Tukuy waqyarisqas kanchik

¿MAYMANTAQ waqyarisqas kanchik? Betel wasiman, nisunman Jehovamanta sutʼinchaqkunap mayqin sucursalnillankumanpis. Jallpʼantinpiqa 118 sucursales tiyan. Betelta riqsiq riqkunaqa, may kusisqas kutinpunku.

Bibliamanta yachakuq juk wayna, México suyupi kaq Betelman rirqa, chay wasipi may chhika qharista, warmista ima, may kusiywan Diospaq llamkʼachkasqankuta rikuspa, mayta tʼukurqa. Chayrayku tapurirqa: “¿Imatataq kaypi llamkʼanaypaq ruwayman?”, nispa. Paykunataq nirqanku: “Ñawpaqtaqa bautizakunayki tiyan, chantá may sumaq kanman precursorjina llamkʼanayki”, nispa. Kay waynuchuqa chayta ruwarqa, iskay watanmantaq Betelpi llamkʼananpaq waqyarqanku, kunantaq 20 watastaña chaypi llamkʼachkan.

¿Imataq Betel?

Hebreopi “Betel” rimayqa, “Diospa wasin” niyta munan (Gén. 28:19). Kay Betel wasismantataq, Jallpʼantinpi pachak waranqamanta kuraq qutuchakuykunata yanapachkanku. Wakin Betelespiqa, Bibliasta, wak publicacionesta ima ruwanku, wak suyusmantaq apachinku. Chaykunapitaq, yaqha 20.000 qharis, warmis ima llamkʼanku, paykunaqa tukuyniqmanta kanku, mana ni imata suyaspataq Diospaq, hermanosninkupaq ima, tukuy sunqu llamkʼanku. Chay wasispiqa Diospaq may chhika watastaña llamkʼaq hermanos tiyan, jinallataq waynas, sipaskuna ima. Chantá betelitasqa llamkʼayta tukuytawan, chantapis sábado, domingo pʼunchaykunapi tantakuykunaman, willayman ima rinku. Astawanpis Bibliata ukhunchanankupaq, wak ruwaykunapaq ima, tiempochakunku.

Betelitasqa, necesitasqankuta rantikunankupaq sapa killa pisi qullqillata japʼinku. Chantapis sumaq waykʼusqa mikhunasta mikhunku, llimphuchasqa cuartospitaq tiyakunku. Sucursalesqa, mana jatuchaq hotelesjinachu ruwasqa kachkanku, manaqa chaypi llamkʼaqkuna llamkʼayninkuta usqhayta ruwanankupaqjina ruwasqas kachkanku. Betel wasiman riqkunaqa mana, jardines, cuartos, may llimphuchasqa kasqallantachu rikunku, manaqa chaypi kaqkunata kʼachamanta parlapayanakusqankuta, puraqmanta yanapanakusqankuta ima. Achkha ruwanasniyuq kaspapis, Betelman riqkunata napaykunankupaq tiempochakunku. Betelpiqa, ni pita pisipaq nitaq jatunpaq qhawankuchu, betelitasqa, pichayta, waykʼuyta, publicacionesta urqhuyta, oficinaspi llamkʼayta ima, may jatunpaq  qhawanku. Chantapis juk runajinalla Diospa Reinonmanta willakunanpaq mayta llamkʼachkanku (Col. 3:23, 24).

Wakin betelitasta riqsina

Betel wasipi llamkʼaqkunamanta parlarina. ¿Imataq Betelpi llamkʼanankupaq yanaparqa? Ñawpaqtaqa Mariomanta parlarina, payqa Alemaniamanta. Bautizakuchkaptinqa, llamkʼayninpi sumaq sueldoyuq karqa, chantapis astawanraq ganakuyta atinman karqa. Bautizakusqanmanta pisi tiemponmantaq, Betelman juk semanata llamkʼaq rirqa, chaypitaq imprentapi yanapananta nirqanku. Betelpi llamkʼaqkunata, llamkʼayninmanta compañerosninwan, mana kikinchu kasqankuta repararqa, chayrayku Betelpi llamkʼananpaq juk solicitud nisqata juntʼachirqa. Familiaresnin, compañerosnin ima, chayta mana entienderqankuchu, chaywanpis Marioqa, Betelpi may kusisqa llamkʼachkan.

Achkha betelitas jatuchaq yachaywasisman mana rispapis, Betelpi llamkʼachkanku. Ajina karqa Abelwan, pichus 15 watastaña Mexicomanta sucursalpi llamkʼachkan, pay nin: “Ñuqapaqqa, Betel juk jatun yachaywasijina, imaraykuchus kaypiqa jatuchaq imprentasta apaykachayta yachakuni. Kay yachakusqaywanqa, wak empresaspi llamkʼaspa sumaqta ganayman. Chaywanpis Betelpiqa kusisqa, sunqu juntʼasqa, mana llakikuspa, ni piwan llamkʼaypi atipanakuspa kakuni, chaytataq ni maypi tariymanchu. Yuyasqaymanjinaqa, may sumaqta yachakuni, chantapis Diosman astawan qayllaykuni, chaytaqa ni mayqin jatun yachaywasipipis tariymanchu”, nispa.

Betelman riyqa tukuyta yanapan

Betelta riqsiyqa, Diosman astawan qayllaykunapaq yanapawasunman. Ajina karqa Omarwan, payqa México suyupi tiyakun. Mamanqa, juchʼuymantapacha, Bibliamanta yachachirqa, 17 watasniyuq kaspataq tantakuykunaman, willayman ima manaña rirqachu. Chantapis viciosman qukurqa, qullqi maskʼayman ima. Aswan qhipamantaq juk empresapi llamkʼachkaptin, México suyupi kaq Betelman, imaynatachus maquinasta apaykachanata rikuchiq compañerosninwan rirqa, pay nin: “Chaymantataq chaypi llamkʼaq juk hermano  Betelta riqsichiwarqayku, tukuy kʼachamanta parlapayawarqanku, chaytaq Jehovamanta karunchakusqayrayku imaynatachus kawsachkasqaypi mayta tʼukuchiwarqa. Chantá, Bibliamanta yachakuyta, tantakuykunaman riyta ima, watiqmanta qallarirqani, Betel wasiman risqaymanta suqta killanmantaq bautizakurqani. Jehovaman mayta pachis nini payman qayllaykunaypaq yanapawasqanmanta”, nispa.

Japón suyumanta Masahikoqa, Jehovamanta sutʼinchaqkuna familiapi uywakurqa. Chaywanpis, cristianojina kawsakuytaqa manaña munarqachu, chayraykutaq, yachaywasipi astawan yachakuyman qukuspa, tantakuykunaman, willayman ima manaña riqchu. Pay nin: “Juk pʼunchay familiay, wak hermanos ima, Betelta riqsiq rinankupaq parlarirqanku. Familiayqa, paykunawan rinaytapuni munarqanku. Hermanoswan Betelman richkaspa, mayta kusikurqani jinallataq Betelta riqsichkaspapis, amigosniywanqa, ni jaykʼaq ajinata sientekurqanichu. Watiqmanta cristianojina kawsakuyta munasqayraykutaq, juk hermanota Bibliamanta yachachinawanta nirqani”. Kunantaq Masahikoqa, qutuchakuypi precursorjina llamkʼachkan.

Francia suyumanta juk hermanaqa, llamkʼayninrayku Moscú llaqtaman ripurqa. Chaypitaq manaña hermanoswan tantakuyta atisqanrayku llawchhiyarqa. Tiemponmantaq saqra ruwaykunapi urmarqa, Diosta mana yupaychaq runawantaq casarakurqa. Juk kutiqa, juk hermana Francia suyumanta payta waturikuq rirqa, iskayninkutaq Rusia suyumanta, San Petersburgo llaqtaman, Betelta riqsiq rirqanku. Juk cartapitaq pay nin: “Betelman chayaptiyku hermanosqa, may kʼachamanta parlapayawarqayku, chaytaq sunquyta kuyurichirqa. Chaypi llamkʼaqkunata kusisqasta, sunqu tiyasqasta ima rikuspaqa, Diospa espiritun chaypi kasqanta repararqani. Tapurikurqanitaq: ‘¿Imaraykutaq Diospa llaqtanmanta karunchakurqani?’ nispa, Betelta riqsiytawan Jehovamanta yanapata mañakurqani, wawasniymantaq Paymanta yachachirqani”, nispa. Chay hermanata ichá wak hermanospis yanaparqanku, chaywanpis Betelman risqanqa mayta kallpacharqa, chaymantapachataq, Diosta yupaychanallanpaqpuni mayta kallpachakurqa.

Wak runas Betel wasiman waturiq rispa, ¿imatá ninku? Albertoqa, politicapi may satʼisqa karqa, 1988 watapitaq Brasil suyumanta Betelta riqsiq rirqa. Tukuy ima llimphu kasqanta, chantapis ni ima pakakuspa ruwakusqanta rikuspaqa, tʼukulla qhipakurqa. Niraq Betelman rispaqa, cuñadonta waturikuq juk seminarioman risqa, cuñadonqa sacerdote karqa. Beteltaq, seminariowan ni imapi kikinchu karqa, imaptinchus “seminariopiqa tukuy ima pakayllapi ruwakuq”. Albertoqa, Betelta riqsisqantawan Bibliamanta yachakuyta qallarirqa, politicatapis saqipurqa, kunantaq ancianojina qutuchakuypi llamkʼachkan.

¡Betelman jamuriychikpuni!

May chhika hermanosqa, llaqtankupi sucursalta riqsinankupaq mayta kallpachakunku. Sutʼincharinapaq; Paulowan Eugeniawanqa, Brasilpi kaq sucursalman rinankupaq, tawa watatapuni qullqita tantakurqanku. Chay sucursalman chayanankupaqtaq, 3.000 kilometrosta viajarqanku. ¿Imaynataq paykunaman riqchʼarqa? Paykuna ninku: “Tukuy imata Betelta riqsinaykupaq ruwasqaykumanta mana pesachikuykuchu, imaraykuchus kunanqa imaynachus Diospa llaqtan kasqanta yachayku. Bibliamanta ñuqaykuwan yachakuqkunata, Betelpi imatachus ruwasqankumanta sutʼinchaptiykuqa, ‘¿qamkunarí Betelta riqsinkichikñachu?’, nispa tapuriwaq kayku. Kunanqa, arí nispa kutichisqayku”.

¿Tiyakunki chayniqpi juk sucursal kanchu? Jina kaptinqa, waqyariyku chayman rinaykipaq. May sumaq jamusqa kanki, chantapis Diosta yupaychanaykipaq kallpachasunqa.

[18 paginapi dibujo/foto]

Mario

[18 paginapi dibujo/foto]

Abel

[18 paginapi dibujo/foto]

Alemania

[18 paginapi dibujo/foto]

Japón

[18 paginapi dibujo/foto]

Brasil