Ñawiriqkunapta tapuyninku

Tantakuykunapi chayri jatun tantakuykunapi, juk hermana umallirichiq nichkasqanta makiswan parlayman tikrachinanpaq, ¿umanta qhatakunanchu tiyan?

Tukuy hermanas, qutuchakuypi juk hermanop ruwananta ruwachkaspa chayri qusankup ruwananta ruwachkaspa, umankuta imawanpis qhatakunanku tiyan. Chaytaq apóstol Pablo sutʼinchasqanmanjina kachkan, pay nirqa: “Pi warmillapis mana uman sukʼumpasqa Diosmanta mañakunman, chayri Diospa Palabranta sutʼinchanman chayqa, umanta pʼenqaypi rikhurichin”, imaraykuchus ‘qhariqa warminpa kamachiq umanjina’, nispa (1 Cor. 11:3-10). Chantapis, juk hermana chay ruwaykunata ruwachkaspa umanta imallawanpis qhatakun chayqa, Jehová, Biblianiqta kamachichkasqanta kasukuchkan (1 Tim. 2:11, 12). *

Chantá juk hermano umallirichichkasqanta, juk hermana makiswan parlayman tikrachinanpaq, ¿umanta qhatakunallantaqchu tiyan? Hermanaqa, umallirichiq nisqallanta tikrachichkan, manataq paychu yachachichkan. Chantapis, juk qallumanta wak qalluman tikrachiyqa, mana makiswan parlayman tikrachiywan kikinchu. Imaraykuchus juk qalluman tikrachikuchkaptinqa, tikrachiqta uyarispapis umallirichiqta astawan qhawakun. Chayrayku juk hermana juk qalluman tikrachichkan chayqa, mana paypis umallirichichkanmanjina qhawasqa kananpaq, ichá tiyasqallamanta chayta ruwanman, sayasqa kachkaspataq, uyariqkunata qhawananmantaqa, umallirichiqta astawan qhawanman. Jinata ruwaspaqa, mana umanta imawanpis qhatakunanchu kanqa.

Chaywanpis, jatunchaq telesjina rikhurisqanrayku, umallirichiq rikukunanmantaqa,  tikrachiq hermana astawan rikukun. Chayrayku, makiswan parlayman tikrachinankupaq umankuta imawanpis qhatakunankuqa may allin, jinamanta qutuchakuypi hermanospa ruwanankuta, jatunpaq qhawachkasqanta rikuchinqanku.

Diosmanta Parlayta Yachanapaq tantakuypi, Bibliamanta Yachaqanapaq tantakuypi, Willayta Yachanapaq tantakuypi, Torremanta Qhawaq revistamanta yachaqanapaq tantakuypi ima, rikuchiykunata chayri tapuykunaman kutichiykunata, juk hermana makiswan parlayman tikrachiptin, ¿umanta qhatakunallantaqchu tiyan? Ichá wakin kutiqa, mana umanta qhatakunanpunichu kanqa, imaraykuchus tantakuypi kaqkunaqa, mana paychu yachachichkasqanta reparanqanku. Sutʼincharinapaq, tantakuypi kutichiykunata, hermanas rikuchiykunata ruwasqankuta ima, makiswan parlayman tikrachinanpaq, mana umanta qhatakunanchu kanqa. Chaywanpis, tantakuypi juk hermano umallirichichkaptin, Torremanta Qhawaq revistata qutuchakuywan ukhunchakuchkaptin, Bibliamanta Yachaqanapaq tantakuypi qutuchakuywan ukhunchakuchkaptin, makiswan parlayman tikrachichkaspaqa, umanta qhatakunan tiyan, kikillantaq takiykunata tukuy payjina ruwanankupaq tikrachichkaptinpis. Chantapis, tantakuypiqa ichá ancianospa, hermanospa, hermanaspa, wawaspa ima, parlasqankuta makiswan parlayman tikrachinan kanqa, chayrayku allin kanman tantakuy tukukunankama, umanta imawanpis qhatakunan.

[Sutʼinchaynin]