Diospa Palabranmanta mana manchachikuspa willamuna

“Tukuyninkutaj Espíritu Santowan juntʼasqa kaspa, Diospa Palabranta mana manchachikuspa willarqanku.” (HECH. 4:31.)

1, 2. ¿Imaraykutaq sumaqta willamunapaq kallpachakunanchik tiyan?

JESUSQA, wañunan pʼunchaymanta kimsa pʼunchay kachkaptin, discipulosninman jinata nirqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa. Kawsarimuytawan janaqpachaman ripunanpaqña kachkaspataq, jinata kamachirqa: “Rispa, tukuy laya runasta yachachisqasniyman tukuchimuychej [...]. Yachachimuychej paykunaman imatachus noqa kamacherqaykichej, chayta”, nispa. Chaymantataq, paykunaman nirqa: “Qankunawan tuta pʼunchay kas[aq], kay pacha tukukunankama” (Mat. 24:14; 26:1, 2; 28:19, 20).

² Jehovamanta sutʼinchaqkunaqa, ñawpa siglopijinallataq, chay Reinomanta willamuchkanchik, yachachimuchkanchik ima. Kay ruwayqa, ni imawanpis kikinchakunmanchu, runas salvakunankupaq kasqanrayku. Chayrayku, chay llamkʼayta sumaqta juntʼanapaq kallpachakunanchik tiyan. Kay yachaqanapiqa, imaynatachus espíritu santo, mana manchachikuspa willamunapaq yanapawasqanchikta rikusun, qhipan iskay yachaqanaspitaq, sumaqta, mana saqispataq willamunapaq yanapawasqanchikta rikusun.

Mana manchachikuq runas kana

3. Mana manchachikuspa willamunapaq, ¿imastá atipananchik tiyan?

³ Dios, Reinonmanta willamunata kamachiwasqanchikqa, may sumaq. Chaywanpis, chay llamkʼayta juntʼayqa, wakin kuti mana atikullanchu. Wakin runas, allin willaykunata  sumaqta japʼikuptinkupis, achkhas, Noep tiemponpijina kanku. Imaraykuchus chay tiempopi runasqa, Jesús nirqajina, “mana imatapis reparakorqankuchu jatun para jamunankama, tukuyninkutaj chinkachisqa karqanku.” (Mat. 24:38, 39). Wakinkunataq asipayawanchik, ñakʼarichiwanchik ima (2 Ped. 3:3). ¿Pikunataq churanakuwasunman? Kamachiqkuna, llamkʼaymanta chayri yachaywasimanta compañerosninchik, familiaresninchik ima. Chantapis wakinkunaqa, manchali kayninchikta chayri, qhisachanawanchikta manchachikuyta atipananchik tiyan. Arí, Diospa Palabranmanta “mana manchachikuspa” willamunapaqqa, achkha jarkʼaykuna tiyan (Efe. 6:19, 20). Chayrayku, ¿imatá mana manchachikuq runas kanapaq ruwasunman?

4. a) ¿Imaynataq mana manchachikuq runa? b) ¿Pitaq Pablota Tesalónica llaqtaman willamunanpaq kallpacharqa?

⁴ Mana manchachikuq runaqa, mana machu machuchu, astawanpis tukuyta allinpaq qhawan (Col. 4:6). Chayrayku ñuqanchikqa, sutʼinta parlaptinchikpis, tukuywan allinpi kawsakuyta maskʼanchik (Rom. 12:18). Mana manchachikuspa Reinomanta allin willaykunata willamuspapis, wakkunata mana phiñachinapaqjinalla parlamunanchik tiyan. Rikunchikjina, mana manchachikuq kaytaqa, mana atikullaptinpis, wak kʼacha kaykunatawan khuskachananchik tiyan. Kallpallanchikwanqa, mana chayta ruwayta atisunmanchu. Apóstol Pablo, compañerosninwan, tesalonicensesman willamuq risqankupi tʼukurina. Pablo nin: “Diosniyku kallpachawarqayku, [...] qankunaman willanaykupaj”, nispa. ¿Imaraykutaq chay kallpachayta necesitarqanku? ‘Filipos llaqtapi kʼumuykachachisqas’ kasqankurayku (1 Tesalonicenses 2:2, ñawiriy). Arí, Jehovaqa, sunqunchikpi manchachikuyta urqhuspa, kikillantataq kallpachawasunman.

5. ¿Imaynatá Jehová, Pedrota, Juanta, wak discipulosta ima, kallpacharqa?

⁵ “Kamachejkuna, kurajkuna, leymanta yachachejkuna ima”, Pedrowan, Juanwan ima, parlasqankuta yuyarikuna. Apostolesqa, chay kamachiqkunaman jinata kutichirqanku: “Qankuna unanchaychej, qankunata kasunaykuchus, chayri Diosta kasunaykuchus aswan allin kasqanta. Mana chʼin kayta atisqaykuchu. Willanaykupuni tiyan imatachus rikusqaykuta, uyarisqaykuta ima”, nispa. Paykunaqa, Dios, qhatiykachayta chinkachinanta mañakunankumantaqa, wak cristianoswan khuska ajinata mañakurqanku: “Señor, qhawariy imaynatachus phiñakuspa, manchachiwasqaykuta. Kunanqa kamachisniykita kallpachay ari, ama manchachikuspa Palabraykita willanaykupaj”, nispa (Hech. 4:5, 19, 20, 29, 30). ¿Imaynatá Jehová mañakuyninkuman kutichirqa? (Hechos 4:31, ñawiriy.) Espíritu santonwan paykunata kallpacharqa. Kunanpis, kikillantataq kallpachawasunman. Chaywanpis, ¿imatá espíritu santota japʼikunapaq, willayninchikpi yanapachikunapaq ima, ruwasunman?

¿Imatá mana manchachikuq runas kananchikpaq ruwasunman?

6, 7. ¿Imaynamantá espíritu santota japʼikusunman? Sutʼinchariy.

⁶ Espíritu santotaqa, Diosmanta mañakuna. Jesús, runasman nirqa: “Qankunachus sajra runas kashaspa, allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Espíritu Santota qonqa mañakojkunaman”, nispa (Luc. 11:13). Chay nisqanqa, Jehovap kallpanta sapa kuti mañakunata rikuchin. Willaymanta ima ruwayllatapis mana atinapaqjina qhawaptinchikqa, chayta ruwananchik tiyan, nisunman callespi, ranqhana chiqaspi, wak lugarespi ima, willamunapaq (1 Tes. 5:17).

⁷ Rosa sutiyuq hermanaqa, jinata ruwasqa. * Juk pʼunchayqa, may yachaywasipichus llamkʼan chaypi, juk yachachiqta, wak yachaywasimanta willayta ñawirichkaqta rikusqa.  Chay yachachiqqa, chay yachaywasipi wawasta ñakʼarichichkasqankuta ñawirispa, mayta phiñakuspa ajinata nisqa: “¡Maymanchus chayasunpis!”, nispa. Chaypitaq hermanaqa, Diosmanta willayta qallarisqa. Ajinata ruwananpaq, ¿maymantá kallpata urqhurqarí? Pay nin: “Jehovamanta, espíritu santonwan yanapanawanta mañakurqani”, nispa. Chay hermanaqa sumaqta sutʼinchasqa, wak pʼunchay astawan willarinallanpaqpunitaq parlarisqa. Phichqa watitayuq Milanemantañataq parlarina, payqa Nueva York llaqtapi tiyakun. Pay nin: “Mamaywan ñuqawanqa, niraq yachaywasiman richkaptiy Diosmanta mañakuykupuni”, nispa. Chantá, ¿imatá mañakunku? Milane sinchita sayaspa mana manchachikuspa Diosmanta parlarinanpaq. Maman nin: “Chayta ruwasqaykurayku, Milaneqa, diachakusmanta, wak raymismanta ima, imatachus yuyasqanta sutʼinchayta atin, nitaq chaykunaman satʼikunchu”, nispa. Diosmanta mañakuy, ¿maytacharí mana manchachikuspa willanapaq yanapawanchik?

8. ¿Imatataq Jeremiasmanta yachakusunman?

⁸ Jeremías manchachikuyninta atipananpaq, imachus yanapasqanpi tʼukurina. Jehová profetatajina kachachkaptin, pay nirqa: “Noqaqa waynallaraj kani, nitaj sumajta parlaytapis atinichu, nispa” (Jer. 1:4-6). Chaywanpis aswan qhipamanqa, Jehová, runasta juchachasqanmanta, may kallpawan willarqa, chayraykutaq layqa pʼisqu kasqanta nirqanku (Jer. 38:4). Payqa, 65 kuraq watasta willamurqa. Mana manchachikuspa willasqanqa, Israelpi may riqsisqa karqa. Chayrayku, Jesusta mana manchachikuspa willasqanta rikuspa, Jeremías kawsarimusqanta nirqanku (Mat. 16:13, 14). ¿Imataq manchali kayninta atipananpaq, mana iskaychakuspa parlananpaq ima, yanaparqa? Payllataq sutʼinchan: “[Diospa willayninqa] sonqoypi nina jina ruphaykuwan, tullusniykamataj chayan. Sonqoyta ñitʼiykukuyta munashaspapis, manapuni atinichu” (Jer. 20:9). Arí, willamunanpaqqa, may atiyniyuq Diospa Palabran tanqarqa.

9. ¿Imaynatá Diospa Palabran, Jeremiaspa sunqunmanjina sunqunchikman yaykunman?

⁹ Pabloqa, hebreosman jinata qillqarqa: “Diospa Palabranqa kawsayniyoj, atiyniyojtaj; puraj filoyoj espadamanta aswan filo. Chay Palabraqa runaj sonqon ukhukamapuni chayan. Jinallataj yuyasqanta, sonqompi imatachus munasqantapis sutʼita rikuchin allinchus, manachus kasqanta”, nispa (Heb. 4:12). Diospa Palabranqa, Jeremiastajinallataq willamunapaq tanqawanchik. Imaraykuchus Bibliaqa, mana runap yuyayninmantachu urqhusqa kachkan. Runas qillqaptinkupis, paykunataqa Dios yuyaycharqa. Kay 2 Pedro 1:20, 21, ninjinapuni: “Profetaspa sutʼinchasqankoqa mana paykunaj yuyayninkuman jinallachu karqa, imaraykuchus profetaspa sutʼinchasqankoqa mana jaykʼajpis runaj munayninmantachu jamorqa. Manachayqa, Espíritu Santomin Diosmanta chay imasta parlarqa  runasnejta”. Chayrayku, Bibliata sumaqta ukhunchaptinchikqa, yuyayninchikta Diospa willayninwan juntʼachichkanchik (1 Corintios 2:10, ñawiriy). Chay willaytaq “sonqo[nchik]pi nina jina”, chayraykutaq mana chʼinyakusunmanchu.

10, 11. a) Mana manchachikuspa willamunapaq, ¿imaynatataq Bibliata ukhunchananchik tiyan? b) Bibliata sapallaykipi aswan sumaqta ukhunchanaykipaq imatachus ruwanaykita sutʼinchay.

¹⁰ Bibliata sapallanchik ukhunchasqanchik yanapanawanchikpaqqa, yachachiynin sunqunchikta tikrachinan tiyan. Ezequielpi tʼukurina. Jehovaqa, musquypijina juk kʼuyuna librota mikhuykunanta nirqa, chaypitaq mana kasukuq Israelta juchachanapaq willay tarikurqa. Kay profetaqa, ñawpaqta payraq chay willayta japʼikunan karqa. Ajinamanta, chay willayqa paypaq miskʼijina kananpaq (Ezequiel 2:8–3:4, 7-9, ñawiriy).

¹¹ Kunanpis, Ezequielpa tiemponpijinallataq kachkanchik. Diosmanta willayqa, mana atikullanchu, imaptinchus wakinkunaqa, ni uyarillaytapis munankuchu. Chay llamkʼayta juntʼanallapaqpuniqa, Bibliata sunqunchikman chayananpaqjina, sapa kuti ukhunchananchik tiyan. Salmistajina yuyana, pay nirqa: “Pakakunay chhanka, kacharichiwaj Tata Dios, ñawpaqeykipi parlasqasniy yuyasqasniypis allin kachun”, nispa (Sal. 19:14). Bibliap yachachiynin sunqunchikpi qhipakunanpaqqa, chaypi tʼukurinapaq tiempochakunanchikpuni tiyan. Chayrayku, Bibliata sapallanchikpi aswan sumaqta ukhunchanapaq, kallpachakunanchik tiyan. *

12. ¿Imaraykutaq espíritu santota japʼikunapaq tantakuykunaman rinanchik tiyan?

¹² Espíritu santota japʼinapaqqa, kay yuyaychaymanjina ruwana: “Purajmanta kallpachanakuspa yanaparinakunachej, munanakuypi kawsananchejpaj, allin ruwaykunata ruwananchejpajtaj. Chaypajqa Diosta yupaychana tantakuytaqa ama saqeychejchu” (Heb. 10:24, 25). Espíritu santoqa, qutuchakuyniqta yanapallawanchiktaq, chayrayku tantakuykunaman rinanchikpuni tiyan, chaypi yachakusqanchikmanjinataq kawsananchik tiyan (Apocalipsis 3:6, ñawiriy).

Mana manchachikuq runas kayqa, mayta yanapawanchik

13. Ñawpa siglomanta cristianos, ¿ima yanapawantaq allin willaykunata willamurqanku?

¹³ Espíritu santoqa, may atiyniyuq, Jehovap munayninta juntʼanapaqtaq kallpachawanchik. Ajinata ñawpa cristianosta kallpacharqa, chayraykutaq, allin willaykunata “tukuy kay pachapi kajkunaman willa[yta]” atirqanku (Col. 1:23). Chantapis paykunaqa, “mana yachakuyniyoj runaslla” karqanku, chayrayku  chay willaytaqa, espíritu santop yanapaynillanwan juntʼarqanku (Hech. 4:13).

14. Mana manchachikuspa willamunapaq, ¿imataq yanapawasunman?

¹⁴ Mana manchachikuspa willamunapaqqa, Diospa espiritunwan pusachikuna. Chantapis, Diosmanta espíritu santota mañakuy, Bibliata sapallanchikpi ukhunchay, yachakusqanchikpi tʼukuriy, tantakuykunaman riy ima, ‘espiritupi kʼajarinapaq’ yanapawasun (Rom. 12:11, NM). Apolospi tʼukurina, payqa “Efesoman chayamurka, Alejandriamanta[taq] caj, cosata parlaj runa” karqa. ¿Imarayku sumaqta yachachiq? Biblia nin: “Espiritupi tucuy sonko, Señorpa imasninmanta allin allinta parlasharka, yachachisharkataj” (Hech. 18:24, 25, Mosoj Testamentoj). Ñuqanchikpis, ‘espiritupi lawrariptinchikqa’, mana manchachikuspa wasimanta wasi, tukuyniqpi willasunchik (Rom. 12:11, Mosoj Testamentoj).

15. Mana manchachikuspa willamuy, ¿imaynatá yanapawanchik?

¹⁵ Mana manchachikuspa willamuyqa, sumaqta yanapawasun. Ñawpaqtaqa, willayninchik may sumaq kasqanta yachasqanchikrayku, chay llamkʼayta tukuy sunqu juntʼasun. Sumaqta yachachisqanchikraykutaq, kusiyninchik yapakunqa. Chantá, usqhayta willamunanchikta sutʼita yachasqanchikrayku, sunqu kʼajayninchik yapakullanqataq.

16. Manaña ñawpaqtajina willamuyta munanchik chay, ¿imatá ruwasunman?

¹⁶ Manaña ñawpaqtajina willamuyta munanchik chay, ¿imatá ruwasunman? Ñawpaqtaqa, allinta qhawarikuna, Pablo ninjina: “Qankuna kikiykichej qhawarikuychej, yachanaykichejpaj creeypi sinchʼitachus sayashankichej, chayri manachus, chayta. Allinta qhawarikuychej” (2 Cor. 13:5). Tapurikunataq: “¿Espiritupi lawrarichkallanipunichu? ¿Jehovap espiritunta mañakunichu? Diosmanta mañakuchkaspa, ¿rikuchinichu yanapanawanpi atienekusqayta? Willamunayta kamachiwasqanmanta, ¿agradecekunichu? ¿Sumaqtachu Bibliata ukhunchani? Bibliata ñawirisqaypi, tantakuykunapi uyarisqaypi ima, ¿machkha unaytataq tʼukurini? ¿Tantakuypi tapuykunaman kutichinaypaq wakichikunichu?”, nispa. Kay tapuykunata ruwakuspaqa, imaspichus astawan llamkʼananchik kasqanta reparasun.

Diospa espiritunwan yanapachikuna

17, 18. a) ¿Imaynatá Reinomanta kay tiempopi willakuchkan? b) ¿Imaynatá “mana manchachikuspa” willamusunman?

¹⁷ Jesusqa, discipulosninman kawsarimuytawan nirqa: “Espíritu Santo qankunaman jamojtin, atiywan juntʼachisqa kankichej. Rispataj, noqamanta testigos jina willankichej Jerusalenpi, tukuy Judea jallpʼapi, Samariapi, tukuy kay pachaj kʼuchusninkama”, nispa (Hech. 1:8). Chay llamkʼayqa, ni jaykʼaqjina kunan juntʼakuchkan. Imaraykuchus qanchis junu kuraq Jehovamanta sutʼinchaqkuna, 230 kuraq suyuspi Reinomanta willachkanku. Sapa watataq, yaqha waranqa phichqa pachak junu kuraq horasta willamunku. Kay llamkʼaypi yanapaysikuyqa, ¡may sumaqpuni! Imaptinchus ni jaykʼaq ruwakunqañachu.

¹⁸ Ñawpa tiempopijina, espíritu santop yanapayninwan, allin willaykunata willamuchkanchik. Chay yanapawan yanapachikuspaqa, “mana manchachikuspa” willamusun (Hech. 28:31). Chayrayku, Reinomanta allin willaykunata willamunallapaqpuniqa, espíritu santowan pusachikuna.

[Sutʼinchaykunasnin]

¿Imatá yachakunchik?

• Diospa Palabranmanta willamunapaq, ¿imaraykutaq mana manchachikuq runas kananchik tiyan?

• Ñawpa cristianos mana manchikuspa willanankupaq, ¿imá yanaparqa?

• ¿Imaynamantá mana manchachikuq runas kasunman?

• ¿Imaynatataq cristianosta, mana manchachikuqkuna kay yanapawanchik?

[Tapuykuna]

[7 paginapi dibujo/foto]

¿Imaynatá wawasninchikta manchali kayninkuta atipanankupaq yanapasunman?

[8 paginapi dibujos/fotos]

Diosmanta mañakuyqa, willamunapaq kallpachawasun