Diospa llaqtanpi kasqanchikta jatunpaq qhawana

“Diosqa cuerpoj imasninta churarqa cuerpoman sapa ujninta maypichus kananman, munasqanman jina.” (1 COR. 12:18.)

1, 2. a) ¿Imaraykutaq tukuy cristianos Diospa llaqtanpi imatachus ruwasqanku may allinpaq qhawasqa kasqanta nisunman? b) ¿Ima tapuykunamantaq kay yachaqanapi kutichikunqa?

JEHOVÁ DIOSQA, llaqtanta israelitaspa tiempokumantapacha qutuchakuyniqta yachachin, yuyaychan ima. Sutʼincharinapaq, isralitas, Hai nisqa llaqtata atipasqankutawan, “Josueqa leymanta qhelqasqa libromanta tukuyninta leeykaporqa, bendicionesmanta, jinallataj maldicionesmantapis [...] tukuy tantasqa israelitasman” (Jos. 8:34, 35).

² Ñawpa siglopitaq, apóstol Pablo, anciano Timoteoman, qutuchakuy ‘Diospa wasin’, “cheqa kajta waqaychaj, sayachejtaj” kasqanta nirqa (1 Tim. 3:15, Qheshwa Biblia). Kunan tiempopiqa, ‘Diospa wasin’, tukuy pachantinmanta chiqa cristianos kanku. Pabloqa, 1 Corintios 12 tʼaqapi, qutuchakuyta juk cuerpowan kikincharqa. Chantapis, cuerpop tukuy imasnin mana kikin ruwaytachu  ruwasqankuta, chaywanpis tukuynin necesitakusqanta nirqa: “Diosqa cuerpoj imasninta churarqa cuerpoman sapa ujninta maypichus kananman, munasqanman jina, nispa”. Chantapis nillarqataq: “Cuerpoj wakin imasnin mana allimpaj qhawasqasta astawan allimpaj qhawanchej”, nispa (1 Cor. 12:18, 23). Jinallataq juk cristiano, ‘Diospa wasinpi’ imatachus ruwasqanqa, wakjinataq, mana wakkunamanta aswan allinchu, nitaq aswan pisichu. ¿Imaynatá Diospa llaqtanpi kasqanchikta jatunpaq qhawasqanchikta rikuchisunman? Diospa llaqtanpi imatapis ruwananchik, ¿imamantataq kanman? ¿Imatataq “Señorpi wiñasqanchikta tukuy rikunankupaj” ruwasunman? (1 Tim. 4:15.)

Diospa llaqtanpi kasqanchikta jatunpaq qhawasqanchikta rikuchina

3. ¿Imaynatá Diospa llaqtanpi kasqanchikta jatunpaq qhawasqanchikta rikuchisunman?

³ ¿Imaynatá Diospa llaqtanpi kasqanchikta jatunpaq qhawasqanchikta rikuchisunman? ‘Allin kamachi, yuyayniyuqta’, Diospa Llaqtanta Kamachiqkunata ima, tukuy sunqu yanapaspa (Mateo 24:45-47 ñawiriy). Chayrayku, allin kamachita chiqamantachus manachus kasukuchkasqanchikta qhawarikunanchik tiyan. Sutʼincharinapaq, tukuy kay wataspiqa, imaynatachus pʼachallikunamanta, kʼachanchakunamanta, sunqunchikta kusichinapaq imatachus akllasqanchikta, Internet nisqata imaynatachus apaykachananchikmanta ima, achkha yuyaychaykunata japʼinchik. Diosmanta mana karunchakunapaqqa, kay yuyaychaykunata kasukunanchik tiyan. Chantapis, familiapi Diosta yupaychanapaq tiempochakunanchikta yuyaychawasqanchikta, ¿kasukuchkanchikchu? Chayta ruwanapaq juk chʼisita, ¿tiempochakunchikchu? Solteros kanchik chay, ¿Bibliata chay chʼisipi ukhunchachkanchikchu? Allin kamachita kasukusun chayqa, Jehová, ñuqanchikta, familianchikta ima, bendeciwasun.

4. Imatapis akllachkaspa, ¿imaspitaq tʼukurinanchik tiyan?

⁴ Ichá pillapis, imaynatachus pʼachallikuy, kʼachanchakuy, sunquta kusichinapaq imatapis akllay ima, sapa jukmanta kasqanta ninman. Chaywanpis, qutuchakuypi imatachus ruwasqankuta allinpaq qhawaq cristianosqa, mana munayninkumanjinallachu akllananku kasqanta yachanku. Astawanpis, imaynatachus Jehová yuyasqanpi tʼukurinanku tiyan, chaytaq Bibliapi tarikun. Bibliap yuyaychakunasninqa, “purina[nchik]pi kʼanchana jina”, “ñanni[nchik]pitaq kʼanchay jina” (Sal. 119:105). Chantá imatachus akllasqanchikta, hermanosninchik, wak runas ima, imaynatachus qhawanankupi tʼukurinanchik tiyan (2 Corintios 6:3-5 ñawiriy).

5. ¿Imaraykutaq imatapis mana sapallanchikmanta ruwayta munanapaq, allinta qhawakunanchik tiyan?

⁵ ‘Diosta mana kasukuqkunapi llamkʼachkaq espirituqa’, wayrajina tukuyniqpi kachkan (Efe. 2:2). Chay espíritu chayri chay saqra yuyayqa, Jehovap llaqtanpa yuyaychayninta mana necesitasqanchikta yuyachiwasunman. Chantapis, ni pipis Diotrefesjina kayta munasunmanchu, payqa apóstol Juanta ‘mana valechiqchu’ (3 Juan 9, 10). Chayrayku, imatapis mana sapallanchikmanta ruwayta munanapaq, allinta qhawakunanchik tiyan. Jehovaqa, allin kamachi yuyayniyuqniqta imatachus ruwananchikta niwanchik, chayrayku ni jaykʼaqpis, paykunapaq saqrata parlanachu, chayri ruwanachu (Núm. 16:1-3). Manaqa, paykunata yanapayta jatunpaq qhawananchik tiyan, chantapis, qutuchakuyninchikpi ancianosta kʼumuykukuq sunquwan kasukunanchikpaq kallpachakuna (Hebreos 13:7, 17 ñawiriy).

6. ¿Imaraykutaq tukuy atisqanchikmanjinachus manachus ruwachkasqanchikpi tʼukurinanchik tiyan?

⁶ ¿Imatawantaq Diospa llaqtanpi kasqanchikta jatunpaq qhawasqanchikta rikuchinapaq ruwasunman? ‘Diospaq ruwayninchikta allinpaq qhawachinapaq’, Jehovata jatunchananpaq ima, tukuy atisqanchikmanjinachus  manachus ruwachkasqanchikpi tʼukurisunman (Rom. 11:13). Wakinkunaqa, precursores regulares kanku. Wakintaq, misionerosjina, betelitasjina chayri qutuchakuykunata waturispa Diospaq llamkʼachkanku. Wak hermanostaq, Tantakunapaq Wasista ruwaypi yanapachkanku. Yaqha tukuy Jehovamanta sutʼinchaqkunataq, familiankuman Diosmanta yachachinankupaq, sapa semana willayman rinankupaq ima, mayta kallpachakunku (Colosenses 3:23, 24 ñawiriy). Chayrayku, mana iskaychakuspa tukuy sunquwan Diospaq llamkʼaptinchikqa, llaqtanpiqa, ima ruwaypipis yanapasunpuni.

Diospa llaqtanpi imatapis ruwananchik, ¿imamantataq kanman?

7. Diospa llaqtanpi imatapis ruwananchik, ¿imasmantataq kachkan?

⁷ Diospa llaqtanpi imastachus ruwayta atisqanchikpi tʼukurina. Sutʼincharinapaq, juk hermanaqa, mana juk hermanojina wakin ruwaykunata ruwayta atinchu. Chantapis, machituña kasqanchikrayku, unquyninchikrayku, wak imasrayku ima, mana Jehovapaq anchata llamkʼayta atisunchu. Proverbios 20:29 pʼiti nin: “Waynakunaqa kallpankurayku jatumpaj qhawasqa kanku; machu runasri yuraj chujchasninkurayku jatumpaj qhawasqa kanku”, nispa. Arí, qutuchakuypi waynas, sipaskuna imaqa, kallpayuq kasqankurayku astawan llamkʼayta atinku; kuraq hermanosrí, yachayniyuq kasqankurayku, achkha watastaña kawsakusqankurayku ima, qutuchakuyta sumaqta yanapayta atinkuman. Chaywanpis, Jehovap kʼacha yanapayninraykulla, llaqtanpi imatapis ruwayta atisqanchikta, yuyarikunanchik tiyan (Hech. 14:26; Rom. 12:6-8).

8. ¿Imaynatá imatachus ruwayta munasqanchik, Diospaq llamkʼasqanchikpi rikukunman?

⁸ ¿Imamantawantaq kachkan Diospa llaqtanpi imatachus ruwayta atisqanchik? Sutʼincharinapaq, iskay ñañaspi tʼukurina. Tatasninkuqa, iskayninkuta yachaywasimanta lluqsiytawan precursores kanankupaq kallpachanku. Yachaywasimanta 18 watasniyuq lluqsiytawantaq, juklla precursora kayta qallarin, juknintaq llamkʼayman qukun. ¿Imaraykutaq mana kikintachu ruwanku? Imatachus munasqanku mana kikin kasqanrayku. Sapa juk imatachus ruwayta munasqankuta ruwanku. Yaqha tukuyninchik ajinata ruwanchik. Chayrayku, Diospaq imatachus ruwayta munasqanchikpi allinta tʼukurinanchik tiyan. Tapurikuy, ¿Jehovapaq astawan llamkʼayta atiymanchu, kawsayniypi wakin imasta tikrachinay kaptinpis? (2 Cor. 9:7.)

9, 10. Jehovapaq astawan llamkʼayta munanapaq, ¿imatá ruwasunman?

⁹ Qutuchakuypi astawan ruwayta atispapis, mana kallpachakuptinchik, ¿imataq llamkʼayta munanapaq tanqawasunman? Pabloqa, Filipensesman qillqarqa: “Diosqa qankunaman churan munanaykichejta, ruwanaykichejtataj paypa kʼacha munayninrayku”, nispa. Arí, Jehovaqa paypaq llamkʼayta munananchikpaq kallpachawasunman (Fili. 2:13).

¹⁰ Chayrayku, chay kallpata mañakunanchik tiyan. Rey Davidqa, ajinata mañakurqa: “Ñankunaykita rikuchiway, Tata Dios, purinasniykinejta pusaway. Cheqan kayniykinejta pusaway, yachachiwaytaj. Qanmin kanki salvaj Diosniy. Tukuynin pʼunchay qampi suyakuni”, nispa (Sal. 25:4, 5). Ñuqanchikpis,  imachus Jehovata astawan kusichisqanta ruwanapaq, yanapanta mañakunanchik tiyan. Chantapis Jehová, Churin ima, ruwasqanchikta allinpaq qhawasqankupi tʼukuriptinchikqa, kusiywan agradecekunchik (Mat. 26:6-10; Luc. 21:1-4). Agradecesqa kasqanchikraykutaq, llaqtanpi ñawpaqman rinallapaqpuni yanapanta mañakunchik. Isaiasjinataq ruwananchik tiyan. “Pitataj kachasajri? kPitaj nisqaykuta willamonqari?, nispa” Jehová tapuptin, profeta Isaiasqa, “kaypi kani, noqata kachaway ari, nispa”, kutichirqa (Isa. 6:8).

Diospa llaqtanpi ñawpaqman rina

11. a) ¿Imaraykutaq hermanos qutuchakuypi astawan llamkʼanankupaq kallpachakunanku tiyan? b) ¿Imatá juk hermano qutuchakuypi astawan llamkʼananpaq ruwanan tiyan?

¹¹ Kay 2007 septiembre killamantapacha 2008 agosto killakamaqa, 289.678 runas bautizakurqanku, chaytaq astawan ancianos necesitakusqankuta rikuchiwanchik. Chayrayku, ¿imatá hermanos ruwankuman? Siervos ministeriales chayri ancianos kanankupaq, imatachus Biblia nisqanta juntʼanankupaq kallpachakunanku tiyan (1 Tim. 3:1-10, 12, 13; Tito 1:5-9). Juk hermano Bibliap nisqanta juntʼananpaqtaq, willayman rinanpuni tiyan, imatachus qutuchakuypi kamachisqankuta allinta juntʼanan tiyan, tantakuykunapi parlarinanpaq astawan wakichikunan tiyan, hermanospa allinninkutataq maskʼanan tiyan. Jinata ruwaspaqa, Diospa llaqtanpi kasqanta jatunpaq qhawasqanta rikuchinqa.

12. Waynas, ¿imaynatá chiqa yachachiyta munakusqankuta rikuchinkuman?

¹² Waynuchitus, sipasitas ima, ¿imatá qutuchakuypi ñawpaqman rinankupaq ruwankuman? Bibliata astawan riqsinanku tiyan, jinamanta “espiritoj qosqan tukuy yachaywan, yuyaywan ima” wiñanankupaq (Col. 1:9). Chaypaqtaq, Diospa Palabranta astawan ukhunchananku tiyan, tantakuykunapitaq parlarinanku tiyan. Astawanpis, ‘jatun punkunta yaykunankupaq’ nisunman Diospaq astawan llamkʼanankupaq kallpachakunkuman (1 Cor. 16:9, Qheshwa Biblia). Jehovapaq llamkʼayta, kawsayninkupi ñawpaqman churanqanku chayqa, kusiyta, achkha tʼinkasta ima, tarinqanku (Eclesiastés 12:1, ñawiriy).

13, 14. ¿Imaynasmantá hermanas, Diospa llaqtanpi kasqankuta jatunpaq qhawasqankuta rikuchinkuman?

¹³ Salmo 68:11 pʼiti nin: “Tata Diosqa ujta parlarqa, ashkha warmistaj chay sumaj willaykunata willarqanku”, nispa. Hermanasqa, runaman yachachispa chay pʼitita juntʼayta, jatunpaq qhawasqankuta rikuchinkuman (Mat. 28:19, 20). Arí, Diosmanta willanankupaq mayta kallpachakuq hermanasqa, Diospa llaqtanpi kasqankuta jatunpaq qhawasqankuta rikuchinku.

 ¹⁴ Pabloqa, Titoman jinata qillqarqa: “Jinallataj paya warmispis Diospi creejkuna jina kawsachunku. [...] Allin kajta yachachejkuna kachunku. Sipas warmista yachachichunku sapa ujpis qosankuta, wawasninkutawan munakuyta, allin yuyayniyoj, llimphu kawsayniyoj ima kanankuta. Yachachillachunkutaj wasisninkuta allinta qhawanankuta, kʼachas kanankuta, sapa ujpis qosankuman kʼumuykukoj sonqoyoj kanankuta ima, ajinapi Diospa Palabranmanta ama pipis sajrata rimanampaj”, nispa (Tito 2:3-5). Rikunchikjina, Diospa llaqtanpi sumaq sayasqa cristianasqa, qutuchakuypi mayta yanapanku. Chantapis, ancianosta jatunpaq qhawanku, imawanchus sunquta kusichiyta, imaynatachus pʼachallikuyta, kʼachanchakuyta imataq, allinta akllanku. Ajinamanta wakkunatapis ruwasqankuwan yachachinku, Diospa llaqtanpi kasqankuta jatunpaq qhawasqankutataq rikuchinku.

15. Soltera hermanas mana piniyuq kasqankuta mana yuyanankupaq, ¿imatá ruwankuman?

¹⁵ Wakin kuti, soltera cristianasqa, Diospa llaqtanpi kasqankuta qunqapunkuman. Juk hermana nin: “Wakin kutiqa, mana piniyuq kasqayta yuyani”, nispa. Chay yuyayninta atipananpaq imatachus ruwasqanta tapuriptinku, pay nin: “Diosmanta mañakuy, Bibliata ukhunchariy ima, Diospa llaqtanpi kasqayta yuyarichiwan. Chantapis, Jehová munakuwasqanta yuyarinaypaq publicacionesta ukhuncharini, qutuchakuypi wakkunata yanapanaypaqtaq kallpachakuni. Chayqa, mana ñuqallapi anchata yuyanaypaq yanapawan”, nispa. Kay Salmo 32:8 pʼitipi, Jehová, Davidman nirqa: “Ñawisneyqa qanllapi kashan”, nispa. Arí, Jehová Diosqa, tukuy kamachisninta, soltera hermanastapis, allinpaq qhawan. Chantapis, llaqtanpi kasqanchikta mana qunqananchikpaq yanapawasun.

Jehovap llaqtamanta ni jaykʼaq lluqsipunachu

16, 17. a) ¿Imaraykutaq Jehovap llaqtanpi kayta allinta akllasqanchikta nisunman? b) ¿Imatá Jehovap llaqtanpi kanallanchikpaqpuni ruwasunman?

¹⁶ Jehovaqa, jatun munakuyninrayku, payman kʼaskanapaq qayllaykuqta saqiwanchik. Jesús nirqa: “Mana pipis noqaman jamunmanchu, manachus kachamuwaj Tatay pusamunman chayqa”, nispa (Juan 6:44). Jehová Diosqa, kunan tiempopi may chhika runasmanta, ñuqanchikta llaqtanmanta kananchikpaq waqyariwanchik. Chay waqyariyta kasukuspaqtaq, allinta akllanchik, imaraykuchus kunanqa, kawsayninchik mana qhasipaqchu kasqanta yachanchik. Diospa llaqtanpi kasqanchikmantataq, ¡mayta kusikunchik, sunqu juntʼasqataq kanchik!

¹⁷ Salmista nirqa: Jehová “Dios, wasiykita noqa munakuni”, nispa. Chantá nillarqataq: “Sumaj pampapi sinchʼita sayashani; jatun tantakuykunapi Tata Diosta yupaychasaj”, nispa (Sal. 26:8, 12). Diosninchikqa, tukuyninchik, llaqtanpi kananchikta munan. Chayrayku llaqtanta kasukuspa, Paypaq llamkʼanallapuni, ajinamanta ni jaykʼaqpis llaqtanmanta lluqsipusunchu.

¿Yuyarikunkichu?

• ¿Imaraykutaq ni mayqin cristianopis Diospa llaqtanpi qhasipaqchu kasqanta nisunman?

• ¿Imaynamantá Diospa llaqtanpi kasqanchikta jatunpaq qhawasqanchikta rikuchisunman?

• Diospa llaqtanpi imatapis ruwananchik, ¿imasmantataq kanman?

• Waynas, kuraq hermanos ima, ¿imaynamantá Diospa llaqtanpi kasqankuta jatunpaq qhawasqankuta rikuchinku?

[Tapuykuna]

[16 paginapi dibujos/fotos]

¿Imatataq hermanos qutuchakuypi ñawpaqman rinankupaq ruwankuman?

[17 paginapi dibujo/foto]

¿Imaynatá hermanas Diospa llaqtanpi kasqankuta jatunpaq qhawasqankuta rikuchinkuman?