‘Mayordomosjina Diospa yanapayninwan wakkunata yanapaychik’

“Hermanos jina tukuy sonqo munanakuychej, ujkuna ujkunata aswan allimpaj qhawaspa.” (ROM. 12:10.)

1. ¿Imatataq Biblia sutʼita niwanchik?

BIBLIAQA sapa kuti sutʼita rikuchiwanchik sunqu pʼakisqa kachkaptinchik, Jehová yanapanawanchikta. Qhawarinachik kay sumaq sunquchay rimaykunata: “Tata Diosqa tukuy urmajkunata oqharispa sayachin, jinallatataj kʼumuykachachisqastapis aysarin”. “Payqa sonqo pʼakisqasta thañichin, nanasqasninkutataj jampiykun” (Sal. 145:14; 147:3). Janaqpachapi kaq Tatanchik nin: “Noqaqa paña makiykimanta japʼisoj Señorniyki Tata Dios kani, niykitaj: Ama manchachikuychu; noqa yanapasqayki”, nispa (Isa. 41:13).

2. ¿Imaynasmantataq Jehová kamachisninta yanapan?

² Jehová janaqpachapi tiyakusqanrayku, ¿imaynatá makinchikmanta japʼiwasunman chantapis sinchi llakiymanta uqhariwasunman? Tukuy imaymanamanta yanapaspa. Ñawpaqtaqa, espíritu santota quwanchik, ‘chay may sumaq atiy’ kapunawanchikpaq (2 Cor. 4:7; Juan 14:16, 17). Chantapis Biblianiqta kallpachawanchik, mayqintachus pay yuyaycharqa (Heb. 4:12). Jehovaqa jukjinamanta kallpachallawanchiktaq. ¿Imaynamanta? Apóstol Pedrop ñawpa kaq cartanta qhawarina, kay tapuymantaq kutichiwasun.

‘Diospa kʼacha yanapayninqa’ tukuy imaymanamanta rikukun

3. a) ¿Imatataq Pedro chʼampaykunamanta nin? b) Pedro ñawpa kaq cartan tukukuyninpi, ¿imataq kanantapuni nirqa?

³ Pedroqa cartanpi, akllasqa cristianosta nirqa, may chhika imas kusikunankupaq kasqanta, imaptinchus may sumaq tʼinkata suyachkarqanku. Chantapis, pay nillantaq: ‘Tukuy imaymana llakiykunawan pisi tiempota ñakʼarinankuta’ (1 Ped. 1:1-6). Rikunchik Pedroqa mana juk chʼampayllamantachu parlachkasqanta. ¿Atinkumanchu hermanos chay chʼampaykunata atipayta? Pedroqa sutʼita rikuchiwanchik, ima chʼampayllapis kachun, Jehová atipanankupaq yanapanantapuni. Chaytataq cartanpa tukukuyninpi tarinchik, maypichus apostolqa ‘tukuy imaq tukukuyninmanta’ parlan (1 Ped. 4:7).

4. ¿Imaptintaq kay 1 Pedro 4:10 sumaqta kallpachawanchik?

⁴ Pedro nirqa: “Sapa ujniykichejman Diosqa ruwanapaj uj atiyta qosorqachej, qankunataj chaywan ujkunata sirviychej. Sumaj mayordomos jina Diospa imaymana kʼacha yanapayninwan” (1 Ped. 4:10). Sutʼita rikunchik, “imaymana” rimayta watiqmanta uqharisqanta. Arí, Pedroqa tukuy imaymana chʼampaykuna kaptinpis, Diospa kʼacha yanapaynin tukuy chay chʼampaykunata atipanapaq yanapanawanchikta niwanchik. ¿Imaptintaq chayta yachay mayta sunquchawanchik? Chayqa, sapa chʼampay rikhuriptin Diospa kʼacha yanapaynin, imaynamantachus chay chʼampayta atipanapaq yanapanawanchiktapuni yachachiwanchik. Reparankichu, ¿imaynamantachus Jehová kʼacha yanapayninta rikuchiwasqanchikta? Arí, Jehovaqa, hermanosninchikta yanapanawanchikpaq tanqanman.

 Puraqmanta yanapanakuna

5. a) ¿Imatá cristianos ruwananchik tiyan? b) ¿Ima tapuykunataq chaymanta kan?

⁵ Pedroqa tukuy cristianosman kay jinata nirqa: “Tukuy imamanta astawanqa qankunapura tukuy sonqo munanakuychej”. Chantá nillantaq: ‘Sapa ujniykichiqman Dios ruwanaykichikpaq juk atiyta qusurqachik chaywan uqkunata sirviychiq’, nispa (1 Ped. 4:8, 10). Ari, sapa jukninchik hermanosninchikta kallpachananchik tiyan. Jehovaqa tukuyninchikman juk sumaq kapuyta quwanchik, chaywantaq wakkunata yanapananchik tiyan. ¿Imamantataq parlachkanchik? Pedroqa juk atiyta quwasqanchikta nin. ¿Imataq chay atiy? Chantá, ¿imaynatá chaywan tukuy imapi wakkunata yanapayta atisunman?

6. ¿Mayqinkunataq wakin atiykunata japʼisqanchik?

⁶ Diospa Palabranqa: “Tukuy ima allin kaj [atiyta], kʼacha kaj imaqa patamanta” kasqanta nin (Sant. 1:17). Jehovaqa kʼacha kayninta rikuchiwanchik, chay atiykunata quspa. Chaywanpis astawan sumaq atiyta paymanta japʼisqanchikqa, espíritu santo. Chay atiyqa cristianojina munakuyta, kʼacha kayta, mana phiñakuyniyuq kayta ima, rikuchinapaq yanapawanchik, chaykunataq hermanosninchikta allinta qhawanapaq, yanapanapaq ima, tanqawanchik. Sumaq yachaywan ruway, yachakuy ima, atiykunallataq kanku, chaykunatataq espíritu santoniqta japʼinchik (1 Cor. 2:10-16; Gál. 5:22, 23). Chayrayku imastachus yachasqanchik, imatachus ruwayta atisqanchik, kʼacha kaykunasninchik ima, janaqpacha Tatanchikmanta juk regalo, payta jatunchanapaq. Chayrayku hermanosninchikman, Diosninchikpa kʼacha kayninta tukuy imaymanamanta rikuchinanchik tiyan.

Dios atiyta quwasqanchikwan, ¿imatá ruwachkanchik?

7. a) “Uj atiyta qosorqachej” rimay, ¿imatá niyta munan? b) ¿Imasta tapukunanchik tiyan, imaraykutaq?

⁷ Kay 1 Pedro 4:10 nisqapi, Pedroqa niyta munan sapa jukninchik ‘juk atiyta’ japʼisqanchikta, chaytaq kʼacha kayninchik, yuyayninchik ima. Chaywanpis mana tukuychu kikin kʼacha kayniyuq kanchik nitaq juk riqllatachu yachakunchik. Chantapis apostolqa tanqawanchik, chay japʼisqanchikwan ‘wakkunata sirvinanchikpaq’. Kay “mayordomos jina [...] wajkunata yanapaychej” rimayqa, juk kamachiyjina qillqasqa kachkan. Chayrayku tapurikunanchik tiyan: “¿Jehová atiyta quwasqanta hermanosniyta yanapanaypaqchu apaykachachkani?” (1 Timoteo 5:9, 10, kikinchay).  Chayri, “¿qhapaqyanaypaq, tukuy imayuq kanaypaq, imatapis ñuqallapaqchu munani?” (1 Cor. 4:7.) Jehovaqa atiyta japʼisqanchikwan wakkunata yanapasqanchikta rikuspa mayta kusikun (Pro. 19:17; Hebreos 13:16, ñawiriy).

8, 9. a) ¿Imaynasmanta chiqa cristianos hermanosninkuta yanapanku? b) Qutuchakuyniykipi hermanos, ¿imaynatá yanapanakunku?

⁸ Bibliaqa ñawpaq siglomanta cristianos, hermanosninkuta tukuy imaymanamanta yanapasqankuta sutʼinchan (Romanos 15:25, 26; 2 Timoteo 1:16-18, ñawiriy). Kay tiempopi chiqa cristianospis, chay kamachiyta kasukuspa, hermanosninkuta chay atiyta japʼisqankuwan yanapanku. Qhawarina imaynatachus chayta ruwanku.

⁹ Achkha hermanosqa sapa killa may chhika horasta wakichikunku, qutuchakuypi umallirichinankupaq, sumaqta yachachinankupaqtaq. Jinamanta sumaq parlaykunata akllanku, qutuchakuypi hermanosta sinchita sayanallankupaqpuni yanapanankupaq (1 Tim. 5:17). Wakin hermanostaq kʼachas, khuyakuyniyuq ima, kasqankurayku wakkunawan sumaqta riqsichikunku (Rom. 12:15). Wakintaq llakisqa kaqkunata waturikunku, paykunawantaq Diosmanta mañakunku (1 Tes. 5:14). Wakkunataq chʼampaykunapi kaqkunapaq, kʼacha cartasta qillqanku kallpachanankupaq. Wakintaq unqusqa kaqkunata, tantakuyman rinankupaq yanapanku. Achkha hermanostaq sinchi para chayri sinchi wayra wakin hermanospa wasisninkuta urmachiptin, wasista ruwaspa yanapanku. Chay cristianos hermanosninkurayku ajinata munakuywan yanapasqankupiqa, ‘Diospa imaymana kʼacha yanapayninta’ rikuchinku (1 Pedro 4:11, ñawiriy).

Iskay ruwaykunamanta, ¿mayqintaq aswan sumaq?

10. a) ¿Ima iskay ruwaykunatataq Pablo mayta ruwayta munaq? b) ¿Imaynatataq Pablojina ruwasunman?

¹⁰ Hermanosninchikrayku tukuy imata ruwanapaq atiyta japʼispapis, Diospa Reinonmanta willay kamachiyta japʼillanchiktaq. Apóstol Pabloqa chay iskay ruwaykuna Diosta yupaychanapaq kasqanta yacharqa. Efesomanta cristianosman mayordomojina ‘Diospa qhasilla kʼacha yanapayninmanta’ parlarqa, nisunman mayordomojina hermanospaq tukuy imata ruwananpaq sutichasqa kasqanmanta (Efe. 3:2). Chaywanpis nillarqataq: ‘Dios allinpaq qhawawarqanchik evangeliota willamunanchikpaqjina’, nispa (1 Tes. 2:4). Ñuqanchikpis Pablojina, Diospa Reinonmanta runaman willana kamachiyta japʼisqanchikta yachanchik. Payqa mana saykʼuspa willarqa, ñuqanchikpis kikinta ruwananchikpaq kallpachakunanchik tiyan (Hech. 20:20, 21; 1 Cor. 11:1). Diospa Reinonmanta willay runasta salvayta atisqanta yachanchik, chantapis hermanosninchikman mayllapipis kaspa ‘espiritup ima kʼacha kaynillantapis’ rikuchiyta atinchik, imaynatachus Pablo ruwaq ajinata (Romanos 1:11, 12; 10:13-15, ñawiriy).

11. Willana kamachiymanta, hermanosninchikta kallpachaymanta ima, ¿imaynatá yuyananchik tiyan?

¹¹ Kay iskay ruwaykunamanta, ¿mayqintaq astawan jatun? Kay tapuyqa kikinchakunman kaywan, ¿pʼisqitu juknin likrallanwan, phawayta atinmanchu? Mana, imaptinchus phawananpaqqa iskaynin likrasnin kapunan tiyan, ñuqanchikpis sumaq cristianos kananchikpaqqa, chay iskaynin ruwayta juntʼananchik tiyan. Chayrayku allin willaykunata willamuy, hermanosninchikta kallpachaywan ima kamachiykunataqa, mana jukchasqachu kasqanta yuyanamantaqa, Pedro, Pablo ima, imaynatachus yuyaq kanku ajinata yuyananchik tiyan: iskaynin ruwaykuna yanapanakusqankuta. ¿Imaynatá yanapanakunku?

12. ¿Imatataq ruwasunman Jehová ñuqanchikniqta imatapis ruwananpaq?

¹² Runaman willaq rispaqa Diospa Reinonmanta willaywan sunqunman chayayta munanchik, chaypaqtaq tukuy atisqanchikta ruwanchik sumaqta willarinapaq. Jinamanta Cristop yachachisqasninman tukunankupaq  yanapanchik. Chantá kʼacha kayninchikwan, imatachus yachasqanchikwan ima, hermanosninchikta sunquchanchik. Ajinata sunquchasqanchikpi, ni imata suyaspa ruwasqanchikpi ima, Diospa kʼacha kaynin rikukun (Pro. 3:27; 12:25). Ajinamantataq Jesuspa yachachisqasnin kanallankupaqpuni yanapanchik. Mayqillantapis ruwaspaqa —runaman willaspa chayri hermanosninchikta yanapaspa— may sumaqta ruwachkanchik, nisunman Jehová ñuqanchikniqta ruwachkanmanjina, chaytaq may jatunta qhawanapaq (Gál. 6:10).

“Tukuy sonqo munanakuychej”

13. ¿Imataq kanman manaña puraqmanta yanapanakuptinchik?

¹³ Pablo hermanosninta ajinata sunqucharqa: “Hermanos jina tukuy sonqo munanakuychej, ujkuna ujkunata aswan allimpaj qhawaspa” (Rom. 12:10). Hermanosninchikta munakusqanchikqa, tukuy sunqu Diospa kʼacha kayninmanta mayordomosjina, paykunarayku imatapis ruwanapaq tanqawanchik. Chantapis Satanasqa, puraqmanta manaña yanapanakunapaq, tukuy imata ruwanqa, pisimanta pisi tʼaqanakunanchikpaq (Col. 3:14). Manaña jukchasqachu kaptinchiktaq, kusiywan willayninchikpis pisimanta pisi chiriyapunqa. Supayqa, nisunman juknin likrallanchiktapis pʼakispaqa, urmachinawanchikta yachan.

14. ¿Pikunapaqtaq may sumaq, hermanosninchikta yanapaptinchik? Juk ruwaymanta parlariy.

¹⁴ Hermanosninchikrayku tukuy imata ruwasqanchikqa paykunapaq, ñuqanchikpaq ima, may sumaq (Pro. 11:25). Illinois llaqtamanta (Estados Unidos), Brayan, Roxana * qhariwarmi kawsayninkupi, ajina kasqan rikukun. Paykunaqa sinchi wayra Katrina sutichasqa, may chhika hermanospa wasisninkuta chinkachisqanta yachaytawan, hermanosninkuta munakusqankurayku llamkʼayninkuta, wasinkuta ima, saqirqanku. Juk runamantataq wasiyuqtajina autota rantikurqanku chayta allinchaspataq, 1.400 kilometrosta (900 millas), Luisiana llaqtaman chayanankukama rinanku karqa. Chaypitaq wata kuraqta qhipakurqanku, tiemponkuta, kallpankuta, qullqinkuta ima, churaspa hermanosta yanapaspa. Brayan, 29 watasniyuq nin: “Ajinata ruwaspaqa Diosman astawan  qayllaykurqayku. Imaynatachus Jehová llaqtanta sumaqta jarkʼasqanta rikullarqanitaq.” Nillantaq: “Unayña cristianos kaqkunawan llamkʼayqa yachachiwan, hermanosta astawan sumaqmanta qhawanaypaq”, nispa. Roxana, 25 watasniyuq nin: “May agradecesqa kachkani wakkunata yanapayta atisqaymanta. Mana jaykʼaqjina kusikurqani. Kay sumaq ruwaypi yachakusqayqa, watasta ñuqap allinniypaq kanqa”.

15. Diospa kʼacha kayninmanta mayordomosjina ruwayllapuni, ¿imaraykutaq sumaq kasqanta ninchik?

¹⁵ Kay kamachiykunata kasukuy, allin willaykunata willamuy, hermanosninchikrayku tukuy imata ruway ima, tukuyninchikpaq may sumaq. Pikunachus yanapata japʼiqkunaqa Diosta sumaqta yupaychanankupaq kallpachasqas kanku, ñuqanchikpis mayta kusikunchik yanapayta atisqanchikrayku (Hech. 20:35). Tukuy hermanos wakkunap allinninkuta maskʼaptinku, qutuchakuyqa may allin. Chantapis puraqmanta munanakunchik chayqa, sutʼita rikukun chiqa cristianos kasqanchik. Jesús nirqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35). Astawanpis Tatanchik Jehovaman agradecesqa kachkanchik, imaptinchus payqa kallpachawanchik kay jallpʼapi kamachisninniqta. Chayrayku atiyta japʼisqanchikwan hermanosninchikrayku tukuy imata ruwayqa may allin, “sumaj mayordomos jina Diospa imaymana kʼacha yanapayninwan”. ¿Jinata ruwallankipunichu? (Hebreos 6:10, ñawiriy.)

[Sutʼinchaynin]

¿Yuyarinkichu?

• ¿Imaynatataq Jehová kamachisninta kallpachan?

• ¿Imatataq kamachiwanchik?

• ¿Imaynatataq hermanosninchikta yanapayta atisunman?

• Atiyta japʼisqanchikwan hermanosninchikta yanapanapaq, ¿imataq tanqawasunman?

[Tapuykuna]

[13 paginapi dibujos/fotos]

Ruwayta yachasqanchikwan, ¿wakkunata yanapanchikchu chayri ñuqallanchikpaqchu munanchik?

[15 paginapi dibujos/fotos]

Allin willaykunata willananchik, hermanosninchiktapis yanapananchik tiyan

[16 paginapi dibujo/foto]

Pikunachus hermanosninchikrayku llamkʼaqkunataqa, may allinpaq qhawananchik tiyan