“Wawasqa Diospi iñinankupaq yachachisqa kananku tiyan”

AJINATA juk jatun tantakuyta suticharqanku, mayqintachus Academia de Derechos del Niño nisqa, wakichirqa. Chay tantakuyqa, 2008 diciembre 9 pʼunchaypi ruwakurqa. Chaymantaq Iglesia Suecap sutinpi, wak religionespa sutinpi ima, kachas jamurqanku, jinallataq runap allinninta maskʼasqankuta niqkunapis.

Juk religionta umachaqqa, jinata nirqa: “Bibliap yachachisqanqa, wawasta Diospi iñinankupaq, maytapuni yanapan”, nispa. ¿Imaynatá chay yachachiykuna wawasta yanapan?

Pay sutʼinchallantaq: “Bibliap pʼitisninqa, wawas tʼukurinankupaq may sumaqpuni”, nispa. Chantá nillantaq: “Adanwan Evamantawan, Cainwan Abelmantawan, Davidwan Goliatmantawan, Zaqueomanta, herencianta usuchiq waynamanta, kʼacha runa samaritanomanta ima, yachakunankuqa, kawsayninkupi allin kaqta ruwanankupaq yanapan. Chantapis, mana wasanchanankupaq, perdonanankupaq, allin kaqwan kutichinankupaq, mana chiqnikunankupaq, mana saqrayanankupaq, runa masinkuwan allinyakunankupaq, munakunankupaq ima, yanapallantaq”, nispa. Astawanpis nillantaq: “Bibliap yachachisqanqa, wawasta kawsayninkupi allin kaqta ruwanankupaq, sumaqta yanapan”, nispa.

Arí, wawas Bibliata ñawirinankuqa, may sumaqpuni. Chaywanpis, ñawirispa, “sumaqta tʼukurispa” ima, ¿Bibliap nisqanta sapallankumanta sumaqtachu entiendenkuman?

Bibliaqa, Etiopiamanta juk runa, Diosmanta Qillqasqasta sapallanmanta ñawirispa, “sumaqta tʼukurispa” ima, mana entiendesqanta nin. Chay runaqa, Isaiaspa qillqasqan profeciasta ñawirichkarqa, chaywanpis imatachus ninayasqanta, mana entienderqachu. Chayraykutaq, discípulo Felipe sutʼinchasqanmanta, mayta agradecekurqa. Kayqa, machu runaspis sumaqta endiendenankupaq, yanapata necesitasqankuta sutʼinchawanchik (Hech. 8:26-40). Arí, tukuyninchik —astawanraq wawasqa— pillapis Diospa Palabranmanta sutʼinchanawanchikta necesitanchik.

Biblia nin: “Wampu kayqa wawajpa sonqompi kashan”, nispa (Pro. 22:15). Chayrayku, wawas Diospi iñinankupaq, allinta kawsakuyta yachanankupaq ima, yanapata necesitanku. ¿Pikunataq yanapananku tiyan? Tatamama. Chaypaqtaq, Bibliap yachachisqanwan, qutuchakuypi yachachisqanwan ima, yanapachikuyta atinkuman. Wawasqa, ajina yachachisqa kananku tiyan. Tatasqa, wawasninkuta juchʼuysitumantapacha Bibliap nisqanmanjina yachachinanku tiyan. Ajinamanta wawasqa, ‘wiñay tukusqa runasjina kanqanku’, “imachus allin, imatajchus mana allin kasqanta[taq]” reparayta yachanqanku (Heb. 5:14).