Espiritumanjina kawsana, Diosman qukusqanchiktapis juntʼana

“Espirituman jina kawsaychej ama aychaj munayninta ruwanaykichejpaj.” (GÁL. 5:16.)

1. Pentecostés pʼunchaypi, Jesuspa discipulosnin, uyariqkuna ima, ¿ima iskay laya bautismostá japʼirqanku?

PENTECOSTÉS 33 watapi, Jesuspa discipulosninqa, espíritu santowan bautizasqas karqanku, tukuy laya qalluspi parlayta qallarispataq juk milagrota japʼisqankuta rikuchirqanku (1 Cor. 12:4-10). Chaymantataq, Pedroqa sumaqta umallirichirqa. ¿Imaynatá uyariqkuna sientekurqanku? “Sonqo nanayta maytapuni phutikorqanku”, chantá Pedrop nisqanta kasukuspa, juchasninkumanta pesachikurqanku, bautizakurqanku ima. Chaymanta Biblia jinata nin: “Pedroj willasqampi creejkuna bautizachikorqanku. Chay kikin pʼunchayllapitaj kinsa waranqa jina yapakorqanku creejkunaman”,  nispa (Hech. 2:22, 36-41). Jesuspa kamachisqanta kasukuspa, Tata Diospa sutinpi, Churip sutinpi, espíritu santop sutinpiwan, yakupi bautizakurqanku (Mat. 28:19, Qheshwa Biblia).

2, 3. a) ¿Espíritu santowan bautizakuy, espíritu santop sutinpi bautizakuywan kikinchu? Sutʼinchay. b) ¿Imaraykú chiqa cristiano kanapaq yakupi bautizakuna tiyan?

² ¿Espíritu santowan bautizakuy, espíritu santop sutinpi, bautizakuywan kikillantaqchu? Mana. Espíritu santowan bautizasqa kaqkunaqa, Diospaq wawasninjina watiqmanta paqarikunku, Diostaq espiritualmente tatanku (Juan 3:3). Chantapis Diospa Reinonpi reyes, sacerdotes ima, kanankupaq akllasqas, chayri waqyasqas kanku, Jesuspa espiritual cuerponpa imasninmantaq tukunku (1 Cor. 12:13; Gál. 3:27; Apo. 20:6). Pentecostés pʼunchaymantapacha Jehovaqa, Cristowan khuska Reinopi herenciata japʼinankupaq espíritu santowan bautizaspa akllachkan (Rom. 8:15-17). Chantá, Jehovamanta sutʼinchaqkuna jatun tantakuykunata ruwasqankupi espíritu santop sutinpi bautizakusqankumanta, ¿imatá nisunman?

³ Juk cristiano yakupi bautizakusqanwanqa, Jehovaman kawsayninta qusqanta rikuchin. Chaytataq janaqpachaman rinankupaq akllasqa kaqkuna, may achkha runas kay pachapi wiñay kawsayta suyakuqkuna ima, ruwanku. Arí, iskaynin qutus Diosta kusichinankupaqqa, “Tataj sutimpi, Churej sutimpi, Santo Espíritoj sutimpiwan”, bautizakunankupuni tiyan. Chantapis bautizakuq cristianosqa, ‘espiritumanjina kawsanallankupuni’ tiyan (Gálatas 5:16, ñawiriy). Tapurikuna: “¿Espiritumanjinachu kawsachkani, chantá qukusqaytapis juntʼachkanichu?”.

¿Imastá espiritumanjina ‘kawsanallapaqpuni ruwana’?

4. ¿Imaynatá ‘espiritumanjina kawsallasunmanpuni’?

⁴ ‘Espiritumanjina kawsanallapaqpuniqa’, kawsayninchikpi Diospa kallpanwan yanapachikuna tiyan. Nisunman, sapa pʼunchay chaymanjina ruwana. Gálatas 5 tʼaqapi, aychap munayninmanjina kawsay, espiritumanjina kawsaywan, mana kikinchu kasqanta allinta sutʼinchan (Gálatas 5:17, 18, ñawiriy).

5. Espiritumanjina kawsanapaq, ¿ima ruwaykunatá qhisachana tiyan?

⁵ Espiritumanjina kawsaqkunaqa, aychap munayninta qhisachanankupaq kallpachakunku. Chay aychap ruwaykunasninqa kaykuna kanku: “Khuchichakuy, chʼichi kawsay, millay puriy, lantita yupaychay, layqa kay, chejninakuy, maqanakuy, tumpanakuy, phiñanakuy, churanakuy, phiñanakuspa tʼaqanakuy, waj yachachiykunata kasuy, envidianakuy, machakuykuna, millay fiestaspi puriykuna” ima (Gál. 5:19-21). Wak parlaypi, cristianos ‘aychap munayninpa ruwanasninta wañuchisqankuta’ nisunman. ¿Imaynatá chayta ruwanku? “Espiritunejta” (Rom. 8:5, 13). Saqra munayninkuwan mana atipachikuspaqa, espiritup ruwaykunasninpi astawan yuyayta, chaymanjina kawsayta ima, atillanku.

6. ¿Imataq kawsayninchikpi espiritup puquynin, puqunanpaq yanapawanchik? Juk kikinchaywan sutʼinchay.

⁶ Kawsayninchikpi Diospaq kallpanwan yanapachikuspaqa, ‘espiritup puquyninta’ puquchisun, nisunman Dios allinpaq qhawasqan kʼacha kaykunata (Gál. 5:22, 23). Chaypaqtaq sapa jukninchik kallpachakuna tiyan. Tarpuq runawan kikincharina. Tarpunanpaqqa yaku, inti ima, kanan tiyan. Mana kaptintaq mana puquchinqachu. Espíritu santoqa intiwan kikinchakun, imaraykuchus kawsayninchikpi  espiritup puquyninta, puquchinapaq yanapawanchik. Chaywanpis tarpuq runaqa, mayta llamkʼaspalla achkhata puquchinqa (Pro. 10:4). Kawsayninchikpipis kikillantataq, espíritu santop puquyninta mayjinata, sumaqta ima puquchinapaqqa, sunqunchikman allinta tarpunanchik tiyan. Chayrayku tapurikuna: “¿Espiritup yanapayninta kasukuchkanichu kawsayniypi puquynin rikukunanpaq?”.

7. Espiritup puquyninta tarpunapaq, ¿imaraykú Bibliata ukhunchanapaq, tʼukurinapaq ima tiempochakuna tiyan?

⁷ Sumaq puquy kananpaqqa, yaku necesitakullantaq. Kikillantaq kawsayninchikpi espiritup puquyninta tarpuywanpis: Diospa llaqtanniqta Bibliap chiqa yachachiykunasninta japʼiytaqa, yakutajina necesitanchik (Isa. 55:1). Achkha kutitañachá sutʼinchanchik, Diospa Palabran espíritu santoniqta qillqakusqanta, allin kamachi yuyayniyuq entiendenanchikpaq yanapawasqanchikta ima (Mat. 24:45-47; 2 Tim. 3:16). Chayrayku, espíritu santo yanapanawanchikta munaspaqa, Diospa Palabranta ñawirinanchik tiyan, chaypitaq tʼukurina. Jinata ruwaspaqa, chiqa sunqu profetasjina ruwasun, paykunaqa chay tiempokama qillqakusqanta “mayta watorqanku yachanankupaj maykʼajtachus, imaynamantatajchus chay imas kananta”. Chantapis angelesjina ruwallasunmantaq, paykunapis Warmip mirayninmanta, akllasqa cristianos qutuchakuymanta ima, chiqa yachachiykunata mayta yachayta munarqanku (1 Pedro 1:10-12, ñawiriy).

¿Imaynatá espíritu santo yanapawanchik?

8. ¿Imaraykutaq Jehovamanta espíritu santonta mañakunanchikpuni tiyan?

⁸ Mana Bibliata ukhunchay, tʼukuriy imallachu kanan tiyan. Manaqa Diosmanta mana saykʼuspa yanapayninta, yuyaychayninta ima mañakuna, imaraykuchus “Diosqa tukuy imata ruwayta atin, mañakusqanchejmantapis yuyasqanchejmantapis aswan ashkhataraj” (Efe. 3:20; Luc. 11:13). Ichapis wakin jinata ninku: “¿Imaraykú cristianos Diosmanta mañakunallankupuni tiyan, manachu pay ‘yachanña imankuchus pisisqanta, manaraq paymanta mañakuchkaptinku’?”, nispa (Mat. 6:8). Ñawpaqtaqa, espíritu santonta mañakuspa Jehovapi atienekusqanchikta rikuchinchik. Juk runata imaraykuchus yanapayta munasqanchikpi tʼukurina. Chay runa ñuqanchikpi atienekusqanrayku, yanapananchikta mañakuwasqanchikrayku ima, ¿manachu yanapayta munanchik? (Proverbios 3:27, kikinchay.) Kikillantaq, Jehovapis paymanta espíritu santonta mañakuptinchik mayta kusikun, mana iskaychakuspataq quwasun (Pro. 15:8).

9. ¿Imaynatá tantakuykunaman riy Diospa espiritunta japʼinapaq yanapawanchik?

⁹ Qutuchakuymanta tantakuykunapi, jatun tantakuykunapi ima, Diospa espiritunta japʼillanchiktaq. Chayrayku chay tantakuykunaman rinapaq, sumaqta uyarinapaq kallpachakuna tiyan, jinamanta “taripay mana atina Diospa yachaynintapis” yachakusun (1 Cor. 2:10). Chantapis, tantakuypi tapuykunaman kutichiyqa may allin ruway. Tapurikuna: “Kay qhipa tawa semanaspi, ¿machkha kutitataq tapuykunaman kutichinaypaq makiyta uqharini, jinamanta iñiyniyta rikuchinaypaq? ¿Atiymanchu astawan kutichiyta?”. Astawan kallpachakunanchik kaptinqa, qhipan semanaspi jinata ruwanapaq kallpachakuna. Jehovaqa jinata ruwayta munasqanchikta rikuspa, tantakuykunapi espíritu santonwan yachaqananchikpaq yanapawasun.

10. Espiritumanjina kawsaqkuna, ¿ima waqyaytá ruwachkanku?

 ¹⁰ Espiritumanjina kawsanapaqqa, kay Apocalipsis 22:17 pʼitipi nisqanta kasukuna, chaypi nin: “Espirituwan, noviawan ninku: Jamuy, nispa. Chayta uyarejpis nillachuntaj: Jamuy, nispa. Chʼakichikojqa jamuchun, munajtaj, kawsay yakumanta qhasilla ujyachun”. Espíritu ‘novianiqta’ (akllasqa qutuchakuyniqta) kawsay yakumanta ukyanankupaq tukuyta waqyan. ¿Imatá qammanta niwaq? Chay, ¿waqyayta kasukunkiñachu, watiqmantapis kasukullawaqtaqchu? ¡May sumaqpuni chay salvanapaq llamkʼaypi yanapakuyqa!

11, 12. ¿Imaynatá willaypi espíritu santo yanapachkan?

¹¹ Kay llamkʼayqa ñawpa siglopijina, espíritu santop yanapayninwan ruwakuchkan. Chay tiempopiqa, Diospa espiritun, misioneros maykunapichus willanankuta, nirqa. Chaymanta parlaspa, apóstol Pablota, paywan riqkunata ima, “Espíritu Santoqa [...] jarkʼarqa ama Asia suyupi evangeliomanta willanankupaj”, nillataq Bitiniaman yaykunankuta saqirqachu. Manapis yachanchikchu imaynatachus espíritu jarkʼasqanta, chaywanpis yachanchik, apostolta, Europa may jatun jallpʼaman rinanpaq musquypijina, juk runa Macedoniapi yanapata mañakuchkaqta rikuchispa yanapasqanta (Hech. 16:6-10).

¹² Kay tiempopipis Jehovaqa, espiritunniqta pachantinpi willakunanpaq yanapachkallantaq. Manañapis musquypijina rikuchinanpaq milagrosta ruwanchu, akllasqa cristianosta kallpanwan imaynatachus willakunanpaq yuyaychachkallanpuni. Chantapis tukuy hermanosta sunqu kʼajaywan willanankupaq, Bibliamanta yachachinankupaq ima, tanqachkallantaq. Kay willaypi yanapakuchkaspapis, ichá astawan willanapaq kallpachakusunman.

13. Imaynatachus espíritu santop yuyaychayninta kasukuy yanapawasqanchikta, juk kikinchaywan sutʼinchariy.

¹³ Chantapis, Diospa llaqtan imaynatachus willanata nisqanta kasukuspa, espíritu santop yuyaychayninta kasukullanchiktaq. Japón suyumanta juk sipas Mihoko sutiyup ruwasqanmanta parlarina. Precursorajina llamkʼayta qallarichkaspa, Bibliamanta yachakuyta munaqkunata mana tarinanta yuyarqa, willasqanta mana kasukunankuta yuyasqanrayku. Chaywanpis Reinomanta Willayninchikpi, yuyaychasqanta ñawirirqa, aswan qhipamantaq Cómo lograr una vida llena de satisfacción folleto, chay suyumanta runasman willananpaq sumaqta yanaparqa. Chay hermanaqa imaynatachus chay folletowan willanapaq, imaynatachus yachakuyta munaqkunaman kutinapaq, yuyaychakusqanmanjina ruwarqa. Jinata ruwasqanrayku, ñawpaqpi willasqanta achkha qhisachaq runas, Bibliamanta yachakuyta munarqanku. Pay jinata nin: “Achkhata Bibliamanta yachachichkani —wakin kutipiqa 12 runasta—, wakintaqa Bibliamanta yachakuyta qallarinankupaq suyakunankuta nirqani”. Jehovap kamachisnin paypa yuyaychaykunasninta kasukunchik chayqa, espiritumanjina kawsachkasqanchikta rikuchinchik, achkha tʼinkastataq japʼinchik.

Diospa espíritu santonpi atienekuna

14, 15. a) ¿Imaynatá juchasapa runas kaspapis Diosman qukusqanchikmanjina kawsasunman? b) ¿Imaynatá allin amigosta tarisunman?

¹⁴ Dios, willananchikta kamachiwasqanchikrayku juntʼananchik tiyan (Rom. 10:14). Ichapis chayta ruwanapaq mana wakichisqachu kasqanchikta yuyasunman, chaywanpis,  akllasqa cristianosta, ñuqanchikta ima, Dios imaynatachus ruwanapaq wakichiwanchik (2 Corintios 3:5, ñawiriy). Mayta kallpachakuspa, espíritu santopi atienekuspa ima, Diosman qukusqanchikmanjina kawsayta atisun.

¹⁵ Juchasapas kasqanchikrayku, mana pantaq Diosman qukusqanchikta mana juntʼayta atillanchikchu. Chantapis manaraq cristiano kachkaptinchik compañeroninchik karqanku chaykunaqa, ichapis kawsayninchikta tikrasqanchikmanta phiñakunku, “sajrata rimanku” ima (1 Ped. 4:4). Chaywanpis kunanqa, wak amigos kapuwasqanchikta mana qunqanachu, may sumaq amigosninchiktaq Jehová, Jesucristo ima kanku (Santiago 2:21-23, ñawiriy). Qutuchakuymanta hermanosninchikwanpis astawan masichakunanchik tiyan, paykunaqa Jallpʼantinpi ‘hermanosninchikmanta’ wakin kanku (1 Ped. 2:17; Pro. 17:17). Jehovaqa, espiritunniqta, kallpachanawanchikpaqjina allin amigosta tarinapaq yanapawansun.

16. ¿Imaraykutaq Pablojina: “Pisi kallpayoj kasqaypi [...] kusikuni, nisunman?

¹⁶ Hermanos yanapawaptinchikpis, sapa pʼunchay chʼampaykunata atipayta, mana atillanchikchu. Wakin kutipiqa, mana atipay atina chʼampakunapi rikukuspa chinkasqajina kanchik. Chaytaq, juk mana lluqsinayuq juskʼupipis kachkasunmanjina kanman. Jinapi rikukuspaqa, Jehovaman astawan qayllaykuna, espíritu santontapis mañakuna. Pablomanta yachakuna, pay nirqa: “Pisi kallpayoj kaspa, aswan kallpayojpuni kani”, nispa (2 Corintios 4:7-10; 12:10, ñawiriy). Payqa, mana kallpayuq, mana yanapaqniyuqjina sientekuptinchik, espíritu santo kallpachawasqanchikta, yanapawasqanchikta ima, sumaqta yacharqa. Chantá, ¿imaraykú “pisi kallpayoj kasqaypi [...] kusikuni” nirqa? Imaraykuchus pisi kallpayuq kachkaptin, imaynatachus espíritu yanapasqanta rikurqa. Ñuqanchikpis kikillantataq kawsayninchikpi rikuyta atisunman (Rom. 15:13).

17. ¿Imaynatá espíritu santo wiñay kawsayman chayanapaq yanapawanchik?

¹⁷ Rikunchikjina, Diosman qukusqanchikta allinta juntʼanapaqqa, kallpanta necesitanchik. Juk barcomanta capitanjina kanchik, barcop chayanantaq wiñay kawsaywan kikinchakun, chayaspataq Jehovata wiñaypaq yupaychayta atisun. Allinta chayanapaqtaq, wayrata nisunman espíritu santota necesitanchik. Chay wayrata maskʼananchik tiyan, barcomanta velanchiktataq chay wayra ladoman kutirichina. Nitaq Satanaspa saqra pachan, chiqanta richkasqanchikmanta, pantachinawanchikta munanchikchu (1 Cor. 2:12). Bibliap yuyaychayninwan, Jehovap llaqtanpa yuyaychayninwan ima, chiqanta risun.

18. ¿Imatá ruwayta munananchik tiyan, chantá imaraykutaq?

¹⁸ Qam, ¿unaytañachu Jehovamanta sutʼinchaqkunawan, Bibliamanta yachakuchkanki, paykunawan khuska kaspapis, niraqchu Diosman qukunki, bautizakunki ima? Jina kaptinqa kayta tapurikuy: “¿Imataq jarkʼachkawan?”. Jehová munayninta juntʼananpaq espiritunta apaykachasqanta allinpaq qhawanki, yanapayninmantataq may agradecesqa kachkanki chayqa, imatachus ruwanayki kasqanta ruway. Jehová achkha tʼinkasta qusunqa. Espíritu santontapis achkhata qusunqa. Unayña bautizasqa kanki chayqa, rikunkiñachá imaynatachus kawsayniykipi espíritu santo yanapasusqanta. Jinallataq imaynatachus Dios kallpanwan, kallpachasusqanta. Chay espíritu santowan wiñaypaq yanapachikuyta atinki. Espiritumanjina kawsaytaqa, ¡ni jaykʼaq saqiychu!

¿Kaykunata japʼiqanchikchu?

• ¿Imaninayantaq ‘espiritumanjina kawsallaypuni’?

• ¿Imataq ‘espiritumanjina kawsanallapaqpuni’ yanapawasun?

• ¿Imaynatá Diosman qukusqanchikta juntʼallasunmanpuni?

[Tapuykuna]

[15 paginapi dibujo/foto]

Jallpʼatajina sunqunchikpi tarpunapaqqa, mayta kallpachakuna

[16, 17 paginaspi dibujos/fotos]

¿Diospa espiritunwan kawsayninchikpi yanapachikuchkanchikchu?