Chiqa cristianospuni kasqanchikta rikuchina

“Allin sachʼaqa sumaj poqoykunata poqon; mana walej sachʼarí, manallataj allin poqoykunatachu poqon.” (MAT. 7:17.)

1, 2. Kay tukukuy pʼunchaykunapi Jesuspa chiqa discipulosnin, ¿imamantataq astawan riqsisqas kanku?

JESUSQA, chiqa cristianosta puquyninkupi nisunman ruwasqankupi, yachachisqankupi ima, riqsinanchikta nirqa (Mat. 7:15-17, 20). Arí, imachus runap yuyayninpi, sunqunpi ima, kasqanqa, ruwayninpi rikukun (Mat. 15:18, 19). Llulla yachachiykunata yachakuqkunaqa, mana “allin poqoykunatachu poqo[chinku]”, chiqa kaqta yachakuqkunarí “sumaj poqoykunata poqo[chinku]”.

² Kay tukukuy pʼunchaykunapitaq, chayqa aswan sutʼita rikukun (Daniel 12:3, 10, ñawiriy). Llulla cristianosqa, Diosmanta pantasqata yachasqankurayku, payta yupaychaqkunaman rikchʼakullanku. Diosta riqsiqkunarí “tukuy sonqowan, cheqa kajman jinataj” yupaychanku, Cristojina ruwanankupaqtaq kallpachakunku (Juan 4:24; 2 Tim. 3:1-5). Chaywanpis, ¿imatá sapa jukninchikmanta nisunman? Kay yachaqanapiqa, imaynasmantachus Jesuspa chiqa discipulosninta riqsinanchikmanta parlarisun. Yachakusqanchikmanjinataq tapurikuna: “¿Diospa munasqanmanjinachu kawsakuni? ¿Bibliap nisqantapunichu yachachini? Kawsayniyta rikuspa, ¿llampʼu sunqu runas chiqa kaqmanta yachakuyta munankumanchu?”, nispa.

Diospa Palabranmanjina kawsakuna

3. ¿Imataq Jehovata kusichin, chantá imatataq cristiano ruwanan tiyan?

³ Jesús nirqa: “Mana tukuy pikunachus: Señor, Señor, nispa niwajkunachu janaj pacha reinoman yaykonqanku. Manachayqa, janaj pachapi kashaj Tataypa munayninta ruwajkunalla yaykonqanku”, nispa (Mat. 7:21). Arí, Jehovaqa, cristiano kasqanta ruwasqanpi rikuchiqwan kusikun, manataq simillamanta Cristop discipulon kani niqwanchu. Chiqa cristianoqa, qullqimanta, llamkʼaymanta, sunqu kusichiymanta, runap ususninmanta, raymismanta, qhariwarmi kawsaymanta, amigosmanta, wak imasmantapis Bibliap nisqanmanjinapuni yuyan. Llulla cristianorí, kay saqra pachap munayninmanjina, yuyan, ruwan ima (Sal. 92:7).

4, 5. Malaquías 3:18 pʼiti nisqan, ¿imata ruwanapaqtaq tanqanawanchik tiyan?

⁴ Profeta Malaquiaspis jinata qillqarqa: “Ujtawan reparankichej pichus cheqan runa, pitajchus mana cheqan runa kasqanta; reparallankichejtaj pichus Diosta yupaychasqanta, pitajchus mana yupaychasqantawan”, nispa (Mal. 3:18). Kay rimaykunapi tʼukurispa, tapurikuna: “¿Kay pachamanta runasman rikchʼakuytachu maskʼani, chayri wakjinachu kayta munani? Yachaywasipi, llamkʼaypi ima, ¿compañerosniywan allinpaq qhawachikuytachu maskʼani? Chayrí, ¿Diospa kamachinjinachu imapichus creesqayta sutʼinchani?”, nispa (1 Pedro 3:16, ñawiriy). Jehovata yupaychaqkunaqa, tukuy runasjina pantaptinchikpis, wakjinas kasqanchikta sutʼita rikuchinanchik tiyan.

⁵ Mana ajinata ruwachkasqaykita reparakunki chayqa, Jehovamanta yanapata mañakuy, payman astawan qayllanaykipaqtaq, Bibliata ukhunchay, tantakuykunamanpis riypuni. Bibliap yachachisqanta astawan sumaqta japʼiqaptiykiqa, “sumaj poqoykunata” astawan sutʼita rikuchinki, ajinamanta sumaq ‘puquyta ofrecenki Diospa sutinta uqharispa’ (Heb. 13:15, Mosoj Testamentoj).

 Diospa Reinonmanta willana

6, 7. Chiqa cristianoswan llulla cristianoswan, ¿imapiwantaq mana kikinchu kanku?

⁶ Jesús nirqa: “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa (Luc. 4:43). ¿Imaraykutaq willayninpi Reinomanta parlayta akllarqa? Imaraykuchus payqa, chay Reinopi kamachiq kananta yacharqa. Chantapis akllasqa cristianospa yanapayninwan, runasta ñakʼarichiqta, nisunman Satanasta, juchata ima, chinkachinanta yachallarqataq (Rom. 5:12; Apo. 20:10). Chayrayku discipulosninmanpis, chay Reinomanta tukukunankama parlanankuta kamachirqa (Mat. 24:14). Llulla cristianosqa, mana chay llamkʼayta ruwachkankuchu, nitaq ruwayta atinkumanchu. Imaraykuchus mana yachasqankumantaqa, mana parlayta atinkumanchu. Chantapis, Reinomanta willamunapaqqa, llampʼu sunqu, mana manchachikuqtaq kana tiyan, imaraykuchus runasqa asipayakunku, ñakʼarichikunku ima, chay runastaq mana chayta muchunankupaqjinachu kanku (Mat. 24:9; 1 Ped. 2:23). Chantapis, Jehovap espiritunqa mana paykunata yanapanchu (Juan 14:16, 17).

⁷ Cristop chiqa discipulosninrí, imachus Diospa Reinon kasqanta, imastachus ruwanankutapis yachanku. Chayrayku chay Reinonta kawsayninkupi ñawpaqman churanku, espíritu santop yanapayninwantaq chaymanta pachantinpi willamunku (Zac. 4:6). Sapa jukninchik, ¿jinatachu ruwachkanchik? ¿Willamuchkallanchikpunichu? Astawan willamunapaq, sumaq yachachiqkuna kanapaq ima, ¿kallpachakunchikchu? Chantapis ‘Diospa Palabran kawsayniyuq, atiyniyuqtaq’ kasqanrayku, ¿Pablojina Bibliawan sumaqta yachachinapaq kallpachakunchikchu? (Heb. 4:12; Hech. 17:2, 3.)

8, 9. a) ¿Imaraykutaq willaypi Bibliamantapuni ñawiriy may allin kasqanta nisunman? b) Bibliawan astawan sumaqta willamunapaq, ¿imaynamantá wakichikusunman?

⁸ Juk hermanoqa, wasimanta wasi willachkaspa, juk católico runapaq, Daniel 2:44 pʼitita ñawiripurqa, chantá, Diospa Reinollan allin kawsayta apamunanta sutʼincharqa. Chay runataq: “Chay yachachiyta Bibliapi ñawiripuwasqaykimanta mayta agradecekuyki”, nispa kutichirqa. Wak hermanotaq warminwan willachkaspa, Ortodoxa Griega religionniyuq warmipaq, juk pʼitita ñawiripurqa. Chay warmi tapuykunata ruwaptintaq, Bibliawan kutichirqa. Jinata ruwasqankurayku, chay warmi nirqa: “Ñuqaqa, Bibliamanta ñawiripuwasqaykichikraykulla qamkunawan parlarqani”, nispa.

⁹ Publicacionesninchikqa, runasta yanapanapaq wakichikun, chaywanpis Bibliamantapuni ñawiripunanchik tiyan. ¿Jinatachu ruwachkanki? Mana jina kaptinqa, chayta ruwanaykipaq kallpachakuy. Ichapis Diospa Reinonmanta, chantá imaynatachus chay Reino chʼampaykunata chinkachinanmanta sutʼinchaq pʼitista akllawaq, ajinamanta wasimanta wasi willachkaspa Bibliamantapuni ñawirinki.

Diospa sutinwan riqsichikuyta jatunpaq qhawana

10, 11. Llulla cristianos, ¿Jesusjinachu Diospa sutinta qhawanku?

¹⁰ Jehová Diosqa, llaqtanman nin: “Qankuna noqamanta sutʼinchajkuna kankichej [...].  Noqamanta ñaupajta mana ima diospis karqachu, manataj qhepamanpis waj dios kanqachu”, nispa (Isa. 43:10, Qheshwa Biblia) ¿Pitaq ñawpaqpi kaq Jehovamanta sutʼinchaq? Jesucristo. Payqa, Tatanpa sutinta runasman riqsichiyta may jatunpaq qhawarqa (Sal. 148:13; Juan 17:6; Hebreos 2:12, ñawiriy). Chayrayku Bibliaqa, “cheqanta willaj testigo” nispa sutichan (Apo. 1:4, 5; Mat. 6:9).

¹¹ Jesuspa, Diospa sutinpi ima, imatapis ruwayku niqkunaqa, Diospa sutinta mana allinpaqchu qhawanku, Bibliankumantapis sutinta urqhurpanku. Kunallanraq, religión catolicata kamachiqkunaqa, kay kamachiyta iglesiasninkuman apachisqanku: “Diospa sutin kay tawa qillqitaspi YHWH kaqtaqa, misa ruwakuchkaptin, ni imarayku uqharikunanchu tiyan”, nispa. * Kay yuyayqa, ¡manapuni allinchu! ¿Icharí?

12. Chiqa cristianos, ¿imatataq Diospa sutinta riqsichiyta munaspa, 1931 watapi ruwarqanku?

¹² Kay tiempomanta cristianospis, Jesusjina, ñawpa tiempopi chay chhika sutʼinchaqkunajina ima, Diospa sutinta may jatunpaq qhawallankutaq (Heb. 12:1). Chayrayku kay 1931 watapi, “Jehovamanta sutʼinchaqkuna” sutiwan riqsichikuyta qallarirqanku (Isaías 43:10-12, Qheshwa Biblia). Ajinamanta, ‘Diospa sutinpaq sutichasqa’ llaqtaman tukurqanku (Hech. 15:14, 17, Mosoj Testamentoj).

13. ¿Imaynatá Diospa llaqtanpa sutinmanjina kawsasunman?

¹³ ¿Imaynatá chay sutimanjina kawsasunman? Qallarinapaqqa, Diospa sutinta riqsichinanchik tiyan. Pablo qillqarqa: “Pillapis [Jehovap] sutinta oqharispa Diosnimpaj rejsikapojqa salvasqa kanqa. Imaynatataj sutinta oqharenqanku, mana paypi creespari? Imaynatataj creenqanku, paymanta mana uyarispari? Imaynatataj uyarenqanku, paykunaman mana pipis willajtinri? Imaynatataj willanqanku, mana kachasqa kaspari?”, nispa (Rom. 10:13-15). Chantapis, mana manchachikuspa, wakkunata mana phiñachinapaqjinataq, Diospa sutinta chʼichichaq yachachiykunata sutʼinchananchik tiyan. Nina lawraypi ñakʼariymanta yachachiytajina, imaraykuchus chay yachachiyqa munakuyniyuq Diosta, saqra Supaywan kikinchan (Jer. 7:31; 1 Juan 4:8; Marcos 9:17-27, kikinchay).

14. Diospa sutinta yachaytawan, ¿imatá wakin runas ruwarqanku?

¹⁴ ¿Diospa sutinwan riqsichikuyta jatunpaqchu qhawanki? Jina kaptin, ¿wakkunaman riqsichichkankichu? París llaqtapi juk warmiqa, Jehovamanta sutʼinchaqkuna Diospa sutinta riqsisqankuta yachasqa. Chayraykutaq paykunata tariytawan, Bibliapi rikuchinankuta mañasqa. Kay Salmo 83:18 pʼitita ñawiriytawanqa, mayta kusikusqa, Bibliamantataq yachakuyta qallarisqa. Kunanqa Diospaq wak suyupi llamkʼachkan. Australia suyupipis, juk católica warmi, Diospa sutinta Bibliapi yachakuspa kusiymanta waqarikusqa. Chantá Bibliamanta yachakuyta qallarisqa, kunantaq unaytaña precursorajina llamkʼachkan. Jaqay Jamaica suyupiqa, hermanos, juk warmiman Biblianpi Jehová sutita rikuchillasqankutaq, chay warmitaq kusiymanta waqarikullasqataq. Arí, Diospa sutinwan riqsichikuyta jatunpaq qhawananchik tiyan, Jesusjinataq chay sutita tukuyniqpi riqsichimuna.

“Kay pachaj yuyayninman jina kawsayta ama munakuychejchu”

15, 16. a) ¿Imaynatá cristianos kay pachata qhawanchik? b) ¿Imastataq sapa juk tapurikuna tiyan?

¹⁵ Bibliaqa nin: “Kay pachaj yuyayninman jina kawsayta ama munakuychejchu nitaj kay pachapi kaj imastapis. Pichus kay pachaj yuyayninman jina kawsayta munakojqa Dios Tatata mana munakunchu”, nispa (1 Juan 2:15). Arí, kay pacha, saqra munayninpis, Jehovap, espíritu santonpa contranpi ima, kachkanku. Chiqa cristianosqa, tukuy kallpankuwan chay saqra ruwaykunata qhisachanku, imaraykuchus  discípulo Santiago nisqanmanjina, “kay pachaj yuyayninman jina kawsakojqa Diospa contran[pi]” kachkan (Sant. 4:4).

¹⁶ Santiagop nisqanta juntʼaytaqa mana atikullanchu, kay pachap imasnin munapayanapaqjina kasqanrayku (2 Tim. 4:10). Chayrayku Jesús, Diosmanta ajinata discipulosninpaq mañapurqa: “Mana mañakunichu paykunata kay pachamanta orqhokapunaykita, manachayqa mañakuni paykunata sajra kajmanta waqaychanaykita. Paykunaqa mana kay pachajtachu kanku; noqapis manallataj kay pachajtachu kani”, nispa (Juan 17:15, 16). Chayrayku tapurikuna: “Kay pachap saqra ruwaykunasninmanta karunchasqa kawsanaypaq, ¿kallpakunichu? Llulla religionpi qallariq raymismanta, runaspa ususninmanta ima, ¿imatachus yuyasqayta riqsisqasniy yachankuchu?”, nispa (2 Cor. 6:17; 1 Ped. 4:3, 4).

17. ¿Imaraykutaq llampʼu sunqu runas Jehovamanta yachakuyta munanku?

¹⁷ Ruwasqanchik mana allinpaq qhawasqa kaptinpis, llampʼu sunqu runasqa yachakuyta munanku. Chay runasqa, iñiyninchik Bibliap nisqanmanjina kasqanta, chaymanjina ruwasqanchikta ima, rikunku. Chayrayku akllasqa cristianospa yachachisqankuta yachakuyta munaspa, ajinata ninku: “Qankunawan riyta munayku, imaraykuchus uyariyku qankunawan Dios kasqanta” (Zac. 8:23).

Chiqa munakuyta rikuchina

18. ¿Imayna munakuytataq Jehovaman, runa masinchikman ima rikuchinanchik tiyan?

¹⁸ Jesús nirqa: “[Jehová] Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj”. Chantá nillarqataq: “Runa masiykita munakunki qan kikiykita jina”, nispa (Mat. 22:37, 39). Kay munakuyqa (Griegopi agápe nisqa), chiqan kaqmanjina, imatachus ruwananta juntʼan, yuyaychaykunawantaq kamachisqa kachkan. Chaywanpis sunqumantapacha lluqsin (1 Ped. 1:22). Chay munakuyqa, parlayninchikpi, ruwayninchikpi ima rikukun, wakkunap allinninta maskʼanapaqtaq tanqawanchik (1 Corintios 13:4-7, ñawiriy).

19, 20. Imaraykuchus chiqa munakuy atiyniyuq kasqanta sutʼinchay.

¹⁹ Munakuyqa, espíritu santop puquyninmanta. Chiqa cristianosqa, chay munakuyniyuq kasqankurayku, tukuy laya runasta  allinpaq qhawanku, wak runastaq mana chayta ruwayta atinkuchu (Juan 13:34, 35, ñawiriy; Gál. 5:22, 23). Llampʼu sunqu runasqa, chayta rikuspa, Bibliamanta yachakuyta munanku. Sutʼincharinapaq, Israel suyupi juk waynaqa, ñawpaq kutita tantakuyman risqa, chaypitaq judíos, árabes ima, Jehovata khuska yupaychachkasqankuta rikuspa, tʼukuchkaq qhipakusqa. Chayrayku Bibliamanta yachakuyta munasqa, tantakuykunamantaq riyta qallarisqa. Hermanosninchikta, ¿chiqamantachu munakunchik? Tantakunapaq Wasiman imayna runallapis jamuptin, ¿kʼachamantachu parlapayanchik?

²⁰ Chiqa cristianosqa, tukuy runasman munakuyninchikta rikuchinapaq kallpachakunchik. El Salvador suyupiqa, juk católica warmi 87 watayuq, Jehovamanta sutʼinchaq sipaswan Bibliamanta yachakuchkaspapis, mana iglesianta saqiyta atichkarqachu. Jinallapi mayta unquykuspa hospitalpi internakusqa. Wasinman kutipuptintaq, hermanosqa, waturiq rirqanku, mikhunatapis aparqanku. Iglesianmanta kaqkunarí, ni pi waturisqachu, chayraykutaq lantisninta chinkachisqa, iglesianta saqispataq, watiqmanta Bibliamanta yachakuyta qallarisqa. Chiqa munakuyqa, ¡may atiyniyuqpuni! Sunqu ukhukamataq chayan.

21. Suyakuyninchik chhanka patapi wasijina kananpaq, ¿imatataq ruwasunman?

²¹ Jesusqa, llulla cristianosta tumpamantawan ninqa: “¡Ni jaykʼaj qankunata rejserqaykichejchu. Chinkaychej ñawpaqeymanta, sajrata ruwajkuna!”, nispa (Mat. 7:23). Ñuqanchiktaqrí, Tata Diosta, Churinta ima, jatunchayta munanchik. Cristop kay nisqantataq yuyarikunchikpuni: “Pipis kay nisqasniyta uyarispa ruwan chayqa, chay runaqa sumaj yuyayniyoj chhanka patapi wasichakoj runaman rijchʼakun”, nispa (Mat. 7:24). Arí, Cristop chiqa discipulosnin kasqanchikta kawsayninchikwan rikuchisun chayqa, Diosninchik allinpaq qhawawasun, suyakuyninchikpis chhanka patapi wasijina kanqa.

[Sutʼinchaynin]

¿Yuyarikunkichu?

• ¿Imapitaq Jesuspa chiqa discipulosnin, llulla cristianosmanta wakjinas kanku?

• Chiqa cristianos, ima ‘puquykunatachus’ rikuchisqankuta sutʼinchay.

• Cristianosjina, ¿ima kʼacha kaykunata rikuchinapaq astawan kallpachakuna?

[Tapuykuna]

[13 paginapi dibujo/foto]

¿Bibliamantapunichu willaypi ñawirinchik?

[15 paginapi dibujo/foto]

Bibliap juchachasqan raymista imaraykuchus mana ruwasqaykita, ¿wakkuna yachankuchu?