¿Macedoniaman jamuriwaqchu?

APÓSTOL Pabloqa, Troas (Asia Menor) llaqtapi kachkaspa, musquypijina Macedoniamanta juk runa, paymanta ajinata mañakuchkaqta rikurqa: “Jamuriy ari Macedoniaman yanaparinawaykupaj”, nispa. Pablo, compañerosnin imataq, Dios, chay llaqtapi tiyakuq runasman ‘evangeliota willanankupaq waqyachkasqanta’ yacharqanku. ¿Imayná chay willasqankupi rirqa? May chhika runas, cristianosman tukurqanku, may riqsisqa Filipos llaqtamantapis, Lidia, familiaresnin ima, cristianosman tukurqanku (Hech. 16:9-15).

Kunan tiempopi Jehovamanta sutʼinchaqkunaqa, kikillantataq chiqa yachachiymanta kʼajaywan willachkanku. Wakinkunaqa, maypichus Reinomanta pisi willaqkuna kanku, chayman yanapaq qullqisitunkuwan rinku. Lisaqa ajinata ruwasqa, payqa astawan willamuyta munaspa, Canadamanta Keniaman ripusqa. Trevorwan Emilywantaq, Canadamanta Malauiman ripusqanku. Pablowan Magaliwanqa, Jehovapaq astawan llamkʼayta munasqankurayku, jubilakuytawan Inglaterramanta, África orientalman ripusqanku. ¿Kikinta ruwayta munawaqchu? ¿Wak suyuman riwaqchu? Bibliapiqa, sumaq yuyaychaykuna ajinata ruwanapaq tiyan. Kunanqa chaykunata qhawarisunchik.

Sumaqta tʼukuriy

Ñawpaqtaqa, imaraykuchus wak suyuman riyta munasqaykipi tʼukurinayki tiyan. Jesusqa, mayqinchus aswan jatun kamachiy kasqanta nirqa: “Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj”, nispa. Chayrayku, wak suyuman ripunapaqqa, Jehovata munakusqanchik,  runasman Bibliamanta yachachiyta munasqanchik ima, tanqanawanchik tiyan. Jesús nillarqataq: “Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina”, nispa. Arí, runa masinchikta munakuptinchikqa, yanapayta munasunchik (Mat. 22:36-39; 28:19, 20). Chayrayku wak suyuman Reinomanta willaq rinapaqqa, munakuy, tanqanawanchik tiyan. Imaraykuchus, mana sunqunchikta kusirichiqchu rinchik, manaqa sinchita llamkʼaq. Remcowan Suzannewanqa, Países Bajos nisqamanta Namibiaman ripurqanku, paykunataq ajinata ninku: “Runa masiykuta munakusqaykurayku, kaypi qhipakuyku”, nispa.

Willieqa, Namibiapi qutuchakuykunata waturin, pay nin: “Kay suyupi qhipakuqkunaqa, mana yanapachikuyta yuyaspachu jamunku, manaqa wakkunata willaypi astawan yanapanankupaq jamunku”, nispa.

Tʼukuriytawanqa, tapurikuy: “¿Imatataq yachani hermanosta yanapanaypaq? ¿Allin willaykunamanta sumaq yachachiqchu kani? ¿Wak qalluta parlayta yachanichu? ¿Wak qalluta yachakuyta atiymanchu?”, nispa. Familiayuq kaptiykiqa, paykunawan chaykunamanta sutʼita parlay. Qutuchakuyniykimanta ancianosta tapuriy. Jehovap yanapaynintataq mañakuy. Ajinata ruwaspaqa, Jehovapaq wak suyupi llamkʼayta atisqaykitachus manachus reparanki ( “¿Qam kikiykita riqsikunkichu?”, nisqa recuadrota qhawariy).

¿Mayman riyta atiwaq?

Jehovaqa, Pabloman Macedoniaman willaq rinanta musquypijina rikuchirqa. Kunanqa, manaña jinatachu, maymanchus willamuq  rinanchikta rikuchiwanchik. Chaywanpis kay revistapijina chayri wak publicacionespipis, ima suyuspichus astawan llamkʼana kasqanta yachasunman. Ñawpaqtaqa, maymanchus riyta munasqaykita qillqay. Mana wak qalluta parlayta atiptiyki, chayri mana unaypaq riyta munaptiykiqa, ichá qalluykita parlaq suyusllaman, willaq riyta atiwaq. Chantá, rinaykipaq akllasqayki suyumanta astawan yachayta maskʼay. Yaykunaykipaq visata necesitankichus manachus, autos, llamkʼay ima, kanchus manachus, suwas anchachus manachus, chay suyu chirichus, qʼuñichus kasqantapis, tapuriwaq. Wak suyusman riqkunatapis tapurikuy. Jehovamantataq mañakuypuni. Maymanchus rinaykita yachanaykipaqqa, sumaqta tʼukurinayki kanqa. Pablo, compañerosnin ima, manaraq Macedoniaman kachasqas kachkaptinkuqa, espíritu santo “paykunata jarkʼarqa ama Asia suyupi evangeliomanta willanankupaj”, chantá “Jesuspa espiritun”, nillataq Bitiniaman “rinankuta saqerqachu” (Hech. 16:6-10).

Ichapis maymanchus riyta munasqaykita yachankiña. Kunanqa, chay suyup sucursalninman qillqanayki tiyan. Qutuchakuypi imaynatachus llamkʼachkasqaykita sutʼita willay, tukuy munasqaykitataq tapuriy, ichá qullqimanta, wasimanta, hospitalesmanta, llamkʼaymanta ima, tapurillawaqtaq. Qillqasqaykitataq, qutuchakuyniykimanta comité de servicio nisqaman jayway, paykunataq qillqasqankutawan, chay suyup sucursalninman apachinqanku. Chay suyumanta kutichisqankuta qhawarispa, ichá ima suyumanchus rinaykita sutʼita yachanki.

Willie nillantaq: “Wak suyupi kusisqa llamkʼaq hermanosqa, ñawpaqta chay suyuta waturiq rirqanku. Juk qhariwarmiqa, karu juchʼuy llaqtitapi mana yachakuyta atinankuta reparaspa, astawan jatun llaqtaman yanapanapaq ripurqanku”, nispa.

Wak llaqtapi kawsay

Wasimanta ripuspa wak ladopi tiyakuyqa, mana atikullanchu. Lisamanta parlarinallataq, pay nin: “Sapitallay kasqaymanta llakiytaqa, mana atipayta atillanichu”, nispa. ¿Imaynatá chay llakiyta atipan? Qutuchakuymanta hermanoswan allinta apanakunanpaq kallpachakun. Chayrayku, tukuy hermanospa sutisninkuta yachakunanpaq, manaraq tantakuy qallarichkaptin, tantakuy tukukuptin ima, tukuywan allinta parlarin. Chantapis paykunawan willaq rin, wasinmantaq waqyarikun. Jinamanta achkha amigosta tarin, nintaq: “Jehovaqa, chiqamanta bendeciwan, chayrayku kaypi kanaypaq imastachus ruwasqaymantaqa, mana pesachikunichu”, nispa.

Pablowan Magaliwanqa, wawasninkuta uywayta tukuytawan, 30 watasta tiyakusqanku wasita saqispa, wak suyuman ripurqanku. Pablo  nin: “Wasiykutawan kapuyniykutawanqa, saqiyta atillarqayku. Chaywanpis familiaykuta saqiytaqa, mana atillarqaykuchu. Avionpiña kachkaspaqa, mayta waqarikurqayku. Ñuqallaykumantaqa, mana riyta atiykumanchu karqa. Chaywanpis Jehovapi atienekurqayku. Chantapis, wak hermanoswan riqsinakuyku, chaytaq ñawpaqman rinaykupaq yanapawayku”, nispa.

Gregoriowan Cristalwanqa, Canadamanta Namibiaman ripusqanku, chaypi inglesta parlasqankurayku. Chaywanpis aswan qhipamanqa, chay suyumanta wak qallusta yachakuy sumaq kasqanta repararqanku. Paykuna ninku: “Wakin kutiqa, qʼasa sunqulla kaq kayku. Chaywanpis qallunkuta parlaspalla, chay llaqtapi runaspa kawsayninkuta entiendenaykuta repararqayku. Chantapis hermanoswan allinta apanakusqayku, yanapallawarqaykutaq”, nispa.

Chay llaqtasmanta hermanosqa, llampʼu sunquwan, mana munayninkuta maskʼaspa llamkʼaqkunataqa, allinpaq qhawanku. Irlandamanta Jennyqa, llaqtanman willaq riq familasmanta, kunankama yuyarikun. Pay nin: “Chay hermanosqa, yanapaq jamurqanku mana yanapachikuqchu. Paykunaqa waqyarikuq kanku. Tukuy sunquwan kusisqa llamkʼaqta rikuspa, ñuqapis jinallatataq ruwayta munarqani”, nispa. Kunanqa, Jenny qusanwan Gambiapi misioneros kachkanku.

Jehovap bendicionninqa, qhapaqyachiwanchik

Apóstol Pablotaqa, Macedoniaman risqan mayta yanaparqa. Chayrayku, 10 wataman Filipospi cristianosman qillqachkaspa nirqa: “Sapa kuti qankunamanta yuyarikuspa, Diosniyman graciasta qonipuni”, nispa (Fili. 1:3).

Trevorwan Emilywanqa, manaraq Escuela Bíblica de Galaad nisqaman richkaptinku, Malaui suyuman rirqanku, chaymanta parlaspa ajinata ninku: “Wakin kuti tapukuq kayku, ¿allintachu ruwayku kayman jamuspa?, nispa. Chaywanpis, kusisqas kachkarqayku. Imaraykuchus, chay ruwasqaykuqa kallpachawarqayku, Jehovap bendicionnintataq rikuchiwarqayku”, nispa. Gregorio, Cristal ima, nillankutaq: “Kawsayniykuwanqa, mana imatapis astawan sumaqta ruwaykumanchu karqa”.

Mana tukuychu, wak suyuman willaq riyta atisun. Chayrayku wakinkunaqa, suyunkumanta mayniqpichus pisi willaqkuna kanku, chayman willaq rinku. Wakinkunataq, llaqtankupi wak qutuchakuykunata yanapanku. Arí, Diospa munayninta ruwanapaqqa, tukuy atisqanchikta kallpachakunanchik tiyan (Col. 3:23, 24). Jinamanta Proverbios 10:22, ñuqanchikpi juntʼakusqanta rikusunchik: “Tata Diospa bendicionnenqa qhapajyachin, nitaj ima llakiytapis chay bendición apamunchu”.

[5 paginapi recuadro, dibujo/foto]

 ¿Qam kikiykita riqsikunkichu?

Kay urapi tapuykunaqa, wak suyuman willaq rinaykipaq, wakichisqachus manachus kasqaykita yachanaykipaq yanapasunqa. Jehovamanta yanapata mañakuy, chantá wak suyupi willamuyta atiwaqchus manachus, chaypi tʼukuriy. Astawan yachanaykipaq, La Atalaya revistapi kay yachaqanasta qhawariy.

• Diosta yupaychaypi, ¿allin sayasqachu kani? (“Medidas que conducen a la felicidad”, 15 octubre 1997, 6 paginapi.)

• Allin willaykunamanta, ¿sumaq yachachiqchu kani? (“El camino al éxito en el ministerio de precursor”, 15 mayo 1989, 21 paginapi.)

• Familiayta, amigosniyta ima, ¿saqiyta atillaymanchu? (“Cómo enfrentarse a la nostalgia en el servicio de Dios”, 15 mayo 1994, 28 paginapi.)

• ¿Wak qalluta yachakuyta atiymanchu? (“El reto de servir en una congregación de habla extranjera”, 15 marzo 2006, 17 paginapi.)

• Wak suyuman rinaypaq, chaypi tiyakunaypaq ima, ¿qullqiy kanchu? (“¿Puede usted servir en el extranjero?”, 15 octubre 1999, 23 paginapi.)

[6 paginapi dibujo/foto]

Hermanosninchikqa, llampʼu sunquwan mana munayninta maskʼaspa Diospaq llamkʼaqtaqa, allinpaq qhawanku

[7 paginapi dibujo/foto]

Diospaq astawan llamkʼayta munaspa wak llaqtaman ripuqkunaqa, kusiyta tarinku