Qutuchakuypaq Torremanta Qhawaq musuq revista

KAY killamantapacha, qutuchakuypaq urqhusqa Torremanta Qhawaq musuq revista kachkan. Kunanqa, sutʼinchasusqayku imaynachus kay revista kanqa.

Qutuchakuypaq urqhusqa revistaqa, Jehovamanta sutʼinchaqkunapaq, Bibliamanta yachakuqkunamanta ñawpaqman riqkunapaq ima, wakichisqa kachkan. Kay revistaqa, killapi juklla lluqsimunqa, tantakuypi ukhunchanapaqtaq, 4 chayri 5 yachaqanasniyuq kanqa. Maykʼaqchus, mayqin yachaqanachus ukhunchakunanta, kay revistap tapanpi rikhurinqa. Tukuypaq urqhusqa Torremanta Qhawaq revistamanta nisqaqa, kay revistap tapanqa mana dibujosniyuqchu kanqa, imaptinchus kay revistaqa, mana runaman willaypi saqinapaqchu.

Kay revistamanta 2 paginanpiqa, imapaqchus qutuchakuypaq urqhusqa revista wakichisqa kasqanta, sutʼinchan. Chaytaq, Torremanta Qhawaq revistamanta tantakuypi umallirichiqkunata, wasinkupi wakichikuchkaptinku, allinta yanapanqa. Chantapis chay paginallapitaq, ima yachaqanaswanchus kay revistapi rikhurisqanta willakun.

Tantakuypi ukhunchanapaq yachaqanasqa, enero killamantapacha aswan pisi parrafosniyuq kanku. Chaytaq, Bibliamanta pʼitikunata astawan ñawirikunanpaq ruwakun. Wakichikuchkaptiykiqa, kay revistapi tukuy rikhuriq pʼitikunata, ñawirinaykita mañayku. Chantapis wakin pʼitip ladonpiqa “ñawiriy” rimay rikhurin, chay pʼitikunataq, tantakuypi ñawirikunqa. Tiempo kaptintaq, chay wak pʼitikunapis ñawirikullanmantaq. Wakin pʼitikunap ladonpitaq, “kikinchay” nisqa rimay rikhurin. Chay pʼitikunaqa, mana tantakuypi ñawirikunqachu. Chay pʼitikunaqa, chay yachachiyta astawan sutʼinchanallanpaq kachkan. Chayrayku, allin kanman tantakuypaq wakichikuchkaptiyki, chay pʼitista ñawirinayki. Ajinamanta, tantakuypi chay pʼitikunamanta parlariyta atinki.

Jallpʼantinpi Jehovamanta sutʼinchaqkuna, imaynatachus llamkʼasqankumanta willayqa, manaña Torremanta Qhawaq revistapi rikhurinqachu. Chay willayqa, 2008 watamantapacha Reinomanta Willayninchikpi lluqsichkan. Chantapis willarqaykujina, qutuchakuypaq urqhusqa revistapiqa, mana tantakuypi ukhunchanapaq yachaqanasllachu lluqsimunqa. Chaykuna mana tantakuypi ukhunchakuptinpis, allin kanman chaykunata ñawirinayki, imaptinchus chaykunapis ‘allin kamachi, yuyayniyuqpa’ wakichisqan kachkan (Mat. 24:45-47).

Chantapis, qutuchakuypaq urqhusqa revista, tukuypaq urqhusqa revista imaqa juklla, Torremanta Qhawaq, Jehová Diospa Reinonmanta willachkan revista. Chayrayku, 2 kaq paginapi rikhuriq willayqa, iskaynin revistaspi rikhurin. Chantapis, iskaynin revistas, watantinpi lluqsimusqanmanta, juk libropi lluqsinqa. Chantá “¿Yuyarikunkichu?” nisqa yachaqanaqa, qutuchakuypaq urqhusqa revistapi rikhurinqa, chaypitaq iskaynin revistasmanta allin yachachiykunata sutʼinchakunqa.

La Atalaya (Torremanta Qhawaq) revistaqa, 1879 watamantapacha imapaqchus ruwasqa kasqanta, chiqamanta juntʼachkan. Arí, jatun maqanakuykuna kaptinpis, qullqi pisiyaptinpis, qhatiykachaq kaptinpis, Diospa Reinonmanta chiqata willachkallanpuni. Jehovap bendicionninta mañakuyku, kay revista imapaqchus ruwasqa kasqanta, juntʼanallanpaqpuni. Chantapis, qutuchakuypaq urqhusqa Torremanta Qhawaq revistawan sumaqta yanapachikunaykipaq, Jehovap bendicionninta mañayku.