Unqusqa familiaykita qhawachkaspa ama Diosmanta karunchakuychu

KIM sutiyuq Jehovamanta sutʼinchaqtaqa, ñañu wasanpi tumorniyuq kasqanta, cáncer unquyniyuq kasqanta ima, nirqanku. Qusan Esteban, nin: “Tumorninta ñawpaqta urqhurqanku, chantataq radioterapia, quimioterapia ima, nisqa tratamientosta ruwachirqanku. * Chay tratamientoqa, mayta llawchhiyachirqa, chayrayku mana kuyuriyllatapis atirqachu”, nispa.

Munasqa warminta chayjina unqusqata rikuspa, ¡maytachá Esteban sunqunta nanachikurqa! Ichá qampatapis, familiaykimanta pillapis, unquyrayku chayri machituña kasqanrayku ñakʼarichkan (Ecl. 12:1-7). Jina kaptinqa, qam allin kaptillayki allinta qhawayta atinki. Diosta yupaychaypi kallpachasqa kanayki tiyan, imaptinchus mana jina kaptinqa, kallpayki pisiyanman, nitaq familiaykita necesitasqanmanjina allinta yanapawaqchu. ¿Imaynatá unqusqa chayri machuyasqa familianchikta allinta qhawasunman, Diosta yupaychaypi ruwanasninchikta mana saqirpayaspalla? ¿Imaynatá qutuchakuymanta hermanos yanapayta atinkuman?

Kallpayuqllapuni kanaykipaq

Unqusqa familianchikta qhawachkaspa, Diosta yupaychaypi ruwanasninchikta mana saqirpayanapaq chayri mana saykʼusqa kanapaq, tiemponchikta, kallpanchikta ima, allinta apaykachananchik tiyan. Proverbios 11:2 nin: “Yachaytajrí llampʼu sonqoyojkunapi kashan”, nispa. Arí, maykamachus atisqankuta allinta reparakuqkunaqa, yachayniyuqkuna kanku. Chayrayku, mana ancha saykʼusqa kayta munanchik chayqa, ruwanasninchikta allinta qhawarikunanchik tiyan.

 Estebanqa, maykamachus atisqanta reparakurqa. Payqa, tukuynin pʼunchayta llamkʼaq, chantá Irlanda suyup juknin qutuchakuyninpi ancianosta umachaqjina, superintendente de serviciojina ima, kachkarqa. Mana chayllachu, llaqtanmanta Comité de Enlace con los Hospitales nisqapi yanapallaqtaq. Pay nin: “Kimqa, ni jaykʼaqpis achkha ruwanasniyuq kasqayrayku payta saqirpayasqayta yuyarqachu, chaywanpis ñuqaqa, mana chay tukuyninta ruwayta atisqayta yacharqani. Chayrayku, Diosmanta mañakuytawan, qutuchakuypi ancianosta umachaq kayta saqipurqani. Chaywanpis ancianollapuni karqani, ruwanasniyta ajinata pisiyachisqayrayku, warmiyta allinta qhawanaypaq, aswan tiempoyuq karqani”, nispa.

Aswan qhipaman Kim allinyariptin, Estebanqa paypa yanapayninwan qutuchakuypi ruwanasninta watiqmanta ruwayta atillarqataq. Esteban nin: “Ñuqaykuqa, unquyrayku imastachus manaña ruwayta atisqaykuta, allin ñawiwan qhawayku. Jehovaman may agradecesqa kani, warmiymanpis. Imaraykuchus payqa, unqusqa kaspapis, mana thutunchu, yanapawanpunitaq”, nispa.

Kunanqa, qutuchakuykunata waturikuq Gerardo hermanomanta, warmin Mariamanta  ima parlarisun, paykunaqa imatachus aswan qhipaman ruwayta munasqankuta tikrachinanku karqa, machuyasqa tatasninta qhawanankupaq. Maria nin: “Qusaywan ñuqawanqa, wak suyuman misionerosjina ripuyta munarqayku, chaywanpis qusay mana hermanosniyuq kasqanrayku, tatasninta ñuqayku qhawanayku karqa. Jinamanta Irlandallapi qhipakurqayku. Tantan wañupunankamataq, hospitalpi qhawarqayku. Kunanqa, sapa pʼunchay suegrayta telefononiqta waqyariyku, pay qayllallapitaq tiyakuyku, imapi yanapanaykupaqpis. Qutuchakuynin, mayta yanapawasqaykurayku, Diospaq sinchita llamkʼallaykupuni”, nispa.

¿Imaynatá wakkuna yanapankuman?

Pabloqa, imaynatachus qutuchakuypi machuyasqa viudasta yanapanamanta parlachkaspa, ajinata qillqarqa: “Sapa runa ayllusnimpaj, chanta astawanraj familiampaj wakichipunan tiyan. Manachus chayta ruwan chayqa, creeyninta qhesachan, mana creejmantataj aswan mana walejman tukupun”, nispa. Apóstol Pabloqa, cristianos machuyasqa tatasninkuta, jatun tatasninkuta ima, qhawananku kasqanta nirqa, imaraykuchus chayqa, Diospa ñawpaqinpi, allinpaq qhawasqa (1 Tim. 5:4, 8). Jina kaptinpis, qutuchakuymanta hermanospis yanapanallankutaq tiyan.

Evermanta Agustinamanta ima, parlarina, paykunaqa Suecia suyupi tiyakunku. Ever nin: “Warmiy cancerwan unqusqa kasqanta yachayqa, mayta llakichiwarqayku. Agustinayqa, mana unquyta yachaqchu. Kunantaq, hospital wasiyuq karqayku, imaraykuchus tratamientonman sapa pʼunchay riq kayku. Chantapis, jampisqa anchata llawchhiyachiq. Tukuy chay tiempotaqa, wasillapi qhipakurqa, ñuqataq payta qhawanaypaq qhipakurqani”, nispa. ¿Imaynatá qutuchakuy chay qhariwarmita yanaparqa?

Ancianosqa, telefononiqta tantakuykunata uyarichiq kanku. Chantapis hermanosqa, waturikuq kanku, telefonopi waqyariq kanku, cartasta, tarjetasta ima, qillqaq kanku. Ever nin: “Jehová, hermanosniyku ima, yanapawasqaykuta rikurqayku. Mana ajinata yanapawaykuman karqa chayqa, iñiyniyku pisiyanmanchá karqa. Kunanqa, warmiy Agustina, allinyakapunña, Tantakunapaq Wasimanpis watiqmanta richkaykuña”, nispa. Chiqamantapuni, qutuchakuypi unqusqa, machuyasqa hermanosta ima, yanapaqqa, “tukuy tiempopi munakuyniyoj, uj wawqetaj runawan khuska llakiypi sayaykunampaj” (Pro. 17:17).

Jehovaqa, ruwasqaykita allinpaq qhawan

Unqusqa familianchikta qhawayqa, ichá saykʼuchiwasunman, chaywanpis chayqa, achkha tʼinkasta apamuwanchik. Kamachiq Davidqa, necesitaqpi “yuyajqa” kusisqa kasqanta nirqa, kikillantataq unqusqasta yanapaqmanta nikunman (Sal. 41:1).

¿Familiankuta yanapaqkuna kusisqa kayta atinkumanchu? Arí, imaraykuchus Biblia nisqanmanjina, pisi kallpayuqta yanapariqqa, Jehovaman manurin, Paytaq chay manuta juntʼapun (Prov. 19:17). Chiqa Diosninchikqa, unqusqa chiqa sunqu kamachisninmanta mayta khuyakun, paykunata qhawaqkunatataq tʼinkan. David jinata takirqa: “Tata Diosqa payta onqoynimpi kallpachanqa. Onqoyninmanta sanoyachiponqa”, nispa (Sal. 41:3). Chantapis, unqusqata qhawaq ñakʼariypi rikukuptinqa, Jehová payta yanapanqa.

Jehová, unqusqa familianchikta qhawasqanchikta, may allinpaq qhawasqanta yachayqa, ¡mayta kusichiwanchik! Mayta kallpakunanchik kaptinpis, Bibliaqa, chay ruwaykuna, ‘Diosta kusichiq sumaq jaywanajina’ kasqanta nin (Heb. 13:16).

[Sutʼinchaynin]

[18 paginapi dibujos/fotos]

Ama Diosmanta karunchakuychu wakkunap yanapayninkutataq ama qhisachaychu