Yuyayninchikta reparananpaq yachachinallapuni

¿GIMNASTATA ejerciciosta ruwachkaqta maykʼaqllapis rikurqankichu? Jinata ruwananpaqqa, ¡maytachá wakichikurqa! Bibliaqa, chay gimnastasjina yuyayninchikta sumaqta yachachinata niwanchik.

Pabloqa, Hebreosman qillqasqanpi nin: “Khamuna mikhuyri wiñay tukusqa runaspajña. Paykunaqa sapa pʼunchay ruwasqankurayku, yachasqa kanku [yuyayninkupi] reparanankupaj imachus allin, imatajchus mana allin kasqanta” (Heb. 5:14). ¿Imaraykutaq Pablo, hebreo cristianosman, imaynatachus gimnastas cuerponkuta juk ruwayman yachachinku, kikinta yuyayninkuta yachachinankuta nirqa? ¿Imaynatá chayta ruwasunman?

“Yachachejkunaña kanaykichej karqa”

Pabloqa, Dios, Cristota ‘kuraq sacerdote Melquisedecpa tʼaqanmanjina’ churasqanmanta sutʼinchachkaspa, jinata qillqarqa: “[Jesusmantaqa] ashkhataraj ninayku tiyan, chaytaj mana sutʼinchay atina jinallachu. Qankunatajrí mana usqhayllata entiendeyta atinkichejchu. Unaymantapacha creesqaykichejrayku, yachachejkunaña kanaykichej karqa. Kunantajrí watejmanta yachachinaraj kankichej, Diospa Palabranmanta qallariy yachachinasta. Qankunaqa wawas jinaman kutispa, lechellapajraj kankichej, mana khamuna mikhunapajrajchu” (Heb. 5:10-12).

Ñawpa siglopiqa, cristianosman tukuq judiosmanta achkhas, Diosmanta chiqa kaqta yachakuypi mana ñawparisqankuchu. Sutʼinchanapaq wakinqa, Leymanta, circuncisionmanta ima, musuq sutʼinchaykunata mana japʼikuyta atillarqankuchu (Hech. 15:1, 2, 27-29; Gál. 2:11-14; 6:12, 13). Wakintaq, sábado pʼunchayta yuyariyta, sapa wata Perdonta Tarina Pʼunchayta ruwayta ima, mana saqiyta munarqankuchu (Col. 2:16, 17; Heb. 9:1-14). Chayrayku Pabloqa, imachus allin, imataqchus mana allin kasqanta reparanankupaq, yuyayninkuta yachachinankuta nirqa, jinamanta wiñay tukusqa kanankupaq, ‘ñawpaqman rinanku’ karqa (Heb. 6:1, 2). Jinata kʼamisqanqa, yuyayninku imaynachus kasqanpi tʼukurinankupaq, ñawpaqman rinankupaq ima, yanaparqapunichá. Chantá, ¿imatá ñuqanchikmanta nisunman?

Yuyayninchikta reparananpaq yachachina

Diosta yupaychaypi ñawpaqman rinapaq, ¿imaynatá yuyayninchikta yachachina tiyan? Pablo ninjina, “sapa pʼunchay” yachachispa. Imaynatachus gimnasiata ruwaq, cuerponta juk ruwayman yachachinanpaq mayta wakichikun. Kikillantataq yuyayninchikta, imachus allin, imataqchus mana allin kasqanta reparananpaq, yachachina tiyan.

Universidad de Harvard (Facultad de Medicina) nisqapi yachachiq, clínico Psiquiatra John Ratey, jinata nin: “Ñuqtunchikta jarkʼanapaq, yuyayninchikta llamkʼachiyqa allin”, nispa. Chantá, Centro de Envejecimiento, Salud y Humanidades de la Universidad George Washington nisqapi kamachiq, Gene Cohen jinata nin: “Mana yachay atinaspi tʼukurichiptinchikqa, ñuqtunchikpi neuronas dendritas nisqata rikhurichin, sinapsis nisqataq achkhayan”.

Chayrayku, yuyayninchikta astawan yachachiyqa may allin, jinallataq Bibliamanta astawan yachakuypis. Jinata ruwaspaqa, ‘imaynachus Diospa munaynin kasqanta yachasunchik’ (Rom. 12:1, 2).

 ‘Khamuna mikhunawan’ miskʼichikuna

“Wiñay tukusqa kananchejkama” ñawpaqman riyta munanchik chayqa, tapurikuna: “¿Bibliap yachachiyninta astawan sutʼitachu entiendechkani? ¿Wakkuna wiñay tukusqa cristianotajinachu qhawawanku?”, nispa. Kaypi tʼukurina, juk warmi, wawitanman lecheta, imitastachus wawitan mikhuyta atisqanta ima, munakuywan jaywan. Chaywanpis, watas pasasqanmanjina chay wawan khamuna mikhunata mana mikhuptin, ¿kusikunmanchu? Diosta yupaychaypi, ichá chay wawajinallataq kachkasunman. Ñuqanchikqa, Bibliamanta yachachisqanchik runa, Diosman qukuspa bautizakuptin mayta kusikunchik. Chaywanpis, ¿imaynataq kanman mana ñawpaqman riptin? ¿Manachu llakiy kanman? (1 Cor. 3:1-4.) Arí, imaraykuchus ñuqanchikqa, sumaq yachachiqman tukunankuta munanchik.

Bibliap yachachisqanpi tʼukuriyqa, imachus allin imataqchus mana allin kasqanta reparanapaq yanapawanchik. Chaypaq tiempochakuytaq, mana atikullanchu (Sal. 1:1-3). Chayrayku, ni teleta qhawayta munaypis, ni ñuqanchikpaq imata ruwayta munaypis, ni wak ruwaykunapis, jarkʼanawanchikchu tiyan. Arí, yuyayninchik astawan allin wakichisqa kananpaqqa, Bibliata, ‘allin kamachi, yuyayniyuq’ urqhusqan publicacionesta ima, ukhunchaspa miskʼirichikunanchik tiyan (Mat. 24:45-47). Bibliata sapa pʼunchay ñawirinanchik tiyan. Chantapis, Familiapi Diosta yupaychanapaq, mana entiendey atina yachachiykunata ukhunchanapaq ima, tiempochakunallanchiktaq tiyan.

México suyupi, qutuchakuykunata waturiq hermano Jeronimoqa, Torremanta Qhawaq revistata, sapa chayamusqantawan ukhuncharin. Chantapis, warminwan Bibliata ukhuncharinankupaq, tiempochakullantaq. Pay jinata nin: “Bibliata sapa pʼunchay ñawiriyku, Veamos ‘la buena tierra’ nisqa folletowanpis yanapachikuyku”. Wak cristiano Ronald sutiyuqqa, sapa semana Bibliata ñawirinapaq wakichikusqanta, mana saqispa ñawirin. Chantapis, wak publicacionestawan ukhunchachkallantaq. Pay nin: “Chay yachakuchkasqay publicacionesqa, astawan yachakuyta munanaypaq tanqawan”, nispa.

¿Ñuqanchikrí? Bibliap nisqanpi tʼukurinapaq, ukhunchanapaq ima, ¿tiempochakunchikchu? ¿Yuyayninchikta sumaqtachu yachachinchik? Bibliap nisqanmanjina imatapis ruwanapaq, ¿sumaq wakichisqañachu kanchik? (Pro. 2:1-7.) Riqsiyninchikpi, yachayninchikpi ima, wiñay tukusqa kananchikkama, ñawpaqman riyta munanchik. Chaypaqtaq, imachus allin, imataqchus mana allin kasqanta reparananpaq, yuyayninchikta sumaqta yachachinanchik tiyan.

[23 paginapi dibujo/foto]

Yuyayninchikta “sapa pʼunchay” yachachina tiyan