¿Yuyarikunkichu?

¿Kay killasmanta Torremanta Qhawaq revistasta ñawirirqankichu? ¿Kay tapuykunaman kutichiyta atiwaqchu?

• ¿Imaraykutaq Mesías wañunan karqa?

Mana juchayuq runa, may ñakʼariypi kaspapis, Diosta tukuy sunqu yupaychayta atisqanta rikuchinanpaq. Chantapis Jesusqa, ‘kawsayninta jaywaspa’ Adán juchata, wañuyta ima, saqiwasqanchikmanta kacharichiwanchik, jinamanta wiñay kawsayta japʼiyta atinanchikpaq (15/12, 22-23 paginaspi).

• ¿Alma wañunchu?

Arí. Hechos 3:23 (Mosoj Testamentoj) jinata nin: “Tukuy alma Diosmanta sutʼinchajta mana uyarejka, runacuna chaupimanta wañuchiska canka”, nispa. Bibliaqa, kawsachkaq almamanta parlaspa, kawsachkaq runamanta parlachkan (01/01, 4 paginapi).

• ¿Ima ninayantaq wawasniykiwan sumaqta parlariy?

Wawasniykiwan parlaspaqa, tapuriy, kutichiyninku qampaq mana allin kaptinpis pacienciawan uyarinayki tiyan. Achkha familiasqa, mikhuchkaspa sumaqta parlarikunku (15/1; 18, 19 paginaspi).

• ¿Saqra runaspa almasninku infiernopichu ñakʼarichkanku?

Mana, imaraykuchus Biblia nisqanmanjina wañupuqkunaqa, mana imatapis yachankuchu, nisunman manaña imatapis sientenkuchu (01/01, 5 paginapi).

• ¿Maykʼaqtaq juk runa, watiqmanta bautizakunanpi tʼukurinan tiyan?

Bautizakuchkaspa, pakayllapi jatun juchata ruwachkarqa chay. Imaraykuchus ajinata juchallikuqkunaqa, qutuchakuymanta wikchʼusqa kanku (15/2, 22 paginapi).

• Kʼacha runas, ¿wañupuspa janaqpachamanchu ripunku?

Jesús jinata nirqa: “Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku” (Mateo 5:5). Jesusqa, mana tukuy kʼacha runas, janaqpachaman ripunankutachu nichkarqa (Juan 3:13) (01/01, 5 paginapi).

• Trigomanta, cizaña qhuramanta ima, rikchʼanachinapi, ¿imawan ninakun sumaq mujuta tarpuy?

Jesucristoqa, Jallpʼapi kimsa wata khuskanniyuqta Diosmanta willachkaspa, chay jallpʼata wakichirqa. Pentecostés 33 watapitaq, sumaq mujuta, nisunman ‘reinop wawasninta’ tarpuyta qallarirqa (15/3; 19, 20 paginaspi).

• Trigowan kikinchasqa cristianosta, ¿imaynatá Jehovap pirwanman tantakuchkan? (Mat. 13:30, NM.)

Trigowan kikinchasqa cristianostaqa, kay pachap tukukuynin tiempopi tantakuchkan. Paykunaqa, nisunman Reinop wawasninqa, chiqa qutuchakuy rikhurisqanman yaykuspa, chayri janaqpachapi tʼinkankuta japʼispa, Jehovap pirwanman yaykunku (15/3; 21, 22 paginaspi).

• ¿Pitaq ima libroschus, Griegopi Qillqasqasman yaykunanta nirqa?

Mana iglesiapi kamachiqkunachu juk tantakuypi akllarqanku, nitaq mayqin religionta kamachiqpis. Astawanpis, ñawpa cristianos, espíritu santoniqta, ima libroschus Diospa yuyaychasqan kasqanta nirqanku. Chaytaq, ñawpa tiempomanta cristianos, willakusqan ‘Diosmantachus manachus kasqanta’ espíritu santoniqta reparanankupaq, atiyta japʼisqankuta rikuchin (1 Corintios 12:4, 10, Dios Parlapawanchej) (01/04, 28 paginapi).