‘Sumaq saphichasqa sinchita sayanachik’

¿WAYRA juk sachʼata kuyuchichkasqanta rikunkichu? Chay sachʼaqa, sumaq saphichasqa kasqanrayku, sinchi wayrapipis sayasqallapuni kachkan. Ñuqanchikpis achkha chʼampaykunapi rikukuspa, ‘sumaq saphichasqa sinchʼita sayasunchik’ chayqa, chay sachʼajina sayallasunchikpuni (Efe. 3:14-17). Chaywanpis, ¿imapi saphichasqa kananchik tiyan?

Diospa Palabranqa, “Jesucristomin” qutuchakuymanta “chay aswan sumaj esquina rumi” kasqanta nin (Efe. 2:20; 1 Cor. 3:11). Chantapis, ‘paywan khuskallapuni kawsananchikta, paypi saphichasqas, wiñasqa kaspataq, creeypi kallpachakunanchikta’ niwanchik. Kay yuyaychayta kasukuptinchikqa, ni imapis iñiyninchikmanta iskaychachiwasunchu, nitaq runaspis “qhasi manakaj” “miskʼi parlasqankuwan pantachi[wasunchu]” (Col. 2:4-8).

“Anchonman, saytʼunman, ukhunman, sayayninman ima”

¿Imaynamantá “saphichasqa”, “creeypi kallpachasqas” ima, kasunman? Diospa Palabranta astawan ukhunchaspallapuni. Jehovaqa, chiqa yachachiymanta “ajllasqaswan khuska sumajta entiendeyta atin[anchikta] may jinachus Cristoj munakuynin kasqanta: Anchonman, saytʼunman, ukhunman, sayayninman ima”, munan (Efe. 3:18). Chayrayku, ni pipis pisi yachasqallanwanqa qhipakunanchu tiyan, nisunman Diospa Palabranmanta “qallariy yachachinasta” yachasqallanwanqa (Heb. 5:12; 6:1, 2). Manaqa, Bibliap chiqa yachachiykunasninta, astawan ukhunchananchik tiyan (Pro. 2:1-5).

Chantapis, ‘sumaq saphichasqa sinchʼita sayanapaqqa’, mana achkha yachayniyuqllachu kananchik tiyan. Imaraykuchus Supaypis, Bibliap nisqantaqa sumaqta yachallantaq. Chayrayku, “Cristoj [munakuyninta] sumajta [riqsinanchik tiyan], mayqenchus tukuy runaspa yuyayninta atipan” (Efe. 3:19). Chantá, Jehovata, chiqa yachachiyta ima, munakusqanchikrayku, Diospa Palabranta ukhunchasqanchikqa, iñiyninchikta kallpachan (Col. 2:2).

Sutʼintachus manachus entiendesqaykita yachay

Bibliap chiqa yachachiykunasninta, sutʼintachus manachus entiendesqaykita, ¿yachayta munawaqchu? Ichapis jinamanta, Bibliata sapaykipi  astawan ukhunchanaykipaq, kallpachakunki. Sutʼincharinapaq, Pablo Efesiosman qillqasqan cartata, qallariynin pʼitispi qhawarina ( “Efesiosman” nisqa recuadrota qhawariy). Kay pʼitista ñawiriy, chantá wistʼituspi qillqasqa imatachus ninayasqanta entiendesqaykitachus manachus qhaway. Kunanqa jukmanta juk ukhuncharina.

“Manaraj kay pacha ruwasqa kashajtin, Diosqa ajllakuwarqanchej”

Pablo cristiano hermanosninman qillqarqa: “[Diosqa] munakuynimpi wiñaymantaña ajllakuwarqanchej, Cristonejta paypa wawasnimpaj rejsikapusqa kananchejpaj”, nispa. Jehovaqa, janaqpachapi familian kanankupaq, wakin runasta akllaspa wawasnintajina riqsikapurqa, Cristowan khuska reyes, sacerdotes ima, kanankupaq (Rom. 8:19-23; Apo. 5:9, 10). Satanasqa, Diosman qallariypi churanakuchkaspa, runasta mana allintachu ruwasqanta nirqa. Chayrayku Jehovaqa, kay pachamanta runasta, saqra kawsayta, rikhurichiqnin Supayta ima, chinkachinankupaq akllarqa. Chaywanpis Diosqa, pikunatachus wawasninpaq riqsikapunanta mana nirqachu, manaqa juk qutu runas Jesuswan janaqpachapi kamachimunankupaq kanallankuta nirqa (Apo. 14:3, 4).

Pablo, cristiano hermanosninman qutujina “manaraj kay pacha ruwasqa kashajtin” akllasqa kasqankuta nispa, ¿ima “pachamantataq” parlachkarqa? Mana kay Jallpʼata chayri runata manaraq ruwachkaptin tiempomantachu parlachkarqa. Chantapis, Dios manaraq runata ruwachkaspa Adanwan Evawan juchallikunankuta yachanmanña karqa chayqa, nichá paykunata  juchallikusqankumanta, juchachanmanchu karqa. Chayqa chiqan kayninta wasanchay kanman karqa. Chayrayku, ¿maykʼaqtaq Jehová kamachiyninman churanakuqkunata, nisunman Satanasta, Adanta, Evata ima, chinkachinanta nirqa? Chayqa, ñawpa tatasninchik juchallikusqankumantaraq karqa, niraq wawasniyuq kachkaptinku, nisunman niraq kay pachapi runas miraykuchkaptinku.

“Khuyakuynin may jatun kasqanrayku”

Pabloqa, efesios cartap qallariyninpi, Diospa “khuyakuynin may jatun kasqanrayku” imaschus qallarisqanmanta sutʼinchan. ¿Imaraykutaq chayta nirqa? Imaraykuchus Jehovaqa, juchasapa runasta kacharichin munayninraykulla, manataq kacharichinanpuni kasqanraykuchu.

Ñuqallanchikmantaqa, ni jaykʼaqpis juchamanta kacharichikusunmanchu karqa. Chaywanpis Jehovaqa, mayta munakuwasqanchikrayku, may jatuchaq imasta juchamanta kacharichinawanchikpaq ruwarqa. Arí, pantasqanchikpi, juchallikusqanchikpi ima, tʼukurisunman chayqa, Pablo nisqanmanjina, chiqamantapuni Diospa may jatun munakuyninraykulla kacharichisqa kanchik.

Diospa munayninmanta pakasqa yachay

Diosqa, imaynatachus Supay ñakʼariyta rikhurichisqanta chinkachinanta, qallariypi mana nirqachu, chayqa “pakasqa yachay” karqa (Efe. 3:4, 5). Aswan qhipaman cristiano qutuchakuy rikhuriptintaq, Jehovaqa, runapaq, Jallpʼapaq ima qallariypi munayninta, imaynatachus juntʼananta sutʼincharqa. Pablo nisqanmanjinaqa, “churasqa pʼunchaykuna juntʼakojtin”, Diosqa ‘wasita apaykachayta’ ñawparichirqa, nisunman imatachus unaymantaña ruwayta munasqanta ñawparichirqa, janaqpachapi kaqkunata, kay pachapi kaqkunata ima, jukllaman tantananpaq.

Jehovaqa, kay 33 wata Pentecostespi, Cristowan janaqpachamanta kamachimunankupaq runasta, ñawpaqta tantayta qallarirqa (Hech. 1:13-16; 2:1-4). Chaymantataq, Cristop Kamachiynin urapi, kay Jallpʼa paraisoman tukusqapi kawsakunankupaq runasta, tantanan karqa (Apo. 7:14-17; 21:1-5). ‘Wasita apaykachay’ rimaykunaqa, mana Diospa Reinonmantachu parlachkan, imaraykuchus chay Reinoqa, 1914 watapiraq sayachisqa karqa. Manaqa, Dios tukuy ruwasqasninta jukchayta munasqanta juntʼananpaq, imastachus ruwasqanmanta parlachkan.

“Yuyayninchejpi machu runas jina” kanachik

Bibliata sapanchikpi ukhunchanapaq tiempochakuyqa, chiqa yachachiyta, “anchonman, saytʼuyman, ukhunman, sayayninman ima” entiendenapaq yanapawasun. Satanasqa, Bibliata manaña ukhunchananchikpaq, ruwanasnillanchikpi tʼukunanchikta munan. Chayrayku, ama paywan atipachikunachu. Astawanpis Dios “yachayta qowasqanchejta”, “yuyayni[nchikpi] machu runas jina” kananchikpaq, sumaqta apaykachanachik (1 Juan 5:20, Dios Parlapawanchej; 1 Cor. 14:20). Imapichus creesqanchikta, imaraykuchus chaypi creesqanchikta ima, sutʼita yachananchik tiyan, ajinamanta ‘suyakuyninchikmanta sutʼita kutichisunchik’ (1 Ped. 3:15).

Éfeso llaqtapi, Pablop cartanta, ñawpaq kutita ñawirikuchkaptin uyarisqaykipi tʼukuriy. ¿Nichu ‘Diospa Churinta allinta riqsinaykipaq’ astawan tanqasqa sientekuwaq karqa? (Efe. 4:13, 14.) Arí. Chayrayku, kay rimaykuna imaynatachus paykunap sunqunkuta tʼuqpirirqa, qampap kikillantaq kananta saqikuy. Chantapis, Jehovata mayta munakusqayki, Bibliamanta sumaqta yachakusqayki ima, Cristopi ‘sumaq saphichasqa sinchita sayanaykipaq’ yanapasunqa. Ajinamanta, manaraq kay saqra pacha tukukuchkaptin, Satanaspa tuqllasninman sinchita sayaykuyta atinki (Sal. 1:1-3; Jer. 17:7, 8).

[27 paginapi recuadro, dibujo/foto]

 “Efesiosman”

“Señorninchej Jesucristoj Diosnin Tatan yupaychasqa kachun. Payqa, espirituman jina janaj pachapi tukuy bendicioneswan juntʼaykuchiwanchej Cristopi kasqanchejrayku. Manaraj kay pacha ruwasqa kashajtin, Diosqa ajllakuwarqanchej Cristopi mana juchayoj, mana kʼaminataj paypa ñawpaqempi kananchejpaj. Jatun munakuynimpi wiñaymantaña ajllakuwarqanchej, Cristonejta paypa wawasnimpaj rejsikapusqa kananchejpaj, kʼacha munayninman jina, khuyakuynimpa jatun kayninta jatunchananchejpaj. Chay khuyakuyninta payqa qhasilla qowarqanchej munasqa Churimpi. Wañushaspa yawarninta jichʼasqanwan rantiwarqanchej kacharichisqa kananchejpaj. Juchasninchejtapis pampachallarqataj khuyakuynin may jatun kasqanrayku. Chay tukuytaqa Cristopi tarinchej. Chay may jatun khuyakuyninmanta payqa ashkhata qowarqanchej. Tukuy yachaywan, entiendeywan ima munaynimpa pakasqa imasninta rejsichiwarqanchej munasqanman jina, mayqentachus Cristopi juntʼayta munarqa, chayta. Chayman jinataj, churasqa pʼunchaykuna juntʼakojtin, Diosqa [Oikonomían nisqata ñawparichirqa, (griegopi, wasita apaykachay chayri wasita qhaway niyta munan) chaywantaq, NM] ujllaman tantanqa janaj pachapi kajkunata, jinallataj kay pachapi kajkunatapis, Cristoj kamachiynimpi kanankupaj.” (Efesios 1:3-10.)