¿Tatanchiktajinachu Jehová Diosta qhawanchik?

JUK kutiqa, Sumaq Yachachiq Jesucristop discipulon, paymanta jinata mañakurqa: “Señor, yachachiwayku Dios Tatamanta mañakuyta”, nispa. Paytaq kutichirqa: “Diosmanta mañakuspaqa, niychej: Janaj pachapi kashaj Tatayku, sutiyki jatunchasqa kachun”, nispa (Luc. 11:1, 2). Jesusqa, Jehovaman, “Tukuy Atiyniyoj”, ‘May Sumaq Yachachiq’, ‘Ruwaqniy’ chayri ‘Wiñaypaq Rey’ niyta atirqa (Gén. 49:25; Isa. 30:20; 45:18; 1 Tim. 1:17). Chaywanpis, ‘Tatáy’ nispa nirqa, tukuy kaq chhikata Ruwaqman, imaynatachus llampʼu sunqu wawa munasqa tatanman qayllaykun, ajinata qayllaykunanchikta munasqanrayku.

Chaywanpis wakin runasqa, Diosta Tatankutajina mana qhawayta atillankuchu. Juk cristiana Atsuko * sutiyuq, ajina kasqanta nirqa: “Bautizasqaña kaspapis, watasta, Jehovaman juk Tatamanjina mana qayllayta atillarqanichu”, nispa. Chantataq, imaraykuchus jinata yuyasqanta sutʼinchan: “Tatayqa, ni jaykʼaqpis munakuyninta rikuchiwarqachu”, nispa.

Kay tukukuy saqra pʼunchaykunapiqa, may chhika runas “mana sonqoyojkuna” kanku, wawasninkumantaq mana munakuyninkuta rikuchinkuchu (2 Tim. 3:1-4). May chhika runas, Atsukojina yuyasqankuqa, mana tʼukunapaqchu. Chaywanpis, Jehovata may munakuq Tatatajina qhawayta atisqanchikta yachayqa, mayta kallpachawanchik.

Jehovaqa, tukuy imata quwanchik

Jehová Diosta, Tatanchiktajina qhawanapaqqa, ñawpaqta payta sumaqta riqsinanchik tiyan. ¿Imaynamantá? Jesús nin: “Mana pipis Churinta rejserqachu; Dios Tatalla rejserqa. Dios Tatatapis nillataj pipis rejserqachu; Churillan paytaqa rejserqa, pikunamantajchus Chureqa rejsichiyta munan, chaykunapis”, nispa (Mat. 11:27). Arí, Dios Tatanchikta sumaqta riqsinapaqqa, imatachus Cristo paymanta sutʼinchasqanpi tʼukurinanchik tiyan. Chantá, ¿imastá yachachiwarqanchik?

Jesús, Diosmanta nirqa: “Paynejtataj kawsani”, nispa. Chayta nispaqa, Dios, payman kawsayta qusqanta nichkarqa (Juan 6:57). Ñuqanchikmanpis, Jehovallataq munakuyninrayku kawsayta quwanchik (Sal. 36:9; Hech. 17:28). Chayrayku, ¿manachu ñuqanchikpis, Payta munakunallanchiktaq kanman?

Jehovaqa, munasqa Churinta ñuqanchikrayku wañunanpaq kachamuspa, jatun munakuyninta rikuchiwanchik. Chayta ruwasqanraykutaq, juchasapas kaspapis payman qayllaykuyta atinchik (Rom. 5:12; 1 Juan 4:9, 10). Chantapis, Payta munakunchik, kasukunchiktaq chayqa, aswan qhipaman “kacharichisqa wawasninwan khuska jatun kusiypi” kananchikmanta, mana iskaychakunchikchu, imaraykuchus Tatanchik Jehovaqa, nisqasninta juntʼanpuni (Rom. 8:21).

Jehová Diospa jatun munakuynintaqa, ‘intita tukuypaq lluqsichimusqanpi’ rikullanchiktaq (Mat. 5:45). Ñuqanchikqa, mana inti lluqsimunanpaq mañakunchikchu. Chaywanpis, chay kʼanchaywan kawsanchik. Dios Tatanchikqa, mana michʼakuspa tukuy imata quwanchik. Payqa, imatachus necesitasqanchikta, niraq mañakuchkaptinchik yachan. Chayrayku, ¿manachu tukuy ima ruwasqanta allinta qhawarispa, munakuywan qhawawasqanchikpi tʼukurina kanman? (Mat. 6:8, 26.)

 Dios Tatanchikqa khuyakuywan jarkʼawanchik

Diosqa, profeta Isaiasniqta, llaqtanman ajinata nirqa: “Khuyakoj Tata Dios nisunki: Tukuy orqosqa kuyurenqanku, lomaspis kharkatitenqanku; khuyakuyniyrí qanmantaqa manapuni tʼaqakonqachu” (Isa. 54:10). Jesusqa, wañuchinanku pʼunchaymanta ñawpaq chʼisin Diosmanta mañakusqanpi, imayna khuyakuywanchus Tatan runasta qhawasqanta rikuchirqa. Discipulosninpaq jinata mañakurqa: “Caycunaka mundopi cashancu, ñokarí kanman jamushani. Santo Tatáy, kowaskayquicunata sutiyquiraycu wakaychay”, nispa (Juan 17:11, 14, Mosoj Testamentoj). Jehovataq, cristianosta jarkʼaspa chay mañakuyman kutichirqa.

Jehová Diosqa, Satanaspa tuqllasninpi mana urmananchikpaq, ‘allin kamachi yuyayniyuqniqta’, sumaq yachachiykunata maychus tiemponpi quwanchik (Mat. 24:45). Chay yachachiykunata ukhunchallasunchikpuni chaytaq, “Diospa qosqan maqanakuna pʼachawan pʼachallikuy[ta]” atillasunchik. Kay pʼachamanta jukninqa, iñiyninchik, chaytaq “uj jarkʼakuna escudo jina, Kuraj Supaypa tukuynin larwashaj flechasninta thasn[uchiyta]” atinapaq (Efe. 6:11, 16). Iñiyninchikqa, Diosmanta mana karunchakunapaq chiqamantapuni jarkʼawanchik, chaytaq Dios Tatanchik, kamachisninta jarkʼananpaq atiyniyuq kasqanta rikuchiwanchik.

Cristo kay Jallpʼapi imaynachus kasqanpi sumaqta tʼukurisunchik chayqa, imayna munakuyniyuqchus Dios Tatanchik kasqanta, astawan entiendeyta atisunchik. Marcos 10:13-16 nisqanmanjinaqa, Jesús discipulosninman nirqa: “Saqeychej wawasta noqaman jamojta”, nispa. Chay wawas payman riptinkutaq, sapa jukta marqʼariykukurqa, bendicerqataq. Chay wawitasqa, ¡maytachá kusirikurqanku! Jehovaqa, kikillantataq runasta qhawan. ¿Imaynamantá chayta yachanchik? Imaraykuchus Jesús nirqa: “Noqata rikuwajqa Tataytapis rikun”, nispa (Juan 14:9).

Jehovap munakuyninqa, mana chʼakiq pukyuwan kikinchakunman. Imaraykuchus payqa, ni imamanta pisichiwanchikchu, ni pijinataq jarkʼawanchik, chantapis, payman qayllaykunanchikta munan (Sant. 4:8). Chayjina kʼacha Tatataqa, ¡ni maypi tarisunmanchu!

May chhika tʼinkas

Jehovap mana tukukuq munakuyninpi atienekuptinchikqa, achkha tʼinkasta japʼisun (Pro. 3:5, 6). Jesuspis, Diospi tukuy sunquwan atienekusqanrayku, achkha tʼinkasta japʼirqa. Chayrayku, discipulosninman jinata niyta atirqa: “Mana sapallaychu kashani; astawanqa kachamuwaj Tataywan khuska”, nispa (Juan 8:16). Payqa, Jehová yanapananpi mayta atienekurqa. Sutʼincharinapaq, bautizakuchkasqan pʼunchaypi, Tatanmanta kay sumaq rimaykunata uyarirqa: “Kaymin ancha munasqa Chureyqa. Paywan sonqo juntʼasqa kani” (Mat. 3:15-17). Wañupunan ratopis, Tatanman jinata qhaparikurqa: “Tatáy, makisniykiman espirituyta churani”, nispa (Luc. 23:46). Chayjina ñakʼariypipis, iñiyninqa mana pisiyarqachu.

Ñuqanchikpis, Jehovapi kikillantataq iñinanchik tiyan. Imaraykuchus Pay yanapawaptinchikqa, ni imamanta manchachikunanchikchu tiyan (Sal. 118:6). Atsuko, pimantachus qallariypiña parlarqanchik, ima chʼampaytapis payllamanta allinchayta maskʼaq. Chaywanpis, Jesuspa kawsayninmanta, imaynatachus Tatanman sumaq kʼaskasqa kasqantawan Bibliapi ukhuncharirqa. ¿Imaynatá chay yanaparqa? Pay nin: “Imaynachus munakuq Tatayuq kayta, paypi atienekuyta ima, yachakurqani. Chantapis, sunqu tiyaykuyta, may kusiyta ima, tarirqani. Diospi atienekuyqa, may sumaq”, nispa.

Jehovata Tatanchiktajina qhawaspa, ¿ima bendicionestawantaq rikunchik? Wawasqa, tatasninkuta munakunku, kusichiytataq maskʼanku. Jesuspis, Tatanta mayta munakusqanrayku, ajinata nirqa: “Paypa munaynillanta ruwani”, nispa (Juan 8:29). Ñuqanchikpis Diosta munakullanchiktaq, chayrayku allin yuyayniyuqkunajina Payta ‘jatunchayta’ munanchik (Mat. 11:25; Juan 5:19).

 ‘Paña makiykimanta japʼisqayki’

Diosninchikqa, juk ‘yanapaqta’ quwanchik, chaytaq Jesús nirqajina ‘chiqa kaqman pusawasunchik’ (Juan 14:15-17, Dios Parlapawanchej; 16:12, 13). Arí, espíritu santoqa, Dios Tatanchikta sumaqta riqsinapaq yanapawasun. Chantapis, sunquchikpi mana allin yuyaykunata, pantasqa yuyaykunata ima, ‘jarkʼachasqa wasistajina thuñinapaq’ yanapawasun, ajinamantataq ‘tukuy yuyayninchikta Cristota kasukuyta yachachisun’ (2 Cor. 10:4, 5). Chayrayku, Diosmanta mana iskaychakuspa ‘yanapaqta’ mañakuna, imaraykuchus Jesús niwanchik: “Janaj pachapi kaj Tataykichejqa Espíritu Santota qonqa mañakojkunaman”, nispa (Luc. 11:13). Chantapis, payman astawan qayllaykunapaq, espíritu santonwan yanapanawanchikta mañakuna.

Wawaqa, tatanpa makinmanta japʼikuspa purispa, jarkʼasqa kasqanta yachan, manataq imatapis manchachikunkuchu. Chayrayku, Jehovata Tatanchiktajina qhawasun chayqa, kay niwasqanchikta japʼikusun: “Noqaqa paña makiykimanta japʼisoj Señorniyki Tata Dios kani, niykitaj: Ama manchachikuychu; noqa yanapasqayki”, nispa (Isa. 41:13). Arí, Diosninchikwan wiñaypaq ‘puriyta’ atisunman (Isa. 48:17). Munayninta juntʼallasunpuni chayqa, Tatanchik Jehovap munakuyninwan kusisqas, ni imata manchachikuspataq kawsakusunchik.

[Sutʼinchaynin]