Ñawiriqkunapta tapuyninku

¿Maykʼaqtaq juk runa watiqmanta bautizakunanpi tʼukurinan tiyan?

Wakinkunaqa, watiqmanta bautizakunanku kasqanta yuyanku. Ichapis, bautizakuchkaptinku pakayllapi jatun juchata ruwachkasqankurayku ajinata yuyankuman, yachanchikjinataq jinata ruwaqkunaqa, qutuchakuymanta wikchʼusqa kanku. Ajinapi kachkaspa, ¿Diosman qukuyta atinkumanchu karqa? Mana. Imaraykuchus chay saqra ruwaytaqa, Diosman manaraq qukuchkaspa saqinanku karqa. Chaywanpis, ajina juchallikuchkaspa bautizakurqanku chayqa, watiqmanta bautizakunankupi tʼukurinanku tiyan.

Kunanqa, kaytañataq qhawarina: juk runa bautizakunan tiempopi mana ima jatun juchatapis ruwachkarqachu, chaywanpis astawan qhipamanqa, juchapi urman, chayraykutaq ancianosqa, juzganapaq comisionpi tantakunanku tiyan. ¿Ninmanchu chay runa, bautizakusqan mana valesqanta, chay kutipi imatachus ruwachkasqanta mana entiendesqanta ima? Ancianosqa, bautizakusqanmanta imatachus yuyasqanta, juzgachkaspa mana tapunankuchu tiyan. Imaraykuchus chay runaqa, bautizakuchkasqan pʼunchay, juk umallirichiypi, imatachus akllachkasqan mana pukllakuyllachu kasqanta uyarirqa. Chantapis Diosman qukuspa bautizakunamanta, iskay tapuykuna ruwakuptin, arí nispa kutichirqa. Chaymantataq pʼachanta lluchʼukuytawan, yakupi bautizachikurqa. Chayrayku, chay runaqa imatachus ruwachkasqanta sumaqta yacharqa, ancianostaq qutuchakuymanta juk hermanotajina qhawananku tiyan.

Chay runa, bautizakusqanmanta iskaychasqallapuni chayqa, ancianosqa, kay revistasta ñawirinankuta ninkuman: La Atalaya 15 agosto 1960, página 511; 15 julio 1964, páginas 443-446. Chaywanpis, pipis imaraykullapis, watiqmanta bautizakunan kasqanta ninman chayqa, (ichapis bautizakuchkaptin Bibliamanta chiqa yachachiykunata mana allinta entiendesqanrayku) paylla akllanan tiyan.

Cristiano juk wasipi pillawanpis tiyakuyta munaspa, ¿imaspitaq tʼukurinan tiyan?

Tukuy runas, juk wasiyuq kayta munanchik, chaywanpis kay tiempopiqa, mana tukuychu juk wasiyuq kayta atinku. Achkha runasqa, qullqi mana kasqanrayku, unquyrayku, wak imas kasqanrayku ima, juk wasillapi familiaresninkuwan tiyakunku. Wakin suyuspitaq, juk cuartollapi achkha familiares tiyakunku.

Jehovap llaqtanpiqa, mana kamachiykuna tiyanchu, machkha runaschus juk wasipi tiyakunankupaq. Chaywanpis, tukuy cristianos Diosta jatunchanapaqjina kawsanankupaq, Bibliap nisqanmanjina yuyaychawanchik. Chay yuyaychaykunamanta wakinta qhawarina.

Qallarinapaq, pikunawanchus tiyakunchik paykunaqa, Diosmanta karunchawasunman chayri astawan qayllachiwasunman. Chayrayku tapurikuna: ¿Pikunataq kanku? ¿Jehovap  kamachisninchu kanku? ¿Bibliap nisqanmanjinachu kawsakunku?, nispa. Pablop yuyaychasqanta ama qunqanachu, pay nirqa: “Ama chʼawkiyachikuychejchu. Sajra runaswan pureyqa kʼacha ususta chinkachin”, nispa (1 Cor. 15:33).

Chantapis Bibliaqa, Jehová khuchichakuyta, qhinchachakuyta ima, mayta chiqnikusqanta sutʼita nin (Heb. 13:4). Paypaq ñawpaqinpiqa, juk soltero qhariwan juk soltera warmiwanqa, casarasqajina tiyakunankuqa, mana allinchu. Chiqa cristianotaq, maypichus khuchichakuy tiyan chaypiqa, mana tiyakunchu.

Bibliaqa, Diospa ñawpaqinpi allinpaq qhawasqa kayta munaqkunata, ajinata yuyaychan: “Ayqeychej khuchichakuy juchamanta”, nispa (1 Cor. 6:18). Chayrayku, juk cristiano juk wasipi pillawanpis tiyakuypi tʼukurichkan chayqa, ñawpaqtaqa, ajinata tiyakuspa khuchichakuyman tanqasqachus manachus kananpiraq, tʼukurinan tiyan. Sutʼincharinapaq, achkha cristianos juk wasillapi tiyakuptinku, ¿maykʼaqllapis juchaman urmanankupaq tanqasqa kankumanchu? ¿Imataq kanman chay wasipi juk qhariwan juk warmiwan sapallanku rikhuriptinku, nitaq casarasqachu kaptinku? Chantapis, iskay solteros munanakuyta qallarichkanku chayqa, mana allinchu kanman juk wasillapi tiyakunanku, imaraykuchus khuchichakuyman urmankuman. Chayjinapi mana urmanapaqqa, yachayniyuq kay yanapawasun.

Chantá divorciakuqkunapis, manaña juk wasillapichu tiyakunanku tiyan. Imaraykuchus, khuska puñuyman yachasqa kasqankurayku, khuchichakuy juchaman urmankuman (Pro. 22:3).

Chantapis, juk wasipi pillawanpis tiyakuptinchik, imatachus vecinosninchik yuyanankupi tʼukurinanchik tiyan. Juk cristiano qhawasqanmanjina allillan kaptinpis, ichapis chay lugarmanta runasqa, mana allintachu parlayta qallarinkuman. Chaytaq mana allinchu kanman, imaraykuchus mana Jehovap sutinta chʼichichayta munanchikchu. Astawanpis, Pablop yuyaychasqanta kasukuyta munanchik, pay nirqa: “Ama miskʼachiychejchu judiosta, nitaj mana judío kajkunata, nillataj Diospa iglesiantapis. Noqapis tukuyman allin rijchʼayta munani tukuy imapi. Manataj noqaj allinnillaytachu maskʼashani, astawanqa wajkunaj allinninkutapis maskʼashallanitaj, salvasqa kanankupaj”, nispa (1 Cor. 10:32, 33).

Arí, wakin kutiqa, Jehovap chiqan kamachiykunasninmanjina juk wasipi tiyakuy, mana atikullanqachu. Chaywanpis, tukuy cristianos ‘allinta reparananchik tiyan, imachus Señorta kusichinanta’. Chantapis wasinchikpiqa, tukuy ima ruwakusqan, llimphu kanan tiyan (Efe. 5:5, 10). Chaypaqtaq, Diospa yanapanta mañakunanchik tiyan, cuerponchik, kawsayninchik llimphu kananpaq, Jehovap sutinta mana chʼichichanapaq ima, tukuy imata ruwana.