Diospaq llamkʼanapaq tiemponchikta churaspa kusisqa kanchik

JEHOVAQA, kamachisnin kusisqa kanankuta munan (Sal. 100:2). Chaywanpis, Diospaq llamkʼasqanchikrayku, tiemponchik pisiyapun. Ichá ñawpaqtaqa, tiemponchik kallaq, chaywanpis bautizakuytawanqa, Diospaqwan llamkʼananchik tiyan, chayrayku ichá saykʼusqa kachkanchik. Ruwanasninchikta mana allinta juntʼayta atisqanchikraykutaq, llakikunchik. Achkha ruwanayuq kaptinchikpis, ¿imataq Jehovap ‘kusiyninta’ mana chinkachinapaq yanapawasun? (Neh. 8:10.)

Saqra pʼunchaykuna kasqanrayku, ni imapaq tiempo kasqanrayku ima, tiemponchikta allinta tʼaqana. Pabloqa, kay sumaq yuyaychayta qillqarqa: “Allinta qhawakuychej imaynatachus kawsasqaykichejta; ama kawsaychejchu wampus jinaqa, manachayqa yuyayniyojkuna jina. Tiempo kashajtillanraj, allin kajta ruwaychej, imaraykuchus kunan pʼunchaykunaqa mana allinchu”, nispa (Efe. 5:15, 16).

Chay yuyaychayqa, ¡may sumaq! Chayrayku, Bibliata sapanchik ukhunchanapaq, familianchikwan khuska kanapaq, willaypaq, llamkʼaypaq, wak imaspaqwan, tiempochakunapi tʼukurina.

Diosman qukuspa bautizakusqaykimanta, ¿imaynatachus kusikusqaykita yuyarikunkichu? Jehovata, munayninta ima, riqsisqaykirayku, maytachá kusikurqanki. Bibliap chiqa yachachiyninta japʼiqanaykipaqqa, mayta kallpachakunayki. ¿Qhasipaqchu chayta ruwarqanki? Mana, imaraykuchus chay yachachiyqa, kawsayniykita tikrarqa, kusichisurqataq.

Chaywanpis, Diospa yachachiyninta manaña ukhunchaptinchikqa, kusiyninchik pisiyanman. Chayrayku, Bibliata sapa pʼunchay machkha minutosllatapis ñawirinapaq, ukhunchanapaq ima, tiempochakunapuni. Jinata ruwaspaqa, Jehovaman astawan qayllaykusun, aswan kusisqataq kasun.

Diospa kamachisninqa, tiempota mana usuchinankupaq allinta tʼukurinku. Qam, ¿jinatachu ruwanki? Tapurikuy: “Revistasta, chayri periodicosta ñawiriyman, teleta qhawayman, takiykunata uyariyman chayri imachus kusichiwan chayta ruwanaypaq, ¿machkha tiempotataq churani?”, nispa. Kay ruwaykuna allillan kaptinpis, mana chaykunallapichu tiempota churana ( Tim. 4:8). Tiempoyki pisi chayqa, watiqmanta allinta tʼaqay.

 Adamqa, anciano, kimsa wawasniyuqtaq, pay imaynatachus tiempochakusqanmanta jinata nin: “Mana may chhika imasniyuq kaytachu maskʼani. Chantapis, mana qhasi imaspi tiempoyta usuchinichu, nitaq may valorniyuq imasniy tiyapuwanchu, chaykunapi achkha tiempota churanaypaq. Jina kaptinpis, kusisqa kani. Chantapis, mana saykʼusqalla kanaypaq, allinta tiempoyta tʼaqani”, nispa.

¿Manachu Diosta yupaychayta akllasqanchikrayku, kawsayninchikpi allin imasta rikunchik? Chaykunapi tʼukuriyqa, aswan kusisqa kanapaq yanapawasunchik. Ajinata Mariuszpa kawsaynin rikuchiwanchik. Payqa, anciano, kimsa wawasniyuqtaq. Pay nin: “Bibliamanta yachakuyta qallarisqaymantapacha, kusisqa kani. Chaywanpis wakin kutiqa, llakiykuna taripawanpuni, chaykunamanta wakintataq, Jehovalla yachan. Chantapis, paypa yanapayninwan imachus aswan qhipaman kananta, kusisqa suyakuni”, nispa.

Rikunchikjina, allin rinawanchikta yuyayqa, mana llakiykunasninchikta chinkachinchu, chaywanpis kusisqa kanapaq, chʼampaykunata atipanapaq ima, yanapawanchik. Proverbios nin: “Pichus llakisqa kajpajqa sapa pʼunchay llakiyllapuni; pichus kusisqa kajpajrí, sapa pʼunchay fiesta jinallapuni”, nispa (Pro. 15:15). Diosninchik munakuwasqanchikpi tʼukuriptinchikqa, astawan payta munakusun, kusiyninchiktaq wiñanqa (Mat. 22:37).

Jehovata ñawpaqman churaq familiasqa, aswan kusisqas kawsakunku. Familiapi sapa juk, Diospa nisqanmanjina ruwaptinqa, chʼampaykunasninku pisiyanqa, aswan jukchasqataq kanqanku. Jinamanta, familiapi sunqu tiyaykuy, allin kawsay ima, kanqa (Sal. 133:1).

Chantapis, familiawan khuska Jehová Diospaq llamkʼayqa, may sumaq. Mariusz, nillantaq: “Familiaywan kaspaqa mayta kallpachakuni, imaraykuchus warmiyqa, sumaqta yanapawan. Khuska willamunaykupaq kallpachakuyku, chantapis, jatun tantakuypaq estadio nisqata llimphuchaq riptiy, chayri wak qutuchakuypi umallirichiq riptiypis, ñuqawan rinanpaq tiempochakunpuni. Chaytaq mayta kallpachawan”.

Bibliaqa, cristiano tatas, familiankupaq tukuy imata churanankuta nin (1 Tim. 5:8). Chaywanpis, llamkʼayninchik achkha tiempota, kallpata ima, qhichuwaptinchikqa, Diospaq llamkʼayninchikpi kusiyninchikta chinkachisunman. Chayrayku, Jehovap yanapanta mañakuna (Sal. 55:22). Wakinkunaqa, Diospa Reinonta ñawpaqman churanankurayku, pisi tiempollata llamkʼanku. Chayrayku, ni pipis qullqita ganananrayku, Diospaq llamkʼayninta pisiyachinanchu tiyan (Pro. 22:3).

Llamkʼayniyki achkha tiempota qhichuchkasunki chayqa, ichá imaspichus yanapasusqanta, imapitaqchus mana yanapasusqanta ima, juk hojapi qillqanayki kanman. Wak llamkʼayta munanki chaypis, kikillantataq ruwawaq. Tukuypis, sumaq pagasqa allin llamkʼaypi kayta munanchik. Chaywanpis, chay llamkʼaywan, ¿familiaykita Jehovata yupaychanallankupaqpuni yanapayta atinkichu? Chaykunapi tʼukuriy, imatachus ruwanaykita akllachkaspataq, Jehovap qayllanpi kayta, aswan allinpaq qhawasqaykita rikuchiy.

Llamkʼayniyki, qutuchakuypi ñawpaqman rinaykipaq mana yanapasuptinqa, ichá wak llamkʼayta maskʼakunayki kanqa. Achkha cristianosqa, Jehovapaq astawan llamkʼanankurayku, kawsayninkupi tukuy imata ruwanku. Poloniamanta juk hermano nin: “Llamkʼayniywanqa, tukuyniqman riq kani, Diospaq llamkʼanaypaq, familiayta yanapanaypaq imataq, mana tiempoy kaqchu. Chayrayku, chay llamkʼayniyta saqipurqani”, nispa. Kunanqa, wak llamkʼayniyuq, chaytaq manaña anchata saykʼuchinchu, nitaq achkha tiempotachu qhichun.

Wakkunata yanapaspa kusikuna

Jesús nirqa: “Aswan kusiy wajman qoriy qorichikunamanta nisqaqa”, nispa (Hech. 20:35). Cristianostaq, tukuy imaymanamanta, jinapuni kasqanta rikunchik. Wakin kutiqa, asirispa, qʼapirispa, qutuchakuypi imatapis ruwasqankumanta agradecespa ima, wakkunata kusirichisunman. Chaytaq, ñuqanchiktapis kusichillawanchiktaq.

 Apóstol Pabloqa, hermanosninman ajinata nirqa: “Callpachaychejtaj pisi sonko cajcunata. Yanapaychejtaj sonkosnincupi pisi callpayojcunata”, nispa (1 Tes. 5:14, Dios Parlapawanchej). Sunqu pʼakisqa kaqkunaqa, ichapis chʼampayninkuta sapallanku mana atipayta atisqankuta yuyanku. ¿Imaynatá paykunata yanapasunman? Juk hermano, Jehovata manaña ñawpaqjinachu yupaychachkasqanta reparaptiykiqa, kallpachariy. Ajinata ruwaspaqa, qampis kallpachakullankitaq. Chaywanpis, wakin chʼampaykunataqa, munaspapis mana allinchayta atinkichu. Ajina kaptinpis, chay chʼampayninmanta chiqamantapuni llakikusqaykita rikuchiwaq. Chantapis, Jehovapi atienekuptin, mana saqirparinanta yuyarichiy (Sal. 27:10; Isa. 59:1).

Willayman khuska rinanpaqpis waqyarillasunmantaq. Jesús, 70 discipulosninta ‘iskaymanta iskay willaq kachasqanta’ yuyarina (Luc. 10:1). Payqa, kallpachanakunankupaq jinata kacharqa. ¿Manachu sunqu pʼakisqa hermanowan willayman rispa kallpachanakullanchiktaq?

Llakiykuna kanqapuni. Jina kaptinpis, Pablop nisqanmanjina ruwasunman, pay nirqa: “Kusikuychejpuni Señorpi. Ujtawampis nillaykichejtaj: Kusikuychej”, nispa (Fili. 4:4). Arí, Diosta munakusqanchikrayku, kasukusqanchikrayku, kamachisqanta sunqu kʼajaywan juntʼasqanchikrayku ima, sunqu juntʼasqas, kusisqas ima, kanchik. Chʼampaykunata atipanapaqtaq, Jehovap yanapayninwan kanchik (Rom. 2:6, 7).

Iñiyninchikqa, Diospa musuq pachan, may qayllitapiña kasqanta rikuchiwanchik. Chaypitaq, may kusisqa, sunqu juntʼasqataq kawsakusunchik (Sal. 37:34). Chayrayku, kallpachakunallapuni. Jehová Diospa, bendicionesninpitaq tʼukurina. Ajinata ruwaspaqa, “kusiywan [Jehová] Diosta” yupaychallasunpuni (Sal. 100:2).

[8 paginapi diagrama]

(Publicacionpi qhawariy texto originalta)

Kusisqallapuni kananchikpaqqa tiemponchikta allinta tʼaqana,

SUNQUTA KUSICHIYPAQ

FAMILIAPAQ

LLAMKʼAYPAQ

TANTAKUYPAQ

BIBLIATA UKHUNCHANAPAQ

WILLAYPAQ

[10 paginapi dibujos/fotos]

Sunqu pʼakisqa hermanosta, ¿yanapawaqchu?