Diosmanta plazapi willakun

Apóstol Pabloqa, sapa pʼunchay Atenas plazapi, Jesucristomanta allin willaykunata willaq (Hech. 17:17). Pabloqa, chay plazaman willaq riq, chaypi achkha runas kasqanrayku.

Chaymanta yaqha 2.000 watasninman, Diospa kamachisninqa, maypichus achkha runas kanku chayman Diospa Reinonmanta willaq, richkallankupuni. Kay tiempopi wakin cristianosqa, plazaman, mercadoman, centro comercial nisqaman ima, willaq rinku. Chaypitaq directormanta chayri, dueñonmanta juk lugarta alquilakunku, chaypi Bibliamanta urqhusqa publicacionesta rikuchinankupaq.

Kayta qhawarina, kay centro comercial Nueva Jersey (Estados Unidos) nisqapi, maypichus hermanos publicacionesta runaman rikuchinankupaq, kay: “Imatataq familianchikpi jukchasqa kanapaq ruwawaq”, nisqamanta sutʼincharqanku. Chay ruwasqankupi, ¿imataq rikukurqa? Juk pʼunchayllapi, 153 librosta suqta simispi, runasman jaywarqanku.

Juk hermana chay publicacionesmanta sutʼinchachkarqa chayman juk warmi chimpaykuspataq allinta uyarisqa. Chay warmiqa, familiapi, chayri kawsayninchikpi, Diosta ñawpaqman churayqa, may allin kasqanta reparasqa, chaymanta kay: Aprendamos del Gran Maestro, Imaynatá familiaykipi kusisqa kawsakuwaq, Lo que los jóvenes preguntan. Respuestas prácticas, librosta, wasinman apakurqa.

Chawpi pʼunchay pasaytataq, juk runa chay libros kachkarqa chayman qayllaykurqa Los jóvenes preguntan librotataq qhawaspa qhipakurqa, chayta rikuspa apaq hermanaqa, tapusqa: “¿Kay librosmanta mayqillantapis munankichu?”, nispa. Chay runataq, Los jóvenes preguntan librota makinwan rikuchisqa arí nisqa, hermanataq chay librota jaywarqa. Chantá chay runaqa, kimsa  wawasniyuq kasqanta nirqa —iskayqa waynuchusña kachkasqanku— nisqa, chantapis chay runaqa nillarqataq payqa, semanapi juk kutita familianwan tantakusqanta parlarinankupaq. Chay librota qhawaspataq kay libroqa familiaywan parlarichkaptiy yanapawanman nisqa. Chayta niptin hermanaqa, Imaynatá familiaykipi kusisqa kawsakuwaq librotawan rikuchisqa, sutʼincharqataq chay libropi, familiapi imastachus ruwanankupaq, yanapaykuna kasqanta. Chay runaqa mayta agradecekuspa, suqumantapacha qullqita churaspa, chay librostataq apakusqa, wasinpi Bibliamanta yachachinankutapis munasqa.

¿Imatá chay hermanos, centro comercial nisqapi willasqankumanta nirqanku? Juk hermana, jinata nirqa: “Chaypi willasqaykumanta mayta kusikuni imaptinchus, ¡may sumaqpuni jinata willayqa!”, nispa. Wak hermanataq nirqa: “Jehová nisqanmanjina, kay allin willaykunaqa, Jallpʼap kʼuchusninkama chayananta, chaytaq juntʼakuchkan. Paramus (Nueva Jersey) nisqapipis, kay allin willaykunaqa, tukuy laya simita parlaqkunaman chayachkan. Chantapis jinata willayqa may allinpuni. Tukuyniyku chaypi willaqkunaqa, mayta kusikurqayku. Chantapis chay pʼunchay tukukuytaqa mana ripuyta munarqaykuchu”, nispa.

Yachanchikjina Diospa Reinomantaqa wasimanta wasi astawan willanchik (Hech. 20:20). Chaywanpis wakjinasmanta atikullantaq willayqa. Qampis, ¿jinata willayta munawaqchu? Ichá mercadop plazanpi, chayri centro comercial nisqapi, Diosmanta willayta atiwaq.