Juntʼaq Mayordomo, Diospa Llaqtanta Kamachiqkuna ima
Juntʼaq Mayordomo, Diospa Llaqtanta Kamachiqkuna ima
“Pitaj allin yuyayniyoj juntʼaj mayordomo, mayqentachus patronnin churan wasi qhawajta, tiempompi kamachisman mikhuchinampajtaj, chay?” (LUC. 12:42.)
1, 2. Qhipa pʼunchaykunamanta parlaytawan, ¿imatá Jesús tapurqa?
JESÚS imaynachus qhipa pʼunchaykuna kananmanta parlaytawan, tapurqa: “Pitaj chay allin kamachi, yuyayniyojtaj kanman, mayqentachus patronnin churanman kamachi masisninman horanpi mikhunata jaywanampaj, chay?”, nispa. Chaymanta nillarqataq, allin kamachi yuyayniyuq chiqa sunqu kasqanrayku, patronninpa tukuy kapuyninta qhawananpaq kamachisqa kananta (Mat. 24:45-47).
2 Jesusqa, aswan ñawpaqta kikillantataq tapurirqa (Lucas 12:42-44, ñawiriy). Chay kutitaq, allin kamachi yuyayniyuqta, ‘mayordomo’ nispa suticharqa, kamachi masisnintataq, ‘kamachis’ nispa suticharqa. Juk mayordomoqa, wasita, chaypi llamkʼaq masisninta ima qhawaq. Chaywanpis Jesús nisqanmanjina, ¿pitaq chay allin kamachi yuyayniyuq chayri mayordomo? ¿Imaynatataq chay allin kamachi yuyayniyuq, kamachisninman tiemponpi mikhunata jaywan? Kay tapuykunaqa may allin, imaraykuchus piniqtachus Jehová yachachiwasqanchikta yachananchikpuni tiyan.
3. a) Bibliamanta yachaq runas nisqankumanjina, ¿pitaq chay ‘allin kamachi yuyayniyuq’, pimantachus Jesús parlachkarqa chay? b) ¿Pikunawan ‘mayordomo’ chayri ‘allin kamachi yuyayniyuq’ ninakun? Jesús ‘kamachismanta’ chayri ‘kamachi masismanta’ parlachkaspa, ¿pikunamantá parlachkarqa?
3 Bibliamanta yachaq runasqa, Jesús kay pʼitipi, llulla religionta kamachiqkunamanta parlachkasqanta ninku. Chaywanpis Jesús, chayri ‘patronqa’, mana sapa religionpi juk allin kamachi yuyayniyuq churasqa kanankumantachu parlachkarqa. Manachayqa, juk ‘mayordomolla’, chayri juk ‘allin kamachi yuyayniyuqlla’, tukuy kapuyninta qhawananpaq churasqa kananta nirqa. Chayrayku kay revistapijina, achkha kutista imaynatachus sutʼinchakusqanmanjina mayordomoqa, ‘juchʼuy tropawan’, chayri tukuy akllasqa cristianoswan ninakun. Lucas Evangeliopi nisqanmanjina Jesusqa, niraq mayordomamanta parlachkaspa, kay juchʼuy tropamanta parlachkarqa (Luc. 12:32). Chantapis, ‘kamachismanta’, chayri ‘kamachi masismanta’ parlachkaspa Jesusqa, sapa juk akllasqa cristianomanta parlachkarqa. Chaywanpis Bibliap yachachisqanmanjina, ¿tukuy akllasqa cristianoschu yachachiykunata mikhunatajina, kamachispaq wakichinanku karqa? Imatachus kaymanta Biblia yachachisqanta sumaqta ukhuncharispaqa, kay tapuyman kutichiyta atisunchik.
Jehovap kamachin ñawpa tiempopi
4. a) Jehová, Israel llaqtata ñawpa tiempopi, ¿imatá suticharqa? b) ¿Israel llaqtata pikunataq yachachiq kanku?
4 Jehovaqa, Israel llaqtata ñawpa tiempopi, kamachiy nispa suticharqa. Nirqataq: “Qankuna testigosniy kankichej [reparay kaypiqa achkhamanta parlachkan], noqaj ajllakusqay kamachiypis [kaypitaq reparay jukllamanta parlasqanta]” (Isa. 43:10). Rikunchikjina, tukuy Israel llaqta, Diospa juk kamachinjina karqa. Chaywanpis, Israel llaqtata yachachiqkuna, sacerdotes, levitas imalla kasqankuta yuyarikunachik tiyan (2 Cró. 35:3; Mal. 2:7).
5. ¿Ima llaqta akllasqa kananmantataq Jesús parlachkarqa?
5 Jesús, allin kamachi yuyayniyuqmanta parlachkaspa, ¿Israel llaqtamantachu parlachkarqa? Mana. Imaraykuchus Jesusqa, ajinata judiosman nirqa: “Diospa reinonqa qankunamanta qhechusqa kanqa, jinataj Diospa munayninta ruwajkunaman qosqa kanqa”, nispa (Mat. 21:43). Rikunchikjina Jesusqa, Jehová, musuq llaqtata akllananmanta parlachkarqa. Chantapis, allin kamachi yuyayniyuq imaynatachus yachachinan kasqanta sitʼinchachkaspa, Diospa ‘kamachin’ ñawpa tiempopi Israel llaqtata imaynatachus yachachiq kanku, ajinallatataq ruwananta nirqa.
Allin kamachi yuyayniyuq rikhurin
6. Pentecostés 33 watapi, ¿ima llaqtataq rikhurirqa, pikunataq chaymanta kanku?
6 Jehovap musuq ‘Israel llaqtanqa’, paypa akllasqasnin kanku (Gál. 6:16; Rom. 2:28, 29; 9:6). Kay musuq llaqtanqa, Pentecostés 33 watapi, Dios espíritu santonta qutuchakuyman tʼakaykamusqanmantapacha rikhurirqa. Chaymantapachataq, sapa cristiano espíritu santowan akllasqa kaytawanqa, Diospa musuq llaqtanmanta kanan karqa, Jesucristotaq chay llaqtata allin kamachi yuyayniyuq nispa suticharqa. Chay llaqtamanta kaqkunataq, Diospa Reinonmanta runasman willamunankupaq, Jesuspa discipulosninman tukuchimunankupaq ima, kamachisqas karqanku (Mat. 28:19, 20). Chaywanpis, ¿tukuyninkuchu Bibliap nisqanmanjina yachachiykunata wakichinanku karqa? Imatachus Biblia kutichisqanta qhawarina.
7. a) ¿Imatá apóstoles qallariypi ruwananku karqa? b) Unayninmantaq, ¿imatawan japʼirqanku?
7 Jesusqa, 12 apostolesta akllarqa, Diospa Reinonmanta runasman willamunankupaqtaq kacharqa. Paykunaqa, ñawpaqman chay ruwayta churananku karqa (Marcos 3:13-15, ñawiriy). Griego simipi Apóstolos rimayqa, ‘kachay’ niyta munan, chay parlaytaq Jesús kamachisqanwan khuskachasqa kachkan. Chaymanta apostolesqa, Diospa qutuchakuynin qallarinan kachkaptin, wak ‘ruwanatawan japʼirqanku’ (Hech. 1:20-26).
8, 9. a) Pentecostesmantapacha, ¿imallapitaq 12 apóstoles llamkʼananku karqa? b) ¿Pikunatá apostolestajina riqsikullarqataq?
8 Apóstoles, ¿ima llamkʼaytataq ruwarqanku? Kay tapuyman kutichinapaqqa, Pentecostesmanta pisi tiemponman imachus kasqanta qhawarina. Bibliaqa, viudasman mikhunata mana allintachu rakʼikuchkasqanmanta parlan. Apostolestaq, chay chʼampayta allinchanankupaq discipulosta waqyaspa nirqanku: “Mana allinchu noqaykupaj kanman, Diospa Palabranta saqerparispa mikhunataraj runasman rakʼinaykoqa”, nispa (Hechos 6:1-6, ñawiriy). Chayrayku, “mikhunata rakʼinankupaj”, allin kʼacha kaykunasniyuq hermanosta akllarqanku, ajinamanta paykuna Diospa ‘Palabranmanta willamunallankupaqpuni’. Chay ruwasqankutataq Jehová bendicerqa, “ajinamanta Diospa Palabran tukuynejpi uyarikorqa. Jinataj ashkhas Jerusalén llajtapi kajkuna creerqanku, jinaqa creejkunaman yapakusharqanku” (Hech. 6:7). Rikunchikjina apostolesqa, Diospa llaqtanman, Diosmanta yachachinanku karqa (Hech. 2:42).
9 Apostolesqa, aswan qhipaman wak cristianosta akllarqanku, wak imasta ruwanankupaq. Pablomantawan, Bernabemantawan qhawarina. Paykunaqa, Diospa espíritu santop yanapayninwan, misionerosjina Antioquía qutuchakuymanta kachasqas karqanku. Chayrayku, mana chunka iskayniyuq apostolesmanta kaptinkupis, apostolestajina qhawarqanku (Hech. 13:1-3; 14:14, 15; Gál. 1:19). Astawan qhipamantaq, Jerusalenpi kaq Diospa Llaqtanta Kamachiqkunaqa, apostolespuni kasqankuta sutʼincharqanku (Gál. 2:7-10). Chaymantataq Pabloqa, Dios yuyaychasqanmanjina ñawpaq kaq cartanta qillqarqa, ajinamantataq Diospa yachachiyninta cristianospaq wakichiyta atirqa.
10. ¿Ñawpaq siglopi tukuy akllasqa cristianoschu, Diosmanta yachachiyta qutuchakuykunapaq wakichinanku karqa? Sutʼinchariy.
10 Chaywanpis, ¿tukuy akllasqa cristianoschu imaynatachus willakunanta kamachinanku karqa? Chantá, ¿Diospa nisqanmanjinataq yachachiykunata wakichinanku karqa? Mana. Imaraykuchus apóstol Pablo nirqa: “Mana tucuychu cachasnin cancu. Mana tucuychu willarajcuna cancu. Mana tucuychu yachachejcuna cancu. Mana tucuychu jatun tʼucunasta ruwajcuna cancu”, nispa (1 Cor. 12:29, Dios Parlapawanchej). Espíritu santoniqta akllasqa cristianosqa, tukuyninku Diosmanta runasman willarqanku, chaywanpis pusaqlla Bibliamanta Griego Qillqakunata qillqarqanku.
Kunan tiempopi allin kamachi yuyayniyuq
11. Allin kamachi yuyayniyuq, ¿imatá qhawanan karqa?
11 Kay Mateo 24:45 pʼitipi Jesús parlasqanmanjina, allin kamachi yuyayniyuqqa, tukukuy pʼunchaykunapipis kanallanpuni karqa. Kay akllasqa cristianosmanta parlaspa, Apocalipsis 12:17 pʼitiqa, warmip Mirayninmanta ‘puchuqkuna’ kasqankuta sutʼinchan. Kay akllasqa cristianosllatataq, kay Jallpʼapi Cristop tukuy kapuyninta qhawananpaq kamachikun. Chay Patronpa kapuyninqa, Diospa kamachisnin kay Jallpʼapi kawsakuyta suyakuqkuna kanku, Jallpʼantinpi tukuy Betel wasis, Tantakunapaq Wasis ima, tukuy chaykunatataq mayordomo qhawanan karqa.
12, 13. Juk cristiano janaqpachaman rinanpaq akllasqachus manachus kasqanta, ¿imaynatá yachanman?
12 Juk cristiano janaqpachaman rinanpaq akllasqachus manachus kasqanta, ¿imaynatá yachanman? Pablo, payjina janaqpachaman riyta suyakuq cristianosman imatachus nisqanta qhawarina: “Pikunachus Diospa Espiritumpa pusaykachasqan kajkunaqa Diospa wawasnin kanku. Mana wata runa kay sonqochu qankunaman qosqa karqa, ujtawan manchasqalla kanaykichejpaj, astawanqa Diospa Espiritun qankunaman qosqa karqa Diospa wawasnin kanaykichejpaj. Chayrayku Diosmanta mañakunchej: Tatáy, Tatáy, nispa. Chay kikin Espiritullataj espiritunchejwan khuska testigo jina sutʼinchan Diospa wawasnin kasqanchejta. Sichus paypa wawasnin kanchej chayqa, herenciayoj kanchej. Diosmanta herenciayoj kaspataj, Cristowan khuska herenciata japʼisunchej. Sitajchus Cristowan khuska ñakʼarinchej chayqa, paywan khuskallataj jatun kaynimpa kʼanchaynimpi wiñaypaj kasunchej” (Rom. 8:14-17).
13 Akllasqa cristianos kaqkunaqa, Diospa espíritu santonniqta akllasqa kanku, janapaqpachaman rinankupaqtaq ‘waqyasqas’ kanku (Heb. 3:1). Chantapis Jehovaqa, sapa jukta waqyan. Paykunaqataq, mana iskaychakunkuchu, nitaq manchachikunkuchu, Dios wawasnin kanankupaq akllasqanmanta (1 Juan 2:20, 21, ñawiriy). Chaywanpis paykunaqa mana suyakuyninkuta akllankuchu, manaqa Jehová espíritu santonwan akllan chayri sellan (2 Cor. 1:21, 22; 1 Ped. 1:3, 4).
Maychus kaqllata yuyana
14. Akllasqa kaqkuna, ¿imaynatá waqyasqa kasqankumanta yuyanku?
14 Janaqpachaman waqyasqas kaqkuna, ¿imatá paykuna kikinkumanta yuyananku tiyan? Paykunaqa, janaqpachaman rinankupaq waqyarisqalla kasqankuta yachanku. Chantapis, chay tʼinkata japʼinankupaq wañupunankukama Diosman chiqa sunqu kanankuta yachallankutaq. Llampʼu sunquwan Pablojina yuyanku: “Hermanos, mana ninichu noqa chay tʼinkata taripasqaytaña; astawanri kayta ruwani: Imachus kawsayniypi ñawpajta karqa, chayta qonqayman churaspa, atisqayta kallpakuni ñawpajpi kajta taripanaypaj. Ñawpajman rishallanipuni, maymanchus chayana kashan, chayman chayanaykama, tʼinkata japʼinaypaj patamanta Dios wajyawarqa Cristo Jesuspi, chayman” (Fili. 3:13, 14). Kunan tiempopi akllasqa kaqkunamanta puchuqkunaqa, tukuy atisqankuta ruwanku, ‘waqyasqa kasqankumanjina, llampʼu sunqu kaywan, kʼumuykukuywan’ ima, “Diosta manchachikuspa” purinankupaq (Efe. 4:1, 2; Fili. 2:12; 1 Tes. 2:12).
15. Juk hermano Señorpa Cenanpi tʼanta mikhuptin, vinota ukyaptin ima, ¿imaynatá qhawana tiyan, chantá akllasqa kaqkuna imaynatá paykuna kikinkumanta yuyananku tiyan?
15 Juk hermano akllasqa kasqanta nispa, Señorpa Cenanpi tʼantata mikhuptin, vinota ukyaptin ima, ¿imaynatá qhawananchik tiyan? Mana pipis juzgayta atinmanchu, imaraykuchus chaytaqa paywan, Jehovawan imalla yachanku (Rom. 14:12). Akllasqa cristianosqa, mana mañawanchikchu, akllasqa kasqankurayku may allinpaq paykunata qhawananchikta. Chantapis, mana Bibliamanta astawan yachasqankuta yuyankuchu, akllasqa kasqankuraykulla, ‘may chhika runasmanta’ wakinkuna unaytaña sumaqta Bibliata ukhunchaqkunamantapis (Apo. 7:9). Manallataq ‘wak ovejasmanta’ nisqaqa, Diospa espíritu santonta astawan japʼisqankutapis yuyankuchu (Juan 10:16). Chantapis, Señorpa Cenanpi tʼantata mikhusqankurayku chayri vinota ukyasqankurayku imalla, ancianosmanta nisqa, astawan patapi kasqankuta mana yuyankuchu.
16-18. a) Bibliamanta juk yachachiy astawan entiendekuptin, ¿tukuy akllasqa cristianosmanchu chay rato willakun? b) Diospa Llaqtanta Kamachiqkuna imatapis ruwanankupaq, ¿tukuy akllasqa cristianostaraqchu tapunanku tiyan?
16 Bibliamanta juk yachachiy astawan entiendekusqantawankama, ¿pachantinmanta akllasqa cristianosman chay ratochu willakun? Mana. Allin kamachi yuyayniyuq, akllasqa kaqkunapaq Bibliap nisqanmanjina yachachiykunata wakinanku tiyan. Chaywanpis, allin kamachi yuyayniyuq kaqkunamanta, sapa juk wakjina llamkʼayniyuq kanku (1 Corintios 12:14-18, ñawiriy). Rikusqanchikmanjina ñawpa siglopiqa, tukuy cristianos runasman Diosmanta willamurqanku, chaywanpis wakillan Bibliap librosninta qillqarqanku, qutuchakuykunatapis qhawarqanku.
17 Sutʼincharinapaq: Bibliaqa, juk hermano juchallikuptin qutuchakuy kʼaminanta chayri wikchʼunanta nin (Mat. 18:17). Chayta nispaqa qutuchakuymanta ancianoslla kʼamiyta chayri wikchʼuyta atisqankuta, niyta munan. Chayta ruwanankupaqtaq ancianosqa, mana sapa juk hermanotaraqchu tapunanku tiyan, manaqa kamachisqa kasqankumanjina, qutuchakuypa sutinpi, Bibliap nisqanmanjina ruwanku.
18 Ajinallataq allin kamachi yuyayniyuqwanpis, imaraykuchus wakinkunalla allin kamachi yuyayniyuqpa sutinpi, Diospa Llaqtanta Kamachinankupaq churasqa kanku. Paykunataq Diospa Reinonmanta allinta willakunanta, yachachiykuna Bibliap nisqanmanjina wakichikunanta ima, sumaqta qhawanku. Ñawpaq siglopijina, Diospa Llaqtanta Kamachiqkunaqa, imatapis ruwanankupaq, mana sapa juk allin kamachi yuyayniyuqmanta kaqkunataraqchu tapunku (Hechos 16:4, 5, ñawiriy). Chaywanpis, tukuy akllasqa cristianos, Diospa Reinonmanta mana saykʼuspa runasman willamuchkanku. Chay ‘allin kamachi, yuyayniyuqqa’, juk cuerpojina kanku, sapa jukninkutaq wakjina llamkʼayta ruwanku (1 Cor. 12:19-26).
19, 20. Allin kamachi yuyayniyuqmanta, Diospa Llaqtanta Kamachiqkunamanta ima, ¿imatá kay Jallpʼapi wiñay kawsayta suyakuqkuna yuyanku?
19 Kay Jallpʼapi, wiñaypaq kawsakuyta suyakuqkuna, ¿imatá kay yachaqanapi sutʼinchakusqanta yachakunkuman? Reypa kapuyninmanta kaqkunaqa, Diospa Llaqtanta Kamachiqkuna, ‘allin kamachi yuyayniyuqpa’ sutinpi ruwachkasqankuta, Bibliap nisqanmanjinataq yachachiykunata wakichisqankumanta, mayta agradecenku, tukuy sunqutaq yanapanku. Chantá, allin kamachi yuyayniyuqmanta kaqkunata allinpaq qhawaspapis, mana jatunchankuchu. Diospa espíritu santonniqta akllasqa kaqkunapis, nillataq may jatunpaq qhawasqa kayta suyankuchu (Hech. 10:25, 26; 14:14, 15).
20 Tukuy akllasqa cristianos, kay Jallpʼapi wiñay kawsayta suyakuqkunapis, allin yuyayniyuq juntʼaq mayordomota, Diospa Llaqtanta Kamachiqkunata ima, tukuy sunqu yanapanachik. Chayrayku, wakichisqas kay pacha tukukunankama, Diosman chiqa sunqullapuni kanachik (Mat. 24:13, 42).
¿Atiwaqchu kutichiyta?
• ¿Pitaq ‘allin kamachi yuyayniyuq’, chantá pikunataq ‘kamachi masis’ kanku?
• ¿Imaynatá juk cristiano janaqpachaman waqyasqa kasqanta yachan?
• ¿Pillataq, Bibliap nisqanmanjina yachachiyta wakichinanpaq kamachisqa kachkan?
• Akllasqa cristianos, ¿imatá paykuna kikinkumanta yuyananku tiyan?
[Tapuykuna]
[23 paginapi dibujo/foto]
Diospa Llaqtanta Kamachiqkunaqa, ñawpaq siglopijina, allin kamachi yuyayniyuqpa sutinpi imatapis ruwanku