Runasta yachachiyqa mayta kusichiwanchik

“Chayrayku rispa, tukuy laya runasta yachachisqasniyman tukuchimuychej.” (MAT. 28:19, 20.)

1-3. a) Achkha hermanos, ¿imaynatá runasman yachachiyta qhawanku? b) ¿Ima tapuykunatataq kutichisunchik?

JUK hermana Estados Unidosmanta, hindi parlaymanta qutupi yanapachkan, paytaq jinata qillqarqa: “Chunka jukniyuq semanastaña yachachichkarqani, Pakistán llaqtamanta juk familiata chantapis paykunatataq mayta munakuyta qallarirqani. Waqarikuni paykuna pisimantawan llaqtankuman kutinankuta yuyaspa, imaptinchus manaña paykunawan tinkusaqchu. May kusiyta tarirqani Jehovamanta chiqan kaqta paykunaman yachachispa.”

² Qamri, ¿maykʼaqllapis Bibliamanta yachachispa, ajina kusiyta tarinkichu? Jesús,  yachachisqasnin ima, runasman yachachispa mayta kusikurqanku. Jesuspa 70 yachachisqasnin may kusisqas willasqankumanta kutimuspa, imastachus ruwasqankumanta willaptinku, ‘Jesusqa Espiritu Santoniqta mayta kusikurqa’ (Luc. 10:17-21). Kunanpis, may chhika runas chayta ruwachkanku. Kay 2007 watapi suqta junu khuskanniyuq runasta Bibliamanta yachachikurqa.

³ Chaywanpis, willaqkunamantaqa wakinqa ni jaykʼaq juk runallatapis yachachinkuchu. Wakinkunataq unayña mana pitapis Bibliamanta yachachichkankuchu. ¿Ima chʼampaykunataq tiyan jukllatapis Bibliamanta mana yachachinapaq? ¿Imaynamanta chayta atipasunman? Jesús: “Rispa, tukuy laya runasta yachachisqasniyman tukuchimuychej”, nispa, kamachisqanta juntʼanapaq, ¿imaptintaq mayta kallpachakunanchik tiyan? (Mat. 28:19, 20.)

Chʼampaykuna ruwayninchikta saqichiwasunman

4, 5. a) ¿Imaynatá wak llaqtaspi willayninchikta japʼikunku? b) Wak llaqtaspi, ¿ima chʼampaykunawantaq tinkunchik?

⁴ Pachantinmantaqa kanraq llaqtas maypichus runas publicacionesninchikta kusiywan japʼikuqkuna, Bibliamantapis yachakuyta munaqkuna. Juk qhariwarmi Australia llaqtamanta Zambia llaqtaman risqankumanta jinata qillqarqanku: “Imatachus niwasqaykuqa chiqapuni kasqa: Zambiapiqa may sumaqta uyarikunku. Ñankunapi willachkaptiykupis, runasqa ñuqaykuman qayllamuwayku, ima revistatachus munasqankutataq mañakuwayku”. Pasaq wataspi , Zambiapiqa, iskay pachak waranqa kuraqta Bibliamanta yachachikurqa, nisunman, sapa willaq jukta chayri iskayta Bibliamanta yachachirqanku.

⁵ Chaywanpis wak llaqtaspiqa publicacionesta mana japʼikunkuchu, nitaq Bibliamanta yachakuytapis munankuchu. ¿Imarayku? Imaraykuchus willachkaptinchik mana wasisninkupichu kanku chayri mana religionmanta parlayta munankuchu. May chhika runas pisita chayri ni imata religionmanta yachaspa wiñanku, chayri llulla religionesmanta, puraq uyas kasqankurayku manaña yachayta munankuchu. Wakkunataq llulla pastorespa yachachisqanpi urmarqanku pikunachus qʼasa sunquta saqirpanku (Mat. 9:36). Chayrayku Bibliamanta parlanayaptinchik usqhayllata qhisachawanchik.

6. Wakin hermanos, ¿ima chʼampayniyuq kanku?

⁶ Wakinkunaqa wak imasrayku willayninkupi pisiyanku. Wakin hermanosqa manaña yachachiyta atinkuchu, unqusqa chayri machituña kasqankurayku. Wakkunataq wak chʼampayniyuq kanku. Ichá yuyankuman, Bibliamanta yachachiyta mana atisqankuta. Moisesjina, Jehová, faraonwan parlamunanpaq kamachichkaptin. Moisés nirqa: “Ay, Señor. Ni jaykʼaj noqaqa runasman allinta parlayta atinichu, [...] ni qaynallamantachu, nitaj kunallanmantachu” (Éxo 4:10). Wak kutitaq, mana atinichu ninchik, mana pantayta munaspa. Ichá mana sumaqta yachachiyta atisqanchikrayku, ni jaykʼaq jukllatapis bautizakunanpaq yanapayta atisqanchikta yuyasunman. Chayta manchachikuspataq ichá ni jaykʼaq kallpachakusunchu. ¿Imaynamanta chay chʼampaykunata atipasunman?

Sunqunchikta wakichina

7. ¿Imataq Jesusta willananpaq tanqarqa?

⁷ Ñawpaqtaqa sunqunchikta wakichina tiyan. Jesús nirqa: “Imawanchus sonqon juntʼa kasqanman jina simenqa parlan” (Luc. 6:45). ¿Imataq Jesuspa sunqunpi karqa? Payqa tukuy sunquwan wakkunap allinninkuta maskʼaq. Chaytaq willayninpi ñawpaqman rinanpaq tanqarqa. Kaypi tʼukurina, Jesusqa, llaqta masisnin Dioswan mana allinpi kasqankurayku yachachisqasninta nirqa: “Cosechaqa ashkha [...] mañakuychej ari cosechaj dueñon Señormanta, astawan oqharejkunata cosechanman kachamunampaj” (Mat. 9:36-38).

8. a) ¿Imapitaq tʼukurinanchik tiyan? b) Bibliamanta yachakuq nisqanmanta, ¿imatá yachakunchik?

⁸ Ñuqanchikta chiqa kaqta yachachispa sumaqmanta  yanapawasqanchikpi tʼukurina. Chayqa willayninchik, wakkunata sumaqta yanapayta atisqanta rikuchiwanchik. Juk warmi, suyunmanta sucursalman jinata qillqasqa: “May kusisqa kani Jehovamanta Sutʼinchaqkunawan, Bibliamanta parlariwaq wasiyman jamusqankumanta. Unaytataq qhipakunku, imaptinchus achkha tapuykunasniy kapuwan. Paykunaqa kʼachamanta yachasqankuta yachachiwanku. Mayta agradecekuni Jehovata, Jesusta ima, paykunata riqsisqayrayku”.

9. ¿Imapitaq Jesús astawan yuyarqa chantá imaynamanta payjina yuyasunman?

⁹ Chantapis yuyarikuna, Jesustaqa mana tukuychu kasurqanku (Mat. 23:37). Wakinkunataq kasukuspapis, qhipaman yachachiynintaqa qhisacharqanku, saqipurqanku ima (Juan 6:66). Chaywanpis Jesusqa willayninta mana qhasipaqchu kasqanta qhawaq. Jesusqa, may chhikata tarpusqan mana puquptinpis, astawan allinta ruwachkasqanpi yuyarqa. Payqa, chakrasta qhawarirqa cosechanapaq puqusqaña kasqankuta, kusiywantaq chaypi llamkʼarqa (Juan 4:35, 36, ñawiriy). Ajinallatataq, ñuqanchikpis mana pisi ruwakusqanllapichu yuyana, manaqa imaynamantachus astawan runasman chayananchikpi tʼukurinanchik tiyan. ¿Imaynatá jinata yuyanapaq kallpachakusunman?

Tarpuna juk pʼunchay uqharinapaq

10, 11. ¿Imatataq ruwawaq kusiyllawanpuni willanaykipaq?

¹⁰ Runaqa tarpun achkhata uqharinanta yuyaspa. Ñuqanchikpis runasman willamunanchik tiyan, Bibliamanta yachachiyta munaspa. Ichapis may sumaqmanta ruwaspapis pisi runasta tarisunchik chayri wasisninkuman kutispapis mana tarisunchu, chaytaq sunqunchikta pʼakinman. ¿Wasimanta wasi willayninchikta saqinachu kanman? Mana. Imaptinchus  wakin runasqa manaraq willayninchikta uyarinkuchu.

¹¹ Kusiyllawanpuni willanapaq ichá wakjinamanta runasman willasunman. Qam ñankunapi, ranqhanku chaypi, ¿willarirqankichu? ¿Atiwaqchu telefononiqta willayta chayri pikunawanchus parlarinki, telefononkuta mañankichu watiqmanta paykunawan parlarinaykipaq? Mana saykʼuspa, wakjinamanta willaspa ima, jukllatapis tarinkipuni, chaymantataq mayta kusikunki.

¿Imatá ruwasunman mana uyariyta munaptinku?

12. ¿Imatá ruwasunman llaqtanchikpi mana Diosmanta uyariyta munaptinku?

¹² ¿Imatá ruwasunman llaqtanchikpi mana Diosmanta uyariyta munaptinku? Imachus paykunata llakichisqanmanta parlarisunman. Pablo corintio hermanosninman qillqarqa: “Judiospajqa judio jina kani. Leypa kamachisqampi kajkunapajtaj, mana leypa kamachisqampi kaspapis, leypa kamachisqampipis kayman jina kawsani. Tukuypaj imaynachus kasqankuman jina tukuni”. ¿Imaraykutaq apóstol jinata ruwarqa? ‘Jinamanta wakillantapis salvananrayku’ (1 Cor. 9:20-22). Ñuqanchikpis imamantachus runa masinchikwan parlarinapaq, sumaqta akllayta atisunman. May chhika familiankuwan kusisqa kawsakuyta munanku. Wakkunataq kawsayninkuta tikrachiyta munanku. Uyariyta munanankupaq, ¿Diospa Reinomanta imaynamanta willasunman?

13, 14. ¿Imatá ruwayta atisunman kusiywan willanapaq?

¹³ Bibliamanta runas mana uyariyta munankuchu chaypipis, may chhika hermanos wakjinasmantañataq kusiyllawanpuni willachkanku. ¿Imatá ruwanku? Wak qallupi parlayta yachakunku. Juk qhariwarmi qanchis chunka wata kuraqniyuq kanku, llaqtankupitaq China llaqtamanta achkha yachay wasiman riqkuna familiasninkuwan kawsakusqankuta rikurqanku. Qusan nin: “May sumaq kanman qallunkupi parlayta yachana nispa ninakurqayku. Sapa pʼunchay chay qallupi parlayta yachakurqayku, manataq qhasipaqchu karqa, imaptinchus achkhata Bibliamanta yachachiyta qallarirqayku.”

¹⁴ Mana wak qallupi parlayta atispapis, kay folleto Buenas nuevas para gente de todas las naciones nisqata apaykachasunman, wak qallusta parlaqkunawan parlarinapaq. Chantapis wak qalluspi libros, revistas ima kallantaq. Wak llaqtasmanta runaswan parlayqa mana atikullanchu, chaypaqqa astawan kallpachakuna tiyan. Chaywanpis ni jaykʼaq qunqanachu Bibliap nisqanta: “Pichus ashkhata tarpojpis ashkhallatataj oqharenqa” (2 Cor. 9:6).

Khuskamanta llamkʼanapaq

15, 16. a) Runasta yachachiy, ¿imaptintaq mana jukllapaqchu kasqanta nisunman? b) Machitu hermanosninchik, ¿imaynamanta yanapanku?

¹⁵ Runasta yachachiyqa mana jukllapaqchu, manaqa tukuy yanapasunman. ¿Imaptintaq chayta ninchik? Imaptinchus Jesús kayta nirqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta” (Juan 13:35). Bibliamanta yachakuqkunaqa, chay munakuyta rikunku Tantakuy Wasiman rispa. Bibliamanta yachakuq nin: “Tantakuy wasimanqa may kusiywan rini. Imaptinchus, ¡tukuy may kʼachas kanku!”. Jesús familia ukhupi churanakuy kananta nirqa (Mateo 10:35-37, ñawiriy). Chaywanpis qutuchakuypi chiqamanta “wawqesta, panasta, mamasta, wawasta” ima, tarinanchikta nirqa (Mar. 10:30).

¹⁶ Wakin hermanosninchik machitusña kaspapis, Bibliamanta yachakuqkunata wiñanankupaq sumaqta yanapanku. ¿Imaptin? Imaptinchus mana Bibliamanta yachachiyta atispapis tantakuykunapi sumaqta tapuykunaman kutichisqanku, yachakuqkunaq iñiyninkuta sumaqta kallpachan. Chantapis paykunaqa may unaytaña ‘chiqan ñanpi purichkasqankurayku’, chiqan kaqta maskʼaqkunaqa qutuchakuyta sumaqpaq qhawanku, jamuytataq munanku (Pro. 16:31).

 Manchikuyninchikta atipana

17. Bibliamanta yachachiyta mana atinapaqjina qhawaspa, ¿imatá ruwasunman?

¹⁷ Bibliamanta yachachiyta mana atinapaqjina qhawaspa, ¿imatá ruwasunman? Yuyarikuna Jehovaqa, Moisesta espíritu santonwan yanaparqa, chantapis Aarón hermanontawan kacharqa (Éxo. 4:10-17). Jesustaq, yachachisqasninta Diospa espíritu santo willayninkupi yanapananta nirqa, iskaymanta iskaytaq kacharqa (Luc. 10:1; Hech. 1:8). Chayrayku Bibliamanta yachachiyta mana atinapaqjina qhawaptiykiqa, Diosmanta yachayta, espíritu santota ima mañakuy, juk hermanotataq yanapasunanpaq maskʼay. Jehovaqa mana may yachayniyuq runastachu akllan kay sumaq ruwaypaqqa, manaqa ‘kay pachapi pisi kallpayuqpaq qhawasqa kaqkunata’ (1 Cor. 1:26-29).

18. Pillatapis Bibliamanta yachachiyta manchachikuyninchikta, ¿imaynamanta atipasunman?

¹⁸ Pillatapis Bibliamanta yachachiyta manchachikuyta, ¿imaynamanta atipasunman? Pillapis chiqan kaqta yachakuyta munananqa, mana yachachiqllamantachu kasqanta yuyarikunanchik tiyan. Mana mikhunata waykʼuywan kikinchasunmanchu, imaptinchus chayqa jukllamanta kachkan: waykʼuqmanta. Bibliamanta yachachiypiqa kimsa llamkʼachkanku. Jukninqa Jehová; Paylla jatun ruwayta atin: runap sunqunta kuyurichiyta uyarinanpaq (Juan 6:44). Chantá ñuqanchik, wak hermanos ima, tukuy imata ruwanchik yachachinapaq, wiñananpaq ima (Timoteo 2:15, ñawiriy). Tukunapaq Bibliamanta yachakuqqa yachakusqanmanjina kawsanan tiyan (Mat. 7:24-27). Pillapis Bibliamanta yachakuyta saqiptin, chiqamanta sunqunchik nanawanchik, imaptinchus Jehovata yupaychanankuta suyanchik. Chaywanpis yachanchik sapa juk ‘Diosman cuentata quna kasqanta’ (Rom. 14:12).

Ruwasqanchikqa mana qhasipaqchu

19-21. a) Bibliamanta wakkunaman yachachiy, ¿imaynatá yanapawanchik? b) ¿Imaynatá Jehová willayninchikta qhawan?

¹⁹ Bibliamanta yachachiyqa, Diospa Reinonta kawsayninchikpi ñawpaqman churanapaq yanapawanchik. Chantapis Diospa Palabranmanta chiqa yachaykuna yuyayninchikpi, sunqunchikpi ima, sumaqta saphichakun. ¿Imaynamantá? Juk precursor Barak sutiyuq sutʼinchan: “Bibliamanta yachachinapaqqa sumaqta Diospa Palabranmanta yachana tiyan. Wakkunaman yachachiyta munaspaqa jukraq sumaqta yachakunan tiyan”.

²⁰ ¿Ima kanman Bibliamanta mana jukllatapis yachachiptinchik? ¿Qhasipaqchu kanman Diospaq, tukuy imata ruwasqanchik? Mana. Jehovaqa Payta yupaychanapaq tukuy imata ruwasqanchikmanta, mayta agradecekuwanchik. Tukuy runaman willaqkunaqa ‘Diospaq llamkʼachkanchik’. Chaywanpis Bibliamanta yachachichkanki chayqa aswan kusiyta tarinki, imaptinchus tarpusqaykita imaynatachus Dios wiñachisqanta rikunki (1 Cor. 3:6, 9). Juk precursora Amy sutiyuq nin: “Bibliamanta yachakuqkunata ñawpaqman riqta rikuspaqa, mayta agradecekunchik Jehová Diosninchikman, may jatun tʼinkata qunanchikta saqiwasqanchikrayku: Jehovata riqsiyta atinankupaq, wiñay kawsaytataq japʼinankupaq”.

²¹ Bibliamanta yachachiyta munaspa tukuy imata ruwasun chayqa, yuyayninchik Diosta yupaychayllapipuni kanqa, chantapis musuq pachapi kawsayta suyayninchikpis aswan sinchi kanqa. Jehovap yanapayninwantaq ichá uyariqkunata salvakunankupaq yanapasunman (1 Timoteo 4:16, ñawiriy). ¿Kaymanta aswan jatun kusiy kanmanchu?

¿Yuyarinkichu?

• ¿Ima chʼampaykunataq kanman mana Bibliamanta yachachinapaq?

• Llaqtanchikpi runas Bibliamanta willasqanchikta mana uyariyta munaptinku, ¿imatá ruwasunman?

• Bibliamanta yachachinapaq kallpachakusqanchik, ¿imaptintaq mana qhasipaqchu?

[Tapuykuna]

[9 paginapi dibujos/fotos]

Bibliamanta yachakuyta munaqta tarinapaq, ¿tukuy imaymanamantachu willachkanchik?