Wasanchasuptinpis ñawpaqman riyta atinki

MARGARITAWAN qusan Raulwanqa, achkha watastaña Jehová Diospaq sinchita llamkʼarqanku. * Chaywanpis Raulqa, wawanku paqarikusqantawan, pisimanta pisi Jehová Diosmanta karunchakuyta qallarisqa, chantataq khuchichakuypi urmasqa, qutuchakuymantataq wikchʼuchikusqa. Margarita nin: “Tukuy chayta rikuspaqa, wañupuyta yuyarqani. Sunquyqa pʼakisqa kachkarqa, ni imanakuytataq atirqanichu”, nispa.

Janepa qusanqa, wakjinamantañataq payta wasanchasqa. Casarakusqankumanta juk chhikan tiempomanqa, Janeta maqayta qallarisqa. Pay nin: “Qusay, ñawpaq kutipi saqmawaptinqa, qhasa yakuwanpis qhallaykuwankumanjina karqa, chantapis sarusqa, pʼinqasqataq kachkarqani. Payqa, perdonta mañakuwarqa, ñuqataq perdonarqani. Manataq chay kutillachu chayta ruwarqani, manaqa achkha kutita, cristiana kasqayrayku perdonaspa qunqanay kasqanta yuyasqayrayku. Nitaq pimanpis, ni ancianosmanpis willarqanichu, imaraykuchus chayta ruwaspaqa, qusayta wasanchasqayta yuyarqani. Paytaq, achkha watasta kikillantapuni ruwawarqa, ñuqataq perdonallaqpuni kani. Chantapis, qusay munakunawanpaq, imatapis ruwanaypuni kasqanta yuyaq kani. Chayrayku, qusay wawitaytawan saqirpawaptinqa, ripunanpaq ñuqa juchayuq kasqayta yuyaq kani”, nispa.

 Qamtapis, ichá Margaritatajina chayri Janetajina, qusayki wasanchasunki, chayraykutaq achkha llakiyniyuq kachkanki. Mana chayrí, warmiyki wasanchasusqanrayku, sunqu pʼakisqa, llakisqataq kachkanki. Biblia ninjina, chiqamantapuni manchay ñakʼariy tiempopi kachkanchik. Chantapis chay profecía nisqanmanjinaqa, “manchay sajra pʼunchaykuna” kasqanrayku, familiapi munanakuy pisiyanan karqa, achkha runaspis, ruwasqankuniqta Diosta mana yupaychasqankuta rikuchinanku karqa (2 Tim. 3:1-5). Chiqa cristianospis, chay chʼampaykunata rikullanchiktaq. Chayrayku qusayki chayri warmiyki wasachansunki chay, ¿imaynatá chay chʼampayta atipawaq?

Jehovajina yuyay

Ichapis qallariypiqa, pitachus munakunki chay, ajinata ñakʼarichisusqanta, mana yuyayniykipi japʼiyta atinkichu. Astawanpis, qusayki chayri warmiyki mana allinta purisqanmanta, ichá qamraq juchachakunki.

Chaywanpis yuyarikuy, Jesustapis atienekusqan amigon wasancharqa. Jesusqa, Jehovap chiqa sunqu kamachisninmanta 12 apostolesta akllarqa, Tatanpa yanapayninwan. Chayrayku, Judas payta ‘japʼichispa’ wasanchaptinqa, maytachá sunqun nanarqa (Luc. 6:12-16). Jehovataq, Churinta ni jaykʼaq Judasrayku juchacharqachu.

Chantapis, tukuy qusas, warmispis juchasapas kanku. Chayraykutaq pantankupuni. Salmistaqa, Dios yuyaychasqanrayku ajinata nirqa: “Señor, Tata Dios, juchastachus cuentaman churawaj chayqa, pitaj ñawpaqeykipi sayayta atinmanri?”, nispa (Sal. 130:3). Chayrayku, Jehovata yupaychaq qhariwarmisqa, qusankup chayri warminkup pantasqanta, Jehovajina perdonananku tiyan (1 Ped. 4:8).

Chantapis, “sapa ujninchej ruwasqasninchejmanta Diosman cuentata qonanchej kanqa” (Rom. 14:12). Chayrayku pillapis, qusanta chayri warminta, maqan chayri imatapis sunqunta nanachinanpaqjina niptinqa, Jehovaman cuentata qunqa. Payqa, maqanakuyta, saqra parlaykunata ima, juchachan. Nitaq, qusaykita chayri warmiykita ajinata kʼumuykachachinaykichu tiyan (Sal. 11:5; Efe. 5:33; Col. 3:6-8). Chantapis, juk cristiano, sapa kuti phiñakuyninwan atipachikun, ruwaynintataq mana tikrayta munanchu chayqa, qutuchakuymanta wikchʼuchikunqa (Gál. 5:19-21; 2 Juan 9, 10). Ajina runawan ñakʼariq warmiqa chayri qusaqa, mana manchachikuspa ancianosman willanan tiyan. Imaraykuchus Jehovaqa, ñakʼariqkunamanta khuyakun.

Qhinchachakuq runaqa, mana warminpa chayri qusanpa contrallanpichu juchallikun, manaqa Jehovap contranpipis (Mat. 19:4-9; Heb. 13:4). Juk runa Diospa yuyaychasqanmanjina, qhariwarmi kawsayninpi ruwananpaq kallpachakun chayqa, qusan chayri warmin wasanchasqanmanta, mana juchachakunanchu tiyan.

Jehovaqa, imaynachus kachkasqaykita yachasqanta ama qunqaychu. Palabranpiqa, Israel suyup qusanjina rikuchikun. Chayraykutaq, chay llaqta sapa kuti wasanchaptin, imaynatachus sunqun nanasqanta willawanchik (Isa. 54:5, 6; Jer. 3:1, 6-10). Jehovaqa, qusayki chayri warmiyki wasanchasusqanmanta machkhatachus waqasqaykita, allinta yachan (Mal. 2:13, 14). Chantapis, sunquchayta, kallpachayta ima, necesitasqaykita yachallantaq.

Jehovaqa sunquchasunki

Jehovaqa, kamachisninta qutuchakuyniqta sunquchan. Janeqa, imaynatachus payta sunquchasqankumanta ajinata nin: “Qutuchakuykunata waturikuq hermanoqa, llakiy atipachkawaptinpuni waturiwaq jamurqa. Qusay divorciakuchkawasqanmanta, may llakisqa kachkasqayta, sumaqta yacharqa. Chayrayku, Bibliapi 1 Corintios 7:15 pʼitiswanjina sunquchawarqa. Bibliamanta pʼitiswan, kʼachamanta parlawasqanwanqa, manaña phutikunaypaq,  sunquy tiyaykunanpaq ima, yanapawarqa”, nispa. *

Margaritapis, Jehová imaynatachus qutuchakuyniqta yanapasqanmanta parlarillantaq: “Qusay wasanchawasqanmanta manapuni pesachikusqanta rikuspaqa, wawasniy pusarisqa wak llaqtaman ripurqani. Tiyakunaykupaqtaq, iskay cuartosta alquilakurqani. Qʼayantinqa, may sunqu pʼakisqa qʼipicharakuyta qallarirqani. Jinallapi wasi punkuta takamurqanku. ‘Dueñachá’, nirqani. Chaywanpis, mana paychu kasqa, manaqa familiayta Bibliamanta yachachiq hermana kasqa. Payqa, dueñata Bibliamanta yachachinanpaq jamusqa. Payta rikuspataq, ¡mayta kusikurqani! Chʼampayniymanta willarisqaytawanqa, iskayniyku waqarikurqayku. Payqa chay ratopacha, chay pʼunchay tantakuyman rinaykupaq, yanapawarqa. Qutuchakuyqa, munakuywan japʼiwarqayku, ancianostaq, Diosta yupaychaypi ñawpaqman rinallaykupaqpuni, tukuy imata wakichiyta qallarirqanku”.

¿Imaynatá wak hermanos yanapankuman?

Qutuchakuyqa, imaymanamanta yanapayta atin. Sutʼincharinapaq, juk familiaqa, Margarita familianpaq llamkʼamunankama, wawitasninta yachaywasimanta kutimuptinku qhawapunankuta nisqanku.

Margarita nin: “Hermanos ñuqata wawasniytawan willaq rinaykupaq waqyariwasqaykumanta, mayta agradecekuni”, nispa. Ajinata ruwaqkunaqa, Cristop kay kamachisqanta juntʼachkanku: “Purajmanta yanapanakuychej ima llakiypi rikhurispapis” (Gál. 6:2).

Wakkunap juchanrayku ñakʼariqkunaqa, ajina yanapata japʼisqankumanta may agradecesqas kanku. Moniquep qusanqa, payta tawa wawaswan, 15.000 dólares manuwan ima, saqirasqa. Monique nin: “Qutuchakuymanta hermanosniyqa, may kʼachas ñuqawan karqanku. Mana yanapayninkuwanqa, nichá imatapis ruwayta atiymanchu karqa. Jehovaqa, chiqamantapuni sumaq compañerosta quwan, paykunataq wawasniyta yanapanankupaq tiempochakunku. Paykunap yanapayninwanqa, wawasniy Diospa ñanninpi sumaqta ñawparinku. Ancianosmanta yuyaychayta mañakuptiyqa, paykunaqa yuyaychariwankupuni. Llakiyniyta willariptiypis, paykunaqa uyariwankupuni”, nispa (Mar. 10:29, 30).

Sumaq amigosqa, pitapis ñawpa chʼampayninkumanta mana yuyarichinanku kasqanta allinta yachanku (Ecl. 3:7). Margarita nin: “Musuq qutuchakuyniymanta hermanaswan, willaymanta, Bibliata yachakuqkunamanta,  wawasmanta chayri wak imasmanta parlaspaqa, miskʼirichikuni. Champʼaynillaymanta mana parlayta munanichu. Llakiyniyta qunqanaypaq yanapawasqankumanta, mayta agradecekuni”.

Ama kikillanwantaq kutichiychu

Wakin kutiqa, mana juchayuq qusa chayri warmiqa, wasanchasqankumanta mana juchayuq kasqanta allinta yachan. Astawanpis, chay juchallikuqpa juchanrayku ñakʼarisqanmanta phiñakun. Chaywanpis, phiñakuynin wiñanallantapuni saqinman chayqa, ichapis Jehovaman chiqa sunqu kanan, aswan allin kasqanta qunqayta qallarinman. Sutʼincharinapaq, wasanchaq qusanman chayri warminman, ichapis kikillanwantaq kutichiyta munanman.

Chayjina yuyay, sunquykipi saphichakuchkasqanta reparakunki chayqa, allin kanman Josuepi, Calebpi ima, tʼukurinayki. Chay iskay runasqa, Sumaq Jallpʼata qhawamuq rispa, kawsayninkutapis wañuy pataman churarqanku. Chaywanpis chay chunka watiqaqkunaqa, mana iñiyniyuq kasqankuta rikuchirqanku, llaqta Jehovap contranpi uqharikunankupaqtaq tanqarqanku. Chantapis, wakin israelitasqa, Josuetawan Calebtawan, rumiswan chʼanqaspa wañuchiyta munarqanku, Jehovapi atienekunankupaq tanqasqankurayku (Núm. 13:25–14:10). Jinamanta mana juchayuq kaspapis, 40 watasta chʼin pampapi muyuykachananku karqa.

Chiqamantachá, Josuewan Calebwanqa, hermanosninku ajinata juchallikusqankurayku ñakʼarinanku kasqanmanta, mayta phiñakurqanku, chaywanpis mana chay phiñakuywan atipachikurqankuchu. Astawanpis, Dioswan allinpi kanankupaq kallpachakurqanku. Tawa chunka watas tukuptintaq, iskaynillanku levitaswan khuska chay mitamanta, Sumaq Jallpʼaman yaykurqanku (Núm. 14:28-30; Jos. 14:6-12).

Ichá qamtapis, wasanchasuq qusaykip chayri warmiykip ruwasqanqa, unayta ñakʼarichisunqa. Ichá divorciakunki, chayraykutaq imaymana chʼampaykunapi rikukunki. Jina kaptinqa, ama mana allin yuyaykunawan atipachikuychu. Astawanqa, Jehová Dios, kamachisqasninta mana kasukuqkunamanta cuentata mañananta yuyarikuy, imaynatachus unay tiempopi israelitaswan ruwarqa, ajinata (Heb. 10:30, 31; 13:4).

Ñawpaqman riyta atiwaq

Ama mana allin yuyaykunawan atipachikuychu. Astawanpis, yuyayniykita Jehovap yuyayninwan juntʼachiy. Jane nin: “Torremanta Qhawaq, ¡Despertad! revistamanta ima, grabacionesta uyarisqay, mayta yanapawarqa. Tantakuykunapis achkhata kallpachawarqa. Chaypi kachkaspataq, sumaqta uyarinaypaq, tapuykuna kaptin kutichinaypaq ima, kallpachakuq kani, chaytaq chʼampayniymanta qunqakunaypaq yanapawaq. Willayman riypis, ajinallatataq yanapawaq. Runasta Jehovapi iñinankupaq yanapaptiyqa, iñiyniypis kallpachakullaqtaq. Bibliamanta yachakuqkunata yanapaspataq, imaynasmantachus Jehovata astawan sumaqta yupaychanaypi tʼukuriq kani”.

Moniqueqa, pimantachus ñawpaqta parlarqanchikña, nin: “Tantakuykunaman risqay, tukuy atisqayta willamusqay ima, ñawpaqman rinallaypaqpuni yanapachkawan. Kunanqa, wawasniywan aswan jukchasqa kachkayku, ajinallatataq hermanosmanpis. Chay chʼampaykunata rikusqayqa, imaspichus allinchakunay kasqanta rikuchiwan. Sapallaymantaqa, mana atipayta atiymanchu karqa, chaywanpis Jehovap yanapanwanqa, atipayta atirqani”, nispa.

Qampis, chayjina chʼampaykunapi, ñawpaqman riyta atillawaqtaq. Wasanchasusqankurayku, mayta ñakʼarichkaptiykipis, Pablop yuyaychasqanmanjina ruwanaykipaq kallpachakuy: “Ama saykʼunachu allin kajta ruwaspa, imaraykuchus mana saykʼuspa trabajallasunchejpuni chayqa, maychus tiemponmpi sumaj poqoyta oqharisun” (Gál. 6:9).

[Sutʼinchaynin]

[31 paginapi dibujo/foto]

Wasanchasqa kasqankurayku llakisqa kaqkunaqa, willaypi yanapata japʼisqankumanta mayta agradecekunku