Chiqa yachachiy Tuva llaqtap kʼuchusninkama chayan

RUSIA suyupi Tuva llaqtaqa, Siberiap ura kantunpi kachkan, Mongolia suyuwan tinkuyniqpi. Chay llaqtamanta runasqa, karuspi tiyakunku, chayrayku achkhas, Diosmanta willayta mana uyarinkuchu. Kyzyl llaqtaman juk tantakuyman achkha runas risqankumanta, niraq unaychu. Juk precursora Maria sutiyuq, chay llaqtaman tukuyniqmanta jamuchkasqankuta uyarispa, mayta paykunaman Diosmanta willayta munasqa.

Maria nin: “May yachaywasipichus yachachiqjina llamkʼani chaypi, juk tantakuyta wakichirqanku, viciosman qukuqkunata imaynatachus yanapanankumanta parlanankupaq. Tuva llaqtap, karu lugaresninmanta 50 runasjina jamunanku karqa. Chay tantakuypiqa, yachachiqkuna, psicólogos nisqa, wawasta jarkʼaqkuna imaynatachus llamkʼachkasqankuta qhawaqkuna, wakkuna ima, kachkarqanku”. Mariaqa, paykunaman willay sumaq kasqanta yacharqa. Pay nin: “Manchali kasqayrayku, Diosmanta mana willayta atillaqchu kani. Chayrayku Jehovamanta yanapata mañakurqani”, nispa. ¿Manchachikuyninta atiparqachu?

Pay nin: “Manchachikuymanta parlaq juk ¡Despertad! revistata tarirqani, chay revistata psicólogo nisqa munananta yuyaspataq, yachaywgasiman aparqani. Chay pʼunchayqa, chay tantakuyman riqkunamanta juk yachachiq oficinayman jamurqa, chay revistatataq jaywarqani, paytaq kusisqa japʼikuwarqa. Chantapis, pay kikin juk manchachikuyniyuq kasqanta willawarqa. Qhipan pʼunchaytaq, Waynaspata sipaskunapta tapukuyninku, ñawpaq kaq librota aparqani, chaytapis japʼikullawarqataq. Ajinata japʼikuwasqanrayku, wak yachachiqkunapis japʼikunawankuta yuyarqani. Chayrayku, Waynaspata sipaskunapta tapukuyninku librota, wak publicacionesta ima, juk caja juntʼata yachaywasiman aparqani”. Chaytaq usqhayllata tukukapurqa. Maria nin: “Mayqin yachachiqwanchus parlarirqani, paypa compañerosnin oficinayman jamusqanku, tapuwarqankutaq: ‘¿Maypitaq librosta quchkankuri?’, nispa”. Paykunaqa chiqanta jamusqanku.

Chay tantakuyqa, sábado pʼunchay tukukapurqa. Mariaqa, manaña chay pʼunchay llamkʼachkarqachu, chayrayku oficinanpa achkha mesaspi, publicacionesta churarqa, pizarronpitaq ajinata qillqarqa: “Munasqa yachachiqkuna, kay publicacionesta, qamkunapaq, riqsisqasniykichikpaq ima, apakuyta atiwaqchik. Kay librospi yachachiykunaqa, llamkʼayniykichikpi, familiaykichikpi ima, yanapasunqachik”, nispa. ¿Chay librosta apakurqankuchu? Pay nin: “Chay pʼunchayqa oficinayman rirqani, publicacionestataq yaqha tukuyninta apakapusqanku. Chayrayku revistasta, librosta ima, astawan aparqani”. Mariaqa, chay tantakuy tukukunanpaq 380 revistasta, 173 librosta, 34 folletosta ima, jaywasqa. Chay tantakuyman jamuqkunataq, lugarninkuman chay publicacionesta apakusqanku. Maria nin: “Bibliamanta chiqa yachachiy, Tuva llaqtap kʼuchusninkama chayasqanmanta may kusisqa kachkani”, nispa (Ecl. 11:6).

[32 paginapi mapa]

(Publicacionpi qhawariy texto originalta)

RUSIA

TUVA LLAQTA