Diospa llaqtanpi mana saykʼuspa llamkʼani

Vernon Zubko kawsayninmanta willariwanchik

CANADÁ suyumanta, Saskatchewan nisqa llaqtapi, Stenen nisqa llaqtita kachkan. Ñuqaqa, chay llaqtitap qayllanpi juk campo wasisitupi wiñakurqani. Tatay Fredwan, mamay Adellawanqa, ñuqata, kuraqniy Aurelliata, sullkʼasniy Alvin, Allegra, Daryl imata uywanawaykupaq, mayta kallpachakurqanku. Jehovata yupaychanaykupaq yachachiwasqaykumantaqa, kunankama agradecekuyku.

Tatayqa akllasqa cristiano karqa, mana manchachikuspataq Diosmanta willaq. Familianta uywananpaq mayta llamkʼaq, mayllapipis Jehovamanta sutʼinchaqjina riqsichikuq. Runasman tukuy tiempo Bibliamanta parlaq. Mana manchachikuspa kʼajaywan willasqantaqa, kunankama yuyarikuni. Payqa, ajinata niwaq: “Jehovap llaqtanpi mana saykʼuspa llamkʼanki chayqa, mana ima chʼampaymanpis chayankichu”, nispa.

Stenen llaqtitapi, qayllan llaqtitaspi ima, willallaqpuni kayku. Chaywanpis ñuqaqa, mana willayta atillaqchu kani. Imaraykuchus, sapa llaqtitapi machu machu yuqallas, juchʼuy wawasta turiyawaq kayku. Juk kutiqa, pusaq watitayuq kachkaptiy, juk esquinapi Torremanta Qhawaq, ¡Despertad! revistata ima, runasman jaywanaypaq sayasqa kachkarqani. Chayllapi, machu machu yuqallas muyuykuwarqanku. Musuq sombreroyta qhichuwaspataq posteman churaykurqanku. Kusiyniypaqqa, juk kuraq hermano qhawamuchkawasqa. Chimpaykamuwaspataq niwarqa: “Vern, ¿turiyachkasunkuchu?”, nispa. Niwaptinkama yuqallasqa chinkarparirqanku. Llakiywan chayta yuyarikuni, chaywanpis chayqa, callepi willachkaspa mana titilla qhipakunayta yachachiwarqa. Wawa kayniypi yachakusqayqa, wasimanta wasi mana manchachikuspa willanaypaq yanapawarqa.

Wawqiy Alvinwanqa, kay 1951 mayo killapi bautizakurqayku. Chaypaqqa 13 watayuq kachkarqani. Jack Nathan bautizakuchkaptiyku umallirichisqanta, kunankama yuyarikuni. Payqa, Jehovamanta sapa killa willanaykuta niwarqayku. * Familiaykupiqa, precursor kayta, may sumaqpaq qhawaq kayku. Chayrayku, 1958 watapi yachaywasimanta lluqsiytawan, Winnipeg (Manitoba) llaqtaman precursorjina llamkʼanaypaq ripurqani. Tatasniyqa, negocionkupi maderasta llaqllaspa llamkʼanayta munaspapis, precursor kanayta astawan munarqanku. Chayrayku, Winnipegman ripuchkaptiy, kusisqa kachkarqanku.

Wak llaqtaman ripuni, warmichakunitaq

Kay 1959 watapi, sucursalqa Quebecman willaq riyta munaqkunata waqyarirqa. Maypichus, willaypi may chhika llamkʼana kachkarqa. Ñuqaqa, Montreal llaqtaman precursorjina  llamkʼanaypaq ripurqani. Kunanqa, wak laya kawsayman, francés qallutataq yachakunay karqa. Qutuchakuykunata waturiq hermanoqa, kayta niwarqa: “Ama jaykʼaqpis niychu: ‘Maypichus kachkarqani chaypiqa, mana jinatachu ruwaq kayku’”, nispa. Chay yuyaychawasqanqa, mayta yanapawarqa (1 Cor. 9:22, 23).

Quebecman chayaspaqa, sapallay precursorjina llamkʼachkarqani. Chaywanpis, 1961 watamanta febrero killapi, juk sumaq hermanawan casarakurqani. Sutikurqataq Shirley Turcotte. Paytaqa, Winnipeg llaqtapi kachkaptiy riqsirqani. Paypa familianqa, Jehovata yupaychaqkunallataq karqanku. Chaypachaqa, warmiy mayjinatapunichus sunquchanawanta, kallpachanawanta ima, mana yacharqanichu.

Península de Gaspé nisqapi willamuyku

Casarakusqaykumanta iskay watanmanqa, precursores especiales sutichasqa karqayku. Rimouski (Quebec) llaqtamantaq willaq rirqayku. Paray tiempo chayamusqantawan, sucursalqa península de Gaspé nisqapi, willamunaykuta niwarqayku. Chayqa, Canadamanta inti lluqsimuynin ladonpi kachkan. Bibliamanta yachachiykunata, mujutajina tukuy atisqaykuta tarpunayku karqa (Ecl. 11:6). Chayrayku, 1.000 kuraq revistasta, yaqha 400 librosta, juk chhika mikhunata, pʼachatawan ima autoykuman juntʼaykuchirqayku. Chantataq llaqtamanta llaqta, juk killa juntʼata willamurqayku. Jinapis, runasman mana uyarinawaykuta, publicacionesta mana japʼikunankuta ima, radioniqta kamachisqanku. Chaywanpis, pantasqata entiendesqankurayku, runasqa sumaqta uyariwarqayku.

Chay tiempopaqqa, Quebecmanta wakin llaqtaspi willakunanta saqichkarqankuña. Chaywanpis, chaymanta manaraq unaychu karqa. Chayrayku policiaqa, sapa kuti mana willanaykuta niwaq kayku. Juk pʼunchayqa, juk llaqtapi wasimanta wasi willachkaptiyku, juk policía chimpaykamuwarqayku, policiamantaq pusawarqayku. Policiapitaq chay llaqtamanta abogado mana willanaykuta kamachisqanta rikuchiwarqayku. Ñuqaykuqa, policiaspa kamachiqnin mana chaypi kasqanrayku, abogadoman, Canadamanta sucursal jaywawasqayku cartata rikuchirqayku. Mayqinchus, willanaykupaq derechoyuq kasqaykuta sutʼinchachkarqa. Paytaq ñawiriytawan kayta niwarqayku: “Mana ima chʼampaytapis munachkanichu. Cura, chayta kamachinaypaq tanqawarqa”, nispa. Ñuqaykuqa, kamachiqkuna willanaykuta saqiwasqaykuta runasman rikuchiyta munarqayku. Chayrayku, maypichus willachkarqayku chayman kutispa, willallarqaykupuni.

Qʼayantinqa, policiaspa kamachiqninkuwan parlaq rirqayku. Paytaq abogadopaq mayta phiñakurqa. Chayrayku, telefononiqta waqyarispa sumaqta kʼamiykurqa. Chantá, niwarqayku: “Ima chʼampaypis kaptin, waqyarimullawankichik”, nispa. Runasqa, francés qalluta pisita yachaptiykupis, may kʼachas ñuqaykuwan karqanku. Chaywanpis, sunquyku ukhupi tapukuq kayku: “¿Maykʼaqllapis Jehovap kamachisninman tukunqankuchu?”, nispa. Chaytaqa, watasninman península de Gaspé nisqaman, Tantakunapaq Wasista ruwaq kutiptiyku yacharqayku. Kusikunaykupaqjina, chay kutipi willasqayku runasmanta achkhas, Jehovamanta sutʼinchaqkunaman tukusqanku. Arí, chiqamantapuni Jehovalla wiñachiqqa (1 Cor. 3:6, 7).

May munasqa tʼinkata japʼirqayku

Kay 1970 watapi, wawitayku Lisa nacekurqa. Payqa, Jehovamanta juk tʼinkajina karqa, may kusiytataq apamuwarqayku. Warmiy Shirley, waway Lisa ima, Tantakunapaq Wasista ruwaypi ñuqawan khuska llamkʼarqanku. Lisaqa, yachaywasimanta lluqsiytawan, jinata niwarqayku: “Qamkunaqa, ñuqarayku precursor kayta saqirqankichik, kunanqa ñuqa precursora kasaq”, nispa. Chaymantapacha, 20 wataña pasan, kunankamataq qusan Sylvainwan khuska precursoresllapuni kanku.  Chantapis, Diosta yupaychanapaq wasista ruwaypi yanapakunankupaq, wak suyusmanpis rirqanku. Ñuqaykuqa, Diospaq astawan llamkʼayta munasqaykurayku, maychus kapuwasqallaykuwan kusisqas kawsakuyku. Waway Lisa, precursora kayta qallarichkaspa nisqantaqa, kunankama yuyarikuni. Chayrayku, 2001 watamantapacha watiqmanta precursor kayta qallarirqani. Chayqa, Jehovapi atienekunaypaq, kapuwasqallanwan sunqu juntʼasqa kawsakunaypaq ima, yanapawan.

Diosta yupaychanapaq wasista ruwaypiqa, munakuyniyuq, chiqa sunqutaq kana

Jehová, llaqtanpi ima llamkʼaytapis quwaptinchik, sumaqta juntʼanchik chayqa, payqa mayta tʼinkawanchik. Kunanqa, Quebecpi, wak lugarespi ima, Tantakunapaq Wasis ruwakunanpaq, Comité Regional de Construcción nisqapi yanapakuchkani. Chay llamkʼaytaqa, may jatunpaq qhawani.

Tantakunapaq Wasista ruwaypi, yanapakuq hermanosmanta wakinqa, ichapis mana sumaq umallirichiqchu kanku, chaywanpis llamkʼanankupaq wapus kanku. Ruwanasninkutapis tukuy sunqu juntʼanku. Arí, Jehovaqa, may kʼacha wasista ruwanankupaq yanapan.

Wakinkuna tapuwanku: “Tantakunapaq Wasista ruwaypi yanapakunapaq, ¿ima kʼacha kaykunayuqtaq kanay tiyan?”, nispa. Ñuqataq kawsayniypi rikusqaymanjina, kayta kutichini: “Jehovata, Churinta, tukuy hermanosta ima, munakuna tiyan (1 Cor. 16:14). Chantapis, chiqa sunqu kana. Imaraykuchus chiqa sunqu kaspaqa, imapis munayninchikmanjina mana ruwakuptin, Diospa llaqtallanpipuni kasunchik, aswan qhipaman yanapakuna kaptintaq, yanapakullasunpuni”, nispa.

Jehovaman may agradecesqa kani

Tatayqa, 1985 watapi wañupurqa. Chaywanpis, Jehovap llaqtanpi mana saykʼuspa llamkʼanayta niwasqanqa, umallaypipuni kachkan. Paypis wak akllasqa cristianoswan khuska, janaqpachapi maytachá llamkʼachkallanpuni (Apo. 14:13). Mamayqa, 97 watayuqña. Juk unquyniyuq kasqanraykutaq manaña allinta parlayta atinchu. Chaywanpis, Bibliataqa sumaqta riqsikuchkan. Qillqamuwasqayku cartaspiqa, Jehovapaq llamkʼanallaykupaqpuni, mayta kallpachawayku. Hermanosniywanqa, tatamamayku mayta munakuwasqaykurayku, may agradecesqas kayku.

Chantapis, Jehovaman, may sumaq warmita, compañeray kananpaq quwasqanrayku, may agradecesqa kachkani. Warmiy Shirleyqa, mamanpa nisqanta yuyarikullanpuni. Pay nirqa: “Qusaykiqa, Diospa llaqtanpi, achkha ruwanasniyuq kanqa. Qamtaq mana tukuy tiempochu paywan kayta atinki”, nispa. Casarakusqaykumantaqa, 49 wataña kachkan. Chay kutiqa, Jehovapaq llamkʼaspa khuska machuyanaykuta ninakurqayku. Musuq pachaman kawsachkaq yaykuspataq khuskallapuni Diospaq wiñaypaq llamkʼaspa, waynayanaykuta chayri sipasyanaykuta ninakurqayku. Arí, tukuy kawsayniykupi “astawan astawan llancʼaspapuni Señorpa obranpi” kayku (1 Cor. 15:58, Mosoj Testamento, 1985). Jehovataq ni jaykʼaq qunqapuwaykuchu, nitaq imatapis pisichiwaykuchu.

[Sutʼinchaynin]

[31 paginapi dibujo/foto]

“Ñuqaykuqa, Diospaq astawan llamkʼayta munasqaykurayku, maychus kapuwasqallaykuwan kusisqas kawsakuyku”