Yanapanakuspaqa ñawpaqman risunchik

JUK familia, Diospa llaqtanpi ñawpaqman riyta munan chayqa, yanapanakunanku tiyan. Jehovaqa, qhariwarmita ruwachkaspa yanapanakunankuta nirqa: Evaqa, Adanpa ‘yanapaqnin’ kanan karqa, chayrayku qhariwarmiqa, puraqmanta yanapanakunanku tiyan (Gén. 2:18; Ecl. 4:9-12). Chantapis, tatas, wawas ima, yanapanakuptinkuqa, imatachus Jehová paykunapaq kamachisqanta, allinta juntʼanqanku.

Familiapi Diosta yupaychanapaq

Barrywan, Heidiwanqa, phichqa wawasniyuq kanku, paykunaqa familiapi Bibliamanta yachakuspa ñawpaqman rinankupaq yanapanakusqanku, may allin kasqanta reparanku. Barry nin: “Wawasniymanqa, familiapi Bibliamanta yachakuchkaptiyku parlarinankupaq, atisqankumanjinalla wakichikunankuta nini. Wakin kutiqa, ¡Despertad! revistamanta, juk chhikanta parlarinankuta chayri runamanpis willachkankumanjina rikuchinankuta nini, ajinamanta wawasniy sumaq willaqkuna kanankupaq”. Heidi nin: “Sapa jukniyku juk listata ruwakuyku, Diospaq llamkʼaypi imastachus ruwayta munasqaykumanta, familiapi yachakuchkaspataq, chayta juntʼanaykupaq imastañachus ruwachkasqaykumanta parlariyku”. Kay qhariwarmiqa, tukuy familia Bibliata ñawirinankupaq, wakin chʼisis ni pi teleta qhawananta kamachinku.

Tantakuykunapaq

Mikewan, Denisewanqa tawa wawasta uywarqanku. Yanapanakusqanku, ¿imaynamantá familiankuta yanaparqa? Mikeqa nin: “Tantakuykunaman tiemponpi chayanaykupaq mayta kallpachakuspapis, wakin kuti mana atiqchu kayku, chaywanpis tukuy familia yanapanakuptiykuqa, atikusqanta repararqayku”. Denise nin: “Wawasniyku juchʼuyllaraq kachkaptinku, sapa jukman imatachus ruwanankuta kamachiq kayku. Kim warmi wawaykuqa, waykʼuysiwaq, mesatataq wakichiq”. Michael wawanku ajinata nin: “Martes chʼisisninqa, wasiykupi tantakuy ruwakuq. Chayrayku, chay cuartota llimphuchaspa, sillasta churaspa ima, yanapaq kayku”. Matthew wawantaq nin: “Tatayqa, tantakuna chʼisispi, llamkʼayninmanta usqhayllata kutimpup, tantakuypaq allin wakichisqa kanaykupaqtaq yanapawaq kayku”. Ajinata ruwasqanku, ¿imaynatá chay familiata yanaparqa?

Kallpachakuyqa mana qhasipaqchu

Mike nin: “Kay 1987 watapi, warmiywan precursores kayta qallarirqayku. Kimsa wawasniykutaq, ñuqaykuwan tiyachkarqanku. Chantá, paykunamanta iskay precursoresjina llamkʼayta qallarirqanku, jukkunataq, Betel wasis ruwaypi llamkʼaysikurqanku. Chantá, familiay 40 runasta bautizakunankupaq yanapasqanmanta, may kusisqas kayku. Astawanpis, Tantakunapaq Wasis ruwakusqanpi, wak suyuspi ima, llamkʼarqayku”.

Arí, yanapanakunapaq kallpachakuyqa, mana qhasipaqchu. ¿Imaspiwantaq familiaykipi yanapanakuyta atiwaqchik? Familiapi yanapanakuptiykichikqa, Diospa llaqtanpi ñawpaqman rinkichik.

[28 paginapi dibujo/foto]

Willamunapaq familiapi rikuchiykunata ruwayqa, may allin