Jehovap bendicionninta maskʼanapaq kallpachakuna

“Pikunachus Diosta tukuy sonqo maskʼanku, chaykunaman sumaj tʼinkata qon.” (HEB. 11:6.)

1, 2. a) ¿Imastá runas Diospa bendicionninta japʼiyta munaspa ruwanku? b) ¿Imaraykutaq Diospa bendicionninta japʼiyta munanchik?

ACHKHA suyuspi runasqa, pipis yanapaptin agradecekunankupaq, “¡Dios bendecisuchun!” ninku. Religionesta kamachiqkunapis runasta, uywasta, wak imasta ima, bendecinku. Chantapis achkha runasqa, Diospa bendicionninta japʼiyta munaspa, santosmanta mañakuq karusta chakipi rinku. Wakin politicostaq, suyunkupaq Diospa bendicionninta mañapunku. Chaywanpis, ¿chay mañakuykuna allinchu? ¿Dios uyarinmanchu? ¿Pikunatá Jehová bendecin, imaraykutaq?

² Jehovaqa, qhipa pʼunchaykunapi tukuy suyusmanta runas llaqtanpi kanankuta nirqa. Paykunaqa llimphuta, allinpitaq kawsakunanku karqa. Chantá qhatiykachasqas, chiqnisqas ima kaspapis, runasman Reinomanta allin willaykunata Jallpʼantinpi willananku karqa (Isa. 2:2-4; Mat. 24:14; Apo. 7:9, 14). Arí, tukuyninchik kay profecía nisqanmanjina kawsakuyta akllarqanchik. Chayta juntʼanapaqtaq, Diospa bendicionninta necesitanchikpuni (Sal. 127:1). Chantá, ¿imaynatá Diospa bendicionninta japʼisunman?

Jehovaqa kasukuqkunata bendecinpuni

3. ¿Imaynatataq israelitas kasukuptinku kawsakunkuman karqa?

³ (Proverbios 10:6, 7, ñawiriy.) Jehovaqa, israelitasman niraq Sumaq Jallpʼaman yaykuchkaptinku, nisqanta kasukuptinku sumaqta,  ni imamanta manchachikuspa kawsakunankuta nirqa (Deu. 28:1, 2). Payqa, llaqtanman nirqa: “Kay tukuy bendiciones qankunaman jamusonqachej”, nispa. Arí, Jehovaqa, israelitas kasukuptinku bendecinantapuni nichkarqa.

4. ¿Imaynatataq Jehovata kasukunanchik tiyan?

⁴ ¿Imaynatá israelitas, Diosta kasukunanku karqa? Ley nisqanmanjinaqa, ‘kusiywan, tukuy sunquwantaq’ kasukunanku karqa, ajinallamanta Dios paykunata allinpaq qhawanman karqa (Deuteronomio 28:45-47, ñawiriy). Arí, Jehovap kamachiykunasnintaqa, mana tanqasqajinallachu juntʼananchik tiyan. Imaptinchus uywaspis, supaykunapis kamachisqa kaspaqa kasukullankutaq (Mar. 1:27; Sant. 3:3). Jehovata chiqamantapuni kasukuqqa, sunqumantapacha munakuywan, kusiywantaq kasukun. Imaptinchus, Jehová kasukunapaqjinalla kamachiykunata qusqanpi, payta “tukuy sonqo maskʼanku, chaykunaman sumaj tʼinkata qonan[pi]” ima, atienekun (Heb. 11:6; 1 Juan 5:3).

5. ¿Imaynatataq israelitasta, Jehovap nisqanpi atienekusqanku, Deuteronomio 15:7, 8 nisqanta kasukunankupaq yanapanman karqa?

⁵ Israelitasqa, Diospa kamachiykunasninta tukuy sunquwan kasukuspa, paypi atienekusqankuta rikuchinkuman karqa. Sutʼincharinapaq, Deuteronomio 15:7, 8 (ñawiriy) nisqanta qhawarina. Paykunaqa, chay kamachiyta qʼasa sunqulla kasukuyta atinkuman karqa, wakchastapis tumpata yanapankuman karqa. Chaywanpis qʼasa sunqulla kasukuspa, ¿paykunapura allinpi kawsakunkumanchu karqa? Chantapis, ¿Jehová tukuy imata qunanpi atienekusqankuta rikuchinkumanchu karqa? ¿Jehovajina khuyakuyniyuq kasqankuta rikuchinkumanchu karqa? Mana. Jehovaqa, imachus sunqunkupi kasqanta yacharqa, paykuna khuyakuyta rikuchiptinkutaq, tukuy imapi bendecinanta nirqa (Deu. 15:10). Israelitas chay nisqanpi atienekuptinkuqa, wakkunata tukuy sunqu yanaparinkuman karqa, Diospa bendicionesnintataq japʼinkuman karqa (Pro. 28:20).

6. ¿Imapi atienekunapaqtaq Hebreos 11:6 yanapawanchik?

⁶ Hebreos 11:6 pʼitiqa, Dios tʼinkanawanchikpaq paypi iñinanchikpuni kasqanta sutʼinchan. Chantapis bendicionninta japʼinapaqqa, “tukuy sonqo maskʼa[nanchikta]” nillantaq. Kay rimaykunaqa, griego simipi mana saykʼuspa, mayta kallpachakuna ima, kasqanta niyta munan. Chayrayku kay pʼitiqa, Dios bendecinawanchikpi atienekunapaq yanapawanchik. Imaraykuchus chaytaqa, “mana jaykʼaj llullakoj” Dios niwanchik (Tito 1:2). Chantapis Payqa, unaymantaña nisqasnin juntʼakusqanta rikuchin (Isa. 55:11). Chayrayku, Jehovapi chiqamanta iñiptinchikqa, bendeciwasunpuni.

7. ¿Imaynamantataq Abrahampa mirayninniqta bendecisqa kanchik?

⁷ Bibliapiqa, Abrahanmanta miray jamunanta willakurqa. Kay miraymanta ñawpaq kaqqa Jesucristo, qhipan kaqtaq akllasqa cristianos. Akllasqa cristianosqa, Diospa “tʼukuna may sumaj ruwasqasninmanta, [willanankupaq kamachisqa kanku] pichus laqhamanta wajya[rqa] sumaj kʼanchayninman” (Gál. 3:7-9, 14, 16, 26-29; 1 Ped. 2:9). Chayrayku, Jehovawan allinpi kanapaqqa, “allin kamachi, yuyayniyoj[ta]” kasukunanchik tiyan. Jesusqa, paykunaman tukuy kapuyninta saqirqa (Mat. 24:45-47). Allin kamachi yuyayniyuq mana yanapawaptinchikqa, Diospa Palabranpi nisqanta mana japʼiqayta atisunmanchu, nitaq chaymanjina ruwaytapis. Arí, Bibliapi yachakusqanchikmanjina kawsakunapaq kallpachakuspaqa, Diospa bendicionninta japʼisun.

Diospa munayninqa, ñawpaqpi

8, 9. ¿Imaynatataq Jacob, Diospa munayninmanjina ruwananpaq kallpachakurqa?

⁸ Diospa bendicionninta japʼinapaq mayta kallpachakuymanta parlarispaqa, Jacobmanta yuyarikunchik. Payqa, Dios, jatun tatan Abrahanman nisqan imaynatachus juntʼakunanta mana yacharqachu. Chaywanpis, jatun tatanpa miraynin achkhaman tukunanpaq, Jehová yanapananta sumaqta yacharqa. Chayrayku Jacobqa, 1781 qayna pacha watapi  Haranman warmita maskʼakuq rirqa. Payqa, mana kʼacha warmillatachu maskʼarqa, manaqa Diosta yupaychaq warmita, wawasninpaqpis sumaq mama kananpaq.

⁹ Yachanchikjina Jacobqa, tion Labanpa ususin Raquelta riqsirqa, paytataq mayta munakurqa. Mañaqananpaqtaq, qanchis watasta Labanpaq llamkʼarqa. Chaywanpis, kayqa mana mayta munanakusqankuta yuyarinallapaqchu. Jacobqa, Jehová, jatun tatan Abrahanman, chaymantataq tatan Isaacman, nisqanta sumaqta yacharqa (Gén. 18:18; 22:17, 18; 26:3-5, 24, 25). Aswan qhipamantaq, Isaac, Jacobman jinata nirqa: “Tukuy Atiyniyoj Diosqa bendecisuchun, ashkhayachisuchun, mirayniykita mirachichun, qanmanta ashkha naciones kanankupaj. Qanman, mirayniykimanwan bendicionninta qosuchun, imatachus Abrahamman qonanta nerqa, chayta, kay jallpʼata japʼikapunaykichejpaj, mayqempichus kunan tiyakushanchej karu llajtayojpis kasunman jina, chayta. Kay jallpʼataqa Dios qorqa Abrahamman”, nispa (Gén. 28:3, 4). Chayrayku Jacobqa, familiayuq kananpaq sumaq warmita maskʼaspa, Jehovap nisqanpi atienekusqanta rikuchirqa.

10. ¿Imaraykutaq Jehová, Jacob mañakusqanman kusiywan bendecirqa?

¹⁰ Jacobqa, familianpaq mana qhapaq kaytachu maskʼarqa, astawanqa wawasninman, Jehová imatachus mirayninmanta nisqanta yachachirqa. Paypaqqa, Diospa munayninta ruway ñawpaqpi karqa. Diospa bendicionninta japʼinanpaqtaq, tukuy atisqanta kallpachakurqa, ni imataq jarkʼarqachu. Machuyanankamataq kallpachakullarqapuni, chayrayku Jehová bendecirqa (Génesis 32:24-29 ñawiriy).

11. Dios imaynatachus munayninta ruwananta sutʼinchasqanrayku, ¿imata ruwanapaqtaq kallpachakunanchik tiyan?

¹¹ Ñuqanchikpis Jacobjina, Dios imaynatapunichus munayninta juntʼananta mana yachanchikchu. Chaywanpis Bibliata ukhunchaspaqa, imaynachus “[Jehovap] jamunan pʼunchay[nin]” kananta yachanchik (2 Ped. 3:10, 17). Sutʼincharinapaq, tukukuy pʼunchay maykʼaqchus kananta mana yachaspapis, qayllapiña kasqanta sutʼita yachanchik. Chantapis Bibliaqa, kay pisi tiempopi runasman willamunapaq mayta kallpachakuptinchik salvakunanchikta, willasqanchikta uyariqkunapis  salvakunankuta nin. Chaypitaq atienekunchik (1 Tim. 4:16).

12. ¿Imamantataq mana iskaychakunchikchu?

¹² Tukukuy pʼunchayqa, mana yuyachkaptinchik chayamunqa. Jehovaqa, maykʼaqchus chay pʼunchay kananta ninña. Chayraykutaq, mana Jallpʼantinpi sapa runaman willananchiktapunichu suyanqa (Mat. 10:23). Chaywanpis, runasman aswan sumaqmanta willananchikpaq wakichiwanchik. Chayrayku, Jehovapi iñispa, runasman willanapaq tukuy atisqanchikta, kapuyninchikta ima qunchik. ¿Tukuy runaschu chiqa yachachiyta japʼikunqanku? Mana yachanchikchu (Eclesiastés 11:5, 6, ñawiriy). Chaywanpis, runasman willanapaq kamachisqa kanchik, Jehová bendecinawanchikpitaq atienekunchik (1 Cor. 3:6, 7). Arí, Payqa, mayta kallpachakusqanchikta yachan, espíritu santonniqtataq necesitasqanchikmanjina wakichillawasunpuni, chaymantaqa mana iskaychakunchikchu (Sal. 32:8).

Diospa espíritu santonta mañakuna

13, 14. ¿Imaynatataq Dios kamachisninta espíritu santonwan wakichichkallasqantapuni rikuchin?

¹³ Diospa llaqtanpi ima llamkʼayllatapis japʼiptinchik chayri willayta mana atisqanchikta yuyaptinchik, ¿imatá ruwasunman? Jehovamanta espíritu santonta mañakuna, chaytaq sumaqta ruwanapaq yanapawasun (Lucas 11:13, ñawiriy). Jehovaqa, kamachisninta llaqtanpi, ima ruwayllatapis —mana yachaptinkupis— juntʼanankupaq espíritu santonwan wakichin. Sutʼincharinapaq, Jehovaqa israelitas Egiptomanta lluqsisqankutawan, enemigosninkuta atipanankupaq espíritu santonwan wakichirqa, paykunaqa michiqkuna, wata runas ima karqanku, nitaq maqanakuytapis yacharqankuchu (Éxo. 17:8-13). Aswan qhipamantaq, Bezalelta, Oholiabta ima, Diosta yupaychanapaq toldota imaynatachus ruwanankupaq yuyaycharqa (Éxo. 31:2-6; 35:30-35).

¹⁴ Kay tiempopipis Diosqa, espíritu santonwan, kamachisninta yanapallantaq. Payqa, llaqtan publicacionesta urqhunankupaq juk maquinata rantisqankuta sumaqta apaykachanankupaq yanaparqa. Kay 1927 watapi, imprentapi llamkʼayta kamachiq Robert J. Martin sutiyuq hermano juk cartapi nirqa: “Señorqa, tiemponpipuni yanapawarqayku, imaraykuchus juk maquinata rantispa, imaynatachus apaykachayta mana yacharqaykuchu. Chaywanpis Señorqa, paypaq tukuy atisqankuwan llamkʼayta munaqkunata yuyaychan. [...] Semanasninmanqa, chay maquinata apaykachayta atirqaykuña, kunankamataq apaykachachkallaykupuni. Chay maquinawanqa tukuy imata ruwayta atiyku, chaytaqa ni chay maquinata ruwaqkunapis yacharqankuchu”,  nispa. Jehovaqa, ajinata kallpachakuqkunata bendecichkallanpuni.

15. ¿Imaynatataq Romanos 8:11 juchaman mana urmanapaq yanapawasun?

¹⁵ Espíritu santoqa, tukuy imaymanamanta yanapawanchik, jatuchaq chʼampaykunata atipanapaqpis. Sutʼincharinapaq, juchaman urmanapaq tanqasqa kaspa, ¿imatataq mana atipayta atisqanchikta yuyaspa ruwasunman? Pablo, Romanos 7:21, 25; 8:11 qillqasqanpi tʼukurina. Kay pʼitispi rikunchikjina, ‘wañusqamanta Jesusta kawsarichiq espirituqa’, juchaman mana urmananchikpaq yanapawasun, kallpachawasuntaq. Kay pʼitis akllasqa cristianospaq qillqasqa kaptinpis, Jehovap tukuy kamachisninta yanapawanchik. Cristopi iñisqanchikta rikuchiptinchik, sunqunchikmanta saqra yuyaykunata urqhunapaq kallpachakuptinchik, espíritu santomanjina puriptinchik imaqa, wiñay kawsayta japʼisun.

16. ¿Imatataq espíritu santo yanapanawanchikpaq ruwananchik tiyan?

¹⁶ Dios espiritunta qunawanchikpaqqa, paymanta mañakunanchik tiyan. Chantapis Palabranta, mana saqispa ukhunchananchik tiyan (Pro. 2:1-6). Jehovap espíritu santonqa, qutuchakuypi yanapallantaq, chayrayku tantakuykunaman rinanchikpuni tiyan. Jinamanta, ‘imatachus espíritu qutuchakuykunaman nisqanta’, uyariyta munasqanchikta rikuchisun (Apo. 3:6). Chaypi yachakusqanchiktataq, llampʼu sunquwan kasukuna. Proverbios 1:23, yuyaychawanchik: “Cʼamiskayta casuychej. Khaway, espirituyta kancunaman jichʼaycamusaj”, nispa (Quechua de Cuzce). Arí, “Diosqa [espíritu santonta] qon payta kasojkunaman” (Hech. 5:32).

17. ¿Imaynatá Diospa bendicionninta japʼinchik? Juk kikinchaywan sutʼinchariy.

¹⁷ Diospa bendicionninta japʼinapaqqa, mayta kallpachakuna tiyan. Chaywanpis, Jehová llaqtanpi tukuy imata quwasqanchikqa, mana mayta llamkʼasqanchikraykullachu. Chayta sutʼincharinapaq, cuerponchikmanta, mikhusqanchikmanta ima, parlarina. Diosqa, tukuy laya mikhunata puquchipuwanchik, chayta mikhuspataq cuerponchikta kallpachanchik. Chaywanpis, imaynatachus ukhunchikta mikhusqanchik yanapasqantaqa, mana yachanchikchu, nitaq sutʼinchayta atisunmanchu. Astawanpis, mikhusqanchik cuerponchikta kallpachasqanta yachasqanchikrayku mikhunchik. Sumaqta mikhuspataq, astawan kallpachakunchik. Jehovapis, wiñay kawsayta japʼinanchikpaq imastachus ruwananchikta niwanchik, chayta juntʼanapaqtaq yanapawanchik. Arí, astawanqa Pay yanapawanchik, chayraykutaq jatunchananchik tiyan. Chaywanpis ñuqanchikqa, munayninta ruwananchik tiyan, ajinallamanta bendicionninta japʼisun (Ageo 2:18, 19).

18. ¿Imatataq ruwayta munanchik, imaraykutaq?

¹⁸ Chayrayku, Diospa llaqtanpi ruwanasninchikta tukuy sunquwan ruwana. Chayta sumaqmanta juntʼanapaqtaq, Diospa yanapayninta maskʼana (Mar. 11:23, 24). Imaraykuchus ‘maskʼaqqa tarin’ (Mat. 7:8). Akllasqa cristianosqa, “wiñay kawsay pilluta” janaqpachapi japʼinqanku (Sant. 1:12). “Waj ovejas[manta]” kaqkunataq —Abrahampa mirayninniqta Diospa bendicionninta japʼiyta munaqkuna— mayta kusikunqanku Michiqninku Jesucristo paykunaman niptin: “Jamuychej, Tataypa bendecisqasnin, japʼikapuychej qankunapaj qallariymantapacha wakichisqa reinota”, nispa (Juan 10:16; Mat. 25:34). Ajinamanta, “Tata Dios bendecin, chaykunaqa kay pachata herenciapaj japʼenqanku [...], chaypitaj wiñaypaj kawsanqanku” (Sal. 37:22, 29).

¿Imaynatá sutʼinchasunman?

• ¿Imaynatá chiqamanta kasukuq kasqanchikta rikuchisunman?

• ¿Imatá Dios bendecinawanchikpaq ruwananchik tiyan?

• ¿Imaynatá espíritu santop yanapayninta japʼinchik, chantá imaynamantataq yanapawanchik?

[Tapuykuna]

[9 paginapi dibujos/fotos]

Jacobqa, Jehovap bendicionninta japʼinanpaq, juk angelta mana ripuqta saqirqachu.

¿Kikillantataqchu kallpachakunchik?

[10 paginapi dibujo/foto]

Espíritu santoqa, Bezalelta, Oholiabtawan sumaqta ruwanankupaq yuyaycharqa