Kamachiqninchikqa mayta llamkʼachkallampuni
Kamachiqninchikqa mayta llamkʼachkallampuni
“Atipaspa llojserqa, atipanallampajtaj.” (APO. 6:2.)
1, 2. a) Rey Jesucristomanta, 1914 watamantapacha ruwasqanmanta ima, ¿imatataq Biblia nin? b) ¿Imatataq Cristo kamachinanpaq churasqa kasqanmantapacha ruwarqa?
JEHOVAQA, Jesusta 1914 watapi kamachiq kananpaq churarqa. Chaywanpis, Kamachiq Mesías, ¿imayna kasqantataq yuyanchik? ¿Juk kamachiq tiyananpi tiyasqa mana imata ruwaspalla Jallpʼapi qutuchakuyninta yuyarikuspalla qhawarisqantachu yuyanchik? Ajinata yuyaspaqa, yuyayninchikta tikrachina tiyan. Salmos, Apocalipsis librosqa, Cristo Kamachiqjina mayta llamkʼachkasqanta, caballonpi lluqʼasqa “atipaspa llojs[ichkasqanta], atipanallampajtaj”, “ñawpajman ri[chkasqanta]” rikuchinku (Apo. 6:2; Sal. 2:6-9; 45:1-4).
2 Jesús kamachinanpaq churasqa kasqanmanta ñawpaqta atipasqanqa, ‘sierpita saqra angelesnintawan’ atipasqan karqa. Arí, Cristoqa arcángel Migueljina, angelesninwan, Satanasta, supaykunasnintawan janaqpachamanta wikchʼumurqanku. Kunantaq Satanás, supaykunasnin ima, Jallpʼallapiña imatapis ruwanku (Apo. 12:7-9). Aswan qhipamantaq Jesús, “Tratomanta willaraj[jina]” Tatanwan, Diospa mana rikukuq templon imaynachus kachkasqanta qhawarqanku (Mal. 3:1). Chay qhawasqankupiqa, cristiano nichikuqkuna —mayqinchus “Jatun Babilonia[pi]” kaqkunamanta aswan juchayuq— achkha runasta wañuchichisqanmanta, suyuta kamachiqkunawan chhapukusqanrayku pʼinqaypi rikhurisqanmanta ima, may juchayuq rikhurirqa (Apo. 18:2, 3, 24).
Jallpʼapi kamachinta llimphuchan
3, 4. a) ¿Imatataq Cristo, Jehovap “willarajni[njina]” ruwarqa? b) Jehová, Jesús ima qhawariq jamuspa, ¿imatataq tarirqanku, pitataq Cristo qutuchakuymanta Umajina, Jallpʼapi kapuyninta qhawananpaq churarqa?
3 Jehová, “willarajn[in]” ima, mana rikukuq templomanta jawan kaq pationpi, nisunman Jallpʼapi qhawarisqankupiqa, chiqa cristianos, cristianos nichikuqkunawan mana kikinchu kasqankuta rikurqanku. Chaywanpis, kay akllasqa cristianosqa, —chayri ‘Levip wawasnin’— llimphuchasqa kayta necesitarqanku. Chaymanta Malaquías nirqa: “[Jehovaqa] tiyaykonqa levitasta, sacerdotesta ima sumajta llimphuchanampaj, imaynatachus ninapi qolqe metal, qoripis chʼuwachakun, ajinata. Chantá paykunaqa Tata Diosman ofrendankuta jaywayta atenqanku, maychus jaywanata jina”, nispa (Mal. 3:3, Qheshwa Biblia). Diosqa, kay akllasqa cristianosta “Tratomanta willaraj[niqta]” nisunman Jesucristoniqta llimphucharqa.
4 Chantapis Jesucristoqa, qutuchakuymanta chiqa sunqu akllasqa cristianos, tukuy hermanosman tiemponpi mikhunatajina qunankupaq mayta kallpachakuchkasqankuta rikurqa. Paykunaqa, kay revistaniqta 1879 watamantapacha Reinomanta chiqa yachachiykunata yachachichkarqanku, chaypaqtaq ni ima jarkʼarqachu. Jesusqa, “kay pachaj tukukuynin[pi]” “chayamuspa” allin kamachi, kamachi masisninman “horampi mikhunata jaywa[chkaqta]” taripananta nirqa. Chantá, kusikuyniyuq kananta, “tukuy kapuyninta qhawanampaj” churananta ima nillarqataq (Mat. 24:3, 45-47). Chaytaq juntʼakurqapuni. Cristoqa, qutuchakuymanta Uma kasqanrayku, ‘allin kamachi yuyayniyuqta’ Jallpʼapi tukuy kapuyninta qhawananpaq churarqa. Chantapis payqa, Diospa Llaqtanta Kamachiqkunaniqta, akllasqa “kamachis[ta]”, “waj ovejas[ta]” ima, yanapanan (Juan 10:16).
‘Kay pachap puquyninta’ cosechakun
5. Juan musquypijina rikusqanpi, ¿imatataq Kamachiq Mesías ruwachkarqa?
5 Apóstol Juanqa, Cristo Kamachiq Mesiasjina imatawanchus “Señorpa pʼunchaynimpi” ruwananta musquypijina rikurqa. Chaytaq, 1914 watapi kamachinanpaq churasqa kasqantawan qallarirqa. Juan qillqarqa: “Qhawashajtillaypuni, uj yuraj phuyu rikhurerqa, chay phuyu patapitaj Runaj Churinman rijchʼakoj tiyasqa kasharqa. Umampi qori pilluyoj karqa, makimpitaj filochasqa hoseyoj” ruthunanpaq wakichisqa kachkarqa, nispa (Apo. 1:10; 14:14). Chantapis, juk ángel, Reyman jinata nichkaqta uyarirqa: “Hoseykita japʼispa ruthuypacha, imaraykuchus [...], kay pachaj poqoynin[qa] ñapis poqosqaña kashan”, nispa (Apo. 14:15, 16).
6. Jesús sutʼinchasqanmanjina, ¿imataq trigo chawpipi cosecha chayamunankama wiñanan karqa?
6 “Kay pachaj poqoynintaj” nisqa rimaykunaqa, trigomanta, cizaña qhuramanta ima, rikchʼanachinata yuyarichiwanchik. Jesusqa, chay rikchʼanachinapi sumaq trigo mujuta tarpuq runawan kikinchakun, chay runaqa cosechapi sumaqta uqhariyta munarqa. Chay trigoqa, “reinoj wawasnin[wan]” kikinchakun, nisunman Cristowan kamachinankupaq akllasqa cristianoswan. Chaywanpis, Jesusqa, enemigon “Kuraj Supay” tarpusqanman, tutanpi cizaña qhurata tarpuykusqanta nirqa, chaykunataq “Kuraj Supaypa wawasnin” kanku. Tarpuq runaqa, kamachisninman cosecha tiempokama nisunman “kay pachaj tukukuynin[kama]” trigo, cizaña qhurawan khuska wiñaqta saqinallankuta kamachirqa. Chaymantataq angelesninta, trigomanta, cizaña qhurata tʼiranankupaq kachanan karqa (Mat. 13:24-30, 36-41).
7. ¿Imaynatataq Cristo ‘kay pachap puquyninta’ cosechachkan?
7 Cristoqa, Juan musquypijina rikusqanmanjina, Jallpʼantinpi ‘kay pachap puquyninta’ cosechachkan. Ñawpaq kaq cosechapiqa, 144.000 “reinoj wawasnin[manta]” puchuqkunata chayri Jesuspa rikchʼanachinanmanta “trigota” tantakun. Chiqa cristianos, llulla cristianoswan mana kikinchu kasqankuqa, ñawpaq jatun maqanakuypa tukukuyninmantapacha aswan sutʼi rikukurqa. Chaytaq, iskay kaq cosecha qallarinanpaq yanaparqa, chaypitaq wak ovejasta tantakun. Chay cristianosqa, mana “reinoj wawasnin[chu]” kanku, manaqa ‘may chhika runas’, “tukuy nacionesmanta, [ayllusmanta], [...] tukuy parlaymanta” ima. Paykunataq, Diospa Reinon urapi kanankumanta mayta kusikunku, chaypitaq Jesús, 144.000 “Diospa ayllun[wan]”, janaqpachamanta kamachimunqanku (Apo. 7:9, 10; Dan. 7:13, 14, 18).
Qutuchakuykunata kamachin
8, 9. a) ¿Imaynatá Cristo, mana qutuchakuyllatachu, manaqa sapa jukpa ruwasqanta qhawasqanta yachanchik? b) Kay 26 paginapi fotota rikusqanchikmanjina, ¿“Satanasmanta pakasqa imas[nin]” mayqinkunataq kanku, imarayku qhisachana tiyan?
8 Tawa yachaqanapiqa, Cristo ñawpa siglopi imaynatachus sapa qutuchakuy Diosta yupaychachkasqankuta sumaqta qhawasqanta yachakurqanchik. Chaywanpis, kunan tiempopiqa, Kamachiqjina, ‘tukuy atiyta janaq pachapi, kay pachapipis’ japʼin. Chayrayku Kamachiqninchikqa, qutuchakuykunata, ancianosta ima, tuta pʼunchay yanapachkan (Mat. 28:18; Col. 1:18). Jehovaqa, Jesusta, ‘tukuy imapi [akllasqa cristianosmanta qutuchakuykunap] Uman kananpaq’ churarqa (Efe. 1:22). Chayrayku, Jehovamanta sutʼinchaqkunap pachak waranqamanta kuraq qutuchakuykunasninpi, imachus kasqanta sumaqta yachan.
9 Jesusqa, ñawpa tiempopi Tiatira qutuchakuyman nirqa: “Diospa Churin, pejpatachus ñawisnin nina larway jina kanku, [...] chayqa kayta nin: Noqa rikuni [chayri yachani] ruwasqasniykita”, nispa (Apo. 2:18, 19). Sumaqta qhawasqanrayku, chay qutuchakuymanta wakin hermanos mana allin ruwaykunapi, khuchichakuypi ima, kawsachkasqankuta rikurqa, chayraykutaq kʼamirirqa: “Yacha[ychik] noqa rejsisqayta runaj yuyayninta, sonqontawan. Sapa ujniykichejmampis ruwasqaykichejman jina qopullasqaykichejtaj”, nispa (Apo. 2:23). Kay rimaykunaqa, qutuchakuyta, imatachus sapa juk ruwasqanta ima, sumaqta qhawasqanta rikuchin. Chaywanpis Jesusqa, Tiatira qutuchakuymanta wakin cristianosman, “Satanasmanta pakasqa imas[ninta]” mana riqsisqankurayku, allinta ruwasqankuta nirqa (Apo. 2:24). Kunan tiempopipis, “Satanasmanta pakasqa imas[ninwan]” sunqunkuta kusichiyta qhisachaq discipulosninta, allinpaq qhawan. Satanaspa imasninqa, Internetpi, maqanakuykunamanta videojuegospi chayri runas saqra ruwaykuna allillan kasqanta yuyasqankupi kachkan. Jesusqa, discipulosnin, payta tukuy imapi kasukunankupaq, mayta kallpachakusqankuta, tukuy atisqankutataq ruwasqankuta rikuspa, ¡mayta kusikun!
10. ¿Ima kikinchaytaq ancianos Cristop kamachiyninpi kachkasqankuta rikuchin, imatataq paykuna sumaqta yachananku tiyan?
10 Jesusqa, ancianosniqta munakuywan qutuchakuykunata kamachin (Efe. 4:8, 11, 12). Ñawpa siglopi ancianostaqa, Apocalipsis libropi Cristop paña makinpi chʼaskaswan kikinchakun (Apo. 1:16, 20). Chay tiempomanta ancianosqa, akllasqa cristianos karqanku. Kay tiempopi, ancianos yaqha tukuyninku wak ovejasmanta kaptinkupis, Cristop paña makillanpitaq —kamachiynin urapi— kachkasqankuta nisunman. Imaptinchus paykunaqa, Diosmanta mañakuywan, espíritu santop yanapayninwan ima, churasqas kanku (Hech. 20:28). Ancianosqa, Jesús, akllasqa cristianosmanta juk qutuniqta, nisunman Diospa Llaqtanta Kamachiqkunaniqta, tukuy cristianosta kamachichkasqanta, yachanku (Hechos 15:6, 28-30, ñawiriy).
“Jamuy Señor Jesús”
11. ¿Imaraykutaq Kamachiqninchik usqhayllata jamunanta suyakuchkanchik?
11 Jesusqa, Juanman musquypijina willasqanpi, achkha kutista tumpamantawan jamunanta nirqa (Apo. 2:16; 3:11; 22:7, 20). Chaytaq, Jesús Jatun Babiloniata, Satanaspa pachanmanta puchuqkunata ima, chinkachiq jamunanmanta parlachkasqanta rikuchin (2 Tes. 1:7, 8). Apóstol Juanqa, tʼukunapaqjina rikusqanta juntʼakuqta rikuyta munaspa, nirqa: “Ajina kachun. Arí, jamuy Señor Jesús”, nispa. Ñuqanchikpis, tukukuy pʼunchaykunapi kawsakuspa, Kamachiqninchik Diospa Reinonmanta kamachiqjina, Tatanpa kamachiyninta jatunchananpaq, sutinta llimphuchananpaq ima, usqhayllata jamunanta suyakuchkanchik.
12. ¿Imatataq Cristo chinkachiq wayras niraq kacharisqa kachkaptin ruwanqa?
12 Jesús, Satanaspa saqra pachanpa contranpi niraq jamuchaptinqa, Jallpʼapi qhipakuq akllasqa cristianos sellasqas kananku tiyan, chay sellonkuqa wiñaypaq kanqa. Bibliaqa, 144.000 kaqkuna tukuyninku sellasqa kaptinku, Satanaspa saqra pachanta chinkachinanpaq ‘wayras’, kacharisqa kananta nin (Apo. 7:1-4).
13. ¿Imaynatataq Cristo kutimuyninta “manchay ñakʼariy[pa]” qallariyninpi sutʼita rikuchinqa?
13 Runasqa, kay 1914 watapi Cristo “kutimusqanta, NM” mana repararqankuchu (2 Ped. 3:3, 4). Chaywanpis Jesusqa, tumpamantawan chayta sutʼita rikuchinqa. ¿Imaynamantá? Kay saqra pachap imasninta Diospa nisqanmanjina chinkachispa. Arí, “Diosta mana kasoj juchasapa runa[ta]” nisunman iglesiasta kamachiqkunata chinkachisqantawanqa, ‘jamuynin [chayri kutimuynin] jatun kayninpa kʼanchaynin’, sutʼi rikukunqa (2 Tesalonicenses 2:3, 8, ñawiriy). Jinamanta Jesusqa, Jehová, Jueztajina churasqanta rikuchinqa (2 Timoteo 4:1, ñawiriy). Chantapis, Jatun Babiloniapi kaqkunamanta, ñawpaqtaqa cristiano nichikuqkunata chinkachinqa mayqinchus aswan juchayuq. Chaymantataq, tukuy llulla religionesta chinkachinqa. Chaypaqtaq Jehovaqa, suyusta kamachiqkuna juk yuyaylla, phisu warmita, nisunman Babiloniata, chinkachinankupaq yuyaychanqa (Apo. 17:15-18). Chayqa, “manchay ñakʼariy[pa]” qallariynin kanqa (Mat. 24:21).
14. a) ¿Imaraykutaq manchay ñakʼariy pʼunchaykuna pisiyachisqa kanqa? b) ¿Imataq “Runaj Churinpa señalnin” kaptin Jehovap llaqtanpaq kanqa?
14 Jesusqa, Jallpʼapi qhipakuq ‘akllasqa’ cristianosrayku, jatun ñakʼariy pʼunchaykuna “pisiyachisqa” kananta nirqa (Mat. 24:22). Jehovaqa, kamachiqkuna llulla religionpa contranpi sayariptinku, jallpʼapi qhipakuq akllasqa cristianosta, wak ovejasta ima, chinkachinankuta mana saqinqachu. Jesusqa, ‘ñakʼariy tiempo tukukuptinkama’ intipi, killapi, chʼaskaspi ima, señales kananta nirqa, “chaypacha[taq] Runaj Churimpa señalnin cielopi rikhurenqa”. Runasqa, chayta rikuspa “[mayta] waqanqanku”. Chaywanpis, akllasqa cristianos pikunachus janaqpachapi kawsakuyta suyakunku, Jallpʼapi kawsakuyta suyakuqkuna ima, mana jinapichu rikukunqanku. Astawanqa, Jesuspa nisqanmanjina ruwanqanku, pay nirqa: “Sayaykukuychej umaykichejta oqharispa, imaraykuchus qayllamushanña kacharisqa kanaykichej pʼunchayqa”, nispa (Mat. 24:29, 30; Luc. 21:25-28).
15. ¿Imatataq Cristo jamuspa ruwanqa?
15 Chaywanpis, runap Churin Jesucristoqa, atipayninta niraq tukuchachkaptin, nisqanmanjina ruwanqa, pay nirqa: “Maypachachus Runaj Churenqa Rey jina jatun kaynimpa kʼanchaynimpi tukuy angelesninwan jamonqa chaypacha, lliphipej kamachina tiyanampi tiyaykukonqa. Tukuynejmantataj tukuy laya runas ñawpaqenman tantakamonqanku. Paytaj ujkunata ujkunamanta tʼaqanqa, imaynatachus michejpis ovejasta cabrasmanta wajman tʼaqan, ajinata. Ovejasta pañanman churanqa, cabrastataj lloqʼenman”, nispa (Mat. 25:31-33). Kay rimaykunaqa, Cristo Juezjina “tukuynejmanta [...] tukuy laya runas[ta]” iskay qutusman tʼaqananta rikuchin. Juk qutuqa, Jallpʼapi akllasqa cristianosta yanapaq “ovejas” kanku. Juknintaq, ‘cabras’ kanku “pikunachus Señorninchej Jesucristoj evangeliontapis mana kas[ukunkuchu]” (2 Tes. 1:7, 8). Ovejasqa, nisunman “cheqan kajta ruwajkuna[qa]”, Jallpʼapi “wiñay kawsay[ta]” japʼinqanku. Cabrastaq, “wiñay chinkayman, NM” rinqanku (Mat. 25:34, 40, 41, 45, 46).
Jesusqa, atipaspa lluqsin
16. ¿Imaynatataq Kamachiqninchik atipaspa lluqsinqa?
16 Akllasqa cristianos reyes, sacerdotes ima, kanankupaq tukuyninku sellasqa kaptinku, wak ovejastaq Jesuspa pañanpi salvasqas kanankupaq kachkaptinku, Kamachiqninchikqa, ñawpaqllamanpuni rinqa “atipanallampajtaj” (Apo. 5:9, 10; 6:2). Arí, Jesusqa, may atiyniyuq achkha angelesninwan —kawsarisqa akllasqa hermanosninwan ima—, Satanaspa pachanmanta politicosta, militaresta, ranqhaqkunata ima, chinkachinqa (Apo. 2:26, 27; 19:11-21). Jesusqa, kay saqra pachata chinkachispa atipaspa lluqsinqa. Chantá, Satanasta, supaykunasninta ima, chinkay chinkay ukhuman wisqʼaykunqa, chaymantataq waranqa watasta mana lluqsimuyta atinqankuchu (Apo. 20:1-3).
17. ¿Maymantaq Cristo Waranqa Watas Kamachiyninpi wak ovejasninta pusanqa, imatataq ruwananchik tiyan?
17 Apóstol Juanqa, “may chhika runas[man]ta” kaqkuna, jatun ñakʼariymanta kawsachkaq lluqsisqankumanta nirqa: “Kamachina tiyanaj ñawpaqempi kashaj Corderoqa paykunata michenqa, kawsaj yaku juturisninmantaj pusanqa”, nispa (Apo. 7:9, 17). Arí, Cristoqa, Diospa Reinon Waranqa Watasta Kamachiyninpi, nisqanta kasukuq wak ovejasninta kamachillanqapuni, wiñay kawsaymantaq pusanqa (Juan 10:16, 26-28, ñawiriy). Chayrayku, musuq pachaman pusawaqninchik Kamachiqninchikta kasukunallapuni.
Yuyarinapaq
• ¿Imatataq Cristo kamachiq kananpaq churasqa kasqantawan ruwarqa?
• ¿Pikunaniqtataq Jesús qutuchakuykunata yanapan?
• ¿Imastataq Kamachiqninchik Cristo jamuspa ruwanqa?
• ¿Imaynatá Cristo musuq pachapi yanapallawasunpuni?
[Tapuykuna]
[29 paginapi dibujo/foto]
Jesusqa, Satanaspa saqra pachanta chinkachispa kutimuyninta sutʼita rikuchinqa