Bibliata ukhuncharinaykipaq, ¿tiempochakunkiñachu?

QAYNA wataqa, Diospa Llaqtanta Kamachiqkuna, tantakuykunap horariosnin tikrakusqanta willawarqanchik. Chayraykutaq, familiapi Diospa Palabranta ukhunchanapaq aswan tiempoyuq kanchik. Tata kanki chayqa, warmiykiwan, wawasniykiwan ima, Bibliata sapa semana ukhunchayta, ama qunqaychu. Mana wawasniyuq kaspaqa, warmiykiwan Bibliata ukhunchariy. Mana familiaykiwan tiyakuq soltero kaptiykitaq, sapallaykipi Bibliata astawan ukhunchay.

Achkha hermanosqa, Familiapi Diosta Yupaychanapaq Chʼisi kasqanmanta, may agradecesqas kanku. Sutʼincharinapaq, juk anciano Kevin * sutiyuq, jinata qillqarqa: “Qutuchakuypiqa, tukuy may agradecesqa kachkayku. Wakin kutiqa, ancianos imaynatachus Diospa Llaqtanta Kamachiqkuna nisqankumanjina, familiasniykuwan Bibliata chay chʼisipi ukhuncharisqaykumanta parlariyku”, nispa.

Juk ancianop warmin, Jenny sutiyuq, jinata qillqarqa: “Kimsa warmi wawasniyuq kayku, jukqa 15, juknintaq 11, juchʼuy kaqtaq 2 watayuq. Makiswan parlaypi qutuchakuyman risqayku, manaraq unaychu kasqanrayku, tantakuykunapaq astawan unaypi wakichikuyku. Chaywanpis, tantakuy semanapi iskay kutilla ruwakunanta kamachikusqanrayku, juk chʼisipiwan familiapi Jehovata yupaychanaykupaq tiyapuwayku”.

John, JoAnn ima, qhariwarmi precursores regulares kanku, paykuna qillqarqanku: “Qutuchakuypi achkha ruwanasniyuq kasqaykurayku, Bibliata sapa semana khuska ukhunchanaykupaq, mana tiempoyku kallaqchu. Tantakuykuna tikrakusqanqa, Jehovap regalon, paypaq astawan llamkʼanaykupaqtaq kallpachawayku, chaywanpis chay tiempota sumaqta apaykachanayku tiyan”.

Tonyqa 25 watayuq soltero, payqa, martes chʼisis Bibliata ukhunchan, wak pʼunchaykunataq, tantakuykunapaq wakichikun. Pay nin: “Martes pʼuchay chayamunantaqa, mayta suyakuni. Chay chʼisiqa, Diosniyta yupaychanaypaq. Iskay horastajina Jehovaman astawan qayllaykunaypaq, sumaq yachaqanasta ukhuncharini, astawan tiempoy kapuwasqanraykutaq, ñawirisqay pʼitispi tʼukurini”, nispa. ¿Imaynatá chay ruwasqan Tonyta yanaparqa? Pay nin: “Imatachus ñawirisqayqa, sunquypi astawan saphichakuchkan. Juk kutiqa, Perspicacia nisqa libropi, Davidwan, Jonatanwan may amigos kasqankumanta ñawirirqani, Jonatán mana allinnillanpi yuyasqanmantataq, mayta yachakurqani. Imaynachus juk chiqa amigo kasqantapis, sumaqta entienderqani. Mayta martes chʼisista suyakuni, chay may valorniyuq yachachiykunata, aswan allinta yachanaypaq”.

Chiqamanta nisunman: tukuy Jehovamanta sutʼinchaqkuna Bibliata, chay tʼaqasqa tiempopi astawan ukhuncharinanku, familiapi Diosta yupaychananku ima, allinninkupaq kananta.

[Sutʼinchaynin]