Bulgariapi sumaq campaña ruwakun

“Cosechaqa ashkha, oqharejkunarí pisi kanku. Mañakuychej ari cosechaj dueñon Señormanta, astawan oqharejkunata cosechanman kachamunampaj.” (MAT. 9:37, 38.)

BULGARIA suyuqa, Europamanta inti lluqsimuynin uraniqpi tarikun, chaypitaq Jesús nisqanmanjinapuni kachkan. ¿Imarayku? Imaraykuchus chay suyupiqa, 7.000.000 runas tiyakunku, chay runasman willakunanpaqtaq achkha llamkʼaqkuna necesitakun. Chay suyupi 1.700 willaqkuna kaptinkupis, chay chhika runasman willanankupaq pisilla kanku. Chayrayku Bulgariapi sucursalqa, juk campaña ruwakunanta mañarqa, Diospa Llaqtanta Kamachiqkunataq, Europap suyusninmanta búlgaro qalluta parlaqkunata willaq rinankupaq waqyarinankuta nirqanku. Chay campañaqa 2009 watapi, qʼuñi tiempopi 7 semanata ruwakunan karqa. Sofía llaqtapi 14-16 agosto killapi 2009 watapi “Wakichisqapuni kaychik” nisqa Jatun Tantakuykamataq kanan karqa.

Achkha hermanos rinku

Sofía llaqtamanta sucursalpi kaq hermanosqa Alemania, España, Francia, Grecia, Italia, Polonia ima, suyusmanta machkha hermanoschus rinankuta tapukurqanku. Chayman riqkunaqa, qullqinkuwan, vacacionesta urqhuspa ima, willaq rinanku karqa. Semanas pasasqanmanjinaqa, 292 solicitudeskama chayarqa. Chayrayku, Kazanlak, Sandanski, Silistra llaqtasman kachayta atinkuman karqa. Chantapis chay suyumanta qutuchakuykunata waturiqkunaqa, willaqkunata, precursoresta ima, chay campañapi yanapanankupaq waqyarirqanku. Chay campañapiqa, 382 willaqkuna sunqu kʼajaywan ni jaykʼaq willakuq lugarespi willarqanku.

Chay llaqtaspa qayllanpi kaq qutuchakuykunamanta hermanosta alojamientota maskʼaqta kacharqanku. Paykunaqa, pisi qullqillawan wasista alquilarqanku. Chay llaqtaman willaq riqkunata necesitasqankupi yanapanankupaqtaq, sinchita llamkʼarqanku. Chantapis tantakuykuna ruwakunanpaq wasista alquilallarqankutaq, chay tantakuykunataqa, chayman riq hermanos apaykachananku karqa. Wakin llaqtaspiqa, Jehovamanta sutʼinchaqkuna mana karqachu. Chaywanpis chay tantakuykunapi Jehovata jatunchanankupaq 50 willaqkunajina tantakusqanku, may kusiy karqa.

Wak suyusmanta riqkunaqa, kusiywan willarqanku. Nitaq imapis jarkʼarqachu, qʼuñi tiempopi 40 °C nisqaman chayaptinpis willallarqankupuni. Chay campaña qallarikusqanmanta kimsa semananmanqa, Silistra llaqtantinpiña willakurqa, chay llaqtaqa, Danubio nisqap mayu kantunpi kachkan, 50.000 runastaq tiyakunku. Chayrayku willaqkunaqa, qayllapi kaq llaqtitasman rirqanku, Tutrakan, llaqtakamataq chayarqanku, mayqinchus 55 kilometrospi inti yaykuy ladopi kachkan. Paykunaqa, 9:30 horamantapacha willarqanku, mikhunallankupaq samarispataq, 7:00 horaskama willarqanku. Kazanlak, Sandanski llaqtaspiqa, kikillantaq karqa, chayman riq hermanosqa kʼuchis karqanku, imaptinchus maypichus willanankuta tukuspa, juchʼuy ranchituspiwan willarqanku.

 ¿Runas uyarirqankuchu?

Qanchis semanasta campaña ruwakusqanpiqa, achkha runasman willakurqa. Runasqa, ñawpa siglopi apóstoles willasqankurayku nirqanku: “Yachachiyniykichejwan tukuy Jerusalén llajtamanña juntʼaykuchinkichej”, nispa. Bulgariap llaqtasninpi Jehovamanta sutʼinchaqkunap willasqankumanta kikillantataq nikunman (Hech. 5:28). Imaptinchus runasman yaqha 50.000 revistasta saqirqanku, 482 runastataq Bibliamanta yachachiyta qallarirqanku. Chantapis 2009 watapi 1 septiembre killapi Silistra llaqtapi ñawpaq kaq qutuchakuy qallarirqa, Kazanlak, Sandanski llaqtaspitaq iskay qutitusña tiyan. Chay chhika runas ñawpaq kutirayku allin willaykunata uyarispa ñawpaqllamanpuni richkasqankuqa, may kusiy.

España suyumanta búlgaro qalluta parlaq juk precursora especialqa, chayasqanmanta ñawpaq semananpi, Silistra llaqtamanta periodicosta ranqhaq Karina sutiyuq warmiman willarqa. Karinaqa, sumaqta uyarirqa, juk tantakuyman rispataq Bibliamanta yachakuyta munarqa. Chaywanpis qusanqa, Diospi mana creenchu, chayrayku juk parquepi yachachinanta nirqa. Chaypitaq iskay warmi wawasninwan yachakurqa, kuraq wawan Danielaqa, chiqa yachachiykunata may jatunpaq qhawarqa. Juk semanallapitaq Yachachin librota ñawiriyta tukurqa, chantá Bibliamanta yachakusqanmanjina lantista yupaychayta saqipurqa. Amigosninmantaq chiqa yachachiykunamanta willarirqa. Kimsa semanamanta ñawpaq kutirayku tantakuyman riytawantaq, yachachiqnin hermanaman nirqa: “Qamkunapis kaymanjinaña sientekuni. ¿Imatataq qamkunawan willanaypaq ruwayman?”, nispa. Danielaqa, mamanwan, sullkʼa ñañanwan ima, ñawpaqllamanpuni richkan.

Italiamanta búlgaro qalluta parlaq Orlin sutiyuq hermanoqa, Kazanlak llaqtaman kachasqa karqa. Juk pʼunchayqa, alojamientonman kutipuchkaspa, juk parquepi iskay waynuchusta rikuspa willarirqa. Chantá Yachachin librota saqispa, qʼayantin kutinanta nirqa. Qʼayantintaq juknin kaq Svetomir sutiyuq waynuchu, Bibliamanta yachakuyta munarqa. Minchhantinqa yachachillarqapuni, jisqʼun pʼunchayninmantaq Svetomirqa, pusaq kutistaña Bibliamanta yachakurqa. Chay waynuchuqa Orlinman willarirqa: “Parquepi taripawasqaykimanta iskay pʼunchay ñawpaqtaqa, Diosman payta riqsiyta munasqayta, yanapawaptintaq yupaychanayta nirqani”, nispa. Orlin Italiaman kutipuptinqa, chay llaqtamanta hermanos Svetomirta yachachillarqankupuni, ñawparichkallanpunitaq.

 Tukuy atisqankuta ruwasqankumanta bendicionesta japʼinku

Bulgaria suyuman qullqinkuwan, vacacionesta urqhuspa ima, riq hermanos, ¿imatataq allin willaykunata willasqankumanta ninku? Españamanta juk ancianoqa, qillqarqa: “Kay campañaqa, Españapi búlgaro qalluta parlaq willaqkunata mayta jukchan. Bulgariaman risqankuqa maytapuni yanapan”, nispa. Italiamanta juk qhariwarmi qillqallarqataq: “¡Bulgariaman risqaykuqa tukuy kawsasqaykumanta may sumaqpuni! [...] Kay campañaqa mayta yanapawayku. Ni jaykʼaqjina kusisqa kachkayku”, nispa. Paykunaqa, willaypi astawan yanapanankupaq Bulgariaman ripuyta munachkanku. Españamanta juk precursora regular soltera hermana Carina sutiyuq, Silistra llaqtaman rirqa. Campaña tukukuptintaq llamkʼayninta saqipuspa, chay llaqtapi musuq qutuchakuyta yanapaq ripurqa. Payqa, Bulgariapi juk watata kawsakunanpaqjina qullqita tantakurqa. ¿Imaynataq sientekun? Pay nin: “Jehová Bulgaria suyuman jamunaypaq yanapawasqanmanta kusisqa kachkani, kaypiqa unaysituta qhipakuyta munani. Phichqa runasmanña Bibliamanta yachachichkani, paykunamanta kimsataq tantakuykunaman richkankuña”, nispa.

Italiamanta juk hermanaqa, chay campañapi yanapakuyta munarqa, chaywanpis pisi tiempollataraq llamkʼachkasqanrayku, vacacionesta mana urqhuyta atirqachu. Jina kaptinpis, mana manchachikuspa mana paganankuta suyaspalla juk killapaq permisota mañakurqa, jefen mana munaptintaq llamkʼayninta saqipuyta yuyarqa. Mana yuyasqanmanjinataq jefenqa, nirqa: “Rillay, chaywanpis Bulgariamanta juk fotota apachimuwanki”, nispa. Chay hermanaqa, Jehová mañakuyninman kutichisqanta yacharqa.

Bulgariamanta Varna llaqtapi tiyakuq Stanislava sutiyuq hermanaqa, sumaq pagasqa llamkʼayniyuq. Permisota mañakuspataq campañapi yanapananpaq Silistraman rirqa. Chayaspataq, wak suyusmanta precursores suyunman rispa kusiywan willachkasqankuta rikuspa, kusiymanta waqarikurqa. Chaymantataq, kawsayninpi imatachus ruwachkasqanpi tʼukurirqa, wasinman kutipusqanmanta iskay semananmantaq llamkʼayninta saqipuspa precursora regular kayta qallarirqa. Kunanqa may kusisqa kachkan, imaptinchus sipas kachkaspa Jehovata tukuy sunquwan yupaychachkan (Ecl. 12:1).

Jehovata tukuy sunqu yupaychaqkunaqa, ¡achkha bendicionesta japʼinku! Kawsayninchikpi runasman willanapaq, yachachinapaq ima, tiempochakusqanchik, kallpachakusqanchik imaqa, ni imawan kikinchakunmanchu. Qampis runasta salvanapaq willaypi, ¿astawan llamkʼawaqchu? Ichapis suyuykimanta wakin lugarespiqa, astawan willaqkuna necesitakun. ¿Chay lugaresman ripuypi tʼukurinkichu? Chayri ichapis chiqa yachachiykunata uyariyta munaqkunata yanapanaykipaq, wak qalluta parlayta yachakuwaq. Kaykunamanta mayqillantapis ruwaptiykiqa, Jehová mayta bendecisunqa (Pro. 10:22).

[32 paginapi recuadro, dibujos/fotos]

Mana qunqanapaqjina pʼunchay

Wak suyusmanta hermanos chay campañapi yanapaqkunaqa, Sofía llaqtapi “Wakichisqapuni kaychik” nisqa Jatun Tantakuyman rirqanku. Bulgariamanta hermanosqa, Europap suyusninmanta jamuq hermanosta riqsispa, mayta kallpachakurqanku. Chantapis mana yuyasqankumanjina Diospa Llaqtanta Kamachiqkunamanta Geoffrey Jackson hermano, viernes pʼunchaypi Traducción del Nuevo Mundo de las Santas Escrituras, nisqata búlgaro qallupi kasqantaña rikuchirqa. Chay Jatun Tantakuyman 2.039 riqkunaqa, maytapuni kusirikurqanku, agradecekuspataq unayta tʼaqllarikurqanku. Wakintaq, kusiymanta waqarikurqanku. Kay Bibliaqa, entiendenapaqjina tikrachisqa kasqanrayku, Bulgariamanta kʼacha sunquyuq runas, Jehovata riqsinankupaq yanapanqa.

[30, 31 paginaspi mapa]

(Publicacionpi qhawariy texto originalta)

BULGARIA

SOFÍA

Sandanski

Silistra

Kazanlak

[31 paginapi dibujos/fotos]

Qanchis semanasta campaña ruwakusqanpiqa, achkha runasman willakurqa