Ñawiriqkunapta tapuyninku

Bibliaqa, wakin pʼitikunapi, ‘Jaserpa libronmanta’, ‘Jehová maqanakuykunapi atipasqan libromanta’ ima, parlan (Jos. 10:13; Núm. 21:14, NM). Chaywanpis kay 2 librosmanta ni mayqin Bibliap librosninwan khuska kachkanchu. ¿Chay ninayanchu Diospa yuyaychasqan librosmanta, wakin libros chinkapusqanta?

Mana kay iskay librosqa, Diospa yuyaychasqan kasqanta, chantá chinkasqanta nisunmanchu. Bibliata qillqaqkunaqa, achkha librosmanta parlarqanku. Ichapis chaykunamanta wakin librosqa, Bibliap librosninpi kachkan, chaywanpis wak sutiswan kachkasqanrayku, kunan tiempopi Bibliata ñawiriqkunaqa Bibliamanta ima libroschus kasqankuta, mana yachankuchu. Sutʼinchanapaq; 1 Crónicas 29:29 pʼiti, ‘profeta Samuelpa’, ‘profeta Natanpa’, ‘profeta Gadpa’ ima, librosninkumanta parlan. Ichá kay librosqa, kunan tiempopi, Ñawpa kaq, Iskay kaq Samuel libro, chayri Jueces libro sutichakun.

Chantapis wakin librospa sutisninqa, Bibliap librosninpa sutisninman rikchʼakun, chaywanpis mana Bibliap librosninpunichu. Chaykunamanta tawa librospa sutisninqa: “Judamanta reyespa ruwasqasninkumanta willaj” libro, “Judamanta, Israelmantawan reyesninkoj” libron, “Israelpa reyesnimpa” libron, “Judamanta, Israelmanta reykunaj” libron ima. Kay librosqa, Bibliapi Ñawpaq kaq, Iskay kaq Reyes librosman rikchʼakun, chaywanpis kay tawa librosqa mana Diospa yuyaychasqan libroschu, nitaq Bibliap librosninwan khuska kayta atinchu (1 Rey. 14:29; 2 Cró. 16:11; 20:34; 27:7). Chay librospiqa, astawan ñawpaqta imachus kasqanmantachá qillqasqa kachkarqa. Ichapis chay librosqa, Esdraspa, Jeremiaspa tiemponpi ima kachkallarqaraq, chayrayku paykunaqa Bibliata qillqachkaspa, wakin kuti chay librospa sutisninkuta uqharirqanku.

Chayrayku Bibliata, wakin qillqaqkunaqa, chay tiempopi libros kaqmanta parlarqanku, chay libros mana Diospa yuyaychasqan kaptinpis. Astawan sutʼinchanapaq; Ester 10:2 pʼiti, “Mediamanta Persiamanta reyespa yuyarikuna libro[manta]” parlan. Lucastaq, Evangelionpi ‘tukuy imasta allinta entiendespa qallariymantapacha imachus kasqanta qillqasqanta’, nirqa. Ichapis chayta ruwananpaq, chay tiempopi librosta sumaqta ñawirirqa, jinamanta ñawpa runaspa mirayninkumanta qillqananpaq, Adanmantapacha, Jesuskama (Luc. 1:3,4; 3:23-38). Discípulo Lucas, wak librosta sumaqta ñawirispa qillqaptinpis, Lucas librota qillqasqanqa, Diospa yuyaychasqan kasqanrayku, allinninchikpaq.

Kay yachaqanap tapuyninpi ‘Jaserpa libronmanta’, ‘Jehová maqanakuykunapi atipasqan libromanta’ ima parlarqanchik. Rikunchikjina kay librosqa, ichá mana Diospa yuyaychasqan libroschu kanku. Chayrayku Jehovaqa, kay iskay libros chinkananta saqillarqa. Chantapis, kay iskay librospa sutisninqa, Bibliapi rikhurisqanrayku, Bibliap rimaykunasninta ukhunchaqkuna, kay iskay libros, Israel llaqta enemigosninwan chʼampaypi rikukusqanmanta, takiykuna libros kasqanta, ninku (2 Sam. 1:17-27). Bibliap rimaykunasninta ukhunchanapaq libro nisqanmanjina, ichapis kay iskay librospiqa, ‘poesias, ñawpa Israelmanta sumaqta takiyta yachaqkunap takiykunasnin ima, qillqasqa kachkarqa’. Jehovaqa, wakin kuti runasman profeciasta, chayri musquypijina rikusqankuta sutʼincharqa, paykunataq chayta Bibliapi qillqarqanku, chay qillqasqankutaq “may sumaj kashan yachachinapaj, juchata reparachinapaj, cheqa kajman kutirichinapaj, cheqanta kawsayta yachachinapaj ima”. Chaywanpis chay runasqa, wak librosta qillqallarqankutaq, mayqinkunatachus Dios mana yuyaycharqachu, nitaq Bibliap librosninwan khuskachu kachkan (2 Tim. 3:16; 2 Cró. 9:29; 12:15; 13:22).

Bibliapi, wak librospa sutisnin rikhurisqanqa, mana ninayanchu chay libros Diospa yuyaychasqan kasqankuta. Chaywanpis, Jehová Diosqa ‘Palabranta’ waqaychan, chaytaq “wiñaypa wiñaynintimpaj sayallanqapuni” (Isa. 40:8). Arí, Jehovaqa, ‘allin kaqta ruwananchikpaq’ imatachus necesitasqallanchikta, Bibliap 66 librosninpi qillqachirqa kunankamataq waqaychachin (2 Tim. 3:16, 17).