PILLAPIS yanapawaptinchik, ¿imaynatá agradecekunchik? Israelmanta soldadospa kuraqkunasninqa, Jehová madianitasta atipanankupaq yanapasqanmanta mayta agradecekurqanku. Niraq madianitasta maqanakupi atipachkaspaqa, Baal—Peorta yupaychaspa juchallikurqanku. Chaywanpis, Jehová atipanankupaq yanaparqa. Madianitasmanta qhichusqankutataq israelmanta 12.000 soldados, tukuy israelitas ima, rakʼinakurqanku. Dios nisqanmanjinataq soldadosqa, japʼisqankumanta wakinta sacerdotesman qurqanku, wakin israelitastaq levitasman (Núm. 31:1-5, 25-30).

Chaywanpis, soldadospa kuraqkunasninkuqa, astawan quyta munarqanku, Moisesmantaq jinata nirqanku: “Noqayku kamachisniykeqa soldadosniykuta sumajta yupayku; mana ujpis faltanchu”, nispa. Chayrayku, qurita, qorimanta ruwasqa kaqkunata ima, Jehovaman qurqanku, tukuynintaq 190 kilos (500 libras) ruwakurqa (Núm. 31:49-54).

 Kunan tiempopipis Diospa kamachisninqa, Jehovaman tukuy imata quwasqanchikmanta, agradecekusqanchikta rikuchiyta munanchik. Chaytataq mana ñuqallanchikchu ruwanchik. Sutʼincharinapaq, autota apaykachaq runamanta parlarina. Payqa, 2009 watapi Italia suyumanta Bolonia llaqtapi achkha suyusmanta jatun tantakuyman, juk qutu Jehovamanta sutʼinchaqkunata rinankupaq, kutipunankupaq ima, aparqa. Hermanosqa, chay runa may kʼacha kasqanrayku, agradecekusqankuta rikuchinankupaq, juk tarjetata, qullqita, ¿Imatapunitaq Biblia yachachin? nisqa librota ima, jaywarqanku. Chaywanpis chay runaqa, ajinata nirqa: “Tarjetamanta, libromantawanqa, mayta agradecekuykichik, chaywanpis, qullqitaqa kutichipullasqaykichik, imaraykuchus ruwasqaykichikta chay qullqiwan yanapayta munani. Mana Jehovamanta sutʼinchaqchu kaspapis, yanapayta munaykichik, imaraykuchus qamkunaqa, runasta munakusqaykichikrayku willankichik”, nispa.

Jehovaman tukuy imata quwasqanchikmanta agradecekunapaqqa, Jehovamanta sutʼinchaqkuna pachantinpi willanankupaq, qullqita churaspa yanapasunman (Mat. 24:14). Kay urapi rikhuriq recuadropi imaynasmantachus yanapayta atisqanchikta rikuchichkan.