Wañusqata pʼampanapaq tantakuyta Diosta jatunchanapaqjina wakichina
Wañusqata pʼampanapaq tantakuyta Diosta jatunchanapaqjina wakichina
TUKUYNIQPI qhaparichkasqanku, waqachkasqanku ima uyarikun. Juk qutu runastaq, yana pʼachaswan pʼachallisqa, mana yuyayniyuqjina pampaman chuqakunku may llakisqa kasqankuta rikuchinankupaq. Wakinkunataq takiypi tusukuchkanku, wakintaq mikhuchkanku maytataq asispa chʼaqwachkanku. Wakinkunataqri pampapi machasqas wikchʼu wikchʼulla kachkanku. Wakin lugarespi tukuy kay ruwaykunaqa, wañusqata pʼampanapaq tantakuypi rikukullanpuni. Chay tantakuypitaq achkha runas tantakunku wañusqata pʼampanankupaq.
Wakin llaqtitaspi runasqa, wañusqasta manchikunku, llulla cuentospipis creenku, achkha chiqa cristianostaq chay llaqtaspi tiyakunku. May chhika runastaq yuyanku juk runa wañupuptin juk espirituman tukusqanta, atiyniyuqtaq kasqanta kawsachkaq runasta yanapananpaq chayri ñakʼarichinanpaq. Ajinata yuyasqankurayku, wañusqata pʼampanapaq tantakuypi, achkha costumbresta ruwanku. Familianchikmanta pillapis wañupuptin waqanchikpuni; Jesuspis, apostolesninpis wakin kuti waqallarqankutaq (Juan 11:33-35, 38; Hech. 8:2; 9:39). Chaywanpis, paykunaqa mana chay tiempopi runasjinachu mayta llakikurqanku (Luc. 23:27, 28; 1 Tes. 4:13). ¿Imaptin? Imaptinchus paykunaqa, wañusqasmanta chiqa kaqta yacharqanku.
Bibliaqa sutʼinchan: “Kausashajkunaqa wañunankuta yachakunku; wañusqasrí mana imatapis yachankuchu [...] Tukukapullantaj munakuyninku, chejninakuyninku, tukuy ima munapayayninku ima [...] imaraykuchus wañuspa maymanchus rinki, chaypeqa manaña ima ruwanapis kanchu, ni yuyanapis, ni yachana, nitaj yachaypis”, nispa (Ecl. 9:5, 6, 10, Qheshwa Biblia). Kay pʼitikunaqa, wañupuqkuna manaña imatapis yachasqankuta rikuchiwanchik. Nisunman manaña yuyayta, reparayta, parlayta, imatapis yachayta atisqankuta. Cristianos ajinata Biblia yachachisqanta yachaspa, ¿imaynatá wañusqata pʼampanapaq tantakuyta wakichinanku tiyan?
“Ama llankhaychejchu chʼichipaj qhawasqa imasta”
Ninchikjina, achkha runasqa, wañusqas espiritusjina kawsachkasqankuta, kawsaqkunata imatapis ruwayta atisqankuta ima yuyasqankurayku, achkha costumbresta ruwanku, Jehovamanta sutʼinchaqkunataq, ima llaqtamanta kaspapis, tukuy chay costumbresta qhisachanku. Chantapis runas costumbresninkumanjina lutukusqanku, veloriosta, wañusqaspaq misasta, wañusqaspa pʼunchaynin raymista ruwasqanku, mikhunata tumban pataman churasqanku ima, Diospaqqa chʼichipaq qhawasqa, phiñachintaq, imaraykuchus chay ruwaykunaqa, Kuraq Supay, alma mana wañunchu, nispa yachachisqallanmanta jamun (Eze. 18:4). Cristianosqa chay ruwaykunata qhisachanku, imaraykuchus “Señorpa mikhunanmanta mikhushaspa, supaykunaj mikhunanmantapis [mana] mikhuyta” atisqankuta yachanku (1 Cor. 10:21). Astawanpis, apóstol Pablop kʼamirisqanta kasukunankupaq mayta kallpachakunku, pay nirqa: “Tʼaqakuychejtaj [...] Ama llankhaychejchu chʼichipaj qhawasqa imasta”, nispa (2 Cor. 6:17). Chaywanpis jinata ruwayqa, mana atikullanchu.
Achkha runas, costumbresmanjina mana ruwaptinku, ñawpa tatasninkup espiritusninku phiñakunankuta yuyanku. Chantá, costumbresmanjina mana ruwayqa, paykunapaqqa may jatun jucha, imaptinchus
yuyasqankumanjinaqa, llaqtankupaq ima ñakʼariypis kanman. Jehovamanta sutʼinchaqkuna, chay costumbresmanjina mana ruwayta munasqankurayku, familiankupaq, wasinkup qayllanpi tiyakuqkunapaq ima, mana allinpaq qhawasqas, chiqnisqas ima kanku. Chantapis wakin cristianosmanta ninku, runasta chiqnisqankuta, wañusqastapis pisipaq qhawasqankuta. Wakin kutipiqa mana cristianos kaqkunaqa, cristianos kaqkuna mana munachkaptinkupis, wañusqata pʼampanapaq tantakuypi munasqankumanjina ruwanku. ¿Imatá ruwasunman ajina chʼampaypi mana rikukunanchikpaq? Astawanpis, Jehovap qayllanpi kanallanchikpaqpuni, ¿imatá ruwasunman chay chʼichipaq qhawasqa costumbresmanta karunchakunapaq?Creesqaykita mana iskaychakuspa sutʼinchay
Wakin llaqtaspi wañupuqpa familiaresninku, chay llaqtapi kuraqkuna ima, imaynatachus wañusqata pʼampanapaq tantakuy wakichikunan kasqanta niyta atinku. Chayrayku juk cristianoqa, paykunaman sutʼita ninan tiyan, wañusqata pʼampanapaq tantakuyta Jehovamanta sutʼinchaqkuna Bibliap nisqanmanjina wakichinankuta (2 Cor. 6:14-16). Wañusqata pʼampana tantakuypi imastachus ruwakusqanqa, ni mayqin cristianotapis miskʼachinanchu tiyan, jinallataq imaspichus creesqanchikta, wañusqasmanta imatachus yachachisqanchikta ima yachaqkunatapis, mana pantasqata yuyachinanchu tiyan.
Juk familia, wañusqata pʼampana tantakuyta wakichinankupaq, qutuchakuypi ancianosmanta yanapata mañakuptinku, paykunaqa chay familiata Bibliap yuyaychaykunasninmanjina ruwanankupaq yanapankuman. Wañusqata pʼampanapaq juk discursota ruwakuchkaptin, wañupuqpa pi familiallanpis, Bibliap kamachisqanwan churanakuq costumbresninmanjina ruwayta munaptinqa, llampʼu sunquwan, mana manchikuspataq sutʼita willana kanman, imaraykuchus ruwasqanta qhisachasqanchikta (1 Ped. 3:15). Mana kasukuspa munasqanmanjinapuni ruwayta munaptinqa, aswan allin kanman wañupuqpa cristiano familiaresninku chay tantakuymanta lluqsipunanku (1 Cor. 10:20). Ichapis Tantakunapaq Wasipi chayri wak wasipi wañusqata pʼampanapaq discursota ruwakunman, wañupuqpa familianta Diospa Palabranwan ‘sunquchanapaq’ (Rom. 15:4). Wañusqata chay tantakuyman mana apamuptinkupis, chay tantakuyqa ruwakullanman (Deu. 34:5, 6, 8). Chantá, mana cristiano kaqkuna chay tantakuypi costumbresninkumanjina ruwasqankumanta, wañupuqpa cristiano familiaresnin llakisqas kaspapis, kusikunkuman Bibliap nisqanmanjina ruwasqankuta, Dios allinpaq qhawasqanmanta. Chantapis mana iskaychakuspa suyankuman Diosninchik “chay may sumaj [atiyninwan]” paykunata yanapananta (2 Cor. 4:7).
Wañupuptiyki imatachus ruwanankuta munasqaykita qillqay
Juk cristiano; wañupuptin pʼampanankupaq tantakuyta imaynatachus wakichipunankuta munasqanta qillqan chayqa, cristiano familianqa qillqasqanmanjina ruwakunanpaq mana cristiano familiaresninman sutʼinchayta atillanqa. Chay qillqasqapiqa, pʼampanankupaq tantakuy imaynatachus, maypichus wakichinankuta, pichus wakichinanta ima, qillqasqa kanan tiyan (Gén. 50:4, 5). Chay documentota juk chayri aswan testigospa ñawpaqinpi firman chayqa, astawan allin kanqa. Bibliaqa, imatapis ñawpaqmantapacha wakichikunata yuyaychawanchik. Pikunachus kay sumaq yuyaychayta kasukuqkunaqa, mana may machitu, chayri wañuy patapi kaytaraqchu suyakunqanku, kay documentota ruwanankupaq (Pro. 22:3; Ecl. 9:12).
Wakin cristianosqa, kay documentota mana ruwayta munallankuchu. Chaywanpis chay documentota ruwaspaqa, sumaq wakichisqa cristiano kasqanchikta, cristiano familiaresninchikta munakusqanchikta ima, rikuchisunchik (Fili. 2:4). Chayrayku, juk cristiano kawsachkaspallaraq jinata ruwananqa, may allin, cristiano familiaresnin mana chʼampaypi kanankupaq, imaptinchus llakisqa kachkaptinku, tanqasqaraqtaq kankuman Bibliap yachachiykunasninwan churanakuq costumbresta ruwanankupaq.
Wañusqata pʼampanapaq tantakuyta maychus kaqllata wakichiy
May chhika runasqa creenku, wañusqata pʼampanapaq tantakuy, may sumaq wakichisqa kananta, ñawpa tataspa espiritusninku mana phiñakunankupaq. Chantapis wakinkunaqa, ‘imatapis ruwasqankumanta, kapuyninkumantataq runaykachanankupaqjina’ chay tantakuyta wakichinku (1 Juan 2:16). Chayta ruwanankupaqtaq, achkha tiemponkuta, kallpankuta, qullqinkuta ima churanku. Chantapis chay pʼunchaypiqa, riqsisqas, familiares ima, wañupuqpa familianta sunquchaq rinku, paykunamantaq mikhunata qunku, wakin kutitaq riqkunaqa, chay wasipi qhipakunku. Wakin kutiqa, wañusqata mana pʼampankuchu familiaresninku chayamunankukama. Wakin kutipitaq yatirisman rinku, imamantachus wañupusqanta yachayta munaspa. ¿Allinchu kanman juk cristiano ajinata ruwanan?
1 Juan 2:15-17). Chayrayku, kay pachap costumbresninmanjina mana ruwanapaq, allinta qhawarikunanchik tiyan (Gál. 5:26). Rikukunjina, ima llaqtaspichus wañusqasta manchachikunku, chay llaqtaspi, wañusqata pʼampanapaq tantakuy may chhikan tantakuyman tukun, wañupuqpa familiaresnintaq chaypi kaqkuna imatachus ruwachkasqankuta mana qhawayta atinkuñachu. Ichapis chaypi kaqkunaqa, wañusqata jatunchayta munaspa, Bibliap qhisachasqan ruwaykunata ruwayta qallarinkuman. Chantapis, wañusqamanta qhaparispa waqankuman, abrazankuman, parlapayankuman, cajonninman mikhunata, cartata, imachus kapusqanta, wak imasta ima churaykunkuman. Wañusqata pʼampanapaq tantakuypi ajinata juk cristiano ruwanman chayqa, Jehovap sutinta, llaqtanta ima, mana allinpaq qhawachinman (1 Ped. 1:14-16).
Diospa llaqtanpi sumaq wakichisqa cristianosqa, yachanku wañusqata pʼampana tantakuyta maychus kaqllata wakichinata. Chantapis yachallankutaq, Bibliap nisqanta pʼakispa, runaykachanapaqjina ima costumbretapis ruwayqa, ‘mana Dios Tatamantachu jamusqanta, [manaqa] kay pachallamanta” jamusqanta (Imaynachus wañusqas kasqankuta yachayqa, chʼichipaq qhawasqa costumbresta mana ruwananchikpaq yanapanawanchik tiyan (Efe. 4:17-19). Jesús, Diospa Churin kaptinpis, maychus kaqmanjinalla pʼampasqa karqa (Juan 19:40-42). Pikunachus, “Cristoj yuyaynin[manjina]” yuyaqkunapaqqa, ajinata pʼampasqa kayqa, mana pʼinqakunapaqjinachu (1 Cor. 2:16). Wañusqata pʼampanapaq tantakuy, Diosta jatunchanapaqjina kananpaq, chay tantakuypi mana millay costumbres ruwakunanpaq ima, chay tantakuyta allin yuyaywan maychus kaqllata wakichiyqa may allin.
Wañusqata pʼampaykuytawankama
Wañusqata pʼampaykuytawankama, wañupuqpa familianqa, wañusqata pʼampanapaq tantakuypi yanapaysikuqkunapaq mikhunata waykʼupunku. Chantapis, wañupuqpa tumban pataman mikhunata churanku, paypa espiritun mikhunanta yuyaspa. Chantá achkha kutispiqa, pillapis layqachispa wañuchisqanta yuyanku. Pichus jinata ruwasqanta yachaspataq, wañupuqpa familianqa vengakullankutaq.
Chiqa cristianosqa, imaynachus wañusqas kasqankuta yachanku, chayrayku mana paykunamanta manchachikunkuchu (Eclesiastés 9:5, 10). Chayrayku wañusqata pʼampanapaq tantakuypi, mana cristiano kaqkuna layqa ruwaykunawan chhapusqa ima costumbretapis ruwachkaptinku, juk cristiano mana chaypi qhipakuyta atinmanchu. Chaypi qhipakuspaqa, Jehová Diosta mana jatunpaq qhawasqanta, hermanospa concienciankumanta mana llakikusqanta ima, rikuchinman.
Runasqa jukjina kasqanchikta reparananku tiyan
Kunan tiempopi runasqa, wañusqasta manchachikuspa kawsakunku. Ñuqanchikrí, chay manchachikuymanta kacharichisqaña kanchik. Chayrayku, ¡may agradecesqas kachkanchik! (Juan 8:32.) Familianchikmanta pillapis wañupusqanmanta, imaynatachus llakiyninchikta rikuchisqanchikqa, “kʼanchaymanta kajkuna” kasqanchikta, chiqa kaqta yachasqanchikta ima, rikuchinan tiyan. Wañupuqkuna kawsarimunankuta yachasqanchikrayku, maychus kaqllata llakiyninchikta rikuchinchik (Efe. 5:8; Juan 5:28, 29). Kayta yachayqa, imaynatachus mana suyakuyniyuqkuna mayta llakikunku, ajinata mana llakikunanchikpaq yanapawasun (1 Tes. 4:13, Dios Parlapawanchej). Astawanpis, chiqa yupaychayta mana manchachikuspa jarkʼasunchik (1 Ped. 3:13, 14).
Bibliap nisqanmanjinapuni ruwasunchik chayqa, “pichus Diosta yupaychasqanta, pitajchus mana yupaychasqantawan”, sutʼita runas reparanqanku (Mal. 3:18). Bibliaqa wañuy chinkananta niwanchik (Apo. 21:4). Niraq chay pʼunchay chayamuchkaptin, Jehová ‘mana juchayuqta, mana kʼaminata’, kay pachamanta millay ruwaykunasninmantawan tʼaqasqata taripanawanchikpaq, atisqanchikta kallpachakunachik (2 Ped. 3:14).
[30 paginapi dibujo/foto]
Wañupuptinchik pʼampanawanchikpaq tantakuyta, imaynatachus wakichipunawanchikta munasqanchikta qillqay, may allin
[31 paginapi dibujo/foto]
Cristianosqa wañusqata pʼampanapaq tantakuyta maychus kaqllata wakichinku