Ñawiriqkunapta tapuyninku

Jehovaqa, lantita yupaychayta juchachan, Aarón waka uñaman rikchʼakuq lantita ruwaptinrí, ¿imaptintaq mana jasutʼirqachu?

Éxodo 32 tʼaqaqa, Aarón juk waka uñaman rikchʼakuq lantita qurimanta ruwasqanta nin, jinata ruwaspaqa Diospa contranta juchallikurqa (Éxo. 20:3-5). Chayrayku Jehovaqa, ‘Aaronpaq mayta phiñakurqa, chinkachiytataq munarqa’. Chaywanpis, Moisés, hermanonpaq Diosmanta mañapurqa (Deu. 9:19, 20). Jinamanta Biblia, “cheqan runaj tukuy sonqo mañakuynenqa sinchʼi atiyniyojmin” nisqan juntʼakurqa (Sant. 5:16). Arí, Aaronqa, Moisés Diosmanta mañapusqanrayku mana jasutʼisqachu karqa. Chantapis, ichá iskay imasrayku ima, mana jasutʼisqachu karqa.

Qallarinapaq, Aaronqa Diosman chay tiempokama chiqa sunqu kasqanta rikuchirqa. Jehová, Moisesta llaqtanta Egiptomanta urqhumunanpaq kachachkaspaqa, wawqin Aarontawan kacharqa, Moisés payniqta Faraonman parlananpaq (Éxo. 4:10-16). Iskayninkutaq Jehovata kasukusqankurayku, Faraonpaman achkha kutita rirqanku, paytaq saqra runa kasqanrayku, paykunawan mayta phiñakurqa. Chayrayku Aaronqa, Egiptomanta lluqsimunan tiempokamaqa, Diosman chiqa sunqu kasqanta rikuchirqaña (Éxo. 4:21).

Aaronta, imaschus chay lantita ruwayman tanqasqanta qhawarinallataq. Moisesqa, tawa chunka pʼunchaykunataña Sinaí urqumanta mana kutimurqachu. Israelitastaq, Moisés “Sinaí Orqomanta mana usqhayta [...] uraykʼamojtin”, Aaronta juk lantita ruwananpaq tanqarqanku, paytaq nisqankumanjina ruwarqa (Éxo. 32:1-6). Chaywanpis, Moisés kutimuptin imatachus ruwasqanqa, israelitas mayta tanqasqankuraykulla chay lantita ruwasqanta rikuchin. Imaraykuchus payqa, chay ruwayta qhisacharqa. Moisés lanti yupaychayta chinkachina kasqanta niptintaq, Aaronqa, Leví ayllunwan khuska Jehovaman chiqa sunqu kasqanta rikuchirqa. Pikunachus chay juchaman tanqaqkunataq, kimsa waranqajina wañurqanku (Éxo. 32:25-29).

Aswan qhipamantaq Moisesqa, israelitasman jinata nirqa: “Qankunaqa uj jatun juchata ruwarqankichej”, nispa (Éxo. 32:30). Chaytaq, mana Aaronllachu juchallikusqanta rikuchiwanchik. Chaywanpis, Aarón, llaqtantin ima, Jehovap khuyakuyninta rikurqanku.

Chaymanta qhipamanqa, Jehová, Moisesman nirqa: Aaronta kuraq sacerdote kananpaq, “sumaj ruwasqa pʼachaswan pʼachallichinki, aceitewantaj jawispa, payta tʼaqanki sacerdotey kanampaj”, nispa (Éxo. 40:12, 13). Jehovaqa, chayta nispa, Aaronpa juchanta pampachasqanta rikuchirqa, imaraykuchus sunqunpi Aaronqa, chiqa yupaychayta jarkʼaq runa karqa, manataq mana kasukuq lanti yupaychaq runachu.