¡Kay sumaq ñanman allin jamusqa kaychik!

“Kausaspapis, wañuspapis Señorpata kanchej.” (ROM. 14:8.)

1. ¿Imatataq Jesús, sumaq ñanmanta yachachirqa?

KAY kawsaypiqa achkha ñankuna tiyan, chaywanpis juklla sumaq ñanqa, Jehovaqa chay ñanta akllananchikta munan. Arí, Biblia kamachisqanta kasukuy, Diospa Churin Jesucristomantataq yachakuyjinaqa, mana imapis kanchu. Jesusqa, discipulosninman tukuy sunquwan, chiqa kaqmanjinataq Tata Diosta yupaychanankuta yachachirqa, chantapis discipulosta ruwanankuta kamachirqa (Mat. 28:19, 20; Juan 4:24). Chay kamachisqanta kasukuptinchikqa, Jehová kusikunqa, bendeciwasuntaq.

2. a) Ñawpa siglopi runas, Diospa Reinonmanta uyarispa, ¿imatá ruwarqanku? b) ¿Imaraykutaq ñawpa cristianosta ‘Ñanmanta’ kasqankuta niq kanku?

² Llampʼu sunquyuq runas, Bibliamanta yachakuptinku, bautizakuptinku imaqa, jinata niyta atinchik: “¡Kay sumaq ñanman allin jamusqa kaychik!”, nispa. Ñawpa siglopiqa, tukuy laya suyusmanta waranqas, chiqa yachachiyta yachakurqanku, Diosta yupaychayta munasqankuraykutaq bautizakurqanku (Hech. 2:41). Discipulosta, chay ‘Ñanmanta’ kasqankuta niq kanku (Hech. 9:2; 19:23). Kay rimayqa paykunapaqjinapuni karqa, imaraykuchus Jesuspi iñirqanku, payjinataq kawsarqanku (1 Ped. 2:21).

3. a) ¿Imarayku bautizakunchik? b) Kay pasaq chunka wataspi, ¿machkha runas bautizakurqanku?

³ Kay tukukuy pʼunchaykunapiqa, 230 suyusmanta kuraqpiña, runaman yachachikuchkan. Chantá kay pasaq chunka watasllapi, 2.700.000 runas, —sapa semana 5.000— Jehovaman qukuspa bautizakurqanku. Chaytaqa Jehovata munakusqankurayku, yupaychayta munasqankurayku, Bibliamanta yachakusqankuta sunqunkupi japʼikusqankurayku ima, ruwanku. Arí, juk kutillata bautizakunchik chay kutimantapachataq Jehovaman qayllaykunchik. Chantapis bautizakuspaqa, Jehová ñawpa tiempo kamachisnintajina ñanninpi purinallanchikpaqpuni yanapanawanchikpi atienekusqanchikta rikuchinchik (Isa. 30:21).

 ¿Imaraykutaq bautizakuna tiyan?

4, 5. Bautizakuqkuna ima tʼinkastachus japʼisqankuta sutʼinchay.

⁴ Ichapis qamqa, Diosmanta yachakunkiña, kawsayniykitapis tikrachinkiña, niraq bautizasqa kaspapis Diosmanta willachkankiña, ajinata ruwachkankiña chayqa, may allin. Chaywanpis, ¿Jehovaman qukuypi, bautizakuypi ima, tʼukurinkiñachu? Bibliata ukhunchasqaykimanjinaqa, Jehovata jatunchay imamantapis aswan allin kasqanta yachanki, manataq munasqallaykita ruwaychu, nitaq qhapaq kayta maskʼaychu (Salmo 148:11-13; Lucas 12:15, ñawiriy). Chantapis, bautizakuspaqa, achkha tʼinkasta japʼinki. ¿Ima tʼinkastá?

⁵ Bautizakuptiykiqa, kawsayniyki mana qhasillapaqchu kanqa, imaraykuchus Diospa munayninta ruwanki, chaytaq kusichisunqa (Rom. 12:1, 2). Espíritu santoqa, iñiyta, sunqu tiyaykuyta, wak kʼacha kaykunata ima, wiñachinaykipaq yanapasunqa (Gál. 5:22, 23). Chantapis Diosqa, mañakuykunasniykita uyarisunqa, Bibliap nisqanmanjina kawsanaykipaq kallpachakusqaykitataq tʼinkanqa. Ajinamanta may kusiywan willamunki, wiñay kawsaytataq rikuchkawaqpisjina qhawanki. Astawanpis, Diosman qukuspa, bautizakuspa imaqa, Jehovamanta sutʼinchaqpuni kayta munasqaykita rikuchinki (Isa. 43:10-12).

6. ¿Imatataq bautizakuspa rikuchinchik?

⁶ Yakuman pʼultichikuspaqa, Jehovaman qukusqanchiktaña, paypata kasqanchiktataq rikuchinchik. Pabloqa ajinata nirqa: “Noqanchejmanta mana pipis pay kikimpajchu kausan, nitaj pipis pay kikimpajchu wañun. Chayrayku kausaspaqa, Señorpaj kausanchej. Wañuspapis, Señorpaj wañunchej. Ajina ari, kausaspapis, wañuspapis Señorpata kanchej”, nispa (Rom. 14:7, 8). Chantapis Diosqa, akllakunanchikta saqispa, allinpaq qhawawasqanchikta rikuchiwanchik. Ñanninta puriyta akllaptinchiktaq, payta munakusqanchikta rikuchinchik, kusichinchiktaq (Pro. 27:11). Bautizakusqanchikwanqa, mana Jehovaman qukusqallanchiktachu rikuchinchik, manaqa Kamachiqninchiktajina akllasqanchikta rikuchinchik, chantapis paylla aswan sumaq kamachiq kasqanta nichkanchik (Hech. 5:29, 32). Jehovataq, ñuqanchikwan kachkan (Salmo 118:6, ñawiriy). Chaywanpis, kunan tiempopi, aswan qhipamanpis achkha bendicionestaraq japʼisun.

Diospa llaqtanmanta kayqa may sumaq tʼinka

7-9. a) Jesús paywan puriqkunaman, ¿imata japʼinankutataq nirqa? b) Jesuspa Marcos 10:29, 30 nisqan, ¿imaynamantá kunan tiempopi juntʼakuchkan?

⁷ Pedroqa, Yachachiqninta tapurqa: “Noqaykoqa tukuy kapuyniykuta saqerparispa, qanwan purishayku. Imataj noqaykupaj kanqari?”, nispa (Mat. 19:27). Payqa, paypaq, discípulo masisninpaqpis imachus aswan  qhipaman kananta yachayta munarqa. Imaraykuchus paykunaqa, Reinomanta astawan willanankurayku, tukuy imankuta saqisqanku (Mat. 4:18-22). ¿Imatataq Jesús kutichirqa?

⁸ Marcos Evangeliopi nisqanmanjina Jesusqa, juk jatun familiamanta kanankuta nirqa ajinata: “Pichus noqarayku, evangelioraykutaj saqerparin wasinta, wawqesninta, tatanta, mamanta, wawasninta, jallpʼasninta ima, chay runaqa pachaj jinastawanraj kay pachapi japʼinan tiyan wasista, wawqesta, panasta, mamasta, wawasta, jallpʼasta ima; jinapis mayta ñakʼarispa, qhatiykachasqallataj kanqa. Jamoj pʼunchaypitaj wiñay kawsaytapis japʼillanqataj”, nispa (Mar. 10:29, 30). Arí, Cristo nisqanmanjina, ñawpa discipulosqa, —Lidia, Áquila, Priscila, Gayo ima— hermanosninkuta wasinkuman waqyariq kanku, ajinamanta paykunapaq chiqamantapuni ‘wawqisninku, panasninku, mamasninku’ ima karqanku (Hech. 16:14, 15; 18:2-4; 3 Juan 1, 5-8).

⁹ Jesuspa nisqanqa, kay tiemponchikpi astawanraq juntʼakuchkan. Arí, achkha cristianosqa, —misioneros, betelitas, siervos internacionales ima— Reinopaq astawan llamkʼanankurayku “jallpʼasninkuta”, chayri llamkʼayninkuta saqispa wak suyusman rinku. Wakkunataq wasisninkuta saqispa, maychus kasqallanwan kawsakunku. Chay cristianosqa, Jehovap yanapaynin achkha kasqanta ninku, may kusisqastaq payta yupaychanku (Hech. 20:35). Arí, tukuy bautizasqa cristianos, pachantinmanta hermanosninkuwan khuska “ñawpajtaqa Diospa reinonta, cheqan kaynintawan” maskʼayta atinku (Mat. 6:33).

“Diospa waqaychaynimpi” kayqa juk tʼinka

10, 11. ¿Imataq ‘Diospa waqaychaynin’, chantá imaynatataq chayman yaykusunman?

¹⁰ Diosman qukuspa, bautizakuspa ima, wak tʼinkata japʼisunmantaq, chaytaq “Diospa waqaychaynimpi” kayta atisqanchik (Salmo 91:1, ñawiriy). Chay waqaychaypiqa, iñiyninchik mana pisiyananpaq jarkʼawanchik. Kay pacha runastaq, Diosmanta mana allinta yachasqankurayku, nitaq paypi iñisqankurayku ima, chay waqaychayta mana tarinkumanchu.  Jehová Diosman qukusqanchikmanjina kawsaptinchik, paypi atienekuptinchik ima, ajinata payman nichkanchik: “Qan kanki pakakunay, jarkʼachasqa wasiy, Diosniytaj; qampi atienekusaj”, nispa (Sal. 91:2). Ajinamantataq, Jehovaqa Jarkʼawaqninchikman tukun (Sal. 91:9, 10). ¿May sumaqcharí chayqa?

¹¹ Jehovap amigosnin kasqanchikraykulla ‘waqaychayninman’ yaykuyta atinchik. ¿Imaynamantá Diospa amigosnin kayta qallarinchik? Payman qukuspa, bautizakuspa ima. Bibliata ukhunchaspa, paymanta mañakuspa, kamachiykunasninta juntʼanapaq kallpachakuspa imataq, payman astawan qayllaykunchik (Sant. 4:8). Jesusjinaqa, ni pi Jehovap qayllanpi kachkanchu, chayrayku payjina kanachik tiyan. Payqa, Tatanpi tukuy sunqu atienekun (Juan 8:29). Chayrayku Diosman qukusqanchikmanjina kawsanapaq, pay yanapanawanchikmanta, ni jaykʼaq iskaychakunanchikchu tiyan (Ecl. 5:4). Ajinata jarkʼawasqanchikqa, munakuwasqanchikta, payman chiqa sunqu kananchikta munasqanta ima, rikuchiwanchik.

Diospa llaqtanpi kasqanchikqa juk tʼinka

12, 13. a) ¿Imaynatá Diospa llaqtanpi kawsakunchik? b) ¿Imaynatá musuqkunata yanapasunman?

¹² Diosman qukuptinchik, bautizakuptinchik imaqa Diospa llaqtanpi sunqu tiyasqa, kusisqa ima kawsakuyta atinchik. Chantapis Jehovawan, hermanosninchikwan ima, allinpi kawsakuyta atinchik (Sal. 29:11; Isa. 54:13). Chayrayku kay pachamanta may sumaq imasninwanpis, manapuni kikinchakunmanchu. Chaytaq achkha suyusmanta, jatun tantakuykunapi sutʼita rikukun, maypichus wak suyusmanta tukuy laya hermanos imaymana parlayniyuq, sunqu tiyasqa, munakuypitaq khuska tantakunku.

¹³ Kay pachamanta runastaqrí, ¡may llakiypi kawsakuchkanku! (Isaías 65:13, 14, ñawiriy.) Ñuqanchiktaq chay runasta, willayniqta Diospa llaqtanman waqyariyta atinchik. Chantapis Diospa llaqtanpi pisi tiempollataraq kaqkunata, sumaqta willayta yachanankupaq yanapayta atisqanchikqa may sumaq llamkʼay. Astawanpis, ancianos chayta ruwananchikta mañawaptinchikqa, chay hermanosta yanapayta atinchik, imaynatachus Áquila, Priscila ima, Apolosta “yachacherqanku aswan sutʼita Diospa ñanninmanta” entiendenanpaq, ajinata (Hech. 18:24-26).

Jesusmanta yachakunallapuni

14, 15. ¿Imaptintaq Jesusmanta yachakunallanchikpuni tiyan?

¹⁴ Bautizakuspañaqa, Jesusmanta yachakunallanchikpuni tiyan. ¿Imarayku? Imaraykuchus payqa, niraq kay Jallpʼaman jamuchkaspa, waranqa waranqa watastaña Tatanwan khuska janaqpachapi llamkʼarqa (Pro. 8:22, 30). Chayrayku Jehovata yupaychay, chiqa kaqta yachachiy ima, aswan sumaq ñan kasqanta yacharqa (Juan 18:37). Chantapis chay ñan achkha ñakʼariykunaman, wañuyman ima, apananta yacharqa (Mat. 20:18, 19; Heb. 4:15). Chaywanpis, Tatanpa munayninta mana ruwayqa, wampu yuyay kananta yacharqa. Chay ruwasqanqa, Jehovata mana wasanchanapaq yanapawanchik.

¹⁵ Satanasqa, Jesús bautizakuptinkama, chay sumaq ñanmanta karunchachinanpaq juchaman tanqarqa, chaywanpis Jesusqa mana urmarqachu (Mat. 4:1-11). Chaytaq Kuraq Supay imaymanamanta urmachiyta munawaptinchikpis, Jehovaman juntʼa sunqullapuni kayta atisqanchikta yachachiwanchik. Chantapis payqa, bautizakunankupaqña kaqkunata chayri kunallanraq bautizakuqkunata astawan urmachiyta munan (1 Ped. 5:8). ¿Imaynasmantataq chayta ruwan? Diospaq llamkʼayninchikmanta pisillata yachaspa, allinninchikta maskʼaq familiaresninchikniqta. Chay kutisqa Diosmanta allinta willanapaq, tapuykunasninkuman kutichinapaq, allillamanta parlanapaq, wak kʼacha kaykunata rikuchinapaq ima, may allin (1 Ped. 3:15). Ajinamanta, willayninchikta uyariqkunata yanapayta atisunchik (1 Tim. 4:16).

 Sumaq ñanpi purinallapuni

16, 17. a) Deuteronomio 30:19, 20 nisqanmanjina kawsayta japʼinapaq, ¿ima kimsa ruwaykunatá ruwananchik tiyan? b) Jesús, Juan, Pablo ima, ¿imaynatá chay ruwaykunata sutʼinchallarqankutaq?

¹⁶ Diospa Churin Jallpʼaman jamunanmanta waranqa phichqa pachak watas ñawpaqta, Moisesqa, Israel llaqtata chay sumaq ñanta akllakunankuta nirqa ajinata: “Kunanqa noqa janaj pachaj ñawpaqempi, kay pachaj ñawpaqempipis [...]: Ñawpaqeykichejman churani kawsayta, wañuytawan chantá bendicionta, maldiciontawan, chaykunamanta ajllakunaykichejpaj. Kawsayta ajllakuychej ari, jinamanta qankuna, wawasniykichej ima kawsanaykichejpaj. Señorniykichej Tata Diosta munakuychej, kasuychejtaj; payllata qhatiychej”, nispa (Deu. 30:19, 20).Israel llaqtaqa, tiempomanta Diosta wasancharqa, chaywanpis Moisés, kawsayta japʼinapaq chay kimsa ruwaykunata nisqanqa, mana tikrakunchu. Imaraykuchus Jesuswan discipulosninwanqa, chay ruwaykunamanta parlallarqankutaq.

¹⁷ Ñawpaqtaqa, ‘Jehovata munakuna’ tiyan, chaypaqtaq chiqan kamachiykunasninta kasukuna (Mat. 22:37). Chantapis, nisqanta ‘kasukuna’ tiyan. Chaytataq Bibliata ukhunchaspa, kamachiykunasninta kasukuspa ima, juntʼanchik (1 Juan 5:3). Chayrayku tukuynin tantakuykunamanpuni rinanchik tiyan, imaraykuchus chaypiqa, Diospa Palabranmanta sutʼinchakun (Heb. 10:23-25). Chaymantapis, ‘payllata qhatinanchik’ tiyan, chayri paymanta japʼikunanchik tiyan. Ima kaptinpis, paypi iñisqanchikta rikuchina, Churinjinataq ruwana (2 Cor. 4:16-18).

18. a) ¿Imatataq kay revista 1914 watapi, chiqa kaqmanta nirqa? b) Chay kʼanchaypi purisqanchikta, ¿jatunpaqchu qhawanchik?

¹⁸ Chiqa yachachiymanjina kawsayqa, ¡may sumaq! Kay revistaqa, 1914 watapi, inglés qallupi jinata nirqa: “¿Manachu achkha bendionesniyuq, may kusisqa llaqta kanchik? Diosninchik, ¿manacharí jaykʼaypis saqirpariwarqanchikchu? Chayrayku, pillapis aswan sumaq ñanta riqsiqqa, chayninta richun. Qamkunamanta mayqillanpis aswan sumaq ñanta tarin chayqa, willariwayku ari. Ñuqanchikpaqqa, Diospa Palabranmanta yachakusqanchik, ni imawanpis kikinchakunchu. [...] Chiqa Diosta riqsispa imayna kusisqapunichus kasqanchiktaqa, ni imaynamanta niyta atinchikchu. Diospa yachayninmanta, chiqan kayninmanta, atiyninmanta, munakuyninmanta ima yachasqanchikqa, yuyayninchikman, sunqunchikman ima juntʼan. Manaña maskʼananchikchu tiyan. Chayrayku, Diosninchikmanta sapa kuti astawan yachakuyta munallanchikpuni”, nispa (The Watch Tower, 15 diciembre 1914; 377, 378 paginaspi). Chiqa yachachiymanta agradecekusqanchikqa, manapuni pisiyanchu. Astawanpis ‘Diospa kʼanchayninpi purisqanchikmanta’ mayta kusikunchik (Isa. 2:5; Sal. 43:3; Pro. 4:18).

19. Biblia nisqanta juntʼaqkuna, ¿imaraykutaq usqhayllata bautizakunanku tiyan?

¹⁹ Ichapis niraq qukunkichu, nitaq bautizakunkiraqchu, chaywanpis Jehová ‘Diospa kʼanchayninpi’ kayta munanki. Ama tʼukullaypunichu bautizakunapaq imatachus Biblia juntʼanaykita nin chayta ruwanaykipaq kallpachakuy, jinamanta Jehová Jesús ima, qamrayku ruwasqanmanta agradecesqa kasqaykita rikuchinki. Kawsayniykita Diosman jayway. Chantapis, munayninta ruwayta munasqaykita, Churinpa qhipanta puriyta munasqaykita ima rikuchiy (2 Cor. 5:14, 15). Kay sumaq ñantajinaqa, ni maypi tarinkichu.

¿Imatá kutichiwaq?

• ¿Imatataq bautizakuspa rikuchinchik?

• Diosman qukuspa bautizakuqkuna, ¿ima tʼinkastataq japʼinku?

• ¿Imaraykutaq Jesusmanta yachakuy may allin?

• ¿Imataq chay sumaq ñanta mana saqinanchikpaq yanapawasun?

[Tapuykuna]

[25 paginapi dibujo/foto]

Bautizakuspaqa, sumaq ñanta akllasqanchikta rikuchinchik

[26 paginapi dibujos/fotos]

‘Diospa waqaychayninman’, ¿yaykunkiñachu?