Ñawiriqkunapta tapuyninku

Jesús nirqa: “Imaynachus janaj pachapi kashaj Tataykichejqa cheqan [chayri juntʼa], ajinallatataj qankunapis kaychej”, nispa (Mat. 5:48). ¿Imaynatá juchasapa runas kaspapis chay nisqanmanjina ruwasunman?

Kay tapuyman kutichinapaqqa, Bibliapi “juntʼa” rimayta imapaqchus uqharisqanta ukhuncharina. Chaywanpis wakin kutiqa, “juntʼa” nispa, mana tukuy imapipuni juntʼa kaymantachu parlan. Imaptinchus, Jehovalla tukuy imapi juntʼaqa. Runas, wak imaspis, mana tukuy imapichu juntʼa kanku. Chayrayku, hebreo, griego qalluspi “juntʼa” rimayqa, imachus cabal, wiñay tukusqa, chayri mana imanasqa kasqanta niyta munan.

Qallariypiqa, Adanwan Evawan, kawsayninkupi, Diosta yupaychaypi ima, llimphu karqanku, cuerponkupis juntʼa karqa. Imaptinchus Diospa kamachisqanmanjinapuni ruwarqanku. Chaywanpis, mana kasukusqankurayku, manaña Diospa nisqanmanjinachu kawsarqanku, juntʼa kawsayninkutataq chinkachirqanku, wawasninkupis juchasapas paqarikurqanku. Ajinamanta Adanqa, juchata, pantayta, wañuyta ima, tukuyman chayachiwarqanchik (Rom. 5:12).

Jesusqa, Urqupi yachachichkaspa, juchasapa runas, juntʼa kayta atisqankuta sutʼincharqa, chaywanpis mana Diosjinachu. Umallirichichkaspaqa, imachus chiqan chayri juntʼa munakuy kasqanta sutʼincharqa. Chay munakuytaqa, Dios, runasman rikuchin. Jesús nirqa: “Enemigosniykichejta munakuychej, chejnispa qankunata qhatiykachajkunapajtaj Diosmanta mañapuychej. Ajinamanta, janaj pachapi kashaj Tataykichejpa wawasnin kankichej. Payqa sajra runaspaj, kʼacha runaspajpis intinta llojsichimun. Kikillantataj parachimun tukuypaj, allin runaspaj, sajra runaspaj ima”, nispa (Mat. 5:44, 45). Jesuspa discipulosnin chayjina munakuyta rikuchispaqa, Diosjina munakusqankuta rikuchinku.

Kunan tiempopiqa, Jehovamanta sutʼinchaqkuna, runamasinchikman tukuyniqpi chayjina munakuyta rikuchinapaq kallpachakunchik. Sutʼincharinapaq, tukuy runasta, chiqa kaqta yachakunankupaq yanapanchik, ima layamantapis, ima religionmantapis, maymantapis kachunku. Chantapis, Bibliamanta qanchis junumanta kuraq runasman, 236 suyuspi yachachichkanchik.

Jesús tapurqa: “Munakojkunallatachus munakunkichej chayqa, ima tʼinkayojtaj kawajchejri? Manachu impuesto cobrajkunapis kikillantataj ruwanku? Wawqesnillaykichejtachus napaykunkichej chayqa, ujkunamanta ima aswan allintataj ruwankichejri? Manachu mana judiokunapis kikillantataj ruwanku?”, nispa (Mat. 5:46, 47). Chiqa cristianosqa, mana allinpaq qhawasqa runasllatachu chayri wakin laya runasllatachu munakunku. Nitaq paykunata munakuqkunallatachu. Astawanqa, wakchasta, unqusqasta, waynasta, sipaskunata, machitusta ima, yanapanku. Ajinamanta, mana tukuy imapichu juntʼa kaspapis, Jehovajina munakuyninkuta rikuchinku.

¿Maykʼaqllapis watiqmanta juntʼa runas kasunchu? Arí. Kasukuqkunaqa, Jesuspa wañuyninpi iñiptinku, paypa Waranqa Watasta kamachiyninpi, juntʼa runasman tukunqanku. Imaptinchus Diospa churinqa “Kuraj Supaypa ruwasqasninta phirin[qa]” (1 Juan 3:8).