Ñawiriqkunapta tapuyninku

¿Imaraykutaq Jesús juk juchasapa warmita, juchasniyki pampachasqaña nirqa? (Luc. 7:37, 48.)

Jesús, juk fariseo Simón sutiyuqpa wasinpi kachkaptin, juk warmi payman qayllaykuspa waqayninwan Jesuspa chakisninta juqʼucharqa, chukchasninwantaq chʼakichirqa, muchʼaraspataq perfumewan jichʼaykurqa. Bibliaqa, chay warmi may “juchasapa” kasqanta nin. Yachanchikjina tukuypis juchasapas kanchik, chaywanpis Bibliaqa, “juchasapa” rimayta, Diospa kamachiykunasninta pʼakiqkunamanta parlanapaq uqharin. Chay warmiqa, ichá phisu warmi karqa, paytataq Jesús nirqa: “Juchasniyki pampachasqaña”, nispa (Luc. 7:36-38, 48). ¿Imaptintaq chayta Jesús nirqa? Chay tiempopaqqa Jesús juchasninchikrayku manaraq wañurqachu. ¿Imaynatá chay warmip juchasnin pampachakunman karqarí?

Chay warmi Jesuspa chakisninta waqayninwan juqʼuchachkaptin, Jesusqa, juk kikinchaywan Simonman juk sumaq yachachiyta suntʼincharqa. Chaymantaraq chay warmip juchasninta pampacharqa. Jesusqa, juchallikusqanchikta may chhika qullqita manukuywan kikincharqa, chaytataq mana kutichiyta atisqanchikta rikuchirqa. Pay nirqa: “Uj qolqe manoj runaman iskay runas manu kasqanku. Ujnin kajqa phishqa pachaj denario qolqe manu kasqa, ujnintaj phishqa chunka. Mana imaynamanta kutichipuyta atejtinku, iskayninkuta khuyaspa, manaña mañakapusqachu. Kunan niway ari: Chay iskayninkumanta mayqentaj munakonqa astawan chay khuyaj runatari?”, nispa. Simontaq kutichirqa: “Pichus aswan manu karqa, chay kasqanta yuyani, nispa. Jesustaj nerqa: Arí, cheqanta ninki”, nispa (Luc. 7:41-43). Chiqamantapuni, Diostaqa tukuy kasukunanchik tiyan. Chayrayku juchallikuspaqa, Diosman manapis manukusqanchikta pagachkasunmanchujina kanman. Jehovaqa, qullqita manuq runapis kanmanjina, khuyakusqanraykutaq manaña pagananchikta suyanchu. Chayrayku Jesusqa, discipulosninman Diosmanta jinata mañakunankuta nirqa: “Manu caskaycumanta perdonawaycutaj, imaynatachus ñokaycupis manuycu cajcunata perdonaycu”, nispa (Mat. 6:12, Mosoj Testamentoj). Lucas 11:4 pʼititaq juchasninchik manujina kasqanta sutʼinchan.

Ñawpa tiempopi runaspa juchasninkuta, ¿imaraykutaq Dios pampacharqa? Diospa chiqan kayninrayku, pillapis juchallikuqqa wañunan karqa. Chayraykutaq Adanqa, Diosta mana kasukusqanrayku wañurqa. Israel llaqtapiqa, Jehová kamachisqanmanjina juchallikuqqa, juchasnin pampachasqa kananpaq juk uywata qʼulachispa jaywanan karqa. Apóstol Pablo nirqa: “Leyman jinataj, yaqha tukuy ima yawarwan llimphuchakun. Jaywanapaj yawar mana kajtin, mana juchapis pampachakunchu”, nispa (Heb. 9:22). Judiosqa, ajinallamanta Dios juchasninkuta pampachananta yacharqanku. Chayrayku, Simonpa wasinpi kaqkunaqa, Jesús nisqanwan churanakurqanku, ajinata yuyaspataq nirqanku: “Pitaj kay runa juchastapis pampachajri?”, nispa (Luc. 7:49). Chaywanpis, ¿imaynatá Jesús chay warmip juchasninta pampachanman karqarí?

Ñawpa tatasninchik juchallikusqankutawan, Jehovaqa ñawpa kaq profeciata nirqa, chaypitaq warmip mirayninta Satanás, miraynin ima, chaki talonninmanta khaninankuta nirqa (Gén. 3:15). Warmip mirayninta, ¿maykʼaqtaq chaki talonninta Satanás khanirqa? Diospa enemigosnin Jesusta wañuchichkaptinku (Gál. 3:13, 16). Jesuspa kawsaynillanwan runasta juchamanta, wañuymanta ima, rantikurqa. Jehovap munaynin juntʼakunanpaqqa, mana imapis jarkʼanmanchu. Chayrayku Jehovapaqqa, Génesis 3:15 pʼitipi nikusqanmantapacha, Jesús ñuqanchikrayku kawsayninta  qunmanñapisjina karqa, chayrayku Diospa nisqasninpi iñiqkunap juchasninkuqa, pampachakuyta atikurqaña.

Jehovaqa, Jesús manaraq Jallpʼaman jamuchkaptin, wakin runasta chiqan runaspaqña qhawarqa. Paykunaqa Enoc, Noé, Abraham, Rahab, Job ima karqanku, Diospa nisqasnin juntʼakunantataq iñiywan suyarqanku. Discípulo Santiago nirqa: “Abrahamqa cheqan runapaj qhawasqa karqa ruwasqasninrayku”, nispa. Chantá nillarqataq: “Ajinallatataj, manachu phisu warmi Rahabpis cheqampaj qhawasqa karqa allinta ruwasqanrayku?”, nispa (Sant. 2:21-25).

Israelmanta rey Davidqa, mayta juchallikurqa, chaywanpis Diospi iñiyninta churarqa, tukuy sunqutaq juchanmanta pesachikurqa. Bibliapi nin: “Jesusta Dios Tata churarqa wañuyninwan runasta allinyachinampaj, yawarnimpi creeynejta. Ajinapi justicianta rikucherqa, pacienciawan tukuy ñaupa juchasta mana jasutʼispa. Chayta ruwarqa kay pʼunchaykunapi justicianta rikuchinampaj, Jesuspi creejta cheqan runapaj qhawanampaj”, nispa (Rom. 3:25, 26). Jehovaqa, chiqan kayninmanjina, Davidpa juchasninta pampacharqa. Imaraykuchus aswan qhipaman Jesús, juchasrayku kawsayninta qunantapuni yacharqa.

Chayraykullataqchá, Jesuspa chakisninta waqayninwan juqʼuchaq warmip juchasninpis pampachakurqa. Chay warmiqa mayta juchallikuspapis sunqumantapacha pesachikurqa. Juchasninmanta kacharichisqa kananta sutʼita yacharqa, ruwayninwantaq Jesusta may jatunpaq qhawasqanta rikuchirqa, pitachus Dios juchamanta rantinawanchikpaq akllarqa. Jesucristo manaraq runasrayku wañuptinpis, kawsaynintaqa qunanpuni karqa. Chayrayku, Jesusqa chay warmita nirqa: “Juchasniyki pampachasqaña”, nispa.

Rikunchikjina, Jesusqa juchasapa runasmanta mayta khuyakurqa, manataq qhisacharqachu. Jehovataq, juchasninkumanta pesachikuqkunata perdonananta nin. Chayta yachayqa, ¡maytapuni sunquchawanchik!

[7 paginapi dibujo/foto]

Chiqan runaspaq qhawasqa karqanku