Machitusta jatunpaq qhawana

CALIFORNIAP mama qucha kantunpi, juk jatun sachʼa Ciprés Solitario nisqa tiyan. Runastaq, chay sachʼata fotosta urqhunankupaq tukuyniqmanta rinku. Runasqa, iskay pachak phichqa chunka watas kuraqniyuqña kasqanta ninku. Achkha runastaq, kay tukuy imata muchuq sachʼata, allinpaq qhawanku. Chayrayku, muyuyninman rumiswan pirqaykunku, mana urmananpaqtaq cableswan japʼichinku.

Ciprés Solitario sachʼaqa, ichapis Diospa llaqtanpi machituña cristianosmanta yuyarichiwanchik. Chay hermanosqa, Diospa llaqtanpi sinchita sayanku, willachkallankupunitaq. Profeta Joel nisqanmanjina ‘unay watasniyuq runaspis’, Diosmanta willananku karqa (Joel 2:28-32; Hech. 2:16-21). Ajinapunitaq, imaraykuchus machuyasqa hermanosqa, achkha horasta “reinomanta evangelio[ta]” willanku (Mat. 24:14). Wakinqa, watasta qhatiykachayta, wak chʼampaykunata ima, atipananku karqa. Ciprés sachʼallataraq unayniyuq kasqanrayku rumiswan, cableswan ima, jarkʼachaspa sumaqta qhawanku chay, ¿manachu chiqa sunqu machitu hermanosninchikta, astawanraq jatunpaq qhawananchik tiyan?

Jehovaqa, israelitasman ajinata kamachirqa: “Machu runastaqa sayarikuspa napaykuychej, jinallataj jatumpaj qhawaychej”, nispa (Lev. 19:32). Kunan tiempopipis, achkha machuyasqa hermanos, unaytaña chiqa sunquwan Diospa ‘ñankunanta purinku’ (Deut. 30:16). Bibliap yuyaychasqanta  kasukusqankurayku, yuraq chukchankuqa, juk “sumaj pillu[jina]” (Pro. 16:31).

Pabloqa, wayna Timoteoman jinata yuyaycharqa: “Kurajniyki runataqa ama kʼamiychu, astawanqa tataykita jina parlapayaykuy”, nispa. Chantapis, nillarqataq: “Kurajniyki warmitapis mamaykita jina qhaway”, nispa (1 Tim. 5:1, 2). Timoteoqa, ajinata ruwaspa machu runasta sayarikuspapis napaykuchkanmanjina karqa. Arí, Jehovaqa, machuyasqa hermanosta jatunpaq qhawaspa parlapayananchikta munan.

Dios Parlapawanchej Bibliaqa, Romanos 12:10 pʼiti nin: “Munanacuychej cʼacha familiajina. Respetanacuypeka ñaupaj caychej”, nispa. Arí, qutuchakuypi machitusta jatunpaq qhawaypiqa, ancianos ñawpaqpi kananku tiyan. Chaywanpis, tukuyninchik kikinta ruwanapaq kallpachakunanchik tiyan.

Kay kamachiy nisqanmanjinataq, tatasninchikta, jatun tatasninchikta ima, qhawananchik tiyan. Runaqa, chay Ciprés Solitario nisqa sachʼata imaynatachus jarkʼachanankupi tʼukurinku. Chayrayku, ¿manachu tatasninchikta, jatun tatasninchikta ima imaynatachus jatunpaq qhawananchikpi astawanraq tʼukurinanchik tiyan? Arí, chaytataq, parlasqankuta allinta uyarispa, allinninkuta maskʼaspa, manataq munaynillanchikmanjinachu ruwaspa, rikuchisunman (Pro. 23:22; 1 Tim. 5:4).

Jehová Diosqa, machitu kamachisninta may allinpaq qhawan. Ni jaykʼaq saqirparinqachu (Sal. 71:18). Astawanpis, chiqa sunquwan yupaychanallankupaqpuni kallpachan. Ñuqanchikpis, yanapananchik tiyan, jatunpaqtaq qhawananchik tiyan.

[7 paginapi dibujos/fotos]

Imaynatachus Ciprés Solitario sachʼata jarkʼachaspa qhawanku, kikillantataq machuyasqa hermanosninchikta, jatunpaq qhawananchik tiyan

[Maymantachus foto urqhukusqan]

American Spirit Images/age fotostock