Juqʼara hermanosninchikman munakuyninchikta rikuchina

KAY tiempopi Diospa llaqtanqa, may jatun familia kanchik. Chay familiataq, unaymantapachaña karqa, maypichus Diosman chiqa sunqu Samuel, David, Sansón, Rahab, Moisés, Abraham, Sara, Noé, Abel ima, yupakullankutaq. Chaywanpis Diospa llaqtanpiqa, achkha juqʼara hermanos tiyan. Sutʼincharinapaq, Mongolia suyupi ñawpa kaq Jehovamanta sutʼinchaqkunaqa, juqʼara qhariwarmi karqanku. Chantapis, Rusia suyupi juqʼara hermanosninchik chiqan sunqu kasqankurayku, Tribunal Europeo de Derechos Humanos nisqapi juk juiciopi atiparqanchik.

“Allin kamachi, yuyayniyoj[qa]”, kay qhipa wataspi achkha publicacionesta makiswan parlaypi urqhun, chantapis qutuchakuykunata, jatun tantakuykunata ima, wakichin (Mat. 24:45). Chaykunataq, achkha juqʼara runasta yanapan. * Niraq chay yanapas kachkaptin, ¿imaynatataq juqʼara runas Diosmanta yachakuspa ñawpaqman rirqankurí? ¿Imaynatá maypichus tiyakunki chaypi kaq juqʼara runasta yanapawaq?

Niraq ima yanapapis kachkaptin

Diospa llaqtanpi unaytaña kaq juqʼara hermanosninchikta, imaynatachus Diosta riqsisqankumanta tapuriptinchik, ¿imatá kutichiwasunman? Ichapis, mana entiendey atina yachachiykunata entiendenapaq, makiswan parlaypi videos manaraq kachkaptin, Diospa sutinta riqsiylla kawsayninkuta tikrasqanta, Diospa llaqtallanpipuni kanankupaq yanapasqanta ima, willawasunman. Chayrí, tantakuykunapi imatachus nikuchkasqanta makiswan parlaypi entiendechinankupaq, ni pipis kaptin, imaynachus sunqunku kasqanta willawasunman. Ichá, ladonkupi tiyakuq hermanolla, imamantachus tantakuypi parlakuchkasqanta yachanankupaq, juk papelpi qillqasqata jaywaq. Juk hermanoqa, qutuchakuypi makiswan parlayman tikrachiq manaraq kaptin, qanchis watata papelpi qillqasqitallawan chiqa yachachiyta yachakuchkarqa.

Machitu juqʼara hermanosqa, runasman willamuq riyta mana atinatajina qhawasqankumanta yuyarikunku. Paykunaqa, juk makinkupi, willayniyuq papelta japʼiq kanku, juknin makinkupitaq Torremanta Qhawaq, ¡Despertad! revistata ima. Juk juqʼara runapaqqa, juqʼara runallamantaq Bibliamanta yachachiyqa, juk jatun chʼampay karqa. Imaraykuchus ñawpaqtaqa, qillqasqa publicacioneslla karqa, ni mayqintaq chaykunata allinta entiendeqchu. Chantapis wakin juqʼara hermanosqa, Diosmanta parlachkaptinku mana runawan entiendechikusqankurayku, chiqa yachachiymanta manaña astawan willayta atispa, mayta llakikusqankumanta yuyarikunku. Tukuy sunquwan Diosta munakuptinkupis, wakin yachachiykunata mana allinta entiendeyta atispa, phutikuq kanku.

Chayjina chʼampaykuna kaptinpis, juqʼara hermanosninchikqa, Diosman juntʼa sunqullapuni karqanku (Job 2:3). Chantapis, tukuy kallpankuwan Jehová Diospi suyakunku (Sal. 37:7). Kunantaq, Jehová Diosqa, mana yuyasqankumanjina bendicionninta achkhata paykunaman tʼakaykamuchkan.

Familiayuq juqʼara hermano ruwasqanpi tʼukuriy. Payqa, niraq makiswan parlaypi videos kachkaptin, familianman Bibliamanta sapa semana yachachiqña. Churin yuyarikun: “Tatayqa, qillqasqa publicacioneslla yachachinawaykupaq  kasqanrayku, mana allinta yachachiyta atillaqchu. Imachus qillqasqa kasqantaqa, mana entiendellaqchu. Ñuqaykutaq, waynas kaspa, mana yanapariqchu kayku. Mana allinta yachachiwaptiykuqa, usqhayllata pantachkasqanta reparachiq kayku. Chaywanpis tatayqa, mana saykʼuspa yachachillawaqpuni kayku. Paypaqqa, chiqa yachachiykuna sunquykuman yaykunan aswan allin karqa, inglesta mana entiendesqanrayku wakin kuti pʼinqaypi rikukunanmantaqa”, nispa.

Qanchis chunka watayuq Richard hermanonchikmanta parlarillasunmantaq. Payqa, (Nueva York) Brooklynpi tiyakun. Mana uyarinchu nitaq rikunchu, chaywanpis tantakuykunamanqa rinpuni. Tantakuyman rinanpaqqa, jallpʼa ukhuta riq trenman wicharin, maypichus uraqananta yachananpaqtaq, trenpa sapa sayananta yupan. Juk wataqa, chiri tiempopi mayta ritʼiykamusqa, chayraykutaq manaña tantakuyta ruwanankuta nisqanku. Chaytaqa, qutuchakuymanta tukuy hermanosman willasqanku, chaywanpis hermano Richardman willayta qunqapusqanku. Chayta reparaytawanqa, maskʼaq risqanku. ¿Maypí tarirqankuri? Tantakunapaq Wasip punkunpi suyachkaqta, payqa kicharikunanta may pacienciawan suyakuchkasqa. Imaraykuchus chayjina chiripi wasinmanta lluqsimusqanta tapuptinkutaq, payqa, jinata kutichirqa: “Jehová Diosta munakusqayrayku jamuni”, nispa.

¿Imatá qam ruwawaq?

Maypichus tiyakunki chayniqpi juqʼara runas kan chayqa, allin kanman makiswan parlaypi juk machkha parlayllatapis yachakunayki. Juqʼara runasqa, parlayninkuta wakkunaman yachachinapaq, kʼachas kanku, pacienciayuqtaq. Willaypi juk juqʼara runawan tinkukunkiman chay, ¿imatá ruwawaq? Paywan parlarinaykipaq kallpakuy. Chaypaqtaq uyaykiwan, makisniykiwan, qillqasqawan, fotoswan, dibujoswan ima, yanapachikuwaq. Chay runa, chiqa kaqmanta mana yachakuyta munasqanta nisuptinpis, pichus makiswan parlayta yachan chayman willanayki tiyan. ¿Imarayku? Imaraykuchus runaqa, parlayninpi parlaptinku allinta uyariyta yachanku.

Ichapis, makiswan parlayta yachakuchkanki, chay parlaypi kaq qutuchakuymantaq richkanki. ¿Imaynatá allinta yachakuwaq? Chay qutuchakuypi, parlayta atiqkuna kaptinkupis, allin kanman tukuyta makisllawan parlapayanayki. Chayta ruwaptiykiqa, imaynatachus imatapis makiswan ninaykipi yuyanaykipaq yanapasunqa. Wakin kutiqa, mana atillankichu, ichá parlayta munapunki. Chaywanpis, ima qallullatapis yachakunapaqqa, kallpachakunayki tiyan.

Juqʼara hermanosninchikwan, makiswan parlapanapaq kallpachakuspaqa, paykunata munakusqanchikta, jatunpaq qhawasqanchikta ima, rikuchichkanchik. Sapa pʼunchay llamkʼayninkupi chayri yachaywasipi compañerosninkuta mana entiendesqankurayku, imaynachus sientekusqankupi tʼukuriy. Juk juqʼara hermanonchik jinata nirqa: “Sapa pʼunchay, runaqa mana entiendesqayta  parlanku. Chayrayku, wakin kutiqa mana piniyuq kasqayta yuyaspa phiñakuni. Imaynapunichus kachkasqaytaqa, nichá niyta atiymanchu”, nispa. Chayrayku, juqʼara hermanosninchik tantakuykunapi kusiyta tarinankupaqqa, tukuy imata ruwana. Tantakuykunaqa, mana chiqa yachachiykunata yachakunallankupaqchu kachun, astawanpis chaypi wak hermanoswan sumaqta parlarinankupaqjina kachun (Juan 13:34, 35).

Qutuchakuykunapi makiswan parlaypi juchʼuy qutitusmantapis parlarinallataq. Imatachus tantakuypi nikuchkasqanta entiendenankupaqqa, pipis makiswan parlaypi paykunapaq tikrachipunan tiyan. Juqʼara hermanosqa, Tantakunapaq Wasiman rispa ñawpaqpi tiyakunku, ajinamanta umallirichiqta, pichus makiswan parlaypi tikrachichkan chaytapis, allinta rikuyta atinku. Rikukusqanmanjinaqa, chayqa mana juk chʼampaychu, imaraykuchus hermanosqa, imatachus nikuchkasqanta uyariyta atillanku. Jatun tantakuykunapipis kikillantaq. Chay tantakuykunapi makiswan parlayman tikrachiq hermanosqa, mayta kallpachakunku imatachus nikuchkasqanta juqʼara runasman maychus kaqta willanankupaq, chayrayku allinpaq qhawasqa kayta atinkuman.

Ichapis qutuchakuyniykipi, makiswan parlaypi qutitu tiyan, chayri juk machkha juqʼara runas tiyan. ¿Imaynatá juqʼara hermanosman munakuyniykita rikuchiwaq? Wasiykiman waqyarikuwaq, chayri juk machkhallatapis makiswan parlaypi imatapis niyta yachakuwaq. Chayta ruwanaykipaq, ama imapis jarkʼasuchunchu. Chantapis, juqʼara hermanosman munakuyniykita rikuchispaqa, mayta kusikunki (1 Juan 4:8). Imaraykuchus, mayta paykunamanta yachakusunman. Chantapis, parlaspa miskʼichikunku, sumaq yuyayniyuq kanku, maytataq asirinku. Juqʼara tatasniyuq hermano, ajinata nin: “Ñuqaqa, juqʼara runaswanpuni kayta yachani, paykunataq mayta yachachiwanku. Juqʼara hermanosninchikmantaqa, achkhata yachakusunman”, nispa.

Jehovaqa, payta chiqa sunquwan yupaychaqkunata munakun, chay yupaychaqkuna juqʼaraspis amapis kachunku. Chiqamantapuni, juqʼara hermanosninchikpa iñiyninku, muchusqanku imaqa, Diospa llaqtanta mayta kallpachan. Chayrayku, ¡juqʼara hermanosman munakuyniykita rikuchiy!

[Sutʼinchaynin]

[31 paginapi dibujo/foto]

Juqʼara runasman, Diospa Reinonmanta makiswan parlaypi willaspaqa, sunqunman chayasunman

[32 paginapi dibujos/fotos]

Tantakuykunaqa, juqʼara hermanosninchik kusiyta tarinankupaqjina kanan tiyan