Astawan runasman willanaykipaq wakichikuy

QUTUCHAKUYNIYKI willan chaypi, pillamanpis willanaykipaq, ¿wakichisqachu kachkanki? Finlandia suyumanta Turku llaqtapi hermanosqa, ajina wakichisqa kasqankurayku, wak suyuyuq runasman willayta atirqanku.

Hermanosqa, Turku llaqtaman asiamanta runas, chaypi ruwakuchkasqan jatun barcota tukuchanankupaq chayasqankuta yachasqanku. Juk hermanotaq, chay llaqtapi mayqin alojamientospichus kachkasqankuta, chaymantapachataq autospi llamkʼayninkuman risqankuta ima, yachasqa. Chayrayku, usqhayllata inglés qallupi kaq qutuchakuyman willamusqa.

Chay qutuchakuymanta ancianostaq, chay runasman Diospa Reinonmanta willananku kasqanta reparaspa, usqhayllata tukuy imata wakichiyta qallarirqanku. Chay semanap domingontaq, qanchis hora paqarintaña, chunka hermanos, mayniqmantachus chay autos lluqsinku chayman chayasqanku. Chayaytawanqa, ni juk runallatapis rikurqankuchu, chayrayku “qhipatasina chayamunchik chayri, ¿kay llaqtamanta ripunkuñachu?” nispa ninakusqanku. Jinallapi, juk runa llamkʼanapaqjina pʼachallisqa esquinata muyuykamusqa. Ajinamanta jukmanta juk, achkha rikhurimurqanku. Hermanosqa, usqhayllata paykunawan parlayta qallarirqanku, inglés qallupi publicacionestataq jaywararqanku. Chantapis, paykunawan sumaqta parlarirqanku, imaraykuchus autosqa, juk horamantawanraq lluqsirqanku. Chay runasqa, 126 folletosqa, 329 revistasta ima, apakurqanku.

Qhipan semanataqa, qutuchakuykunata waturiq hermano, qutuchakuyninkuta waturichkarqa. Hermanostaq, chay runas sumaqta uyarikusqankurayku, juktawan kutinankupaq wakichikurqanku. Chay pʼunchay parachkaptinpis, waturikuq hermanoqa, suqta hora khuskanniyuq paqarinta, ñapis willayman lluqsinapaq tantakuyta ruwachkarqaña. Chaymantataq iskay chunka tawayuq hermanos, maymantachus autos lluqsinku chayman rillasqankutaq. Ñawpaq kutipi Filipinasmanta achkha runasta tarisqankuraykutaq, tagalo qallupi achkha publicacionesta apasqanku. Chay paqarinqa, llamkʼaq runasman 7 librosta, 69 folletosta, 479 revistasta ima, jaywasqanku. Chayrayku chay hermanosqa, ¡mayta kusikurqanku!

Hermanosqa, niraq chay runas suyusninkuman kutipuchkaptinku, wakinman alojamientonkupi Diospa Reinomanta astawan sutʼincharimurqanku. Paykunamanta achkhastaq, wak suyuspipis Jehovamanta sutʼinchaqkunata uyarisqankuta nirqanku. Chantapis chay suyupi kachkaptinku, paykunawan parlarisqankumanta mayta agradecekurqanku.

¿Qamrí? Qutuchakuyniyki mayniqpichus willan chaypi, imaynallamantapis astawan willanaykipaq, ¿wakichisqachu kachkanki? Wak suyuyuq runasman willanaykipaq, ¿kallpachakunkichu? Jina kaptinqa, ichá qampis, Turku llaqtamanta hermanosjina wakkunaman willariyta atinki.

[32 paginapi mapa, dibujo/foto]

(Publicacionpi qhawariy texto originalta)

FINLANDIA

HELSINKI

Turku