Diospaq llamkʼaspa kallpachakuna

‘Yugoyman churakuychik, almasniykichikpaqtaq samakuyta tarinkichik.’ (MAT. 11:29.)

1. Jehová, ¿ima kamachiytataq Sinaí urqupi israelitasman qurqa, imaraykutaq?

JEHOVÁ, Sinaí urqupi israelitasman Leyta quchkaspa, sabadotawan waqaychanankuta kamachirqa. Moisesniqtataq, Israelman jinata kamachirqa: “Sojta pʼunchaykunata llankʼanki, qanchis kaj pʼunchaypitaj samarikunki, wakasniyki, burrosniyki samarikunankupaj, jinallataj warmi kamachiykej wawan kallpachakunampaj, jinallataj forasteropis”, nispa (Éxo. 23:12). Jehovaqa, munakuyninrayku israelitas “samarikunankupaj”, watiqmanta kallpacharikunankupaq ima, chayta kamachirqa.

2. ¿Imastataq sábado pʼunchaypi Israelitas ruwayta atirqanku?

² Sábado pʼunchay, ¿samarikunallankupaqchu karqa? Mana. Diosta yupaychanankupaq ima karqa. Tatasqa, familiankuta Jehovap ‘ñankunanpi puriyta’, chiqan kaqta ruwayta ima, chay pʼunchaypi yachachinanku karqa (Gén. 18:19). Mana chayllachu, familias, amigos ima, Jehovap ruwasqasninpi tʼukurinankupaq, kusirikunankupaq ima, tantakuyta atirqanku (Isa. 58:13, 14). Chantapis sábado pʼunchayqa, Cristo Waranqa Watasta Kamachiyninpi, imatachus ruwananta rikuchinanpaq karqa (Rom. 8:21). ¿Kunan tiempopirí? ¿Imaynamantataq chiqa cristianos Jehovap ‘ñanninpi purinallapaqpuni’ kallpata japʼisunman?

Hermanosninchikwanqa kallpacharikunchik

3. ¿Imaynatataq ñawpa cristianos yanapanakuq kanku, chantá chay ruwasqanku yanaparqachu?

³ Apóstol Pabloqa, qutuchakuyninchik “cheqa kajta waqaychaj, sayachejtaj” kasqanta nirqa (1 Tim. 3:15). Ñawpa cristianosqa, paykunapura yanapanakuq kanku. Chantapis, munakuypi sunquchanakuspa kallpachanakuq kanku (Efe. 4:11, 12, 16). Sutʼincharinapaq, Corintomanta wakin hermanosqa, Pablota Efesopi kachkaptin waturirqanku. Chaytaq, mayta kallpacharqa. Pay nin: “Kusikuni jamusqankumanta Estefanas, Fortunato, Ajaico ima. [...] Paykunaqa sonqoypi kallpachawarqanku”, nispa (1 Cor. 16:17, 18). Titopis, Corinto llaqtapi hermanosta yanapaspa kusikullarqataq. Chayrayku, Pablo astawan qhipaman juknin cartanpi nirqa: “Qankuna sonqonta pataman oqharerqankichej”, nispa (2 Cor. 7:13). Kunan tiempopi Jehovamanta sutʼinchaqkunapis, hermanosninkuwan khuska kaspa, kusisqa, kallpachasqastaq kanku.

4. ¿Imaynatá tantakuykuna kallpachawanchik?

⁴ Yachanchikjina tantakuykunapiqa, may kusiyta tarinchik. Chaypiqa, wakkunap iñiyninkuta rikuspa, ‘puraqmanta kallpachanakunchik’ (Rom. 1:12). Hermanosninchikqa, mana riqsisqasllachu, pikunawanchus wakin  kutilla tinkunchik. Manaqa, chiqamantapuni amigosninchik kanku, pikunatachus munakunchik, jatunpaqtaq qhawanchik. Paykunata tantakuypi sapa semana rikuspataq, kallpachakunchik, sunquchakunchik ima (File. 7).

5. Jatun tantakuykunapi, ¿imaynatá kallpachanakusunman?

⁵ Jatun tantakuykunaqa, mayta kallpachallawanchiktaq. Imaraykuchus chaypiqa, Bibliamanta chiqa yachachiykunata yachakunchik. Wak hermanostapis riqsiyta atinchik (2 Cor. 6:12, 13). Manchalis kanchik chayrí, ¿imatá ruwasunman? Chay tantakuypi, imallapipis yanapaysikusunman. Juk hermanaqa, achkha suyuspaq jatun tantakuypi yanapaysikuytawan, jinata nirqa: “Ñuqaqa familiayta, amigosniyta imalla riqsirqani. Chaywanpis, jatun tantakuypi yanapakuspaqa, achkha hermanosta, hermanasta ima, riqsirqani, chaytaq mayta kusichiwarqa”, nispa.

6. ¿Imata ruwaspataq Diosta yupaychaypi kallpachakullasunmantaq?

⁶ Jerusalenpiqa, watapi kimsa tantakuykuna kaq. Israelitastaq, kimsantin kutita chayman riq kanku (Éxo. 34:23). Achkha israelitasqa, llamkʼanankuta, ranqhanankuta ima, saqispa, chakipi achkha pʼunchaykunata riq kanku. Chaywanpis chay ruwasqankuqa, mana qhasichu karqa, imaraykuchus templopiqa, ‘sinchʼi kusiywan Jehová Diosta yupaychasqankuta’ rikuq kanku (2 Cró. 30:21). Kunan tiempopipis, Diospa achkha kamachisninqa, familiankuwan Betelta (Jehovamanta sutʼinchaqkunap sucursalninku) riqsimuq rispa kusiyta tarillankutaq. Qamkunapis, qhipan kutipi mayllamanpis riyta munaspa, ¿Betel wasita riqsiq riwaqchikchu?

7. a) Kusirikunapaq tantakuykuna, ¿imaynamantá kallpachawanchik? b) Chay tantakuypi tukuy kallpacharikunankupaq, ¿imaynataq kanan tiyan?

⁷ Familianchikwan, amigosninchikwan ima, kusirikunapaq tantakuspaqa, mayta kallpachawasunman. Yachayniyuq kamachiq Salomón, jinata qillqarqa: “Runapajqa chay tukuy imasmanta nisqaqa aswan allimpuni mikhunan,  ujyanan, tukuy ruwasqanwan kusikunan ima”, nispa (Ecl. 2:24). Hermanosninchikwan ajinata tantarikuspaqa, mana kallpacharikullanchikchu, manaqa astawan paykunata riqsinchik, munakunchiktaq. Chay tantakuy, kallpachanawanchikpaqjina, yuyarinanchikpaqjina ima, kananpaqqa, juchʼuylla kanan tiyan. Chantapis, imatachus ruwakusqanta qhawaq kananpuni tiyan. Kaytaq machanapaq ukyanas kaptin, astawanraq ruwakunan tiyan.

Willamuq rispaqa kallpachakunchik

8, 9. a) Jesuspa, fariseospa yachachiykunasninku, ¿imaspitaq mana kikinchu karqa? b) Diospa Reinonmanta willay, ¿imaynatá yanapawanchik?

⁸ Jesusqa, sunqu kʼajaywan willarqa. Discipulosnintapis kikinta ruwanankuta nirqa: “Cheqatapuni cosechaqa ashkha, oqharejkunarí pisi kanku. Mañakuychej ari cosechaj dueñon Señormanta, astawan oqharejkunata cosechanman kachamunampaj”, nispa (Mat. 9:37, 38). Chay sumaq willayqa tukuyta sunqucharqa (Mat. 4:23; 24:14). Manataq Fariseospa churasqanku kamachiykunajinachu karqa (Mateo 23:4, 23, 24, ñawiriy).

⁹ Diospa Reinonmanta willaspaqa, Bibliap chiqa yachachiykunasninta, yuyayninchikpi, sunqunchikpi ima, astawan japʼinchik. Yachakuyta munaqkunataq, chay willayta uyarispa sunqu juntʼasqa qhipakunku. Chayraykuchá, salmista nirqa: “Jatunchasqa kachun Tata Diosqa. May sumajmin Diosninchejman takeyqa; yupaychayqa kʼachapuni”, nispa (Sal. 147:1). Qamrí, Jehovata chay llamkʼaywan jatunchanaykipaq, ¿kallpachakuwaqchu?

10. Willaypi runas mana uyariwaptinchikpis, ¿imaraykutaq ruwayninchik mana qhasipaqchu kasqanta nisunman?

¹⁰ Wakin chiqaspi runasqa, astawan chiqa yachachiykunata uyariyta munanku (Hechos 18:1, 5-8, ñawiriy). Maypichus tiyakunki chaypi, runas mana uyariyta munanku chayqa, Jehovap sutinta runasman willamunaykipaq kallpachakusqayki, mana qhasipaqchu kasqanpi tʼukuriy (1 Cor. 15:58). Chantapis, llamkʼayninchik allin kasqanqa, mana runas uyarinawanchikmantapunichu. Jehová Diosninchikqa, Reinomanta willayta llampʼu sunquyuq runasman, imaynallamantapis chayachinqapuni (Juan 6:44).

Familiapi Diosta Yupaychay Chʼisiqa, kallpachawanchik

11. ¿Ima kamachiytataq Jehová tatasman qun, imaynatataq juntʼayta atinkuman?

¹¹ Tatas, Jehovamanta, munayninmanta ima, wawasniykichikman yachachinaykichik tiyan (Deu. 11:18, 19). Ima pʼunchaychus, ima horachus, Diosmanta yachachinaykichikta, ¿paykunawan parlankichikñachu? Jehovaqa, qusasta familiankuta paypa yuyaychayninpi uywanankupaq yanapayta munan. ¿Imaynamantá? Librosta, revistasta, videosta, uyarinapaq grabacionesta ima, quspa.

12, 13. a) Familiapi Diosta Yupaychanapaq Chʼisi, ¿imaynamantá yanapawanchik? b) Chay tantakuy tukuy familiata kallpachananpaq, ¿imaytá tatas ruwankuman?

¹² Allin kamachi yuyayniyuqqa, Familiapi Diosta Yupaychanapaq Chʼisita churan, jinamanta familiantin sapa semana Bibliamanta yachakunankupaq. Achkha tatasqa, chay tantakuy, familiankuta Jehovaman astawan qayllachisqanta, astawan jukchasqanta, munakuyninkuta astawan wiñachisqanta ima, sutʼinchanku. Chantapis, chay tantakuy tukuy familiata kallpachananpaq, ¿imaynatá ruwankuman?

¹³ Familiapi Diosta Yupaychanapaq Chʼisiqa, mana puñuyta chʼutunapaqjinachu kanan tiyan, manaqa, kusichinapaqjina. Imaraykuchus, ‘kusisqa Diosta’ yupaychachkanchik, paytaq kusiywan yupaychananchikta munan (1 Tim. 1:11, NM; Fili. 4:4). Jehová, chiqa yachachiykunata ukhunchanapaq juk chʼisitawan quwasqanchikqa, may sumaq yanapa. Tatastaq tukuy imaymanamanta wawasninkuta yachachinanku tiyan. Sutʼincharinapaq, 10 watasniyuq Brandonqa, Bibliapi  Kuraq Supayta katariwan kikinchakusqanta mana allinpaqchu qhawaq. Imaraykuchus katarista mayta munakuq, tatasninqa chayta yachaspa kay tapuyta sutʼinchananta nirqanku: “¿Imaraykutaq Bibliapi, Satanasta katariwan kikinchakun?”, nisqata. Wakin familiaspiqa, Bibliamanta juk chiqata ñawirinankupaq akllanku, sapa juktaq, chay tiempomanta runapaq kanmanjina ñawirin chayri ruwan. Ajinata ruwayqa, wawasta kusichin, sunqunkumantaq chayan, imaraykuchus paykunapis parlarinku. *

Tiemponchikta allinta apaykachana

14, 15. a) Kay tukukuy tiempopi, ¿imaraykutaq llakiykuna, chʼampaykuna ima, yapakun? b) ¿Ima chʼampaykunatawantaq cristianos rikunchik?

¹⁴ Kay tukukuy tiempopiqa, llakiykunawan chʼampaykunawan manchayta yapaykukun. May chhika runasqa, mana llamkʼayniyuq, mana qullqiyuq ima, kanku. Llamkʼayniyuq kaqkunataq, juskʼu bolsillomanpis qullqita churachkankumanjina, ñakʼayllata familiankupaq alcanzachikunku (Hageo 1:4-6, kikinchay). Kamachiqkunawan politicoswantaq, saqra kawsayta chinkachinankupaq ni imata ruwayta atinkuchu. Runasqa, pantasqankurayku ñakʼarinku (Sal. 38:4).

¹⁵ Cristianospis, Satanaspa saqra pachanpi tukuy runasjinallataq ñakʼarinchik (1 Juan 5:19). Wakin kutitaq, Jehovaman chiqa sunqu kananchikrayku, astawan chʼampaykunataraq muchunchik. Jesusqa nirqa: “Noqatachus chejnikuywan qhatiykachawarqanku chayqa, qankunatapis chejnikuywan qhatiykachallasonqachejtaj”, nispa (Juan 15:20). Chaywanpis, ‘qhatiykachasqa kachkaptinchikpis, mana saqirparisqachu kanchik’ (2 Cor. 4:9). ¿Imaraykutaq jinata ninchik?

16. ¿Imataq kusikuyninchikta mana chinkachinapaq yanapawanchik?

¹⁶ Jesusqa, jinata runasta waqyarin: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej”, nispa (Mat. 11:28). Cristop wañuyninpi iñiptinchikqa, Jehovap makinman churakunchik, paytaq ‘chay may sumaq atiyta’ quwanchik (2 Cor. 4:7). Chantapis espíritu santonta, iñiyninchikta kallpachanapaq quwanchik. Jinamanta mana chʼampaykunallatachu atipanchik, manaqa kusikuyninchikta mana chinkachinchikchu (Juan 14:26; Sant. 1:2-4).

17, 18. a) Diospa kamachisnin, ¿imamantaq mana qukunanchikchu tiyan? b) Sunquta kusichiyllaman tiemponchikta churaptinchik, ¿imapitaq tukusunman?

¹⁷ Jehovap kamachisninqa, mana kay pachamanta runasjinachu kusikuyllaman qukunanchik tiyan (Efesios 2:2-5, ñawiriy). Imaraykuchus, “kay pachapi tiyan aychaj sajra munaynin, ñawispa rikusqanta munapayay, imatapis ruwasqanmanta, kapuyninmantataj runaykachay ima” (1 Juan 2:16). Chantapis, Diospa munayninpa contranta ruwaspa, kusisqa kananchikta yuyasunman (Rom. 8:6). Sutʼincharinapaq, wakin runasqa, kusiyta tariyta munaspa, drogasman, machayman, qʼala runasta qhawayman, mana allin pukllaykunaman chayri wak saqra ruwaykunaman qukunku. Satanasqa, ‘urmachiq saqra yuyasqasninwan’ chʼawkiyayta munawanchik, saqra ruwaykuna kusiyta apamuwasqanchiktataq, yuyachiyta munawanchik (Efe. 6:11).

 ¹⁸ Allin yuyaywan mikhurikuy, ukyarikuy, imallapipis kusikuy imaqa, mana juchachu. Chaywanpis chaykunataqa, mana ñawpaqmanchu churananchik tiyan. Tukukuy pʼunchaykunapi kawsasqanchikrayku, tiemponchikta allinta apaykachananchik tiyan. Munayninchikta juntʼayllaman qukusunman chayqa, llakiyllaman chayasunman, ‘Señorninchik Jesucristota riqsiypitaq’ pachallanpi kakusunman (2 Ped. 1:8).

19, 20. ¿Imatataq kallpachasqallapuni kanapaq ruwasun?

¹⁹ Jehovajina yuyaqkunaqa, kay pachap kusikuynin juk tiempollapaq kasqanta yachanku. Moisés chayta yacharqa, ñuqanchikpis yachallanchiktaq (Heb. 11:25). Chiqamantapuni, kusisqa, sunqu juntʼasqa ima, kayta munaspaqa, janaqpacha Tatanchikpa munayninta ruwananchik tiyan (Mat. 5:6).

²⁰ Diospaq astawan llamkʼaspa kallpachakuna. Jinamantaqa, “mana cheqan kajman jina kawsaytaqa qhesacha[sunchik], kay pachaj sajra munapayaynintapis [...]. Ajinata kawsaspa, suyakushanchejpuni chay kusiy pʼunchay chayamunanta, [maypachachus jatun Diosninchik, Salvawaqninchik Jesucristo ima, jatun kayninkuq kʼanchayninkupi rikhurimunqanku chaypacha, NM]” (Tito 2:12, 13). Jesuspa yugonman churakunachik. Kamachiwasqanchiktataq tukuy imapi kasukuna. Ajinamanta chiqamantapuni kallpachasqas, kusisqataq kasunchik.

[Sutʼinchaynin]

¿Imatá kutichiwaq?

• Jehovap kamachisnin, ¿imaynamantá kallpachakunku?

• ¿Imaynatá willayninchik ñuqanchikta yanapawanchik, jinallatataq uyariqkunatapis?

• Familiapi Diosta Yupaychanapaq Chʼisi kallpachanawanchikpaq, ¿imatá tatas ruwananku tiyan?

• ¿Ima ruwaykunataq Diosta yupaychaymanta karunchawasunman?

[Tapuykuna]

[26 paginapi dibujos/fotos]

Jesuspa yugonman churakuspaqa kallpachakunchik