¿Yuyarikunkichu?

¿Kay killasmanta Torremanta Qhawaq revistasta ñawirirqankichu? ¿Kay tapuykunaman kutichiyta atiwaqchu?

• ¿Ima yanapastaq tiyan alcoholman manaña qukunaykipaq?

Diosmanta mañakuy, Bibliata ukhunchay, saqra munayniykita atipay, nisqaykita juntʼay, pikunawanchus purichkasqaykitataq allinta qhawarikuy. Ukyayta munaspaqa, yuyayniykita mana chinkachispalla, machkha copasllatachus ukyayta atisqaykita reparakuy. Manaña niyta yachay (01/07, 7-9 paginaspi).

• ¿Jesús kʼata wawachu karqa?

Tawa Evangeliosqa, Jesús wawqisniyuq, panasniyuq kasqanta rikuchin. Marcos nisqanmanjinaqa, Nazaretmanta wakin runas Jesusmanta nirqanku: “Manachu kayqa carpintero [...]? Manachu wawqesnimpis Santiago, José, Judas, Simón ima kanku? Manachu panasnimpis noqanchejwan kaypi kashanku?”, nispa (Mar. 6:3). Chaywanpis, Jesús mana wawqisniyuqchu kanman karqa chayqa, ¿chay runas jinata ninkumanchu karqa? Mana, ¿icharí? Imaraykuchus achkha kutispichá María wiksallikusqanta rikurqanku (01/04, 13 paginapi).

• ¿Imarayku Jesusta “Cristo” sutiwan riqsikullantaq?

“Cristo” rimayqa, griego simipi kjristós rimaymanta jamun, hebreo simipitaq maschíaj (Mesías) rimayman tikrakun. Iskaynin rimaykuna “akllasqa” niyta munan. Jesús manaraq Jallpʼaman jamuchkaptinqa, chay rimayta Jehovap sutinpi llaqtanta kamachiqkunapaq uqharikullaqtaq (2 Sam. 22:51). Jesús, Mesías kasqanrayku, Diospa sutinpi parlasqanrayku ima, Bibliaqa “Cristo kawsaj Diospa Churin” kasqanta nin (Mat. 16:16) (01/04, 15 paginapi).

• ¿Imaraykutaq Jehová, Aarón waka uñaman rikchʼakuq lantita ruwaptin mana jasutʼirqachu?

Aaronqa, Diospa kamachisqanta pʼakirqa (Éxo. 20:3-5). Chaywanpis, Moisés paypaq Diosmanta mañapurqa, mañakusqantaq “sinchʼi atiyniyoj” karqa (Sant. 5:16). Aaronqa, Diosman achkha watastaña chiqa sunqu karqa. Paytaqa, israelitas chay lantita ruwananpaq tanqarqanku, chantapis aswan qhipaman, Levip ayllunwan Jehovaman chiqa sunqu kasqanta rikuchirqa (Éxo. 32:25-29) (15/5, 21 paginapi).

• Juk cristianota warmin chayri qusan wasanchaptin, ¿imaynatá llakiyninta atipanman?

Juk cristiano Diospa yuyaychasqanmanjina, qhariwarmi kawsayninpi ruwananpaq kallpachakun chayqa, qusan chayri warmin wasanchasqanmanta, mana juchachakunanchu tiyan. Jehovaqa, sunquchayta, kallpachayta ima, necesitasqanta yachan. Chayrayku, qutuchakuypi kamachisninniqta sunquchan (15/6, 30, 31 paginaspi).

• ¿Imaynasmantá wawasniykita ñawiriyta munanankupaq yanapawaq?

Wawasniykiman munakuywan yachachiptiykiqa, yachakuspa miskʼichikunqanku. Chantapis librosta jayway, ñawiripuy, parlarinankuta niy, paykunawantaq parlariy. Chantá, paykuna ñawiripusunankuta, tapusunankuta ima niy (15/7, 26 paginapi).

• ¿Imarayku kay pachamanta runasjina mana yuyanachu?

Runasqa, mana Jehová yuyasqanmanjinachu yuyanku, chayrayku imastachus jatunpaq chayri pisipaq qhawasqankuqa, tiempowanqa mana kikinchu. Ñuqanchikqa, Jesucristojina ruwanchik, payqa, Tatanta jatuncharqa. Arí, “[kurkupi, NM] ñakʼarerqa pʼenqaypi rikhurinanta mana kasu[ta] ruwaspa” (Heb. 12:2) (15/08, 6 paginapi).

• ¿Imaraykutaq Jesús juk juchasapa warmita, juchasniyki pampachasqaña nirqa?

Jehovaqa, ñawpa tatasninchik juchallikusqankutawan, ñawpa profeciata nirqa. Chaypitaq, Satanás, miraynin ima, warmip mirayninta talonninmanta khaninanta nirqa. Jehovaqa, munayninta juntʼanpuni. Paypaqqa, Génesis 3:15 pʼitipi nikusqanmantapacha, Jesús ñuqanchikrayku kawsayninta qunmanñapisjina karqa. Jesucristo manaraq wañuptinpis, kawsayninta qunanpuni karqa. Chayrayku, pesachikuq runaspa juchasninku pampachakurqa, chay juchasapa warmiqtajina (15/08, 6, 7 paginaspi).