Jesusjina “Supaypa contranta sinchʼita” sayana

“Kuraj Supaypa contranta sinchʼita sayaychej, paytaj qankunamanta ayqenqa.” (SANT. 4:7.)

1. Jesús kay Jallpʼapi ¿imawantaq churanakunan karqa, chantá imataq paypaq karqa?

JESUCRISTOQA, kay Jallpʼaman jamuptin, Supay payman churanakunanta yacharqa, imatachus Dios Edén huertapi, Satanasman nisqanta yacharqa; Dios nirqa: “Qantawan, warmitawan chejninachisqaykichej [nisunman janaqpachapi tukuy angelkuna Jehovap llaqtan kaqkuna]. Jinallataj mirayniykiwan, mirayninwampis chejninakonqanku. Miraynin [Jesucristo] umaykita saruspa, pʼaltarparenqa, qantaj chaki talonninmanta khaninki”, nispa. (Gén. 3:14, 15; Apo. 12:9). Jesusta kay Jallpʼapi wañuchirqanku, chaytaq Satanás chakinmantapis khanichkanmanjina karqa. Chaytaq pisi tiempollapaq karqa, imaraykuchus Jehovaqa janaq pachapaq kawsarichirqa. Kataritataqri umanta pʼaltarpanqa, jinamanta wiñaypaq wañunqa (Hechos 2:31, 32; Hebreos 2:14, ñawiriy).

2. ¿Imaraykutaq Jehová mana iskaychakurqachu, Jesús, Supaypa churanakusqanman sinchita sayananmanta?

² Jehovaqa yacharqa, Jesús jallpʼapi kachkaspa, Supay churanakuptin sinchita sayananta, kamachiynintataq juntʼananta. ¿Imaraykutaq Jehová chaymanta mana iskaychakurqachu? Imaraykuchus paytaqa maychhika unayña ruwasqanrayku, sumaqta riqsirqa. Chantapis, “yanapaq maestrojina”, ‘tukuy ima ruwasqa kaqmantataq aswan ñawpaq kaq’, kasukuq, chiqa sunqu kasqanta ima, yacharqa (Pro. 8:22-31; Col. 1:15, NM). Chayrayku Jehová, Jesusta, kay Jallpʼaman kachamuspa, Supay payta  wañuykama pruebaman churananta saqirqa, Diosqa yachallarqataq, Churin wañunankama payta mana wasanchananta (Juan 3:16).

Jehová kamachisninta jarkʼan

3. ¿Imaynatá, Supay, Jehovap kamachisninta qhawan?

³ Jesusqa, discipulosninman Supay ‘kay pachamanta kamachiq’ kasqanta, paytajinataq, paykunatapis qhatiykachananta nirqa (Juan 12:31; 15:20). Kay pachapi runasqa, Satanaspa kamachiyninpi kasqankurayku, chiqa cristianosta, Jehovata yupaychasqankurayku, chiqan kaqmanta willasqankurayku ima, chiqninku (Mat. 24:9; 1 Juan 5:19). Supayqa, Cristowan janaqpachamanta paywan Kamachimunankupaq Diospa akllasqasnin kaqkunawan, mayta churanakun. Jinallatataq, may chhika Jehovamanta sutʼinchaqkunata, chinkachiyta munan, pikunachus tʼikapacha Jallpʼapi wiñay kawsayta suyakuchkanku. Chayrayku Biblia jinata nin: “Enemigoykichej Kuraj Supayqa, phiña león jina qhaparirispa muyuykachasunkichej, mayqellantapis oqoykunampaj”, nispa (1 Ped. 5:8).

4. ¿Imataq, Diospa llaqtan sinchita, Supayman sayaykusqanta rikuchiwanchik?

⁴ Jehovap llaqtanqa, Supaypa churanakuyninman, sinchita sayan. Kaypi tʼukurina. Pachak pasaq wataspi, may saqra kamachiqkunaqa, Diospa llaqtanta chinkachiyta munarqanku. Chaywanpis mana atinkuchu, imaptinchus kay tiempopi, Jehovamanta sutʼinchaqkunaqa, yaqha qanchis junu jinaña, pachak waranqamanta kuraq qutuchakuykunapi, kachkanchik. Chay qhatiykachaqkuna, ¿maypitaq kachkanku? ¡Paykunamá chinkankuqa!

5. ¿Imaynatataq, Isaías 54:17 pʼiti, kay tiempopi juntʼakun?

⁵ Jehovaqa warmintajina Israel llaqtata nirqa: “Mana mayqen arma ruwasqankupis qanta chinkachisunampaj jina kanqachu. Pichus contraykita parlajtaqa juezpa ñawpaqempi chʼinyachillankipuni. Chay imasta noqaqa kamachisniyman qoni, atipanakupis noqamanta llojsenqa”, nispa (Isa. 54:11, 17). Diospa llaqtan kay ‘qhipa sajra pʼunchaykunapi’, Jehovap nisqan juntʼakuqta, rikunku (2 Tim. 3:1-5, 13). Supay, churanakuwasqanchikman, sinchita sayanallapuni, imaptinchus Jehová ñuqanchikwan kachkan, manataq chinkachinawanchikta saqinqachu (Sal. 118:6, 7).

6. ¿Imatataq Daniel libropi, Satanaspa kamachiyninmanta nin?

⁶ Pisi tiempomantawan kay saqra pacha, Satanaspa millay ruwaykunasnin ima, wiñaypaq chinkanqa. Profeta Daniel, Diospa espiritunniqta, jinata qillqarqa: “Chay reykuna [kay tiempopi kamachiqkuna] kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajri wiñaypaj sayanqa”, nispa (Dan. 2:44). Chay profecía juntʼakuptinqa, kay Jallpʼataqa manaña Satanaschu, nitaq juchasapa runaschu kamachinqanku. Astawanpis, Supaypa saqra pachan wiñaypaq chinkanqa, Diospa Reinontaqri, kay pachata kamachinqa (2 Pedro 3:7, 13, ñawiriy).

7. ¿Imaynamantá yachanchik, Supayta atipayta atisqanchikta?

⁷ Ñuqanchikqa, kay pacha chinkachisqa kaptinpis, Jehovap llaqtan kanallantapuni, bendicionnintapis japʼinallantapuni ima, yachanchik (Salmo 125:1, 2, ñawiriy). Chaywanpis, ¿imatataq sapa jukninchikmanta nisunman? Bibliaqa, Jesusjina, Supayta atipayta atisqanchikta niwanchik. Chantapis, apóstol Juan, Jesucristo nisqanta qillqasqanpi, Satanás churanakuchkaptinpis, kay saqra pachap tukukuyninmanta, kay jallpʼapi kawsanankupaq ‘may chhika runas’ kawsayniyuq lluqsinankuta niwanchik. Paykunataq qhaparinqanku: “Salvacionqa Diosninchejpata, pichus kamachina tiyanapi tiyasqa kashan, chaypata, Corderoj, [Jesucristoqtawan]”, nispa (Apo. 7:9-14). Bibliaqa, Diospa akllasqasnin, “waj ovejas” ima, Satanasta atipanankuta nin (Juan 10:16; Apo. 12:10, 11). Chaywanpis, atipanankupaqqa atisqankuta kallpakunanku tiyan, Dios, Supaymanta jarkʼanantataq, mañakunanku tiyan (Mat. 6:13).

 Jesús, Supayta atipasqanmanta yachaqakuna

8. ¿Imawantaq Supay ñawpaqta, Jesusta chʼin pampapi, pantachiyta munarqa, chantá Jesús imatataq kutichirqa?

⁸ Diospa churinqa, Supay pantachiyta munaptinpis, Diosman chiqa sunqullapuni karqa. Supayqa, Jesusta chʼin pampapi kachkaptin, Jehovata mana kasunanpaq, tukuy imaymanamanta pantachiyta munarqa. Ñawpaqtaqa, tawa chunka pʼunchayta, tutata ima, Jesús mana mikhusqanmanta yarqhasqa kachkaptin. Jinata nirqa: “Diospa Churinchus kanki chayqa, niy kay rumista tʼantaman tukunankuta”, nispa. Jesustaq, atiyninta mana paypa munaynillanpaq apaykachayta munaspa, jinata kutichirqa: “Diosmanta Qhelqasqapi nin: Mana tʼantallawanchu runaqa kawsanqa: astawanqa, Diospa siminmanta tukuy llojsimoj palabraswan kawsanqa”, nispa (Mat. 4:1-4; Deu. 8:3).

9. ¿Imaraykutaq Supay, sunqunchikpa munayninman urmachiyta munawaptinchik, sinchita sayananchik tiyan?

⁹ Kay tiempopi Satanasqa, Jehovap kamachisninta sunqunkuq munayninpi urmachiyta munan. Chaytaq kanman, khuchichakuy, mayqintachus kay pachaqa mana juchapaqchu qhawan. Chayrayku chay tuqllaman mana urmanapaq sinchita kallpakuna. Bibliaqa, chaymanta parlaspa sutʼita nin: “Manachu yachankichej mana cheqan kajta ruwajkunaqa Diospa reinonta herenciata jina mana japʼinankuta? Ama pantaychejchu: Soltero kashaspa khuchichakojkuna, lantista yupaychajkuna, casarasqa kashaspa wajwan khuchichakojkuna, qhari kashaspa warmiman tukojkuna, qharipura jinanakojkuna[...] manapuni Diospa reinontaqa herenciata jina japʼenqankuchu”, nispa (1 Cor. 6:9, 10). Rikunchikjina, pikunachus chay khuchi kawsayta mana qhisachaqkunaqa, manapuni Diospa musuq pachanman yaykunqankuchu.

10. Mateo 4:5, 6 nisqanmanjina, ¿Imawantaq Supay, Jesús Jehovaman juntʼa sunqu kasqanta saqichiyta munarqa?

¹⁰ Bibliaqa, Supay, Jesusta wakjinamantañataq chay chʼin pampapi urmachiyta munasqanmanta nin: “Kuraj Supayqa Jerusalén llajtamanñataj Jesusta pusaspa, Temploj torren patapi rikhuricherqa. Nerqataj: Diospa Churinchus kanki chayqa, uraman wijchʼuykukuy, imaraykuchus Diosmanta Qhelqasqapi nin: Diosqa angelesninta kachamusonqa makisninkuwan japʼisunankupaj, chakiykita ama rumiman takakunaykipaj”, nispa (Mat. 4:5, 6). Jesuschus, Supaypa nisqanmanjina ruwanman karqa chayqa, paypuni Mesías kasqanta rikuchinman karqa. Chaywanpis, jinata ruwaspaqa, uqharikuq kasqanta rikuchinman karqa, Diostaq chay ruwasqanta qhisachanman karqa. Astawanpis Jesusqa, juktawan Jehovaman chiqa sunqu kasqanta rikuchirqa, jinata kutichispa: “Qhelqasqallataj kashan: Señor Diosniykita ama pruebaman churankichu”, nispa (Mat. 4:7; Deu. 6:16).

11. ¿Imawantaq Supay urmachiwasunman, chantá chayman urmaptinchik ima llakiykunapitaq rikukusunman?

 ¹¹ Kay tiempopi Satanasqa, ichapis Jehovata pruebaman churanapaq tanqawasunman. ¿Imaynamanta? Ichapis kay pachapaq allinpaq qhawasqa kayta munasunman. Chaytaq kanman, kay pachamanta runasjina, pʼachallikuyta munay, sunquta kusichinapaq mana allin kaqkuna ima. Chayrayku, Biblia nisqanta mana kasuspa, kay pachamanta runasjina ruwasun chayqa, ¿suyasunmanchu chay ruwayta akllasqanchikmanta, llakiypi rikukuptinchik, Jehová angelesninta jarkʼanawanchikta? Mana ¿icharí? Kamachiq David, Betsabewan, juchachakusqanmanta sunqumantapacha pesachikuptinpis, ruwasqasninrayku llakiykunata tarikusqanmanta, Jehovaqa mana jarkʼarqachu (2 Sam. 12:9-12). Chayrayku, Jehovata ama pruebaman churanachu, kay pachamanta runaswan masichakuspa (Santiago 4:4; 1 Juan 2:15-17, ñawiriy).

12. Kay Mateo 4:8, 9, pʼitispi, ¿ima pantachiymantataq parlachkan, chantá, imatá Diospa Churin ruwarqa?

¹² Satanasqa, kimsa kaqpi, Jesusta kay pachamanta kamachiq kananta nirqa. Chayrayku, kay pachamanta kamachiqkunata, qhapaq kayninkutawan rikuchispa, nirqa: “Noqa kay tukuy imata qosqayki, qonqorikuspachus yupaychawanki chayqa”, nispa (Mat. 4:8, 9). Supayqa, Jehovalla yupaychana kasqanta yachachkaspa, pay yupaychachikuyta munarqa, jinamanta Jesusta Diosta wasanchachiyta munarqa. Qallariypipis chay, yupaychachikuyta munayllataq, Supaytaqa, qallariypi, Jehovamanta karunchakunanpaq tanqarqa, jinamanta, saqraman, chiqnisqaman, munaynillanta maskʼaqman ima, tukuchirqa (Sant. 1:14, 15). Jesusrí, janaq pachapi Tatanman chiqa sunqullapuni kananpaq wakichisqa kachkarqa. Chayrayku jinata nirqa: “Riy kaymanta, Satanás. Diosmanta Qhelqasqapi nin: Señor [Jehová] Diosniykita yupaychanki, pay sapallantataj sirvinki”, nispa. Diospa Churinqa, juktawan mana manchachikuspa Supayman sinchita sayaykurqa, imaraykuchus Supaypaq ni ima kananta munarqachu. ¡Ni jaykʼaq yupaychanmanchu chay wasanchaqtaqa! (Mat. 4:10; Deu. 6:13; 10:20.)

“Supaypa contranta sinchʼita sayaychej, paytaj qankunamanta ayqenqa”

13, 14. a) Supay, Jesusman kay pachamanta llaqtasta rikuchichkaspa, ¿imatataq quyta munachkarqa? b) ¿Imaynasmantataq kay tiempopi Satanás pantachiyta munawanchik?

¹³ Supayqa, Jesusman kay pachamanta tukuy llaqtasta chayri kamachiykunata rikuchispaqa, ni pi runamanjina chay atiyta rikuchichkarqa. Chayrayku Satanasqa, Jesús kay Pachamanta astawan atiyniyuq kamachiq kayta munananta yuyarqa. Kay tiempopi Supayqa, mana Jesusmanjinachu kay pachamanta kamachiykunata quyta munawanchik, chaywanpis, imatachus rikusqanchikwan, uyarisqanchikwan, yuyasqanchikwan ima, pantachiyta munawanchik.

¹⁴ Supayqa, atiyninpi kay pacha kasqanrayku internetta, teleta, revistasta, wakkunata ima, apaykachachkan. Chayrayku, runap ñawirisqan, uyarisqan, qhawasqan ima, khuchichakuymanta, maqanakuymanta ima, juntʼa kachkan. Chantapis, tukuy imamanta willakun, imastachus mana necesitasqanchikta rantiyta munananchikpaq. Jinamanta Supayqa, sunqunchik qhapaqyayta munananpaq tanqawanchik. Chaywanpis, chay, willaykunata mana ñawirispa, qhawaspa, uyarispa ima, “riy kaymanta Satanás”, nichkanchik. Jinata qhisachaspaqa, Jesusjina ruwachkasqanchikta rikuchinchik. Chantapis, Jehovamanta sutʼinchaqkuna, Jesuspa discipulosnintaq kasqanchikta, mana manchikuspa llamkʼayninchikpi, yachay wasipi, familiaresninchikman, vecinosninchikman ima, willaspa, mana kay pachamanta kasqanchikta rikuchillanchiktaq (Marcos 8:38, ñawiriy).

15. ¿Imaraykutaq sumaq wakichisqa kananchik tiyan?

¹⁵ “Kuraj Supay”, Jesusta, kimsa kutipi, Diosman chiqa sunqu kasqanta mana pʼakichiyta atispa “riporqa” (Mat. 4:11). Chaywanpis, mana jinalla qhipakurqachu, imaptinchus Bibliaqa jinata nin: “Tentayta tukuytawan, pachampi saqespa, pisi tiempota chinkarerqa”, nispa (Luc. 4:13). Ñuqanchikpis, ichá juk kuti mana  juchaman urmanchikchu, chaymantataq, Jehovaman graciasta qunchik, chaywanpis yanapayninta mañakunallapuni. Amataq qunqakunachu Satanás, pantachiyta munallawasqanchiktapuni, maypachachus paypaq aswan allin kaptintaq, nisunman mana sumaq wakichisqa kachkaptinchik, urmachiyta munawasun. Chayrayku sumaq wakichisqa kayqa may allinpuni, ima pantaymanpis mana urmanapaq, Jehová Diosninchiktataq, yupaychanallapaqpuni.

16. ¿Ima sumaq yanapaytataq Jehová quwasun, chantá imaraykutaq mañakunallapuni tiyan?

¹⁶ Supaypa tʼuqllasninman mana urmanapaqqa, Jehovamanta, espíritu santonta, mayqinchus tukuy imamanta aswan atiynin, chayta mañakunallapuni, mana iskaychakuspa. Chay espíritu santop yanapayninwanqa, kallpanchikwan imastachus mana ruwayta atisqanchikta ruwasunchik. Chantapis Jesús, Dios espiritunta discipulosninman, qunanmanta, jinata nirqa: “Qankunachus sajra [juchamanta] runas kashaspa, allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Espíritu Santota qonqa mañakojkunaman”, nispa (Luc. 11:13). Chayrayku Jehovap, may atiyniyuq espíritu santonta mañakunallapuni, imaptinchus chayqa, Supayta atipanapaq yanapawasun. Supaypa tukuy laya tuqllasninman mana urmanapaqqa, Diosmanta yanapata mañakunallapuni, Dios pʼachatajina maqanakunapaq quwasqanchiktataq, tukuyninta churakuna (Efe. 6:11-18).

17. ¿Imataq Jesusta, Supaypa contranta sinchita sayaykunanpaq yanaparqa?

¹⁷ Bibliaqa, Jesusta imapiwanchus, Supayman sinchita sayaykunanpaq yanapasqanta rikuchin, ñuqanchiktapis chay yanapallawasunmantaq, payqa: ‘Ñawpaqinpi kusiyta rikusqanrayku kurkuta muchurqa, pʼinqaypi rikhurinanta qhisachaspataq, Diospa pañanman tiyaykukurqa’, nispa (Heb. 12:2). Kikillantataq, ñuqanchikpis Jesusjina, Jehovap kamachiyninman sayaykuspa, sutinta jatunchaspa, wiñay kawsaymanta japʼinanchikta mana qunqakuspa ima, kusiyta tarisunchik. Chayrayku, maytachá kusikusun Satanás, saqra pachan ima, chinkachisqa kaptinqa, rikusuntaq kay profecía juntʼakuqta: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku” nisqata (Sal. 37:11). Chayrayku, Jesusjina, tukuy kallpanchikwan, Supaypa contranta sayaykuna (Santiago 4:7, 8, ñawiriy).

¿Imaynatataq kutichiwaq?

• ¿Imastaq Jehová llaqtanta jarkʼasqanta rikuchiwanchik?

• Jesús, Satanaspa contranta sinchita sayaykusqanmanta, ¿imatá yachakusunman?

• ¿Imaynasmantataq Supaypa contranta sayaykusunman?

[Tapuykuna]

[29 paginapi dibujo/foto]

Kay pachawan masichakusun chayqa, Diospa enemigonman tukusun

[31 paginapi dibujo/foto]

Satanás tukuy llaqtasta quyta munaptin, Jesusqa qhisacharqa