Wawqis espiritumanjina tarpuspa ñawpaqman riychik

“Pichus Espíritoj munayninta ruwaspa tarpojrí, Espiritumanta wiñay kawsayta japʼenqa.” (GÁL. 6:8.)

1, 2. ¿Imaynatá Mateo 9:37, 38 juntʼakuchkan, chantá imataq qutuchakuykunapi necesitakuchkan?

KAY tiempojinaqa, manaña juktawan rikukunqachu. Imaptinchus, Jesús nirqajina kay sumaq llamkʼay juntʼakuchkan: “Cosechaqa ashkha, oqharejkunarí pisi kanku. Mañakuychej ari cosechaj dueñon Señormanta, astawan oqharejkunata cosechanman kachamunampaj” (Mat. 9:37, 38). Jehovaqa, chay mañakuykunaman ni jaykʼaqjina kutichichkan. Imaraykuchus, 2008 septiembre killamanta, 2009 agosto killakama, Jallpʼantinpi 2.031 musuq qutuchakuykuna sayarirqa, chayrayku kunanqa pachantinpi 105.298 qutuchakuykuna tiyan. Sapa pʼunchaytaq, 757 runas bautizakurqanku.

² Diospa llaqtan wiñasqanrayku, aswan hermanos yachachinankupaq, yanapanankupaq ima, necesitakun (Efe. 4:11). Jehovaqa, unaymantapachaña llaqtanta qhawananpaq sumaq wakichisqa ancianosta churan, chaytataq ruwallanqapuni. Miqueas 5:5 nisqanmanjina, tukukuy pʼunchaykunapi Diospa llaqtanpiqa, “qanchis kuraqkuna”, ‘pusaq sumachaq runas’ ima, kanan karqa, nisunman qutuchakuykunata kamachinankupaq, achkha wakichisqa qharis kankuman karqa.

3. ¿Ima ninayantaq ‘espiritup munayninta ruwaspa tarpuy’?

³ Qam, ¿bautizasqa qharichu kanki? Jina kaptin, ¿imaynatataq qutuchakuypi astawan yanapawaq? ‘Espiritup munayninta ruwaspa tarpuy’, arí, ima ruwasqaykipipis espíritu santo pusasunanta saqikuy (Gál. 6:8). Amataq ‘aychap munayninta ruwaspa tarpuychu’, nisunman ama tukuy imayuq kaytapuni maskʼaychu nitaq sunquta kusichiyllaman qukuychu, imaraykuchus chaykunaqa, Jehovapaq llamkʼayta astawan munasqaykita chinkachinman. Tukuy cristianos ‘espiritup munayninta ruwaspa tarpunanchik’ kaptinpis, qharisqa astawanraq kallpachakunanku tiyan. Ajinallamanta, Biblia imatachus kuraq kamachiqkuna kanankupaq kamachisqanta, juntʼayta atinkuman. Kay yachaqanaqa, siervos ministeriales, ancianos ima, mayta necesitakusqanrayku, qharispaq wakichikun. Chayrayku, wawqiy, kay yachaqanata Diosmanta mañakuspa ukhuncharinaykita munayku.

Allin ruwanata munasqaykita rikuchiy

4, 5. a) Bautizasqa qharis, ¿imata ruwanankupaqtaq kallpachakunanku tiyan? b) ¿Imaynatá qutuchakuypi astawan ruwayta munasqankuta rikuchinkuman?

⁴ Ancianomanqa, ni pipis jinallamanta tukunchu. Chay ‘allin ruwayta’ tariyta munaqqa, mayta kallpakunan tiyan (1 Tim. 3:1). Arí, tukuy hermanosta sinchi sayasqa kanallankupaqpuni, yanapanan tiyan (Isaías 32:1, 2, ñawiriy). Manataq munayninpi maskʼaspallachu, chayri saqra sunquwanchu chayta maskʼanan tiyan.

⁵ Anciano chayri siervo ministerial kayta munaqqa, Bibliap kamachisqanta juntʼananpaq kallpachakunan tiyan (1 Tim. 3:1-10, 12,  13; Tito 1:5-9). Bautizasqa qharisqa, ajinata tapurikunanku tiyan: “¿Willayman rillanipunichu? ¿Wak hermanosta, kikinta ruwanankupaq yanapanichu? ¿Allinninkuta maskʼaspa, paykunata kallpacharinichu? ¿Bibliata sumaqta ukhunchasqayraykuchu riqsichikuni? ¿Tantakuykunapi tapuykuna ruwakuptin allinta kutichinaypaq wakichikunichu? Ancianos imatapis kamachiwasqankuta, ¿kusiywanchu juntʼani?”, nispa (2 Tim. 4:5). Kay tapuykunapiqa, tʼukurinankupuni tiyan.

6. ¿Imataq qutuchakuypi astawan ruwanasta japʼinapaq necesitakun?

⁶ ¿Imatawan hermanos qutuchakuypi astawan ruwanasta japʼinankupaq ruwankuman? Diospa ‘atiyninwan espíritu santoniqta’ kallpachakunanku tiyan (Efe. 3:16). Mana jatunchakuyta munaspachu, siervo ministerial chayri anciano kayta munananku tiyan. Astawanqa, wakkunata yanapayta munaspa, imaptinchus chayjina llamkʼaytaqa, Diosta yupaychaypi sinchita sayasqa runaslla ruwayta atinku. ¿Imatá hermanos, iñiyninku yapakunanpaq ruwananku tiyan? ‘Espiritumanjina kawsaspa’, puquyninta puquchinanku tiyan (Gál. 5:16, 22, 23). Ajina kʼacha kaykunata rikuchiptinku, ancianos yuyaychasqankuta japʼikuptinku ima, ñawpachkasqankuta ‘tukuy rikunqanku’ (1 Tim. 4:15).

Wakkunap allinninta maskʼanayki tiyan

7. ¿Imaynatataq hermanosta yanapananku tiyan?

⁷ Hermanosta yanapanapaqqa, munayninchikta saqispa paykunap allinninkuta maskʼana tiyan. Ancianosqa, michiqkunajina kanku chayrayku hermanosninkup chʼampayninkumanta llakikunku. Pablo, ¿imayna sunquwantaq chay llamkʼayta ruwaq? Corintopi hermanosninman nisqanta qhawarina: “Chay cartata qhelqamushaspa, anchata llakikorqani sonqoypi, mayta waqaspa. Manataj chaytaqa llakichiyta munaspachu qhelqamorqani, astawanqa yachanaykichejpaj may jinatachus qankunata munakusqayta” (2 Cor. 2:4). Arí,  Pabloqa, chay llamkʼananta tukuy sunqu ruwarqa.

8, 9. Diospa kamachisninta yanapanankurayku, imastachus wakin chiqa sunqu runas ruwasqankumanta parlariy.

⁸ Jehovap kamachisninqa, munayninkuta saqispa wakkunap allinninta maskʼasqankurayku, riqsichikunku. Sutʼincharinapaq, Noé, familianman, ¿nirqachu “arcata tukuchaspa willawankichik jamunaypaq”, nispa? Mana. Moisesrí, Egiptopi tiyakuq israelitasman, ¿nirqachu “puka quchaman chayaychik chaypi tinkukusun”, nispa? Mana. Josuetaq, israelitasman, ¿nirqachu “Jericop pirqasnin thuñikuptin waqyawankichik”, nispa? Mana. Chantá Isaiasrí, wak profetata rikuchispachu, ¿“chaypi kachkan, Payta kachay”, nirqa? Mana (Isa. 6:8).

⁹ Cristoqa, espíritu santomanjinapuni kawsarqa, Jehová runasrayku kawsayninta qunanta kamachisqantaqa tukuy sunqu juntʼarqa. Paymantaqa, mayta yachakusunman (Juan 3:16). Chayrayku Jesusman, ñuqanchikrayku wañusqanmanta, munakuyninmanta ima, kawsayninchikwan agradecekuna. Unaytaña ancianojina llamkʼaq hermanoqa, imaynatachus hermanosta qhawasqanmanta jinata nin: “Jesusqa, Pedroman nirqa: ‘Ovejitasniyta michiripuway’ nisqanqa, mayta sunquyta wawayarichin. Ancianojina llamkʼasqay wataspiqa, kʼacha parlaykunawan, ruwaykunawan ima, wakkunata kallpachayta atisqanchikta rikuni. Hermanosta kallpachaspaqa, mayta kusikuni” (Juan 21:16).

10. ¿Imataq juk hermanota, Jesusjina hermanosninta yanapananpaq tanqanan tiyan?

¹⁰ Bautizasqa qhariqa, Jesusjina hermanosninta qhawanan tiyan, pay nirqa: “Noqa [...] samarichisqaykichej”, nispa (Mat. 11:28). Diosta, qutuchakuyta ima, munakusqaykirayku, anciano kayta munanayki tiyan. Amataq chay llamkʼaytaqa, mana atinatajina chayri juk llasa qʼipitajina qhawaychu. Chaywanpis, qutuchakuyta yanapayta munay sunquykipi mana kaptin, ¿imatá ruwawaq?

Wakkunata yanapayta munayninchikta wiñachina

11. ¿Pitaq hermanosninchikta yanapayta munanapaq kallpachawasunman?

¹¹ Anciano chayri siervo ministerial kayta, ¿manchachikunkichu? Chayta atipanaykipaqqa, Diosmanta espíritu santota mañakuy (Luc. 11:13). Yupaychaypi astawan ruwayta munananchikpaqqa, Jehová tanqawanchik, kallpachawanchik ima. Imaraykuchus Espíritu santoqa paymanta jamun (Fili. 2:13; 2 Cor. 4:7). Chayrayku, Diospaq astawan llamkʼayta munanapaqqa, yanapayninta mañakunanchik tiyan (Salmo 25:4, 5, ñawiriy).

12. ¿Imaynatá juk hermano qutuchakuypi ruwaykunata juntʼananpaq yachayta japʼinman?

¹² Wakin hermanosqa, qutuchakuypi achkha ruwanas kasqanrayku, mana atinata qhawasqankurayku ima, anciano kayta manchachikunku. Wakinkunataq, chay llamkʼaykunata ruwanankupaq, pisi yachayniyuq kasqankuta yuyanku. Jina kaptinqa, Diospa Palabranta, publicacionesta sumaqta ukhuncharispa ima, astawan yachayta tarinkuman. Tapurikunkumantaq: “¿Bibliata ukhunchanapaq tiempochakunichu? ¿Yachayta Diosmanta mañakunichu?”, nispa. Discípulo Santiagopis jinata nirqa: “Sichus mayqellampis qankunamanta pisi yachayniyoj kanman chayqa, Diosmanta mañakuchun. Diostaj chay yachayta payman qonqa, imaraykuchus Diosqa tukuyman qon mana michʼakuspa, chay mañakusqanmanta mana rimaspalla”, nispa (Sant. 1:5). Chay nisqanpi, ¿chiqamantachu atienekunki? Salomonqa, Diosmanta mañakuspa, “jatun yachayta, jatun sonqotawan, yuyayniyoj kaytapis” japʼirqa, chaytaq juzgachkaptin imachus allin, imataqchus mana allin kasqanta sutʼita reparananpaq yanaparqa (1 Rey. 3:7-14). Jehovaqa, chayjina yachayta, payllaman qurqa. Chaywanpis, ancianosman, ovejitasninta qhawananpaq yachayta qunanmanta mana iskaychakunanchikchu tiyan (Pro. 2:6).

13, 14. a) Cristop munakuynin, ¿imata ruwananpaqtaq Pablota tanqarqa? b) ¿Imata ruwananchikpaqtaq ‘Cristop munakuynin tanqawanchik’?

 ¹³ Jehová, Churin ima, ñuqanchikrayku ruwasqankupi tʼukuriyqa, astawan ruwayta munananchikpaq tanqawasun. Kay 2 Corintios 5:14, 15, (ñawiriy) nisqanta ukhuncharina. ¿Imaynamantá ‘Cristop munakuynin tanqawanchik’? Jesusqa, Tatanpa munayninta ruwaspa, kawsayninta ñuqanchikrayku quspa ima, mayta munakuwasqanchikta rikuchiwarqanchik. Chaytaq agradecesqa kanapaq, kikinta ruwanapaq ima, tanqawanchik. Pablotaqa, Cristop munakuynin, mana munayninllanta maskʼananpaq tanqarqa. Chayllataq qutuchakuypi chayri mayllapipis, Diosta yupaychananpaq, runamasinta yanapananpaq ima, tanqarqa.

¹⁴ Cristop munakusqanpi tʼukuriyqa, may agradecesqa kanapaq tanqawanchik. Chantapis, ‘aychap munayninta ruwaspa tarpuy’, nisunman munaynillanchikta maskʼay, mana allinchu kasqanta entiendechiwanchik. Chayrayku kawsayninchikpiqa, Dios kamachiwasqanchikta ñawpaqman churanchik. Munakuyninchikraykutaq, hermanosninchikta ‘munakuywan yanapanchik’ (Gálatas 5:13, ñawiriy). Chantapis, hermanosninchikta llampʼu sunquwan yanapayta munanchik chayqa, paykunata jatunpaq qhawasun. Manataq Satanasjinachu wasa rimakus chayri juchachaqkuna kasun (Apo. 12:10).

Familiapis yanapayta atin

15, 16. Juk hermano, siervo ministerial chayri anciano kananpaq, ¿familian yanapanmanchu?

¹⁵ Cristiano tatata siervo ministerial chayri ancianota sutichanankupaqqa, familianta ñawpaqta qhawarinku. Arí, familian Bibliap nisqanmanjinachus manachus kawsasqankuta, qutuchakuy ukhupi imaynachus kasqankuta ima, qhawarinku. Chayrayku, juk hermano, siervo ministerialjina chayri ancianojina qutuchakuypi llamkʼananpaq, familian yanapanan tiyan (1 Timoteo 3:4, 5, 12, ñawiriy).

¹⁶ Jehovaqa, familiap yanapasqanta may allinpaq qhawan (Efe. 3:14, 15). Chantapis, chay cristianosqa, qutuchakuypi ruwanasninkuta juntʼananku tiyan, ‘familiankutapis’, allinta qhawananku tiyan. Chantapis ancianos, siervo ministeriales imaqa, sapa semana familiapi Diosta yupaychaypi, warminkuwan wawasninkuwan ima, Bibliata ukhunchananku tiyan. Tukuyninkutaq khuska willaq rinanku tiyan. Tata ajinata ruwananpaqtaq, warmin wawasnin ima, yanapananku tiyan.

¿Anciano chayri siervo ministerial watiqmanta kawaqchu?

17, 18. a) Anciano chayri siervo ministerial kayta saqiq, ¿imatá ruwanan tiyan? b) Anciano chayri siervo ministerial watiqmanta kayta munaq, ¿imatá mana ruwananchu tiyan?

¹⁷ Ichá maykʼaqllapis siervo ministerial chayri anciano karqanki, kunantaq manaña. Chaywanpis Jehovata munakullankipuni, paypis munakususqanmanta mana iskaychakunaykichu tiyan (1 Ped. 5:6, 7). Chantapis ancianos, kawsayniykipi ichá wakin imasta tikrachinaykita nisunku. Jina kaptinqa, ama phiñakuychu, Diospa yanapayninwantaq pantasqaykita allinchay. Chantapis, yuyayniyuq kasqaykita rikuchiy, ñawpaqmantaq rillaypuni. Juk hermanoqa, unaytaña anciano kasqanta saqirqa, pay jinata nin: “Imaynatachus anciano kachkaspa tantakuykunaman, willayman ima, riq kani. Chantapis, Bibliata  ñawiriq kani, kikinta ruwanallaytapuni nikurqani, chaytataq juntʼarqani. Watanman chayri iskay watanman, watiqmanta anciano kanayta yuyarqani, chaywanpis yaqha qanchis watanmanraq anciano karqani. Chayrayku pacienciayuq kayta yachakurqani. Chay qanchis wataspiqa, hermanos mana saykʼuspa kallpachakunallaypaqpuni, mayta yanapawarqanku”, nispa.

¹⁸ Chay hermanojina rikukuspaqa, ama kallpaykita pisiyachiychu. Astawanqa, imaynatachus Jehová, willayniykita, familiaykita ima, bendecichkasqanpi tʼukuriy. Chantapis, familiaykita Diosta yupaychaypi ñawpaqman rinankupaq yanapariy, unqusqa kaqkunata waturikuy, pisi kallpayuqkunatapis kallpachariy. Jehovap sutʼinchaqninjina sumaq willaykunata willamuy, sutintataq jatunchallaypuni (Sal. 145:1, 2; Isa. 43:10-12) *.

Kawsayniykita allinta qhawariy

19, 20. a) ¿Imatá bautizasqa qharis ruwananku tiyan? b) ¿Imatá qhipan yachaqanapi ukhunchasun?

¹⁹ Kay tiempopiqa, ni jaykʼaqjina astawan ancianos chayri siervos ministeriales necesitakun. Chayrayku bautizasqa qharis, kawsayniykichikta allinta qhawarikuychik, tapurikuychiktaq: “¿Imataq chay llamkʼayta japʼinaypaq jarkʼachkawan?”, nispa. Espíritu santota mañakuychik. Ajinamanta, chay llamkʼaypi sumaqta tʼukurinkichik.

²⁰ Ancianospa chayri siervo ministerialespa llamkʼayninkuqa, tukuy hermanosta yanapan. Rikunchikjina, ni imata suyaspalla wakkunap allinninkuta ruwaptinchikqa, kusiyta tarinchik. Chantapis, espiritup munayninmanjina tarpuchkanchik. Chaywanpis, espíritu santota ni jaykʼaq llakichinapaq allinta qhawarikuna tiyan. Qhipan yachaqanapiqa, chayta ukhuncharisun.

[Sutʼinchaynin]

¿Imatataq kutichiwaq?

• ¿Ima kanantataq Miqueas 5:5 willawanchik?

• ¿Ima ninayantaq wakkunarayku imatapis ruway?

• ¿Imaynatataq hermanosta yanapayta munasqanchikta wiñachisunman?

• Juk cristiano, siervo ministerial chayri anciano kananpaq, ¿familian yanapanmanchu?

[Tapuykuna]

[25 paginapi dibujos/fotos]

¿Imaynatá qutuchakuypi astawan ruwanasta japʼiyta munasqaykita rikuchiwaq?