¿Jehová tapunawanchikta saqinchikchu?

BIBLIAPIQA, achkha tapuykuna kan, chaykunataq sunqu ukhukamapuni chayan. Jehovapis, tapuykunaniqta chiqa yachachiykunata yachachillantaq. Caintapis achkha tapuykunaniqta, saqra kawsayninta saqinanta nirqa (Gén. 4:6, 7). Jehovap tapuykunasninqa, Isaiasta paymanta willamunanpaq tanqarqa. Jehová tapurqa: “Pitataj kachasajri? Pitaj nisqaykuta willamonqari?”, nispa. Isaiastaq usqhayllata kutichirqa: “Kaypi kani, noqata kachaway ari”, nispa (Isa. 6:8).

Sumaq Yachachiq Jesuspis, tapuykunallawantaq yachachirqa. Evangeliospiqa, iskay pachak pusaq chunka kuraq tapuykuna rikhurin. Wakin kutiqa, churanakuqkunata chʼinyachinanpaq, payta uyariqkunap sunqunkuman chayananpaq, Diosta yupaychayninkupi imaynachus kachkasqankupi tʼukurinankupaq ima tapuq (Mat. 22:41-46; Juan 14:9, 10). Apóstol Pablopis, runasta tapuykunaniqta tʼukurichillaqtaq, payqa Griegopi Qillqasqasmanta, chunka tawayuq cartasta qillqarqa (Rom. 10:13-15). Romanosman qillqasqanpiqa, achkha tapuykuna tiyan. Ajinamanta, chay cartasta ñawiriqkunata, “may jina jatumpuni Diospa qhapaj kaynin, yachaynin, rejsiynimpis” kasqanta, yachanankupaq yanaparqa (Rom. 11:33).

Wakin tapuykunaqa juk kutichiyllata suyan, wakinkunataq runa tʼukurinanpaq ruwakun. Evangeliospiqa, achkha chayjina tapuykuna tiyan. Jesús discipulosninman nisqanpi tʼukurina: “Allintapuni qhawakuychej fariseospa levadurankumanta, jinallataj Herodespa levaduranmantapis”, nispa (Mar. 8:15; Mat. 16:12). Jesusqa, chayta nispa puraq uya kaymanta, chay runaspa llulla yachachiykunasninkumanta ima, jarkʼakunankuta nichkarqa. Chaywanpis mana entiendesqankurayku tʼantata qunqasqankumanta chʼaqwayta qallarirqanku. Chayrayku Jesusqa, ajinata tapurqa: “Imaraykutaj siminakushankichej, mana tʼantaykichej kasqanrayku? Manarajchu yachankichej, nitajchu entiendeyta atinkichej? Rumi sonqosllarajpunichu kashankichej? Ñawisniyoj kashaspapis, manachu rikunkichej? Ninrisniyoj kashaspapis, manallatajchu uyarinkichej? [...] Chantá manarajpunichu entiendeyta atinkichej?”, nispa. Chay tapuykunaqa, Jesús imatachus yachachichkasqanpi tʼukurinallankupaq karqa (Mar. 8:16-21).

‘Kay tapusqayman kutichiway’

Jehovaqa, kamachin Job tukuy imata Ruwaqwan kikinchakuspa, ni imapis kasqanta reparakunanpaq, achkha tapuykunata ruwarqa (Job 38-41, tʼaqas). Jehová, ¿Job sapa tapuyman kutichinantachu munarqa? Mana. Imaraykuchus, “kay pachata ruwashajteyqa, maypitaj kasharqankiri?”, nispa tapuspaqa, tʼukurinanta, sunqunman chayayta ima, munarqa. Chayrayku Jehová, tapuykunata ruwayta tukuptin, Jobqa, kayllata nirqa: “[¿]Pitaj noqa kasqani qanman kutichisuyta atinaypajri? Chayrayku chʼinlla kakuyta munani”, nispa (Job 38:4; 40:4). Arí, Jobqa Jehovap nisqanta entienderqa, chayraykutaq pantasqa kachkasqanta reparakurqa. Chaywanpis Jehovaqa, mana llampʼu sunqu kayllatachu yachachirqa, manaqa yuyaynintapis tikrachirqa. ¿Imaynamantá?

Jobqa, ‘Diospa kamachisqanta tukuy sunqu ruwaq, sumaq chiqantataq kawsaq’, chaywanpis, parlasqanpi pantarqa. Chayraykutaq Elihuqa, “Diospa ñawpaqempi mana juchayoj kasqanta nisqanmanta” kʼamirqa (Job 1:8; 32:2; 33:8-12). Chaywanpis Jehovaqa, Job  pantasqa kasqanta reparakunanpaq, juk sinchi wayra ukhumanta ajinata tapurqa: “[¿]Pitaj qan kanki yuyaychasqasniymanta iskayrayanaykipajri, chay parlasqasniykiwan mana yachayniyoj kasqaykita rikuchinaykipajri? Kunanqa wapu kasqaykita rikuchiway, kay tapusqaymantaj kutichiway”, nispa (Job 38:1-3). Jehovaqa, chayjina tapuykunawan, ruwasqasninpi may yachayniyuq, atiyniyuq ima kasqanta, Jobman rikuchirqa. Jobtaq, Jehovap chiqan kayninpi, ruwasqasninpi ima astawan atienekurqa. Jehová kikin Jobta tapusqanqa, ¡may sumaqchá karqa!

Jehová tapunawanchikta saqina

¿Bibliapi tarikuq tapuykuna ñuqanchikta yanapawasunmanchu? Arí. Chay tapuykunapi tʼukuriptinchikqa, achkha bendicionesta japʼisun. Bibliapi tarikuq tapuykunaqa, may atiyniyuq kanku. Chayrayku, ‘Diospa Palabranqa atiyniyuq, runap yuyasqanta, sunqunpi imatachus munasqantapis sutʼita rikuchin’ (Heb. 4:12). Chaywanpis, chay tapuykuna allinta yanapanawanchikpaqqa, Jehovapis tapuchkawasunmanjina qhawananchik tiyan (Rom. 15:4). Kunanqa, chay tapuykunamanta wakinta qhawarinachik.

“Qan kanki kay pachantinta juzgaj. Chayrayku, [¿]manachu cheqan kajtapuni ruwanayki tiyan?” (Gén. 18:25.) Abrahamqa, ajinata Jehovata tʼukurichinanpaq tapurqa, Pay Sodoma, Gomorra llaqtata ima, jasutʼiyta munachkaptin. Abrahamqa, Dios chiqan runasta, juchasapa runastawan khuska mana wañuchinanta, sumaqta yacharqa. Chayrayku tapuyninwanqa, Diospa chiqan kayninpi iñisqanta rikuchichkarqa.

Wakin runasqa, Armagedón chayamuptin, pikunachus kawsachkaq pasanankumanta chayri kawsarimunankumanta, tukuy imata ninku. Chaymanta llakikunamantaqa, Abrahampa iñiyninmanta yuyarikunanchik tiyan. Ñuqanchikpis, Jehová Tatanchik kʼacha, chiqan, khuyakuyniyuq ima, kasqanpi atienekunchik. Chaytaq mana llakikunapaq, mana iskayrayanapaq, nitaq tiemponchikta, kallpanchikta ima, qhasi chʼaqwaspi usuchinapaq yanapawanchik.

“[¿]Mayqentaj qankunamanta anchata phutikuspapis, atinman uj tʼajllullatawampis sayayninman yapaykuyta?” (Mat. 6:27.) Ajinata Jesús, discipulosninman, achkha runasman ima, tapurqa. Chay tapuywanqa, Jehová Tatajina paykunata qhawananpi atienekunankuta yachachirqa. Kay saqra pachap tukukuynin tiempopi kawsayqa, mana atikullanchu. Chaywanpis, may chhika chʼampaykuna kasqanrayku sinchita llakikuyqa, ni imapi  yanapawasunchu, imaraykuchus llakikuspaqa, mana kawsayninchikta yapasunchu, nitaq sumaqyachisunchu.

Kawsayninchik chayri familianchikpa kawsaynin llakichiwaptinchikqa, Jesuspa nisqanta yuyarikuna. Ajinamanta chay llakiykunaqa, ruwasqasninchikpi, yuyayninchikpi ima, mana saykʼuchiwasunchu. Chantapis Cristoqa, Janaqpachapi kaq Tatanchik imatachus necesitasqanchikta yachasqanta nillarqataq, imaraykuchus Diosqa, pʼisqitusta mikhuchin, tʼikitastapis pʼachallichin (Mat. 6:26-34).

‘Qhari pʼachanta mana ruphachispa, ¿ninata uqllayninpi apayta atinchu?’ (Pro. 6:27, Quechua de Cuzce.) Proverbios libroqa, juk tʼaqamanta jisqʼun tʼaqakama, juk tata, wawanta yuyaychasqanmanta parlan. Chay yuyaychaykunamanta jukqa, qhinchachakuqkunata mana allin rinanta nin (Pro. 6:29). Chayrayku, saqra munaykuna sunqunchikman yaykuchkasqanta, chayri mana casarakuyta munaspalla pitapis turiyachkasqanchikta reparanchik chayqa, kay tapuyta yuyarikuna. Wak juchasman urmanapaqjina kachkaspapis, kay tapuymanta yuyarikunallataq tiyan. Chantapis kay pʼitiqa, kay yuyaychay chiqapuni kasqanta rikuchin: “Runaqa imatachus tarpun, chayllatataj oqharenqa” (Gál. 6:7).

“[¿]Qanri, pitaj kanki wajpa kamachinta juzganaykipaj?” (Rom. 14:4.) Pabloqa, Romanosman qillqasqanpi, imaschus chay tiempomanta cristianosta llakichichkasqanmanta parlarqa. Wakinqa, wak laya runasta mana jatunpaqchu qhawaq kanku, chayrayku hermanosninku ima ruwasqankutapis qhawaraq kanku. Apóstol Pabloqa, jinata tapuspa cristianos sapa juk maychus kasqankumanjina allinpaq qhawanakunankuta nichkarqa, Jehovallataq juzgayta atisqanta yuyarichichkarqa.

Kay tiempopipis Jehovamanta sutʼinchaqkunaqa, tukuy laya runa kanchik. Chaywanpis Jehovaqa, llaqtanwan jukchasqa kaqta saqiwanchik. Llaqtan jukchasqa kanallanpaqpuni, ¿yanapachkanchikchu? Hermanosninchikta imallamantapis juchachanchik chayqa, Pablop nisqanta yuyarikuna.

Jehovaman qayllachiq tapuykuna

Bibliapi kaq tapuykunaqa, may atiyniyuq. Rikunchikjina, chay tapuykunata allinta ukhunchayqa, kawsayninchikpi yanapawasun. Bibliata ñawirichkaspa tapuykunata tarispaqa, chayta ruwananchik tiyan (14 paginapi kaq recuadrota qhawariy).

Bibliapi kaq tapuykuna, sunqunchik ukhukama chayananta saqina, ajinamanta yuyayninchik, sunqunchik ima, Jehovap munayninmanjina kanqa. Jobqa, Jehová achkhata tapusqantawan, jinata nirqa: “Kunankama, uyarispalla qantaqa rejserqayki, kunantajri, ñawisniywan rikuyki”, nispa (Job 42:5). ¿Imarayku Jehovata rikusqanta nirqa? Jehovaman astawan qayllaykusqanrayku. Chaymanta aswan qhipaman, Santiagopis, ajinapuni kasqanmanta jinata nirqa: “Diosman astawan qayllaykuychej; paypis qayllamusonqachej”, nispa (Sant. 4:8). Diospa Palabranta, tukuy tapuykunasnintawan allinta ukhunchasun chayqa, Diosta yupaychaypi ñawparisun, aswan sutʼitataq Janaqpachapi Tatanchikta ‘rikusun’.

[14 paginapi recuadro]

¿Imaynatá kay tapuykuna Jehovajina yuyanapaq yanapawasunman?

▪ “Imataj astawan Tata Diosta kusichin? Uywa wañuchisqa qʼolachinaschu, chayri paypa kamachisqanta kasuychu?” (1 Sam. 15:22.)

▪ “Manachu ñawista ruwajqa rikunman?” (Sal. 94:9.)

▪ “Rikunkichu yachayniyoj kasqanta yuyakoj runata?” (Pro. 26:12.)

▪ “ Ajinata phiñakuspaqa, [¿]yuyankichu allinta ruwashasqaykita?” (Jon. 4:4.)

▪ “Ima allintaj runapaj kanman, sichus kay pachaj tukuy kapuyninta ganakapunman, almantaj chinkapunman chayqa?” (Mat. 16:26.)

▪ “Pitaj Cristoj munakuyninmanta tʼaqawasunri?” (Rom. 8:35.)

▪ “Imataj tiyapusunki mana Diospa qosusqan?” (1 Cor. 4:7.)

▪ “Imaynatataj kʼanchayqa laqhawan chajrukonqarí?” (2 Cor. 6:14, Qheshwa Biblia.)

[15 paginapi dibujo/foto]

¿Imatataq Job Jehová tapusqanmanta yachakurqa?