Munakuypi jukchasqas. Watapi juk kuti tantakuy ruwakusqanmanta

ESTADOS UNIDOSMANTA Nueva Jersey llaqtapiqa, Jatun Tantakuykunapaq Wasipi, 2009 wata, 3 octubre pʼunchayta phichqa waranqamanta kuraq runas kusisqa tantakurqanku. Chay pʼunchayqa, Watch Tower Bible and Tract Society of Pennsylvania nisqa, 125 tantakuyninkuta ruwachkarqanku. Chantapis, Estados Unidos betelmanta kimsa lugaresninpi, Canadá suyumanta sucursalpi ima, achkha hermanos tantakullarqankutaq. Paykunataq, chay tantakuyta videoniqta uyarirqanku. Chay tantakuyqa kimsa horasta karqa, 13.235 hermanostaq Jehovata munakusqankurayku tantakurqanku.

Diospa Llaqtanta Kamachiqkunamanta Geoffrey Jackson, chay tantakuyta kamachirqa. Payqa, musuq takinapaq libronmanta, juk qutu Betelitas takisqankuta uyarinankuta nispa, chay tantakuyta qallarichirqa. Chay takiqkunataqa, Diospa Llaqtanta Kamachiqkunamanta, David Splane kamachirqa. Ñawpaqtaqa, chiqa yupaychaypi takiykuna, may sumaq kasqanta, tumpata sutʼincharqa. Chantaqa, chay takiqkuna kimsa takiykunata takirqanku. Chantá chay tantakuypi kaqkunata takiysinankuta mañarqanku. Chay takiqkunata takichisqankuqa, chay tantakuyllapaq karqa, manataq qutuchakuykunapi, jatun tantakuykunapi ima, kikinta ruwakunanchu tiyan.

Sucursalesmanta willaykuna

Chantá, 5 suyusmanta 5 hermanos, pikunachus suyunkup sucursalninpi kamachiqkunamanta kanku, suyunkupi ruwaykunamanta parlarirqanku. Canadamanta Kenneth Little hermanoqa, pisimantawan Canadapaq, yaqha tukuynin Estados Unidospaq ima, revistasta ruwanankuta nirqa. Chay ruwasqanku chunkapiwanjina yapakusqanraykutaq, juk musuq maquinata 16 horasta sapa pʼunchay llamkʼachiyta qallarinankuta nirqa.

Reiner Thompsonqa, República Dominicanapi, imaynatachus Diospaq llamkʼachkasqankumanta parlarirqa. Albert Olihtaq, Nigeria suyumanta parlarirqa. Mozambique suyumanta Emile Kritzinger hermanotaq, 1992 watakama qhatiykachasqas kaspapis, chay watapi juk religionjina qillqasqa kasqankumanta parlarirqa. Kay kimsa suyuspiqa, Reinomanta willaqkuna achkhata yapakunku. Australiamanta Viv Mouritztaq, Timor Orientalpi willaqkuna imaynatachus yapakuchkasqankumanta parlarqa.

Diospa Llaqtanta Kamachiqkunap comisionesnin

Kay 1976 watapiqa, Diospa Llaqtanta Kamachiqkuna suqta comisionespi tʼaqakurqanku, Diospa Reinomanta willay Jallpʼantinpi ñawparinallanpaqpuni. Aswan qhipamanqa, wak ovejasmanta kaqkuna, chay comisionespi yanapanankuta saqirqanku, kunantaq 23 kanku. Chay tantakuypiqa, suqta yanapaqkunata tapurirqanku, tukuyninkuqa 341 watastaña Diospaq juntʼamanta llamkʼasqanku, sapa juktaq 57 watasta.

Ñawpaqtaqa, Don Adamsta tapurirqanku, payqa 1943 watapi Betelpi llamkʼayta qallarirqa. Paytaq, Umachaqkunamanta Comisionpi, chay wak phichqa comisionesmanta Umachaqkuna khuska llamkʼasqankuta nirqa. Kay comisionqa, Jallpʼantinpi Jehovamanta sutʼinchaqkunata, jatun chʼampaykuna rikhuriptin, qhatiykachaptinku, wak llakiykuna rikhuriptin ima, yanapan.

Dan Molchanqa, Llamkʼaqkunapaq Comisión, pachantinpi 19.851 betelitaspa allinninkuta qhawasqanta nirqa. David Sinclairtaq, Publicacionespaq Comisión, sucursalespaq maquinasta, wak imastawan rantikusqanta qhawasqanta nirqa. Chantá, Robert Wallen, pichus yaqha 60 watastaña betelpi kachkan, Willaypaq Comisión, Jehová Diospa llaqtan willaypi ñawparinanpaq,  qutuchakuykunata qhawasqanta ima, sutʼincharqa. William Malenfanttaq, Yachachinapaq Comisión, jatun tantakuykunapaq yachachiykunata wakichisqanta sutʼincharqa. Tukuchanapaqtaq, John Wischuk, Qillqaqkunapaq Comisión, publicacionesninchikpi yachachiykuna lluqsinanpaq, sumaqta qhawarisqanta sutʼincharqa. *

Kay 2010 watapaq pʼitiqa munakuymanta parlan

Chantaqa, Diospa Llaqtanta Kamachiqkunamanta kimsa hermanos umallirichirqanku. Ñawpaqtaqa, hermano Gerrit Lösch, kay tapuywan qallarirqa: “¿Munakusunankuta munankichu?”. Chantá, munasqa kayta necesitasqanchikta, munakuyllataq ñawpaqman rinapaq yanapawasqanchikta ima, sutʼincharqa. Chantapis Jehová Diosqa, munakuyninrayku ruwawarqanchik. Ñuqanchikpis, Jehovata munakusqanchikrayku, runasman willamunchik, yachachimunchik ima.

Cristianospa munakuyninkuqa, Diospa yuyaychasqanmanjina, manataq runa masillankutachu munakunku, manaqa enemigosninkutapis (Mat. 5:43-45). Kay umallirichiypiqa, ñuqanchikrayku imaynatachus Jesusta ñakʼarichisqankupi tʼukurinankuta mañakurqa. Jesusqa, enemigosnin ñakʼarichispa kurkupi wañuchiptinkupis, Diosmanta paykunapaq mañapurqa. ¿Manachu chayta yachaspa, Jesusta astawan munakunchik? Chantá, hermano Lösch, 2010 watapaq pʼiti, 1 Corintios 13:7, 8, pʼitikunamanta urqhukusqanta nirqa: ‘Munakuyqa tukuy imata muchun, nitaq jaykʼaqpis tukukunqachu’. Arí, mana wiñay kawsayllatachus japʼiyta atisunchik, manaqa, wiñay wiñaypaq munakuyta, munachikuyta ima, atisunchik.

¿Tanquenchikpi gasolina tukukuchkanñachu?

Samuel Herdqa, umallirichiyninta juk kikinchaywan qallarirqa. Juk amigonchik, autonpi 50 kilometrosta apachkawasqanchikpi tʼukurina. Tiyananchikmantapacha gasolina pisiyachkasqanta reparanchik. Amigonchikman willaptinchiktaq, payqa, “tawa litrosraq tiyan, ama llikukuychu” nispa niwanchik. Chaywanpis motorqa, tumpamantawan wañupun. Ajinata sayarparinapaq pisi gasolinallawan riy, ¿allinchu karqa? ¿Manachu astawan allin kanman karqa, tanquepi gasolinata juntʼata apakuy? Diosta yupaychaywanpis kikillantaq, “tanquenchikqa” Jehová Diosta riqsiymanta juntʼa kanan tiyan.

Diosta yupaychaypi, gasolinanchik mana pisiyananpaq, sapa kuti juntʼachinanchik tiyan. Chaytataq tawaniqmanta ruwasunman. Ñawpaqtaqa, Bibliata sapallanchikpi ukhunchananchik tiyan. Bibliata sapa pʼunchay ñawirispa, allinta riqsinanchikpaqtaq, imatachus nisqanta entiendenapaq kallpachakunanchik tiyan. Chantapis, Familiapi Diosta Yupaychanapaq Chʼisita ruwananchik tiyan. ¿Sapa semanachu,  tanqueman gasolinata juntʼachinchik chayri tumpallatachu yaparinchik? Chantá, Bibliamanta qutuchakuywan yachakunapaq, tantakuyman rinanchikpuni tiyan. Tukunapaq, Jehová Diospa ñankunanpi sapallanchikpi tʼukurinanchik tiyan. Salmistajina ninachik: “Ñawpa pʼunchaykunamanta yuyarikuni, tukuy ruwasqasniykipi yuyarikuni”, nispa (Sal. 143:5).

“Cheqan kaj runastajri inti jina lliphipenqanku”

Tukunapaqtaq John Barr umallirichirqa, paytaq trigomanta, sizaña qhuramantawan sutʼincharqa (Mat. 13:24-30, 38, 43). Kay rikchʼanachinaqa, ‘reinop wawasninta’ ‘cosechapi’ tantakusqanta nin, sizaña qhuratataq ruphachinapaq tʼaqakusqanta nin.

Hermano Barrqa, cosecha tukukuyninman chayananta nirqa. Chantá, Mateo 24:34, [NM] pʼitimanta ñawirirqa: “Kay mita runasqa manaraq wañunqankuchu, chay tukuy ima juntʼakunankama”, nispa. Iskay kutitataq kayta ñawirirqa: “Kay 1914 watapi, —Cristop kutimuynin qallarichkaptin— kawsaq akllasqa cristianos manaraq wañupuchkaptinku, wak akllasqa cristianospa kawsayninku qallarichkarqa, paykunataq jatun ñakʼariypa qallariyninpi kawsanankuraq karqa”. Chay ‘mita runasqa’, imaymana wiña akllasqa cristianos kanku, chaywanpis tukuyninku, tukukuy pʼunchaykunamanta juk tiempopi kawsakunku. Chay ‘mita runas’ machkha unaytachus kawsanankutaqa, mana yachanchikchu, chaywanpis, mana juk wiñallachu kasqankuta yachanchik. Kay 1914 watapi, Cristop kamachichkasqantaña reparaq akllasqa cristianoswan, juk tiempopi kawsaq akllasqa cristianosqa, jatun ñakʼariy qallarichkaptin kawsachkanqankuraq, chayta yachayqa, ¡mayta kusichiwanchik!

‘Reinop wawasninqa’, janaqpacha tʼinkata mayta suyachkanku. Jallpʼapi kawsayta suyakuqkunapis, paykunajina tukukuykama lliphipirispa chiqa sunqu kananchik tiyan. ‘Trigota’ uqharikuchkasqan tiempopi kawsayqa, ¡may sumaq!

Tukuchanapaq takisqankutawantaq, Diospa Llaqtanta Kamachiqkunamanta, Theodore Jaracz Diosmanta mañakuspa tukucharqa. Chay tantakuyqa, ¡may sumaqpuni karqa!

[Sutʼinchaynin]

[5 paginapi recuadro]

ANCIANOSTA YACHACHINAPAQ

Diospa Llaqtanta Kamachiqkunamanta Anthony Morrisqa, ancianos aswan wakichisqa kanankupaq, wak yachachiypiwan paykunapaq kananta nirqa. Kay 2008 wata qallariypi, Estados Unidosmanta ancianospaq, Patterson llaqtapi juk yachachiy qallarirqa. Kunankamaqa, 72 kutitaña chay yachachiy ruwakun, 6.720 ancianosñataq yachachisqa kanku. Chaywanpis, achkha ancianosraq yachachisqa kananku tiyan. Imaraykuchus Estados Unidosllapi, 86.000 kuraq ancianos kanku. Chayrayku, Diospa Llaqtanta Kamachiqkunaqa, kikin yachachiy Brooklyn llaqtapiwan, 2009 diciembre 7 pʼunchaypi qallarinanta nirqa.

Qutuchakuykunata waturiq tawa hermanosta, Pattersonpi iskay killata yachachinqanku. Chantá, Brooklyn llaqtaman yachachiq rinqanku. Chantaqa, wak tawa hermanostañataq kikinta yachachinqanku, paykunapis Brooklynllamantaq yachachiq rinqanku. Ñawpaqta kachasqa tawa yachachiqkunataq, Jatun Tantakuykunapaq Wasispi, chayri Tantakunapaq Wasispi yachachimunankupaq ripunqanku. Chayqa, Estados Unidospi chunka iskayniyuq yachachiqkuna kanankukama ruwakunqa, paykunataq inglés qallupi, suqta chiqaspi sapa semana yachachinqanku. Chantá, español qallupi yachachinankupaq, tawa yachachiqkunata yachachinqanku. Chay yachachiyqa, mana Escuela del Ministerio del Reino nisqawan, kikinchu. Astawanpis, ancianos Diosta yupaychaypi sumaq sayasqa kanankupaq wakichikun. Tukuy sucursalestaq, 2010 wata septiembre killamantapacha, Jatun Tantakuykunapaq wasispi, Tantakunapaq Wasispi ima, ajinata yachachiyta qallarinqanku.

[4 paginapi dibujos/fotos]

Watapi juk kuti tantakuyqa, Jehová Diosman takinachik musuq libromanta urqhusqa takiykunawan qallarirqa