runa chʼampayninmanta willawasqanchikta, kʼachamanta uyariptinchik, Diospa Reinon imatachus paykunarayku ruwananta, sutʼinchayta atisun. Ichapis unaytaña willaq hermanos, sumaqta uyariyta yachasqankuta, rikunki (Pro. 20:5). Chay hermanosqa, chiqamantapuni runamanta llakikunku. Paykunaqa, mana runa maypichus tiyakusqallankutachu, nitaq sutillantachu hojapi qillqanku, manaqa imamantachus yachayta munasqanta, imachus chay runasta llakichisqanta ima, qillqanku. Pillapis chʼampayninkumanta parlaptinku, chay hermanosqa, yanapananpaqjina yachachiyta maskʼaspa, wak pʼunchay kutinku. Apóstol Pablojina, imayna runachus kasqankumanjina runaman willanku  (1 Corintios 9:19-23, ñawiriy). Chiqamanta runamanta llakikuptinchikqa, paykunaqa, Diosmanta yachakuyta munanqanku chantapis, ‘Diosninchikpa jatun khuyakuyninta’ rikunqanku (Luc. 1:78).

Willayninchikta runa uyarinanta yuyana

14. ¿Imaynatá Jehovap kʼacha kaykunasninta runaman willachkaspa rikuchisunman?

¹⁴ Jehová Diosqa, imatachus ruwayta munasqanchikta akllananchikpaq ruwawanchik. Pay, tukuy atiyniyuq kaspapis, mana kamachisqajinachu payta yupaychananchikta munan, manaqa munakuyninwan payman qayllaykuchiwanchik. Kʼacha kaykunasninta agradecekuqkunataq, achkha tʼinkata japʼinku (Rom. 2:4). Diospa kamachisninjina, allin willaykunata willanapaq, khuyakuyniyuq Diosninchikta jatunchanapaqjina, wakichisqas kana tiyan (2 Cor. 5:20, 21; 6:3-7). Chayta ruwanapaqqa, maypichus willanchik chayniqpi, willayninchikta runa uyarinanta yuyana, ajinata yuyay juk jarkʼayjina kaptinpis. ¿Imataq ajinata yuyanapaq yanapawasun?

15. a) ¿Imatataq Jesuspa apostolesnin ruwananku karqa runa willayninkuta qhisachaptin? b) ¿Imaynatá kʼacha runasta astawan maskʼasunman?

¹⁵ Jesusqa, discipulosninman pillapis willayninkuta qhisachaptin mana llakikunankuta nirqa, astawanqa kʼacha runasta maskʼanankuta kamachirqa (Mateo 10:11-15, ñawiriy). ¿Imaynatá ñuqanchikpis paykunajina kʼacha runasta maskʼasunman? Imatachus willaypi ruwayta atisqanchikpi tʼukurispa. Juk hermanoqa, qurita maskʼaqwan kikinchakun, chayrayku paypa parlayninqa kayjina: “Kay pʼunchayqa, qurita tariyta munayman”, nispa. Wak hermanotaq, nin: “Sapa semana juk runallatapis uyarinawanpaq tariyta munani, Bibliamanta yachakuyta munasqanta wiñachinallaypaqpuni”, nispa. Wakin hermanostaq, wasimanta wasi willachkaspa, atikuptinqa Bibliamanta juk pʼitillatapis ñawirinankupaq kallpakunku. Willaypi, ¿imasta ruwanaykipaqtaq tʼukuriwaq?

16. ¿Imaraykutaq willamunallapuni tiyan?

¹⁶ Wasimanta wasi willamusqanchikqa, mana chiqa sunqu runa salvakunallanpaqchu. Chantá, ¿imaspaqwantaq willamunchik? Willamuspaqa, Jehovata munakusqanchikta, rikuchinchik (1 Juan 5:3). Chantapis, willayninchikta runa mana uyarispa chinkayman riptin, willasqanchikrayku manaña chay runa wañunanmanta juchayuqchu kanchik (Hech. 20:26, 27). Chantapis, saqra runasman Diospa ‘juicio pʼunchaynin chayamuchkasqantaña’ yachanankupaq, willanchik (Apo. 14:6, 7). Astawantaq, Jallpʼantinpi Diosninchikpa sutinta jatunchanapaq, willamunchik (Sal. 113:3). Chayrayku, runa willasqanchikta uyarichunpis manapis, ñuqanchikqa, Diospa Reinonmanta willanallanchikpuni tiyan. Mana jaykʼaq qunqanachu, Jehová Dios, allin willaykunata willamunapaq kallpakusqanchikta may jatunpaq qhawasqanta (Rom. 10:13-15).

17. ¿Imatataq runa juk chhikamantawan yachanqa?

¹⁷ Runas willayninchikta qhisachaptinkupis, juk chhikamantawan paykunaqa, mana kikintachu yuyanqanku (Mat. 24:37-39). Jehová, Ezequielman juicio pʼunchayninta willachisqan juntʼakuchkaptin, mana kasukuq israelitasqa, “paykuna ukhupi uj profeta” kasqanta yacharqanku (Eze. 2:5). Jehová, kay saqra pachamanta runasta cuentata mañachkaptin, kikillantataq kay runasqa, Jehovamanta sutʼinchaqkunata wasimanta wasi willanankuta Jehová Dios kamachisqanta, yachanqanku. ¡Kay qhipa pʼunchaykunapi Jehovap sutinpi, kamachisqanta willayqa, may jatunpuni! Chayrayku, Diospa kallpanwan, ima jarkʼaykunatapis atipaspa, wasimanta wasi willanallapuni.

¿Imatá kutichiwaq?

• ¿Imataq mana manchachikuspa willanapaq yanapawasun?

• ¿Imataq wasimanta wasi Bibliamanta parlayta qallarinapaq yanapawasun?

• ¿Imaynatá chiqamanta runamanta llakikusqanchikta rikuchisunman?

• Mayniqpichus willanchik chaypi, runa willayninchikta uyarinanta yuyanapaq, ¿imatataq ruwasunchik?

[Tapuykuna]

[10 paginapi recuadro, dibujo/foto]

Bibliamanta parlayta qallarinapaq yanapa

Qallarinapaq

▪ Napaykuytawan, juk trataditota quspa nisunman: “Qamwan parlariq jamurqani, kay yachachiy juk sunquchayta quwasqanchikta willasunaypaq”, nispa.

▪ Chayri, trataditota quspa ichapis nisunman: “Juk chhikitallanta qamwan parlariyta munani, ¿imatataq qam, kay tratadito nisqanmanta yuyanki?”, nispa.

Trataditowan qhipakuptintaq

▪ Ichapis tapuriwaq: “¿Imatá kay trataditop yachachiyninmanta yuyanki?”, nispa.

▪ Imatachus kutichisqanta sumaqta uyariy. Kutichisqanmanta pachis niy.

Parlarinallapaqpuni

▪ Bibliamanta jukta, chayri iskay pʼitita ñawirispa ukhunchay. Imatachus uyariq necesitasqanmanjina parlay.

▪ Sumaqta uyariptintaq, juk revistata chayri juk librota jaywawaq, atikuptintaq Bibliamanta imaynatachus yachachisqanchikta sutʼinchay. Wak pʼunchay kutinaykitataq niy.