Jehová ñuqaykuwan kasqanrayku, mana jaykʼaq manchachikurqaykuchu

Egiptia Petridou kawsayninmanta willariwanchik

Kay 1972 watapi, Chipremanta Jehovamanta sutʼinchaqkuna, Nicosia llaqtapi hermano Nathan H. Knorrpa umallirichiyninta uyarinankupaq, tantakurqanku. Chay hermanoqa, unaytaña Diospa llaqtanpa ruwayninta ñawpaqman apachkarqa. Payqa, rikuwaytawan, niraq napaykuchkaptiy, tapuriwarqa: “¿Ima willaykunatataq Egiptomanta apamunkirí?”, nispa. Chay hermanowanqa, iskay chunka wata ñawpaqtaña Alejandriapi (Egipto) riqsinakurqayku.

ÑUQAQA, 1914 watapi, 23 de enero killapi paqarikurqani, Alejandría llaqtapi, tawa hermanosmantataq, kuraq kaq kani. Familiayqa, mana quchap qayllanpi tiyakurqa. Chay wataspi Alejandría llaqtaqa, sumaq wasisninrayku, ñawpaq tiempopi kawsayninrayku ima, may riqsisqa karqa. Arí, kay llaqtapiqa, Europamanta runas, Arabiamanta runaswan, khuska kawsakuq kanku. Chayrayku, árabe, francés, inglés, italiano, griego qalluta ima, wawamantapacha yachakurqayku.

Yachay wasimanta lluqsiytawanqa, juk jatun tiendapi llamkʼarqani. Chay tiendapiqa, Franciamanta warmispa pʼachasta ruwaq kanku. May kusisqa kaq kani, qhapaq warmispa pʼachasninkuta yuyasqaymanjina ruwaspa. Chantapis, Diosta yupaychayta munaspa, Bibliata ñawiriypi miskʼichikuq kani, ñawirisqayta mana entiendespapis.

Chay tiempollapitaq, —1930 wata chayniqta— Chipremanta Theodotos Petrides sutiyuq, juk allin waynata riqsirqani. Payqa, juk sumaq maqanakuq runa karqa, chantapis sumaq riqsisqa pasteleriapi llamkʼaq. Theodotosqa, mayta ñuqata munakuwarqa, yana chukchayuq, juchʼuy warmilla kaptiypis. Payqa, sapa kuti griego qallupi takiykunata takipuwaq. Chaymantataq, 1940 watamanta, 30 de juniopi casarakurqayku. Chay pʼunchaykunaqa, may sumaq ñuqapaqqa karqa. Mamaypa wasinpi tiyakurqayku; 1941 watapitaq, John sutiyuq kuraq wawayku paqarikurqa.

Bibliamanta chiqa kaqta yachakuyku

Theodotosqa, unaytaña religionniykumanta iskaychakuq, Bibliamanta achkha tapuykunayuqtaq karqa. Payqa, mana yachanallayta, Jehovamanta sutʼinchaqkunawan Bibliamanta yachakuyta qallarisqa. Juk pʼunchayqa, wawitaywan wasipi kachkaptiy, juk warmi punkuyta takamurqa, chay warmitaq, Bibliamanta willaywan qillqasqa juk papelta jaywawarqa. Ñuqataq chay pepelta japʼiytawan paywan kʼacha kayta munaspalla ñawirirqani, chantá, librosta rikuchiwarqa. Chay librostaq, ¡qusaypata librosninjina karqa!

Chaymanta nirqani: “Chay librosqa kapuwanña, wasiyman yaykurimuy”, nispa.  Yaykumusqantawantaq, tukuy imata tapuriyta qallarirqani, Eleni Nicolaou hermanataq, pacienciawan chay tapuykunaman Bibliawan kutichiwarqa. Chayta ruwasqanrayku, Diospa Palabranqa, sunquyman yaykuyta qallarirqa. Parlachkaptiykuqa, qusaypa fotonta rikuspa, Eleni nirqa: “¡Riqsini chay runataqa!”, nispa. tʼukulla qhipakurqani, qusay Jehovamanta sutʼinchaqkunap tantakuyninkuman richkasqanta yachaspaqa, imaraykuchus chaytaqa mana willawarqachu. Chay pʼunchay wasiman chamuptintaq, nirqani: “Maymanchus kay domingo risqaykita yachaniña, kay semanataq qamwan riyta munani”, nispa.

Chay tantakuyman risqaypitaq, chunka runajinallata Miqueas librota ukhunchachkasqankuta, rikurqani. Yachachikusqantataq, sumaqta uyarirqani. Chaymantapachataq, hermano George warmin Katerini Petraki nisqawan, sapa viernes Bibliamanta yachachinawaykupaq jamuq kanku. Tatay, iskay wawqisniy ima, mana Jehovamanta sutʼinchaqkunawan yachakunaykuta munarqankuchu. Ñañaytaq, mana imatapis yachakuchkasqaykumanta niqchu, chaywanpis mana jaykʼaq Jehovamanta sutʼinchaqman tukurqachu. Mamaytaqrí, ñuqaykujina Diosmanta yachakuyta qallarirqa. Chaymantataq, Theodotos, mamay, ñuqa ima, Jehovaman qukuspa, Alejandriapi, 1942 watapi mama quchapi bautizakurqayku.

Chʼampaykuna rikhuriyta qallarin

Kay 1939 watapiqa, segunda guerra mundial qallarirqa, chaytaq África suyukama chayamurqa. 1940 wata qallarichkaptintaq, Alemaniamanta soldadosta kamachiq Erwin Rommel, maqanakunapaq sumaq wakichisqa soldadosninwan, El Alamein nisqa llaqtaman chayamurqanku, Alejandriamantaq, Britaniamanta achkha soldados juntʼaykurqanku. Chay iskay tropas maqanakunankuta yuyaspa, chʼaki mikhuyta jallchʼakuyta qallarirqayku. Chaywanpis, juk chhikan tiempoman qusaypa patronnin Port Tawfiq llaqtapi tiendanpi llamkʼanaykuta munarqa, chayrayku chay llaqtaman ripurqayku. Chay llaqtamanta griego parlayniyuq iskay hermanosqa, mana yachaspa maypichus tiyakusqaykuta wasimanta wasi willaspa tarinawaykukama maskʼawarqayku.

Chay llaqtapiqa, Stavros warmin Giula Kypraios, wawasnin Totos, Georgia ima, Bibliamanta yachachiyta qallarirqayku, sumaq amigostaq paykunawan ruwakurqayku. Stavrosqa, maytapuni Bibliamanta yachakuyta munaq, chayrayku wasinmanta relojesta juk horatapuni qhiparichiq, mana cuentata qukunaykupaq, jinamanta tren saqirpariwanaykupaq wasinpi qhipakunaykupaq ima. Qhipakuspataq, tutakama paykunawan Bibliamanta parlaq kayku.

Port Tawfiq llaqtapiqa, juk wata khuskanniyuqta tiyarqayku, mamay unquykusqanraykutaq, Alejandriaman kutipurqayku. Mamayqa, 1947 watapi Diosman chiqa sunqu wañupurqa. Watiqmanta chay kutipi, Jehová amigosniykuniqta kallpachawasqaykuta repararqayku. Chantapis, chay tiempopiqa, achkha misioneros llaqtaykuniqta pasaq kanku, ñuqaykutaq barcosninku sayanankama, wasiykuman waqyarikuq kayku.

Kusiykunataq, llakiykunataq

Kay 1952 watapiqa, iskay kaq waway James sutiyuq paqarikurqa. Ñuqaykuqa, wawasniykuta Diospa kamachiyninpi uywanayku kasqanta yacharqayku. Chayrayku, tantakuykuna ruwakunanpaq, wasiykuta mañarqayku. Chantapis llaqtaykuman jamuq precursoresta, misionerosta ima, waqyariq kayku. Chayta ruwasqaykurayku, kuraq wawaykuqa, waynuchulla precursor kayta qallarirqa. Tutantaq, yachay wasipi yachakuyninta tukucharqa.

Pisi tiemponmanqa, qusay sunqunmanta unquykurqa, doctorestaq, wak llamkʼayta maskʼakunanta nirqanku. Chaypachaqa, sullkʼa wawayku tawa watitayuqllaraq karqa. ¿Imaynatá ñawpaqman lluqsiykuman karqa? Jehová Diospa  nisqanpi atienekurqayku, pay nin: “Ama manchachikuychu, imaraykuchus noqaqa qanwampuni kashani”, nispa (Isa. 41:10). Chaymantá, maytapuni kusikurqayku 1956 watapi, Ismailía llaqtaman precursoresjina llamkʼanaykupaq waqyariwasqaykumanta, chayqa, canal de Suez nisqamanta qayllapi kachkan. Chay wataspiqa may llakiy Egiptopi karqa, hermanosniykutaq sunquchanata, kallpachanata ima, necesitarqanku.

Kay 1960 watapiqa, sapa jukniyku, juk maletallawan Egiptomanta lluqsirqayku. Chaymantataq, qusaypa llaqtanman ripurqayku. Chay tiempopaqtaq, sinchi unqusqaña karqa, manaña llamkʼaytapis atirqachu. Chaywanpis, Diosta yupaychaq juk familia, paykunawan tiyakunaykupaq, wasinkuman waqyawarqayku. Chaymanta iskay watanmantaq, qusay wañupurqa, ñuqataq sapay James sutiyuq wawitaywan qhipakurqani. Juknin wawaytaq, Chiprellapitaq familianwan tiyakuchkarqa, chayrayku mana yanapayta atiwarqachu.

Llakiy tiempopipis Jehová jarkʼallawaykupuni

Qusay wañupuptinqa, Stavros warmin Dora Kairis nisqawan, wasinkuman tiyakunaykupaq waqyawarqayku. Chayrayku, qunqurikuspa Jehová Diosta jarkʼallawasqaykumantapuni, pachis nirqani (Sal. 145:16). Kay hermanos, wasinkuta vendespa, juk musuq wasita ruwachirqanku, chaypi Tantakunapaq Wasitawan ruwarqanku, chayllapitaq, may kʼachas kaspa, ñuqapaq, wawaypaq ima, iskay cuartosta ruwachipuwarqayku.

Tiempowanqa, James casarakapun, chantataq, warminwan khuska precursoresjina llamkʼayta qallarirqanku. Tawa wawasninmanta ñawpa kaq, paqarikunankamataq, precursores karqanku. Kay 1974 watapi, hermano Knorr Chipreta waturiq jamurqa, chaymanta iskay watanmantaq, kay llaqtapi achkha chʼampaykuna rikhuriyta qallarirqa. * Chayraykutaq, achkha runas, wakin Jehovamanta sutʼinchaqkunapis, wasinkumanta ayqispa, wak lugaresman ripurqaku. John sutiyuq wawayqa, warminwan, kimsa wawasninwan ima, Canadá suyuman ripurqanku. Chayjina ñakʼariykuna kaptinpis, Chipre llaqtapi Diosmanta willaqkunaqa, mayta achkhayarqanku.

Rentayta japʼiyta qallariptiyqa, ñuqapis astawan Diospa Reinonmanta willamunaypaq tiempochakurqani. Chaywanpis mana unayraqchu, umaymanta unquykusqayrayku, James sutiyuq wawaypa familianwan tiyakuq ripusqayqa. Chaymanta qhipamantaq, astawan unquykusqayrayku hospitalman apawarqanku, chaypitaq unayta qhipakurqani, lluqsimuytawantaq, machu runasta qhawanapaq wasiman, apawarqanku. Manchay nanayniyuq kaspapis, doctoresta, machu runa masisniyta, waturikuq jamuqkunata ima, Diosmanta willallanipuni. Chantapis astawan Bibliamanta yachakuni, hermanospa yanapayninwantaq, Libromanta yachaqanapaq tantakuyman riyta atini.

Llakiy pʼunchaykunapi sunquchallawankupuni

Maytapuni sunquchawan, qusaywan Bibliamanta yachachisqayku hermanosmanta, allin willaykunata uyarisqay. Chay hermanospa wawasninku, allchhisninku ima, precursoresjina llamkʼachkanku, Australia, Canadá, Grecia, Inglaterra, Suiza llaqtapi ima. Johnqa, warminwan, juk wawanwan ima, Canadapi tiyakuchkan. Kuraq wawankuqa, qusanwan khuska precursores kanku, sullkʼa kaqtaq Linda sutiyuq, qusan Joshua Snape nisqawan, kay Escuela de Galaad nisqaman rinku (clase 124).

James wawayqa, warminwan Alemaniaman ripurqanku. Wawasninmanta iskaytaq, Betel wasipi llamkʼachkanku, juk Grecia suyumanta sucursalpi, juknintaq, Alemaniamanta sucursalpi. Qhari wawasninmanta aswan sullkʼa kaq, hermananjina, precursor Alemaniapi kachkan.

¡Maytapuni mamayman, munasqa qusayman ima, watiqmanta kawsarimuptinku willanayku kanqa! May kusisqachá, kanqanku wawasninkuman juk sumaq herenciata saqisqankuta yachaspaqa. *

[Sutʼinchaykunasnin]

[24 paginapi sutʼinchaynin]

Watiqmanta Jehová, Diosta yupaychaq amigosniykuniqta kallpachawasqaykuta yachayku